ESAIA 60:18 - Jinghpaw Common Language Bible 2009

¹⁸ Kashun kashe du daw sai hkaw ai nsen hpe galoi mung na lu sana n rai; Jahten shaza ai amu gaw na a mungdan hpe bai ga gamang kau na ra ai n rai. Ngai gaw nang hpe bunghku zawn makawp maga nna dahpran shara tai ya na nngai; Ngai gaw nang hpe hkye la ni ai majaw, nang ngai hpe shakawn kungdawn na rai ndai.

Jinghpaw Hanson Version Bible

¹⁸ Na a mung hta kashun kashe, nang shanu ai shara hta, katsi katsang hte hten byak ai htawm hpang de n nga na sai; nang gaw na a bunghku ni hpe Hkye hkrang la ai lam, na a chyinghka ni hpe Shakawn Kungdawn ai shara, nga nna shamying na wu ai.

ESAIA 60:18 ပူးပေါင်းရင်းမြစ်များ

2 SAMUELA 7:10

Nye a Israela amyu masha ni a matu shara langai ngai san da nna, dai yang e shanhte shanu nga lu ai hte dip gamyet sha hkrum ai lam hpa mung n nga ai sha, shanhte nga lu na rai ma ai. Shanhte gaw ya du hkra ndai mung de shang nga ma ai rai nna n hkru ai masha ni e hkap gasat ai mung hkrum sha nga manu ai; rai ti mung dai gaw bai byin wa na ra ai n rai; na a gumlau hpyen ni yawng a lata na shim lum hkra bau sin na ga sadi ngai tawn da nngai; na a amyu masha ni hpe mung ngai jaw ya na we ai.

SHAKAWN KUNGDAWN 147:14

Shi gaw na a lamu ga jarit ni hpe shim nga shangun nna; sau ai hkaulan mam hta nang hpe shakat ya nga ai.

ESAIA 11:9

Karai Kasang a chyoi pra ai kawng ngu ai Ziun ntsa e machyi tsin-yam hte n hkru ai amu hpa mung nga na ra ai n rai. Panglai ni gaw hka hte hpring nga ai zawn dai Madu a machye machyang hpaji gaw mungkan ting hta pri rai na ra ai.

ESAIA 2:4

Shi gaw galu kaba ai masha amyu baw ni a lapran na ndang kalang lam ni hpe jeyang ya na ra ai. Shanhte gaw shanhte a nhtu ni hpe najawn ni, shanhte a nri ni hpe gadoi nhkyi ni dup kau na mara ai. Amyu baw ni majan galoi mung bai baw na n rai, majan a matu galoi mung bai hkyen na mara ai n rai.

ESAIA 26:1

Amyu masha ni Yuda mung hta ndai mahkawn mangoi ga hpe mahkawn shakawn ai nhtoi du wa nga ai: Anhte a mare gaw ngang kang nga a hka! Karai Kasang shi nan de a bunghku ni hpe makawp maga da nga ai!

ESAIA 26:2

Mare chyinghka ni hpe hpaw malang da mu, kangka ai masha amyu baw hte jaw ai amu galaw ai masha amyu baw ni shang lu mu ga.

ESAIA 51:19

Tsin yam tsindam htam lahkawng na a ntsa e hkrat nga sai; na a mungdan gaw majan a majaw hten run mat sai, na a amyu masha ni hku hku masai. Nang hpe matsan yu dum la na masha kadai n nga nga ai.

ESAIA 54:14

Teng man rap ra ai tara hte ding man ai gaw nang hpe n-gun shaja ya na ra ai. Nang gaw dip gamyet sha hkrum ai hte hkrit kajawng ai amu kaw na shim nga lu na ndai.

ESAIA 56:5

na a mying gaw nye a Nawku Htingnu hta mung, nang kashu kasha lu ai rai yang dai ni hta grau nna, nye a amyu masha ni a lapran ni hta adum nga na mara ai. Nang gaw galoi mung malap kau hkrum na n rai nga ndai,” ngu nna tsun nga ai.

ESAIA 60:11

Na a chyinghka ni shani shana hpaw da lu na rai ndai, Shaloi masha amyu baw ni a hkawhkam ni Shanhte a sut gan nang kaw la shang wa na mara ai.

ESAIA 60:17

“Ngai gaw nang hpang de magri mang a malai aja, Hpri hte hpun a malai gumhpraw hte magri mang, Nlung a malai hpri la sa na nngai. Na a mung up du ni galoi mung nang hpe dip gamyet na ra ai n rai; Ngai gaw shanhte hpe teng man rap ra ai tara hte ngwi pyaw sim sa lam hte up shangun na nngai.

ESAIA 61:11

Nli tum ni kaw na maku rawt wa ai hte tu kaba wa ai hte maren, dai Tsaw Htum ai dai Madu gaw shi a amyu masha ni hpe hkye hkrang la na ra ai, Masha amyu baw ni yawng shi hpe shakawn kungdawn na mara ai.

ESAIA 62:10

Yerusalem amyu masha ni e, Mare kata na pru mu, Nhtang wa nga ai na a amyu masha ni a matu nmaw lam galaw mu! Nmaw lam kaba lajang mu; nlung ni hpe jasan kau mu! Masha amyu baw ni chye lu mu ga, masat kumla sharawt tawn mu!

ESAIA 62:4

Nang gaw galoi mung “Mare Dingsa” ngu bai shaga hkrum na sai n rai, Na a mungdan gaw “Kabai Da Hkrum Ai Madu Jan,” ngu nna tsun hkrum sana n rai. Na a mying nnan gaw “Karai Kasang gaw shi hpe awng sharawng nga ai,” ngu na ra ai. Na a mungdan gaw “Kabu gara ai hte hkungran la sai,” ngu shaga hkrum na ra ai; Dai Madu gaw nang hta awng sharawng nga ai majaw, Na a mungdan gaw madu wa langai zawn tai na ra ai.

ESAIA 62:7

Shi gaw Yerusalem hpe bai gram lajang ai hte mungkan ga ting Dai mare hpe shakawn kungdawn wa ai aten du hkra, shanhte gaw shi hpe ban sa lam jaw ma ai n rai.

EZEKELA 42:20

Dai rai nna, bunghku du hkra lawm yang, man mali grup grup pe 840 rai nga ai. Dai bunghku gaw chyoi pra ai hte n chyoi n pra ai shara ni hpe garan ginhka na matu kum da nga ai.

MIHKA 4:3

Shi gaw masha amyu baw ni a lapran e mung, ni ai tsan ai shara na daru magam n-gun kaba lu ai ni a lapran e mung ndang kalang lam ni hpe daw dan ya na ra ai. Shanhte gaw shanhte a nhtu ni hpe najawn, shanhte a nri ni hpe nhkyi kasha ni dup kau na mara ai. Masha amyu baw ni majan de galoi mung pru sa na ma ai n rai, majan a matu galoi mung bai hkyen na mara ai n rai.

ZEHPANI 3:19

Aten gaw du wa nga sai! Ngai gaw nanhte hpe dip gamyet sha ai ni hpe ari jaw na nngai; daw hten ai masha ni yawng hpe ngai mawai la na nngai, bawng dung hkrum nga ai ni yawng hpe dum nta de woi wa na nngai. Ngai gaw shanhte a kaya kahpa hpe shagrau sha-a ai hku bai jaw ya na nngai, mungkan ga yawng gaw shanhte hpe shakawn na mara ai.

ZEHKARIA 2:5

Dai Madu chyawm gaw dai mare hpe makawp maga na matu mare grup grup e shi nan wan bunghku tai nna, shi a hpung shingkang hte dai yang e shanu nga na nngai, nga nna ga sadi jaw da nu ai,” nga nna tsun dan wu ai.

ZEHKARIA 2:9

“Dai Madu gaw shi nan nanhte hpe ninghkap gasat na ra ai; nanhte gaw lang mi nanhte a shangun ma ni tai yu sai amyu masha ni a kashun kashe hpya kau ai hkrum na marin dai.” Ndai lam byin wa ai shaloi, Chyahtum Chyalai N-gun rawng ai dai Madu ngai hpe shangun dat ai amu, masha shagu chye na wa na mara ai.

ZEHKARIA 9:8

Nye a mungdan hpe ngai makawp maga na nngai, dai lamu ga hku hpyen hpung ni ga lai lu na ma ai n rai. Nye a amyu masha ni hpe dip gamyet sha na matu gumshem magam ni hpe galoi mung ahkang jaw na nngai n rai. Nye a amyu masha ni kade wa nni nkri hkrum sha nga masai hpe ngai mu se ai,” ngu nna tsun ai.