ESAIA 57:5 - Jinghpaw Common Language Bible 2009

⁵ Nanhte gaw chyoi pra ai hpun npu hkan num la kanawn mazum ai amu galaw let mayat maya ai karai ni hpe nawku nga myit dai. Nanhte gaw hka shi hkaraw kadit hkan na lunghkrung lungpu ni hta tinang a kashu kasha ni hpe shagu hkungga nawng jau nga myit dai.

Jinghpaw Hanson Version Bible

⁵ nanhte gaw, wamyi hpun hte tsit lali ai hpun shagu a npu e pyaw daw kadaw hkawm ai hte, hkaraw kadit lunghkrung ni a npu e, kasha ni hpe sat kau ai ni, n rai nga myit ni?

ESAIA 57:5 ပူးပေါင်းရင်းမြစ်များ

1 HKAWHKAM 14:23

Shanhte gaw n teng n man ai karai ni a matu nawku shara ni hpe gap nhtawm kawng ntsa hkan na shingnip hpun npu hkan e mung Ashera hkrang sumla ni hpe nawku na matu nlung shadaw ni hpe jung da nga ma ai.

2 HKAWHKAM 17:10

Kawng ni yawng a ntsa hkan e mung, shingnip hpun npu shagu hkan e mung, nlung shadaw ni hte Ashera karai num a gawkngu sumla ni hpe shanhte shadun da nhtawm,

2 HKAWHKAM 17:7

Israela masha ni gaw Egutu hkawhkam a lata kaw na hkye mawai la ai hte Egutu mung kaw nna shanhte hpe woi shapraw wa ai dai Madu shanhte a Karai Kasang hpe shut hpyit kau nna karai kaga ni hpe nawku nhtawm,

2 HKAWHKAM 23:10

Hkawhkam Yoshia gaw kadai mung Molek karai a matu tinang a shayi shadang sha ni hpe wan nat hkungga n shatai ya lu hkra nga, Hinom Kadit na Tohpet ngu ai tara maigan masha ni a nawku shara hpe mung awu asin di kau ya wu ai.

2 HKAWHKAM LABAU 28:3

Israela masha ni rawt lung wa yang, mungdan kata kaw nna dai Madu gawt shapraw kau ai masha ni a matsat shabat re ai arawn alai hta hkan dagraw nang nna Hinom Kadit e manam pyaw ai baw nat nawng nhtawm shi a shadang sha ni hpe pyi hpara sumla ni a matu wan nat hkungga shatai wu ai.

PRU MAT 32:6

Hpang jahpawt manap jau jau aten hta shagu hkungga nat nawng na nga, shanhte gaw yam nga nkau mi la sa nhtawm kaga nkau mi gaw mahku hkungga shan sha ma ai. Amyu masha ni mung lusha poi de shang dung nhtawm lu pyaw sha pyaw ai hte ngang kayut nga ma ai.

ESAIA 1:29

Nanhte gaw nanhte galoi mung nawku yu sai hpun ni hte chyoi pra ai sun ni hta hpun hkai da nga myit dai majaw yawn hkyen hkrum na marin dai.

YEREMIA 17:2

Na a amyu masha ni gaw tawn hkungri ni hta mung, tsit lali ai hpun shagu hte kawng pungding ni hkan Ashera hpara num a matu sharawt tawn ai sumla ni hpe nawku myit dai. Shanhte gaw nam na bum ntsa hkan e mung nawku ma ai. Na a mungdan ting hta nang shut kau ai yubak lam ni yawng a majaw na a sut gan hte arung arai ni hpe kashun la kau ya na matu, na a gumlau hpyen ni a lata de ngai ap kau na we ai.

YEREMIA 2:20

Tsaw Htum ai dai Madu gaw, Israela e, nang gaw moi kaw nna nye a ahkang aya hpe ningdang kau ndai; nang gaw nye a ga madat na matu hte ngai hpe nawku na matu ningdang kau ndai. Tsaw ai kawng shagu a ntsa hte tsit lali ai hpun npu shagu hta mayat maya ai karai ni hpe nang nawku ndai.

YEREMIA 3:13

Nang gaw mara lu nga ndai, nang gaw dai Madu na a Karai Kasang hpe gumlau kau nit dai hpe chyu sha yin la u. Nang gaw tsit lali ai hpun npu shagu hta maigan karai ni hpe na a tsaw ra myit jaw ya nhtawm nye a hkang da ai ga ni hpe nang n madat kau sai lam ni hpe yin la u. Dai Madu ngai nan tsun ni ai.

YEREMIA 3:6

Yoshia hkawhkam tai nga yang, dai Madu gaw ngai hpe, “Israela ngu ai sadi n dung ai numsha gaw kaning re ai amu galaw nu ai hpe nang mu nit ni? Shi gaw ngai kaw na kayin mat wa nhtawm kawng shagu a ntsa hte tsit lali ai hpun npu shagu hta shawa num zawn amu galaw nu ai.

YEREMIA 32:35

Shanhte gaw shanhte a shayi shadang sha ni hpe Molek hpara a matu shagu hkungga nawng jau na nga, Hinom Kadit hta Bala hpara tawn hkungri ni hpe gap da nga ma ai. Dai amu galaw na matu, ngai shanhte hpe hkang da ni ai n rai; shanhte gaw dai zawn re ai amu galaw na hte Yuda amyu masha ni yubak hkrum na matu ngai n myit nngai,” ngu nna tsun nngai.

YEREMIA 50:38

Dai mung a ntsa e jan gri ai hte dai mung na hka nu ni hkun hkraw mat na ra ai. Babelon mung gaw hkrit hpa hpara sumla ni nga ai mung re, dai gaw mung masha ni hpe angawk angak di kau nga ai.

YEREMIA 51:7

Babelon gaw nye a lata hte lang nna mungkan ting hpe shanang kau ai ja gawm zawn rai nga ai. Masha amyu baw ni gaw dai hta rawng ai sabyi ntsin hpe lu nang nna, shanhte chye ai hku hkawm nga ma ai.

YEREMIA 7:31

Shanhte gaw Hinom Kadit e Tohpet ngu shamying ai tawn hkungri langai mi hpe gaw ma ai, shanhte gaw shanhte a shadang sha ni hte shayi sha ni hpe wan hta nat nawng lu ma ai. Dai amu galaw na matu, shanhte hpe ngai hkang da ni ai n rai; Dai amu gaw nye a myit masin hta pyi myit ai n rai.

EZEKELA 16:20

“Dai hpang, nang gaw grau sawng ai amu hpe galaw nit dai-nang gaw na a kasha ni hpe nan dai hpara sumla ni hpe nawng ya nit hka!

EZEKELA 20:26

Shanhte a hkungga nawng jau ai hta mung, shanhte a kasha alat ni hpe wan nat hkungga nawng jau ai hta mung ngai shanhte hpe awu asin di kau nngai. Ngai nan dai Madu rai nga ai lam shanhte hpe madun dan lu na matu, shanhte hpe ndai zawn ari jaw ai lam rai nga ai.

EZEKELA 20:28

Shanhte hpe jaw na ngu nna ngai ga sadi dagam da ai mungdan de shanhte hpe ngai woi wa ni ai. Shanhte gaw tsaw ai kawng ni hte tsit lali ai hpun ni hpe mu mada ma ai shaloi, dai shara ni yawng hta shagu hkungga nawng ya ma ai. Shanhte gaw dai hkan e manam pyaw ai baw wan nat hkungga hte sabyi hkungga ru jaw ai lai hte ngai hpe pawt bu shangun ma ai.

EZEKELA 20:31

Nanhte gaw dai ni du hkra pyi, dai zawn re ai kumhpa ni hte nawng jau nhtawm, dai zawn re ai hpara sumla ni a man e nanhte a kashu kasha ni hpe wan nat hkungga nawng jau ai hte nanhte hkum nanhte awu asin di myit dai. Israela amyu masha nanhte gaw ya du hkra nye a myit ra sharawng ai lam hpa rai nga a ni?, nga nna sa san nga myit dai! Ngai gaw Tsaw Htum ai dai Madu, ahkrung nga ai Karai Kasang rai nga nngai, dai majaw hpa lam hte seng nna mung, nanhte ngai hpe san yu lu na myit dai n rai.

EZEKELA 6:13

Tawn hkungri ni a grup yin hte hpara sumla ni a lapran e mung, tsaw ai kawng shagu a ntsa e mung, bum pungding shagu a ntsa e mung, tsit lali ai hpun shagu a npu e mung, kaba hkung ai wamyi hpun shagu a npu hta e mung, shanhte a hpara sumla ni hpe shagu hkungga nat nawng ya ai shara shagu hkan e mung, shanhte a moi mang ni ayai taw nga na mara ai. Dai hpang masha shagu hte gaw Ngai nan dai Madu rai nga nngai hpe chye wa na mara ai.

JAW JAU 18:21

Molek karai nawku ai hta na a kashu kasha ni kadai hpe mung ap ya lu na n rai; hpa majaw nga yang, dai gaw Madu Karai Kasang a mying ningsang hpe sari jahpoi ya na rai wu ai.

BU HKAWM 25:6

Israela masha langai mi Mawshe a man hte dai Madu a hpung shingkang shanu nga ai Sum Chyinghka lam hta hkrap sharung nga ai shawa hpung ting a man e, Midian numsha langai mi hpe shi a sum de woi shang wa wu ai.

TARA JAHPRANG 12:2

Nanhte madu la na mungdan hta masha amyu ni shanhte a karai ni hpe nawku ai dai tsaw ai bum hte kawng ntsa hkan na tsit lali ai hpun npu hkan na shara ni yawng hpe jahten kau lu na rai myit dai.

SHINGRAN 18:3

Hpa majaw nga yang, masha amyu baw shagu gaw, dai mare a hpye ai amu hta myit kayut baw bang ai ngu ai sabyi ntsin hpe lu masai. Ga ntsa na hkawhkam ni mung, shi hte rau hpye ai amu galaw ma ai, ga ntsa na hpaga la ni mung dai mare a ladu lai ai myit kayut sawse lawklek ai a majaw sut su wa masai,” nga nna ja ai nsen hte jahtau wu ai.