ESHTA 4:11 - Jinghpaw Common Language Bible 2009

¹¹ “Numsha lasha kadai rai ti mung hkawhkam wa n shaga ai sha kata wang de hkawhkam wa hpang de shang ai rai yang, dai wa si lu na rai nga ai. Dai gaw tara rai nga ai hpe hkawhkam wa a hpaji jaw ni kaw nna mungdaw ni de nga ai masha ni de du hkra, masha shagu dai lam hpe chye da nga ma ai. Ndai lam langai mi hku nna sha, ndai tara hpe koi yen lu na lam nga nga ai: dai gaw hkawhkam wa shi a ja sumdoi ladawn ai rai yang, marai langai ngai asak jahkrung da ai hkrum nga ai. Ngai rai ti mung, hkawhkam wa ngai hpe shaga ai gaw shata mi sha naw rai nga ai.”

Jinghpaw Hanson Version Bible

¹¹ “Numsha, lasha, kadai rai timung, hkawhkam n shaga ai, kata wang e hkawhkam hpang de shang yang, hkawhkam wa gaw, dai wa hpe jahkrung da na matu, shi a ja sumdoi n ladawn ya yang, teng teng si ai hkrum na lam langai sha nga ai gaw, hkawhkam a ali ama ni hte, mungdaw amyu masha ni mahkra chye shajang ma ai: ngai mung, ya sumshi ya tup hkawhkam hpang de shang na, shaga hkrum ai n rai,” ngu nna ga htang dat wu ai.

ESHTA 4:11 ပူးပေါင်းရင်းမြစ်များ

ESHTA 1:19

Washti hpe hkawhkam wa a man e galoi mung bai n dawng pru lu nu ga, dai lam hpe Madu hkawhkam ra sharawng ai rai yang, hkawhkam ahkang aya hte ndau dip shabra u; dai gaw galoi mung n galai mat lu u ga, Persi hte Medi a tara ni hta ka da u ga. Dai hpang shi a hkawhkam jan aya hpe grau kaja ai numsha hpe jaw kau na mai nga ai.

ESHTA 2:14

Shi gaw shana de e dai de shang sa nna, hpang jahpawt rai jang kaga numsha ni a nta de woi la hkrum nhtawm hkawhkam wa a lashi num ni hpe woi hpareng ai Shagaza unuk bau sin ai npu hta tawn da na rai wu ai. Hkawhkam wa shi hpe yu ra nna shi a mying n shaga dingsa shi gaw hkawhkam wa kaw bai shang lu na wu ai n rai.

ESHTA 4:10

Eshta mung ndai shiga Mordehkai hpang de la sa ya na matu shi hpe bai jaw dat wu ai:

ESHTA 4:12

Mordehkai gaw Eshta kaw na shiga lu la ai shaloi,

ESHTA 6:4

Hkawhkam wa gaw, “Hkawhkam htingnu kata e nye a du salang ni kadai wa nga nga a ta?,” ngu nna san wu ai. Mordehkai hpe masha sat ai shara hta noi da na matu ya jin jin di da nna dai lam hkawhkam wa hpe sa san na nga, ya sha wang kata de Haman shang wa sai.

ESHTA 8:4

Hkawhkam wa mung ja sumdoi Eshta hpang de ladawn dat wu ai rai nna shi rawt tsap let,

1 PETRU 3:7

Dai hte maren madu wa ni e, madu jan ni gaw n-gun kya ai amyu ni re ai ngu ai hpe atsawm sha chye na let nanhte a madu jan ni hte kanawn mazum nga mu. Shanhte hpe hkungga lara di mu, hpa majaw nga yang shanhte mung nanhte hte maren Karai Kasang kaw na asak a sali wunli kumhpa hpe hkam la na ni rai ma ai. Ndai lam galaw mu, shaloi she nanhte a akyu hpyi ai ga ni hpe hpa e mung dingbai dingna n shabyin na re.