ESAIA 48:19 - Jinghpaw Common Language Bible 2009

¹⁹ Na a aru arat ni gaw zaibru tum ni zawn law htam wa nna, shanhte gaw galoi mung jahten kau n hkrum na rai nga ai hpe ngai shangang shakang da se ai.”

Jinghpaw Hanson Version Bible

¹⁹ na a aru arat ni zaibru zawn, na a kashu kasha ni gaw hka kau na lung sha zawn tai wa na mara ai: shi a amying gaw nye a man e shamyit kau ai hte htum mat hkrum na n rai.

ESAIA 48:19 ပူးပေါင်းရင်းမြစ်များ

NINGPAWT NINGHPANG 13:16

Na a amyu matu mara ni hpe ngai shalaw jahtam na nngai; kadai mung shanhte yawng hpe dang hti lu na mara ai n rai; dai gaw ga ntsa e taw ai ga nhpu ni hpe n dang hti ai zawn law htam na mara ai.

NINGPAWT NINGHPANG 22:17

Na a amyu matu ni hpe mung lamu na shagan ni shing n rai panglai zaibru ni zawn ngai nang hpe jaw na nngai. Na amyu matu ni mung shanhte a gumlau hpyen ni hpe dang kau lu na mara ai.

1 HKAWHKAM 9:7

shanhte hpe ngai jaw da ai mungdan kaw nna nye a amyu masha ni hpe yeng kau nna, ngai hpe nawku na shara ngu nna ngai majai da sai ndai Nawku Htingnu hpe mung ngai kau da na nngai. Shara shagu hkan nga nga ai masha amyu baw ni mung Israela hpe asawng asang rai nna n gawn n sawn di kau na mara ai.

YOBA 5:25

Nang gaw kashu kasha law law lu wa nna; dai gaw udat shara hta tu ai tsingdu tsingman ni zawn rai nga ai.

SHAKAWN KUNGDAWN 109:13

Shi a aru arat ni yawng hte mung si mat mu ga; shi a mying hpe hpang ban prat hta n dum shajang mu ga.

SHAKAWN KUNGDAWN 9:5

Nang gaw tara maigan ni hpe daw dan nna, tara n lang ai ni hpe shamyit kau nit dai; shanhte hpe galoi mung dum sana n rai.

ESAIA 10:22

Israela amyu masha ni gaw ya rai tim panglai hkin-gau na zaibru tum ni daram law htam nga ma ti mung, ngam ai loi mi chyu sha nhtang wa na mara ai. Sharun jahten ai gaw amyu masha ni a matu mahkawng da ya nga ai, dai gaw hpring tup hkra hkam la lu na mara ai.

ESAIA 14:22

Chyahtum Chyalai N-gun rawng ai dai Madu gaw, “Ngai gaw Babelon hpe gasat nna dai mung hpe jahten sharun kau na we ai. Ngai gaw arai hpa hpe mung, kashu kasha ni hpe mung, asak hkrung nga ai masha langai mi hpe mung tawn da na nngai n rai. Dai Madu Ngai nan tsun ni ai.

ESAIA 44:3

“Ngai gaw hpang gara ai lamu ga hpe ntsin jaw na nngai; hkun hkraw ai lamu ga ntsa e hka shi ni hpe shalwi dat na nngai. Ngai gaw nanhte a kashu kasha ni a ntsa de nye a wenyi ru bun na nngai; na a aru arat ni a ntsa de nye a shaman chyeju ru jaw na nngai.

ESAIA 44:4

Shanhte gaw hka hkru ai tsingdu ni hte lwi hkrat wa ai hka shi makau hkan tu ai u byap hpun ni zawn bawngring wa na mara ai.

ESAIA 48:9

“Amyu masha ni gaw nye a mying hpe shakawn kungdawn lu na matu, nye a masin kahtet ai myit hpe ngai dip da nngai; Ngai gaw nang hpe n jahten kau u ga, hkam sharang nga nngai.

ESAIA 54:3

Nang gaw na a lamu ga jarit ni hpe man maga shagu de maden jat lu na rai ndai; na a amyu masha ni gaw kaga masha amyu baw ni ya madu nga ai mungdan de nhtang wa na mara ai. Ya chyawm gaw katsi katsang re ai mare ni hta amyu masha ni hpring wa na mara ai.

ESAIA 56:5

na a mying gaw nye a Nawku Htingnu hta mung, nang kashu kasha lu ai rai yang dai ni hta grau nna, nye a amyu masha ni a lapran ni hta adum nga na mara ai. Nang gaw galoi mung malap kau hkrum na n rai nga ndai,” ngu nna tsun nga ai.

ESAIA 66:22

Ginding aga ningnan hte sumsing lamu ningnan ni gaw nye a daru magam n-gun hte grin nga na mara ai, dai zawn na a aru arat ni hte na a mying mung agrin nga na ra ai.

ESAIA 9:14

Dai Madu gaw lani mi hta sha Israela ningbaw ni hte amyu masha ni hpe ari jaw na ra ai; shi gaw shanhte hpe dan di ai hte abaw hte ningmai hpe kahtum daw kau na ra ai.

YEREMIA 33:22

Ngai gaw nye a shangun ma Dawi a aru arat ni hpe mung, Lewi amyu bawsang kaw na hkinjawng ni hpe mung shalaw jahtam na nngai, shing rai lamu na shagan ni hte panglai zaibru ni hpe hti yu na matu n mai byin ai zawn, shanhte law htam wa na mara ai,” ngu nna tsun ai.

HOSEA 1:10

Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, “Nanhte gaw nye a amyu masha ni n rai nga myit dai,” ngu nna tsun ai. Rai ti mung, dai nhtoi du du wa ai shaloi shi gaw shanhte hpe, “Nanhte gaw ahkrung nga ai Karai Kasang a kashu kasha ni rai nga myit dai!,” ngu nna tsun na ra ai.

ZEHPANI 1:4

“Ngai gaw Yerusalem mare masha ni hte Yuda mung na amyu masha nlang ni hpe ari jaw na we ai. Ngai gaw Bala hpara nawku daw jau ai jahtum na masat dingsat kumla ni hte shi hpe daw jau nga ai maigan htung tara hkan ai hkinjawng ni hpe pyi, kadai n matsing mat lu hkra jahtum kau na mawe ai.

ROMA 9:27

Israela amyu a lam Esaia jahtau tsun ai gaw, “Israela kashu kasha ni gaw nammukdara makau na zaibru zawn law ma timung, shanhte hta na kau chyen chyu sha hkye hkrang la ai hkrum na mara ai.

TARA JAHPRANG 9:14

Shanhte hpe galoi mung n dum mat hkra ngai shanhte hpe shamyit kau na myit shatawng nga nngai majaw ngai hpe hkap jahkring na hkum shakut et. Dai rai nna shanhte hta grau n-gun ja nna grau law htam ai amyu ngai nang hpe shatai na we ai,’ ngu nna tsun wu ai.

YAWSHU 7:9

Hkanani masha ni hte ndai mung na masha nlang ndai lam hpe na na rai ma ai. Shaloi shanhte gaw anhte hpe sa wang nna masha hkum shagu hte hpe sat kau na mara ai. Dai hpang na a arawng sadang hpung shingkang makawp maga na matu nang kaning di na rai nga n ta?,” ngu nna tsun wu ai.

RUHTA 4:10

Dai hta kaga, Malon a gaida jan, Moba amyu shayi Ruhta mung, nye a madu jan rai sai. Dai lam gaw si mat sai masha wa a dinghku na sut gan arung arai hte shi a dinghku matu mara ni shi a mare hte amyu masha ni a lapran matut htuk shachyaw na lam rai nga ai. Dai ni, nanhte gaw ndai lam yawng a sakse ni rai nga manit dai,” ngu nna tsun wu ai.