ESAIA 48:8 - Jinghpaw Common Language Bible 2009

⁸ Nang gaw gumlau wa langai zawn mying gumhkawng nga ndai rai nna, nang hpe n kam lu ai gaw ngai chye sani ai. Dai re ai majaw ndai amu hpe nang galoi mung n na yu nga ndai, de a ga hkaw mi pyi na a na de galoi mung n shang ai majaw rai nga ai.

Jinghpaw Hanson Version Bible

⁸ Gaja wa, nang n na yu ndai; gaja wa, nang n chye ndai; gaja wa, moi kaw nna na a na hpaw ai n rai: kaning rai nme law, nang gaw gumle gumlau amu grai galaw nna, kanu a hkritung kaw nna pyi, tara tawt lai ai, ngu ai mying mying ai hpe ngai chye nngai.

ESAIA 48:8 ပူးပေါင်းရင်းမြစ်များ

SHAKAWN KUNGDAWN 40:6

Nang gaw shagu hkungga ni hte wan nat hkungga ni hpe n sharawng nga ndai; tawn hkungri ntsa e, hkum ting nat nawng ai hkungga ni hte, yubak mara raw dat kau na matu nawng jau ai hkungga ni hpe, nang n hpyi nga ndai. Shing rai nawng jau ya na malai, nang tsun ai lam hpe na la na matu, nang gaw ngai hpe na lashing hpaw ya nit dai,

SHAKAWN KUNGDAWN 51:5

Ngai shangai wa ai shani kaw nna, ngai gaw n hkru n shawp nga nngai; nu a hkritung kaw nna pyi, ngai hta yubak kap nga ni ai.

SHAKAWN KUNGDAWN 58:3

N tara ai masha ni gaw shanhte a asak hkrun lam yawng hta shut hpyit ai hku hkawm sa nga ma ai; shanhte gaw shangai wa ai shani kaw nna masu magaw ai ga ni hpe tsun nga ma ai.

ESAIA 21:2

Ngai gaw mazut byin masa ni a shingran, gumle gumlau ai hte jahten shabyak ai shingran ni hpe mu se ai. Elam hpyen luksuk e, htim gasat mu! Medi hpyen luksuk e, mare ni hpe wang tawn mu! Karai Kasang gaw Babelon mung e shabyin nu ai nni nkri hpe jahtum kau na ra ai.

ESAIA 26:11

Nang gaw na a gumlau hpyen ni hpe ari jaw na ra ai lam hpe shanhte n chye ma ai. Madu e, shanhte hpe kaya kahpa jahkrum nna nni nkri hkam sha shangun u; nang hkyen da ya sai ari ahpri shanhte hpe hkam sha shangun u. Na a amyu masha ni hpe nang kade daram tsaw ra nga ndai gaw, shanhte hpe madun dan u law.

ESAIA 33:1

Anhte a gumlau hpyen ni gaw dingnye hkrum nga ma ai! Shanhte hpe kadai e mung n hpya, gumle gumlau n galaw ti mung, shanhte mahtang hpya ai hte gumle gumlau di kau ma ai. Rai ti mung hpya kau na shanhte a aten hte gumle gumlau amu gaw htum mat na ra ai. Shanhte nan hpya lu hpya sha ai hte gumle gumlau ai amu a tsin-yam tsindam hkrum sha ai masha ni tai na mara ai.

ESAIA 42:25

Dai rai nna, shi gaw shi a masin kahtet ai n-gun anhte hpe hkam sha shangun nna, kashun kashe du daw sai hkaw majan a nni nkri hpe hkrum sha shangun nga ai. Shi a masin kahtet ai gaw wan zawn Israela mung ting hta dinghkren hkru nga ai, rai ti mung hpa byin nga ai lam hpe anhte galoi mung n chye ga ai; anhte gaw shing re byin hkrum ai kata kaw na hpa mung n sharin la nga ga ai.

ESAIA 46:8

“Yubak kap ai ni e, ndai amu hpe adum nga mu; ngai galaw sai amu hpe myit yu mu.

ESAIA 47:11

Tsin yam tsindam gaw na a ntsa e du wa na ra ai, na a mandan lakle hpaji hpa hte mung dai hpe jahkring lu na n rai. Nang galoi mung yup mang n mang yu ai hten run lam gaw nang kaw akajawng sha du wa na ra ai.

ESAIA 48:4

Nang gaw hpri zawn ja nna garai n kapru ai magri mang zawn du ja nga na sakse madun nga ndai gaw ngai chye nngai.

ESAIA 48:7

Ya na lang chyawm gaw dai lam ni hpe ngai shabyin dat nga nngai; dai gaw lai sai aten hta, dai zawn re ai lam hpa mung n byin yu nga ai. Dai lam byin ai rai yang, dai hte seng ai lam yawng mayawng nang chye nga ai hpe tsun na rai ndai.

ESAIA 50:5

Dai Madu gaw ngai hpe chye na hkawn hkrang ai nyan jaw ya ni ai majaw, ngai shi hpe gumlau ai n rai, shi kaw na kayin mat wa nngai n rai.

ESAIA 57:4

Nanhte gaw kadai hpe mani asawng nga myit ni? Masu magaw ai nanhte gaw kadai hpe mani jahpoi nga myit ni?

YEREMIA 3:20

Rai ti mung sadi n dung ai madu jan zawn, nang ngai hta sadi n dung mat nit dai. Dai Madu ngai nan tsun ni ai,” ngu nna tsun ai.

YEREMIA 5:11

Israela hte Yuda amyu masha ni gaw ngai hpe htum hkra gumle gumlau galaw masai. Dai Madu ngai nan tsun ni ai,” ngu wu ai.

YEREMIA 5:21

Myi tu ti mung myi n mu lu, na tu ti mung na n na lu ai angawk angak re ai hte myit n su ai amyu masha ni e, madat mu.

YEREMIA 6:10

Ngai gaw, “Ngai shanhte hpe ga shaga nna sadi jaw ai rai yang, nye a ga hpe kadai madat ya na rai ta? Shanhte gaw du ja ai hte na a mungga hpe n kam madat ma ai; nang ngai hpe tsun shangun ai lam hpe shanhte mani asawng kau ya nga ai.

HOSEA 5:7

Shanhte gaw dai Madu hta sadi n dung nga manu ai; shi gaw shanhte a ma ni hpe n madu nga ai. Dai rai nna, ya chyawm gaw shanhte hte shanhte a lamu ga ni kade n na yang jahten kau hkrum na mara ai.

HOSEA 6:7

“Rai ti mung shanhte gaw Adam nga ai lamu ga de shang wa ai hte rau, ngai shanhte hte tawn da ai ga shaka hpe shanhte jahten kau manu ai.

HOSEA 7:9

dai zawn maigan masha ni hpe shamyet shanat ai gaw shanhte a n-gun hpe hpya sha kau ya na rai nga ma ai hpe n dum n chye nga ma ai. Shanhte a nhtoi hti hkum ni htum mat wa nga ti mung de a lam hpe pyi shanhte n chye nga ma ai.

MALAHKI 2:11

Yuda amyu masha ni gaw Karai Kasang hpe jaw ai shanhte a ga sadi hpe run kau nhtawm Yerusalem hte mungdan ting hta matsat shabat amu galaw ma ai. Dai Madu tsaw ra ai Nawku Htingnu hpe shanhte awu asin di kau mu ai. Lasha ni gaw maigan karai ni hpe nawku ai numsha ni hpe hkungran la ma ai.

EHPESU 2:3

Kaja wa anhte yawng mung shawng de kalang mi shanhte zawn rai nna anhte a hkum shan a marin marit ai lam ni hta hkan sa let hkum shan a ra ai lam ni hte myit masin a ra ai lam shagu hpe hkan sa galaw nga ga ai. Anhte mung hkum shan lam hku nna kaga masha ni hte maren Karai Kasang a pawt sindawng ai hpe hkrum ging ai ni rai nga ga ai.

TARA JAHPRANG 31:16

Dai Madu gaw Mawshe hpe, “Nang gaw kade n na yang si wa na sha rai nit dai. Nang si mat ai hpang amyu masha ni nye a ntsa e sadi sahka myit n rawng mat nna shanhte hte tawn da ai nye a ga shaka hpe jahten kau na mara ai. Shaloi shanhte ngai hpe kau da nhtawm shanhte shang sha na mungdan hta nawku ai maigan hpara ni hpe nawku wa na mara ai.

TARA JAHPRANG 31:18

Shanhte gaw n hkru n shawp ai amu galaw nna hpara shaje ni hpe nawku ma ai majaw shanhte hpe karum la na matu ningdang kau na we ai.