ESAIA 5:28 - Jinghpaw Common Language Bible 2009

²⁸ Shanhte a pala ni masen nga ai; shanhte a ndan ni gap na matu shachyen da chyalu rai nga ai. Shanhte a gumra lahkru ni gaw hpai lung zawn ja nga ai; shanhte hpyen leng dingsen ni gaw bung hpoi zawn chyai nga ai.

Jinghpaw Hanson Version Bible

²⁸ shanhte a pala ni masen nga nna, ndan ni mung shachyen nga ai: gumra lahkru ni gaw hpai lung hte bung nna, leng dingsen ni gaw bungsha zawn chyai nga ai:

ESAIA 5:28 ပူးပေါင်းရင်းမြစ်များ

SHAKAWN KUNGDAWN 120:4

Hpyenla wa a masen ai pala ni, hkyeng kahtet nga ai nhprang wan n-ga ni hte ari jaw na ra ai!

SHAKAWN KUNGDAWN 45:5

Na a pala ni masen nga ai rai nna, na a gumlau hpyen ni a masin salum ni hpe galun htinggrang ya nga ai. Masha amyu ni mung na a lagaw nhpang e, dingnyawm na mara ai.

ESAIA 13:18

Shanhte gaw shanhte a ndan pala ni hte shabrang ni hpe sat kau na mara ai. Shanhte gaw ma chyangai ni hpe matsan dum ma ai n rai, ma kaji ni a ntsa e mung n-gaw nwai ai myit rawng ai n rai.

ESAIA 21:1

Ndai gaw Babelon mung hte seng ai mungga rai nga ai. Zaibru jang hpe lai di nna bung wa ai bung hpoi zawn, tsin-yam tsindam gaw hkrit na zawn re ai mung kaw nna sa wa na ra ai.

ESAIA 66:15

Dai Madu gaw wan hte rau du sa wa na ra ai. Shi gaw shi pawt sindawng ai ni hpe ari jaw na matu nbung laru a singkaw ni a ntsa e jawn sa wa na ra ai.

YEREMIA 4:13

Yu u, gumlau hpyen gaw sumwi ni zawn sa wa mara ai. Shanhte a majan hpyen leng ni gaw nbung bung hpoi zawn rai nga ai, shanhte a hpyen gumra ni gaw galang ni hta grau nna lawan nga ma ai. Anhte sum mat saga ai! Anhte daw dan ai hkrum saga ai!

YEREMIA 47:3

Shanhte gaw gumra lahkru ngoi ai nsen hpe mung, hpyen leng ni a wu kadu ai nsen hpe mung, leng dingsen ni a ngoi garu ai nsen hpe mung na na mara ai. Kanu kawa ni gaw shanhte a kashu kasha ni hpe karum na matu bai kayin wa lu na mara ai n rai; shanhte a lata ni n-gun yawm ai hte kya noi taw nga na mara ai.

YEREMIA 5:16

Shanhte a ndan lang masha ni gaw n-gun rawng ai share ninghkrin ni rai nna, matsan dum myit n rawng ai sha masha sat ai ni rai ma ai.

EZEKELA 26:11

Gumra jawn ai ni mung na a mare nmaw lam hku kabye lai wa nna shanhte a nhtu ni hte na a masha ni hpe sat kau na mara ai. Na a ngang ai shadaw ni gaw ga de kadawng daw mat na mara ai.

EZEKELA 38:9

Shi hte shi a hpyen luksuk ni hte shi hta lawm nga ai masha amyu baw law law ni gaw nbung laru hte sumwi ni zawn mungdan hpe gasat ka-up na mara ai,” ngu nna tsun wu ai.

Daniela 11:40

“Ya Suri hkawhkam a hpang jahtum aten ganoi du wa jang, Egutu hkawhkam wa shi hpe htim gasat na ra ai; shaloi Suri hkawhkam wa mung shi a n-gun atsam mahkra hte hpawn hpyen leng ni, gumra ni, sanghpaw li law law hte bai nhtang htim na ra ai. Shi gaw mungdan law law hpe mawru hka zawn shang gasat hkawm wa na ra ai.

MIHKA 4:13

Dai Madu gaw, “Yerusalem masha ni e, rawt sa nna na a gumlau hpyen ni hpe ari jaw u! Hpri nrung hte magri mang lahkru rawng ai usu zawn ngai nang hpe n-gun shaja ya na nngai. Nang gaw masha amyu baw law law ni hpe adup mani kau na ra ai; shanhte kashun kashe rai lu la ai sut gan hpe mungkan ting a Madu rai nga ai, ngai hpang de sa sak ya na mara ai,” ngu nna tsun ai.

NAHUM 3:2

Lasik hte kayat ai nsen, leng dingsen ni chyai kayin ai nsen, gumtawng hkawm ai gumra ni a nsen, adawt hkra ai hpyen leng ni a nsen ni hpe madat yu mu law!

TARA AGYI 5:22

Dai hpang gumra ni gumtawng bukbak wa nhtawm, dai ni a lagaw lahkru hkindit dukdak kadu malu ai.