ESHTA 3:13 - Jinghpaw Common Language Bible 2009

¹³ Adara shata shi masum ya shani e nan Yuda masha yawng ngu na kaji kaba, ma kaji ni hte numsha ni yawng hpe htau sat sharu kau na matsun ga ni rawng ai ndau laika hpe mungdan a mungdaw shagu de laika sa ai ni la mat wa shajang ma ai. Yuda masha ni gaw matsan dum myit n rawng ai sha sat sharu kau ai hkrum nna shanhte a lanep ni la mat wa ai hkrum na ma ai.

Jinghpaw Hanson Version Bible

¹³ Shing rai, Adara ngu ai shata shi lahkawng a shi masum ya shani jang, Yuda masha yawng, kaji kaba, ma kaji numsha mahkra hpe, atsai awai sat shagrawm shamyit kau nna, shanhte a arung arai ni hpe lanep shatai na nga, hkang dat ai laika ni hpe, laika sa ai ni a lata hte, hkawhkam a mungdaw shagu de shabra dat mu ai.

ESHTA 3:13 ပူးပေါင်းရင်းမြစ်များ

2 HKAWHKAM LABAU 30:6

Hkawhkam wa hte shi a du salang ni hkang dat mu ai hte maren, shiga shana ai ni gaw Yuda hte Israela mung ting de jawt hkawm let ning ngu saw shaga dat ma ai: “Israela amyu masha ni e, nanhte gaw Asuri e gasat ka-up la ai kaw na naw hkrung nga lu ai ni rai myit dai. Dai re ai majaw dai Madu Abraham, Isak hte Yaku a Karai Kasang hpang de ya kayin wa marit; shi nanhte kaw kayin wa na ra ai.

ESHTA 7:4

Nye a amyu masha ni hte ngai gaw sat shamyit kau hkrum na matu, dut kau ai hkrum nga saga ai. Mayam tai na matu dut kau hkrum ai hta hpa mung grau n sawng ai rai yang, ngai atsin sha nga nna dai hte seng ai lam nang hpe n sharu shatsang na nngai; rai ti mung anhte gaw shamyit kau hkrum na matu ri ri sha rai nga saga ai-atsai awai sat shagrawm kau hkrum na saga ai!,” ngu nna htan wu ai.

ESHTA 8:5

“Nye a madu hkawhkam awng sharawng ai hte ngai hpe myit manoi nna na a matu jaw hkrak ai zawn myit nawn la n yang gaw hkawseng mungdan hta nga ai Yuda masha ni yawng hpe sat shagrawm kau na matu Agag amyu matu na Hamedahta a kasha Haman a hkang da ai ga hkan galaw na matu matsun dat ai lam hpe hkan shabai na matu ndau laika hpe chyeju hte ka shapraw ya e.

ESHTA 9:1

Hkawhkam wa ndau shabra dat ai nhtoi ngu ai Adara shata shi masum ya shani hta, Yuda masha ni a gumlau hpyen ni gaw shanhte a daru magam n-gun hte ka-up dang la na myit mada nga ma ai. Rai ti mung shing rai lu na malai, Yuda masha ni mahtang shanhte hpe padang dip la lu nga ma ai.

ESHTA 9:5

Dai rai nna Yuda masha ni gaw shanhte a gumlau hpyen ni hpe shanhte galaw mayu ai hku galaw lu nga ma ai. Shanhte gaw nhtu ni lang let htim gasat nhtawm shanhte hpe sat sharu kau mu ai.

YOBA 9:25

Nye a nhtoi ni gaw gat chyang ai wa hta grau lawan ti mung, dai nhtoi langai mi mung mai kaja lam byin wa ai n rai.

ESAIA 10:6

Ngai gaw ngai hpe masin shapawt ai amyu masha, karai kata ai amyu baw hpe gasat na matu Asuri hpe shangun dat nngai. Ngai gaw shanhte hpe lanep hta, arai lagu na hte lam nmaw na ga nhpu hpe zawn amyu masha ni hpe kabye anut kau na matu dat dat nngai,” ngu nna tsun wu ai.

YEREMIA 51:31

Babelon gaw man maga shagu agrawp daw mat sai lam, Babelon hkawhkam wa hpe wa tsun dan na nga, shiga htinglet ai ni langai hpang langai kagat sa ma ai.

ROMA 3:15

Shanhte gaw masha hpe machyi shangun na hte sat na matu lawan ma ai.

YAKU 2:13

Hpa majaw nga yang matsan dum ai lama myit n rawng ai masha hpe daw dan ai shaloi Karai Kasang gaw matsan dum lama ai lam madun na ru ai n rai; rai ti mung matsan dum lama ai lam gaw tara daw dan ai hpe awng dang kau wu ai.

1 SAMUELA 15:3

Amalek masha ni hpe sa gasat nhtawm shanhte lu malu sut gan mahkra hte hpe tsep kawp jahten shaza kau ya mu. Arai hpa mung hkum tawn hkum ngam da myit. Numsha, lasha, ma kaji, ma chyangai, sagu, dumsu, gawla-uk hte lawze ni yawng mayawng hpe sat kau mu,” ngu nna tsun wu ai.

1 SAMUELA 22:19

Shawlu gaw Noba mare e shanu ai masha ni hpe mung, mare na hkinjawng ni hpe mung, numsha lasha, ma kaji ni hte chyu chyu ai ma ni, dumsu lawze hte sagu ni yawng hpe sat kau na matu hkang dat wu ai hte maren, dai ni yawng sat kau ai hkrum nga ma ai.