ESAIA 59:16 - Jinghpaw Common Language Bible 2009

¹⁶ Dip gamyet sha hkrum nga ai wa hpe karum la na masha kadai n nga ai hpe mu ai majaw shi mau mat nga ai. Dai rai nna, shi gaw shanhte hpe hkye mawai la na matu hte shi a awng padang lu la na matu shi a daru magam n-gun hpe lang na ra ai.

Jinghpaw Hanson Version Bible

¹⁶ Karum ai wa n nga ai gaw shi mu nna, htinglu htinglai ai wa n nga ai majaw, shi mau nga ai; dai rai nna shi a lata gaw, tinang matu hkye hkrang la ai lam shapraw nna, shi a dinghpring ai lam gaw, shi hpe shadaw ya nga ai.

ESAIA 59:16 ပူးပေါင်းရင်းမြစ်များ

SHAKAWN KUNGDAWN 106:23

Shi gaw shi a amyu masha ni hpe jahten kau na nga, Karai Kasang tsun wu ai shaloi, shi lata la ai shangun ma kaja Mawshe gaw shi a man e, rawt tsap nna, shanhte hpe n shamyit kau u ga, shi a masin kahtet ai hpe shakawp ya wu ai.

SHAKAWN KUNGDAWN 94:16

Kadai wa gaw nye a maga de tsap nna, tara n lang ai masha ni hpe gumlang yu nga a ni? Kadai wa gaw nye a maga de nga nna, n hkru ai amu galaw ai ni hpe ninghkap yu nga a ni?

SHAKAWN KUNGDAWN 98:1

Dai Madu hpe mahkawn ga nnan hte mahkawn mu; shi gaw mauhpa magam amu ni hpe galaw da nu ai! Shi a daru magam n-gun hte chyoi pra ai n-gun a jaw e, shi gaw awng padang hpe hkam la nu ai.

ESAIA 33:2

Madu e, anhte hpe matsan dum la mi. Anhte nang hpe myit mada ga ai. Anhte hpe lani hte lani makawp maga ya mi, ru yak tsin-yam tsindam hkrum ai aten ni hta anhte hpe hkye la mi.

ESAIA 33:3

Nang anhte a matu gasat ai shaloi, masha amyu baw ni majan nsen ngoi garu ai kaw na hprawng mat wa ma ai.

ESAIA 40:10

Tsaw Htum ai dai Madu gaw daru magam n-gun hte up hkang na du sa nga ai, shi hkye mawai la sai amyu masha ni gaw shi hte rau woi sa wa nga ai.

ESAIA 41:28

Ngai gaw karai ni hpe mada yu ai shaloi, shanhte hta na lama mi tsun dan lu ai mi kadai n nga; ngai san ai ga san ni hpe langai mi mung n htan lu nga ai.

ESAIA 50:2

“Shanhte hpe hkye hkrang la na matu ngai shanhte hpang de sa ai shaloi, nye a amyu masha ni atsin sha nga ma ni? Ngai shaga yang hpa majaw shanhte n htan ma ni? Ngai gaw shanhte hpe hkye la na matu n-gun nau kya la nga a ni? Ngai gaw nye a ga hte panglai hpe hkun hkraw shangun lu ai hte hka nu ni hpe zaibru jang shatai lu nngai, shaloi dai hta rawng ai nga ni gaw hka n lu ai majaw si mat nga ai.

ESAIA 51:5

Ngai gaw tin tin sa nna shanhte hpe hkye la na nngai; nye a awng padang lu la na aten ni wa nga sai. Ngai nan masha amyu baw ni a ntsa e up na nngai. Sumtsan mung na ni gaw ngai sa wa na matu ala nga ma ai; shanhte gaw shanhte hpe hkye la na matu myit mada ai hte ngai hpe ala nga ma ai.

ESAIA 51:9

Madu e, rawt u, anhte hpe karum la mi! Na a daru magam n-gun lang nna, anhte hpe hkye la mi; dai hpe moi chyaloi nhkoi prat ni hta nang lang ai zawn lang u. Dai daru magam n-gun hte nang gaw panglai numraw Rahab hpe kahtum kadaw di azat kau nga ndai.

ESAIA 52:10

Dai Madu gaw shi a chyoi pra ai daru magam n-gun lang wa na ra ai; shi gaw shi a amyu masha ni hpe hkye la na ra ai, mungkan ga ting dai amu hpe mu na mara ai.

ESAIA 53:1

Amyu masha ni gaw, “Anhte ya htawn tsun ai shiga hpe kadai wa kam nga sata? Ndai amu hta dai Madu a lata hpe kadai mu lu sata?

ESAIA 62:8

Dai Madu gaw dagam ga sadi tawn da nu ai, Shi a daru magam n-gun hte shi gaw dai hpe shadan jahkung na ra ai: “Na a nsi naisi gaw na a gumlau hpyen ni a matu galoi mung lusha tai sana n rai, Maigan masha ni galoi mung na a sabyi ntsin lu na mara ai n rai.

ESAIA 64:7

Akyu hpyi let nang kaw kayin wa ai masha kadai n nga nga ai; karum la na matu nang kaw kadai n sa nga ai. Nang gaw na hkum hpe anhte kaw na makoi kau nhtawm anhte galaw ai yubak mara ni a majaw anhte hpe kau da nga nit dai.

YEREMIA 5:1

Yerusalem amyu masha ni e, na a nmaw lam hku hprawng mu! Makau grup yin de mada yu mu! Nanhte hkum ni hpe yu yu mu! Shawa gat ginra ni hkan sawk tam yu mu! Ding hpring ai amu galaw nna Karai Kasang hta kangka nga na matu shakut ai masha langai mi hpe nang mu tam n ni? Nang mu tam ai rai yang, dai Madu gaw Yerusalem hpe mara dat ya na ra ai.

EZEKELA 22:30

Nye a masin kahtet ai gaw dai mung hpe jahten kau na matu hkyen nga ai shaloi, ngai gaw bunghku gaw gap lu na masha langai ngai, daw agrawp mat sai bunghku shara ni hta tsap lu ai masha langai ngai hte mungdan hpe makawp maga lu ai masha langai ngai hpe tam yu nngai, rai ti mung ngai gaw kadai hpe mung n mu nngai.

MARKU 6:6

Dai masha ni hta makam masham n nga ai majaw, shi grai mau nga ai. Dai hpang, grup yin hkan na kahtawng ni hta e, shi kawan hkawm nna, masha ni hpe sharin shaga nga ai.