ESAIA 64:3 - Jinghpaw Common Language Bible 2009

³ Kalang mi na aten hta, nang du sa nna anhte n myit dum ai hkrit hpa amu ni hte jahkrit yu nit dai; shaloi bum ni gaw nang hpe mu nna hkrit gari ai hte ashun ma ai.

Jinghpaw Hanson Version Bible

³ Anhte myit mada ai hta grau ai hkrithpa amu nang shapraw ai shaloi jang, nang yu wa nna, bum ni gaw na a man e ashun gari ma ai.

ESAIA 64:3 ပူးပေါင်းရင်းမြစ်များ

2 SAMUELA 7:23

Na a amyu masha majing shatai na nga, shanhte hpe mayam shatai nga ai kaw na nang hkye mawai da nit dai, dai Israela amyu ni hte bung ai amyu baw kaga ndai ginding aga ntsa n nga nga ai. Shanhte a matu nang galaw dan sai dai galu kaba ai mauhpa amu ni gaw mungkan ting de na a mying ningsang dan hkung gumhkawng shangun nga sai. Na a amyu masha majing shatai la na nga, Egutu mung kaw na nang shalawt dat sai amyu masha ni rawt lung wa mu yang, kaga masha amyu baw ni hte shanhte a karai ni hpe nang gawt shapraw kau ya nga ndai.

SHAKAWN KUNGDAWN 106:22

Dai mung hta shi galaw dan sai amu ni gaw kaning re ai mauhpa wa rai nga a hka! Nawng hkyeng hta shi galaw dan sai magam amu ni gaw kaning re ai mauhpa wa rai nga a hka!

SHAKAWN KUNGDAWN 66:3

“Nang galaw ai amu ni gaw kade wa mauhpa rai nga a hka! Na a daru magam n-gun grai galu kaba nga ai majaw, na a gumlau hpyen ni gaw na a man e, hkrit ai hte gum dagup nga ma ai.

SHAKAWN KUNGDAWN 66:5

Karai Kasang galaw dan sai amu hte shinggyim masha ni a lapran e, shi galaw dan sai mauhpa magam amu ni hpe, sa nna yu yu mu.

SHAKAWN KUNGDAWN 68:8

mungkan ga gaw gari ashun wa ai hte lamu na marang htu wa nga ai; hpa majaw nga yang, Sina bum a Karai Kasang rai nga ai Israela a Karai Kasang du sa wa ai majaw rai nga ai.

SHAKAWN KUNGDAWN 76:12

shi gaw gumrawng gumtawng ai hkawhkam shadang sha ni hpe shagrit kau nna; galu kaba ai hkawhkam ni hpe jahkrit shama nga ai.

PRU MAT 34:10

Dai Madu gaw Mawshe hpe, “Ya ngai Israela amyu masha ni hte ga shaka langai shagrin da na nngai. Ga ntsa ting na mungdan amyu mahkra hta galoi mung n galaw yu ai mauhpa amu kaba ni hpe shanhte a man e ngai galaw shapraw na we ai. Na a matu ngai galaw na amu gaw hkrit hpa amu rai nga ai majaw, Ngai Madu nan galaw lu ai amu kaba ni hpe amyu masha ni yawng mu lu na mara ai.

ESAIA 5:25

Dai Madu gaw shi a amyu masha ni hpe masin pawt nga ai, shanhte hpe ari jaw na matu shi a lata ladawn da nu ai. Bum ni gari ashun wa nna si mang ni mare lam nmaw hkan e shanut shanaw zawn jawng nga na mara ai. Dai rai tim pyi, dai Madu a masin kahtet ai gaw kawp mat na n rai, rai ti mung shi a lata gaw ari jaw na matu naw ladawn da na ra ai.

ESAIA 64:1

Nang gaw hpa majaw sumsing lamu hpe gang hpaw nna n yu wa n ni? Bum ni mung nang hpe mu nna hkrit gari ai hte ashun mai nga ai.

HABAKU 3:3

Karai Kasang gaw Edom kaw nna bai sa wa nga ai; chyoi pra ai Karai Kasang gaw Paran kawng ni kaw na sa wa nga ai. Shi a hpung shingkang sumsing lamu ni hpe ka-up da nga ai; ginding aga gaw shi hpe shakawn kungdawn ai ga hte hpring nga ai.

HABAKU 3:6

Shi hkring ai shaloi, ginding aga ashun awam nga ai; nang praw mada yu ai shaloi, masha amyu baw ni hkrit gari nga ma ai. Htani htana bum ni ga gamang mat nna; dinggrin a nga nga ai kawng ni, moi prat kaw nna shi hkawm nga ai kawng ni lup shang mat nga ai.

TARA JAHPRANG 10:21

Shi gaw nanhte a Karai Kasang rai nga ai rai nna nanhte a matu shi galaw dan nu ai dai galu kaba ai mauhpa amu ni hpe nanhte nan myi hte chyaw mu manit dai majaw shi hpe shakawn mu.

TARA JAHPRANG 4:34

Dai Madu nanhte a Karai Kasang gaw nanhte a matu Egutu mung hta e galaw dan manit dai zawn kaga amyu baw hta na amyu masha ni hpe woi la nhtawm shi a amyu masha shatai la gwi ai hpara shaje nga nga yu sani? Shi gaw nanhte a man e shi a daru magam n-gun hte atsam marai hpe lang nhtawm ana zinli hte hpyen majan, mauhpa lamik kumla hte hkrit hpa amu ni hpe shapraw dan nu ai.