ESAIA 45:11 - Jinghpaw Common Language Bible 2009

¹¹ Du na ra ai aten hpe hkrang shapraw ai dai Madu Israela a chyoi pra ai Karai Kasang gaw ning nga tsun ai: “Nye a kashu kasha ni hte seng nna san na ahkaw ahkang mung, ngai galaw ang ai amu ngai hpe tsun na ahkaw ahkang mung nang hta n nga nga ai!

Jinghpaw Hanson Version Bible

¹¹ Israela a Chyoi pra ai wa, dai amyu hpe hpan da ai Yehowa ning nga ai: Byin na ra ai lam ni hpe, ngai kaw san yu mu; nye a kashu kasha ni hte, nye a lata galaw ai amu ni a lam ngai hpe sagawn yu mi.

ESAIA 45:11 ပူးပေါင်းရင်းမြစ်များ

NINGPAWT NINGHPANG 32:26

Dai masha wa gaw, “Ngai wa na ni ai; nhtoi mung htoi wa ra ai,” ngu nna tsun wu ai. Yaku mahtang, “Nang ngai hpe n shaman ya ai rai yang, ngai wa shangun na n rai,” ngu nna htan wu ai.

ESAIA 19:25

Chyahtum Chyalai N-gun rawng ai dai Madu gaw shanhte hpe shaman ya nna, “Egutu mung na nye a amyu masha ni, ngai hpan shalat dat hkrum ai Asuri hte ngai lata la sai Israela amyu masha ni hpe ngai shaman ya na we ai,” nga nna tsun nga ai.

ESAIA 29:23

Ngai nanhte hpe jaw ya na dai kashu kasha ni hpe nanhte mu myit dai shaloi, ngai gaw Israela a chyoi pra ai Karai Kasang rai nga nngai hpe nanhte yin la na rai myit dai. Nanhte ngai hpe shagrau sha-a na myit dai, ngai hpe hkrit kamyin na myit dai.

ESAIA 43:1

Israela e, nang hpe hpan da sai dai Madu gaw, “Hkum hkrit et-ngai nang hpe hkye la na nngai. Na a mying hte ngai nang hpe shaga ni ai-nang gaw nye a rai nga ndai.

ESAIA 43:15

Ngai gaw dai Madu na a chyoi pra ai Karai Kasang rai nga nngai. Israela e, Ngai gaw nang hpe hpan da nngai, ngai gaw na a hkawhkam rai nga nngai,” ngu nna tsun ai.

ESAIA 43:21

Shanhte gaw nye a matu ngai lata san da ai amyu masha ni rai ma ai, shanhte gaw nye a shakawn kungdawn ga ni hpe mahkawn na mara ai!,” ngu nna tsun ai.

ESAIA 43:3

Ngai gaw dai Madu na a Karai Kasang, Israela a chyoi pra ai Karai Kasang, nang hpe hkye la ai wa rai nga nngai. Dai majaw nang hpe shalawt dat na matu, Egutu mung hpe mung, Ehtiopi mung hpe mung, Seba mung hpe mung ngai jaw na nngai.

ESAIA 43:7

Shanhte gaw nye a amyu masha ni nan rai nga ma ai, nye a hpung shingkang a matu ngai shanhte hpe hpan da ni ai,” ngu nna tsun ai.

ESAIA 44:2

Ngai gaw nang hpe hpan da ai dai Madu rai nga nngai; nang shangai wa ai aten kaw nna, ngai nang hpe karum ni ai. Hkum hkrit et; nang gaw nye a shangun ma rai nga ndai, ngai tsaw ra ai hte lata la hkrum ai nye a amyu masha ni rai nga myit dai.

ESAIA 45:10

Anhte gaw anhte a kanu kawa ni hpe, “Nanhte hpa majaw ngai hpe ndai zawn shaprat da myit ni?,” nga nna san gwi nga a ni?

ESAIA 48:17

Nang hpe hkye la ai dai Madu Israela a chyoi pra ai Karai Kasang gaw ning nga tsun ai: “Ngai gaw na a mai kaja lam a matu nang hpe sharin achyin ya mayu ai wa hte nang hkawm sa mai ang ai lam hta nang hpe lakawn la ai wa dai Madu na a Karai Kasang rai nga nngai.

ESAIA 54:5

Na a Hpan madu gaw na a matu madu wa zawn tai na ra ai- Chyahtum Chyalai N-gun rawng ai dai Madu gaw shi a mying rai nga ai. Israela a chyoi pra ai Karai Kasang gaw nang hpe hkye la na ra ai- shi gaw mungkan ga ting a up hkang du wa rai nga ai.

ESAIA 60:21

Na a amyu masha ni gaw ding man ai amu mahkra galaw na mara ai, Mungdan hpe htani htana madu la na mara ai. Nye galu kaba ai lam yawng mayawng hpe madun dan na matu, Ngai shanhte hpe hkai da nna, shanhte hpe lajang da ni ai.

ESAIA 63:16

Nang gaw anhte a kawa rai nga ndai. Anhte a kaji kawa ni rai nga ai Abraham hte Yaku yan gaw anhte hpe n chye mi ai, rai ti mung Madu nang gaw anhte a kawa rai nga ndai, anhte hpe tut nawng hkye mawai la ai wa mung rai nga ndai.

ESAIA 64:8

Rai ti mung, nang gaw dai Madu anhte a kawa rai nga ndai. Anhte gaw kagam ga hte bung ga ai, nang gaw di bu sama wa hte bung nga ndai. Nang anhte hpe hpan da ndai,

ESAIA 8:19

Rai ti mung amyu masha ni gaw kadum kahte nga nna tsun ai mandan bau ai sara ni hte nat myihtoi ni kaw mandan ga hpyi san na matu nanhte hpe tsun na mara ai. Shanhte gaw, “Hpang jahtum e, amyu masha ni gaw wenyi minla ni kaw nat ga san mai ang ai hte hkrung nga ai ni a matu si mat sai ni hte tsun shaga san jahkrup nga ma ai,” ngu nna tsun na mara ai.

YEREMIA 3:19

Dai Madu gaw, “Israela e, ngai gaw nang hpe nye a kasha zawn hkap la mayu nngai ngai gaw nang hpe mungkan ting hta awng sharawng mai ai hte grau nna tsawm htum ai mungdan hpe jaw nngai. Ngai gaw nang hpe ngai hpe wa ngu shaga shangun mayu ai hte ngai kaw na galoi mung bai n kayin mat wa shangun mayu nngai.

YEREMIA 31:1

Dai Madu gaw, “Ngai gaw Israela amyu bawsang ni yawng a Karai Kasang tai nna, shanhte gaw nye a amyu masha ni tai wa ai shaloi dai aten gaw du wa na ra ai.

YEREMIA 31:9

Nye a amyu masha ni gaw hkrap ai hte nhtang wa na mara ai; akyu hpyi ai ni hpe ngai bai woi wa na nngai. Ngai gaw hka kau lam hku ahtu kataw shara n nga hkra tsawm htap manu ai lam hte shanhte hpe woi lakawn wa na nngai. Ngai gaw Israela a kawa rai nga nngai; Ehprim gaw nye a kasha alat rai nga ai,” ngu nna tsun ai.

YEREMIA 33:3

“Ngai hpe shaga e, ngai nang hpe htan ya na nngai; nang hpa mung n chye lu ai mauhpa amu ni hte mau kajawng na zawn re ai amu ni ngai nang hpe tsun dan na de ai.

EZEKELA 36:37

Tsaw Htum ai dai Madu gaw, “Ngai gaw karum la na matu ngai hpe hpyi ai Israela amyu masha ni a nsen hpe kalang mi bai madat ya na nngai. Dai hpang, ngai gaw shanhte hpe sagu hpung zawn shalaw jahtam shangun na nngai.

EZEKELA 39:7

Ngai gaw nye a chyoi pra ai mying ningsang hpe nye a amyu masha ni hpe kaja wa teng teng chye shangun nna nye a mying ningsang hpe htawm hpang de galoi mung myi man sum shangun na n rai. Dai hpang, dai Madu ngai nan Israela a chyoi pra ai Karai Kasang rai nga ai hpe masha amyu baw ni chye lu na mara ai,” ngu nna tsun wu ai.

Daniela 2:18

Shi gaw shanhte hpe Babelon mung na kaga hpaji jaw ai masha ni hte rau sat kau ai n hkrum mat hkra nga, matsan dum la na hte makoi magap da ai amu sanglang dan na matu sumsing lamu a Karai Kasang kaw akyu hpyi na matu tsun wu ai.

HOSEA 1:10

Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, “Nanhte gaw nye a amyu masha ni n rai nga myit dai,” ngu nna tsun ai. Rai ti mung, dai nhtoi du du wa ai shaloi shi gaw shanhte hpe, “Nanhte gaw ahkrung nga ai Karai Kasang a kashu kasha ni rai nga myit dai!,” ngu nna tsun na ra ai.

HOSEA 12:4

Shi gaw lamu kasa hpe kamu dang lu jang, hkrap let shaman chyeju hpyi wu ai. Dai hpang Karai Kasang gaw anhte a kaji kawa Yaku hpang de sa nna Behtela mare e shi hte ga shaga chyai wu ai.

MARKU 11:24

Dai re ai majaw ngai nanhte hpe tsun made ai gaw; nanhte akyu hpyi ai hte lama ma hpyi myit yang, nanhte lu la na ra ai ngu nna kam sham nga mu, shing rai jang nanhte hpyi ai hpa rai ti mung, lu la na marin dai.

2 KORINHTU 6:18

Nanhte a Kawa ngai tai na nngai, rai nna nanhte gaw nye a shadang sha ni hte shayi sha ni tai na marin dai, nga nna chyahtum chyalai n-gun atsam rawng ai Madu gaw atsun nga ai.”

EHPESU 2:10

Hpa majaw nga yang, anhte gaw Karai Kasang e tau hkrau lajang da sai mai kaja ai magam bungli ni hpe galaw na matu, Hkristu Yesu hte langai sha rai nga ai a marang e, Karai Kasang gaw anhte hpe hpan da mani ai.

YAWSHU 10:12

Dai Madu gaw Amori hpyen ni hpe dang kau ai awng padang Israela amyu masha ni hpe jaw ya ai shani, Yawshu gaw dai Madu hpe ga shaga wu ai. Shi gaw Israela amyu masha ni a man e ning ngu tsun wu ai: “Jan e, Gibeon a ntsa e naw la u; Shata e, Aiyalon Kadit e naw hkring u.”

TARA AGYI 16:23

Hpilisti hkawhkam ni gaw shanhte a hpara Dagon hpe shagu hkungga kaba nawng jau na hte padang poi galaw na matu zup hpawng ma ai. Shanhte gaw, “Anhte a hpara gaw anhte a gumlau hpyen Samson hpe dang kau lu ai awng padang ninglaw jaw ya mi ai!,” ngu nna mahkawn shakawn ma ai.