ESAIA 60:4 - Jinghpaw Common Language Bible 2009

⁴ Grup yin de mada yu nna hpa byin nga ai hpe yu yu u: Na a amyu masha ni gaw dum nta de wa na matu zup hpawng nga ma ai! Na a shadang sha ni sumtsan kaw na wa na mara ai; Na a shayi sha ni ma kaji ni zawn pawn ba la ai hkrum na mara ai.

Jinghpaw Hanson Version Bible

⁴ Grup yin mada yu u; shanhte yawng zuphpawng nna, nang hpang de wa mara ai; na a shadang sha ni gaw sumtsan mung de na wa nna, na a shayi sha ni gaw ba kaye ai hkrum na mara ai.

ESAIA 60:4 ပူးပေါင်းရင်းမြစ်များ

ESAIA 11:12

Dai Madu gaw bra ayai hkawm nga sai Israela hte Yuda amyu masha ni hpe lamu ga jut mali kaw nna bai woi la ai hte shinggyin da nga ai lam masha amyu baw hpe madun dan na nga, kumla dawnghkawn langai sharawt da na ra ai.

ESAIA 14:2

Masha amyu baw ni law law gaw Israela amyu masha ni hpe dai Madu shanhte hpe jaw da ai mungdan de nhtang wa na matu karum la na mara ai, dai yang na masha amyu baw ni gaw mayam ni zawn Israela hpe daw jau na mara ai. Lang mi Israela hpe rim la yu sai ni gaw Israela a majaw rim la ai bai hkrum na mara ai. Israela amyu masha ni hpe lang mi dip sha lai wa sai ni hpe Israela amyu masha ni bai up hkang na mara ai.

ESAIA 42:6

“Ginding aga ntsa e teng man rap ra ai tara amu galaw nga ai hpe mu lu na matu, dai Madu ngai nan nang hpe shaga la nna daru magam n-gun jaw ni ai. Ngai gaw amyu masha ni yawng hte nang hku nna sha ga shaka tawn da na nngai; ngai gaw masha amyu baw ni hpang de nang hku nna sha nhtoi shapraw dan na we ai.

ESAIA 43:6

Shanhte hpe wa shangun na matu dingdung maga de ngai tsun na nngai; shanhte hpe n shingdang lu na matu dingda maga de tsun na nngai. Nye a amyu masha ni tsan ai mung ni kaw na nhtang wa mu ga, mungkan jut shara shagu kaw na nhtang wa mu ga.

ESAIA 49:12

Nye a amyu masha ni gaw tsan gang ai shara ngu ai dingdung hte sinna maga de nna mung, dingda maga Aswan kaw na mung sa wa na mara ai.

ESAIA 49:17

“Nang hpe bai gaw gap da na ni kade n na yang du na mara ai, nang hpe jahten sharun kau ai ni pru mat wa na mara ai.

ESAIA 49:18

Grup yin de mada yu nna hpa byin nga ai hpe yu u! Na a amyu masha ni gaw zup hpawng nga ma ai, shanhte gaw dum nta de wa nga ma ai! Ngai gaw ahkrung nga ai Karai Kasang rai nga ai hte maren, num nnan gaw shi mawn sumli da ai ja lung seng ni a majaw gumrawng lu ai zawn nang mung na a amyu masha ni a majaw gumrawng lu na rai ndai.

ESAIA 66:20

Shanhte gaw na a amyu masha ni yawng hpe ngai hpang de la sa ai kumhpa hku masha amyu baw ni a lata kaw na woi wa na mara ai. Israela masha ni gaw htung hte maren san seng ai hkungga ban ni hta lusha hkungga ni bang nna Nawku Htingnu de la sa ma ai zawn shanhte gaw dai ni hpe gumra ni, lawze ni, gawla-uk ni, hpyen leng ni hte daw htaw ai leng ni hta htaw nna nye a chyoi pra ai kawng nga ai Yerusalem de la sa na mara ai.

YEREMIA 30:10

Nye a amyu masha ni e, hkum hkrit nga myit; Israela amyu masha ni e, hkum hkrit gari nga myit. Ngai gaw nanhte hpe sumtsan mung hte nanhte bawng dung hkrum ai mungdan kaw nna hkye mawai la na nngai. Nanhte gaw dum nta de bai nhtang wa nna, ngwi pyaw sim sa ai hte nga lu na rai myit dai; nanhte gaw shim lum nga lu nna, kadai mung nanhte hpe jahkrit shama lu na mara ai n rai.

AMO LAIKA (AMOS) 9:14

Ngai gaw nye a amyu masha ni hpe shanhte a mung de woi wa na nngai. Shanhte gaw hten run mat sai shanhte a mare ni hpe bai gaw gap nna dai yang e nga na mara ai; shanhte gaw sabyi sun ni hkai sharing nna sabyi ntsin lu na mara ai; shanhte gaw sun ni galaw nna shanhte hkai ai shat mai lu sha na mara ai.

MIHKA 7:12

Dai shani e, sinpraw maga Asuri mung, dingda maga Egutu mung, Uhprat hka nu lapran hkan na mung, grai tsan ai panglai hte, bum ni kaw nna mung, shara shagu hkan chyam bra hkawm nga ai na a amyu masha ni nang hpang de bai nhtang wa na mara ai.

HAGI 2:7

Ngai gaw maigan amyu mahkra hpe jahten kau nna shanhte a arung arai ni ndai shara de la shawn ai hkrum na mara ai. Nawku Htingnu gaw sut rai ni hte hpring na ra ai.

MAHTE 8:11

Bai ngai nanhte hpe tsun made ga, sinpraw maga de na hte, sinna maga de na masha ni law law wa du sa wa nna, sumsing lamu a Mungdan hta e, Abraham, Isak, Yaku hte hte rau lusha poi hta dung lu na mara ai.

YAWHAN 4:35

‘Ya shata mali naw ra ai, dai lai jang she mam dan ten du na ra ai, nga nna nanhte tsun ga ai ga malai langai mi nga malit dai n rai ni? Rai ti mung ngai nanhte hpe tsun made ga, Hkauna pa ni de atsawm sha sharawt mada yu mu, mam ni myin htoi nga sai rai nna, shu la ten du nga sai.

KASA 13:44

Hpang na Bansa Nhtoi hta Karai Kasang a mungga na la na matu, mare ting ganoi mahkra wa du sa hpawng nga ma ai.