ESAIA 42:16 - Jinghpaw Common Language Bible 2009

¹⁶ “Myi kyaw ai nye a amyu masha ni hpe shanhte galoi mung garai n hkawm yu ai lam hku ngai woi lakawn wa na nngai. Ngai gaw shanhte a nsin hpe nhtoi shatai kau nna marawk marak re ai mung hpe shanhte a man e shatsawm shara da na nngai. Ndai ni gaw nye a ga sadi ni rai nga ai, ngai gaw dai ni hpe n hprai ai sha shatup na nngai.

Jinghpaw Hanson Version Bible

¹⁶ Myi hten ai ni hpe, shanhte n chye ai lam hku ngai lakawn wa nna, shanhte n lai yu ai lam hta woi wa na nngai: shanhte a man na nsin hpe ngai nhtoi shatai nna, magaw ai lam hpe shading na we ai. Dai chyeju ngai galaw nna, shanhte hpe kau da na n rai.

ESAIA 42:16 ပူးပေါင်းရင်းမြစ်များ

SHAKAWN KUNGDAWN 94:14

Madu gaw shi a amyu masha ni hpe kau da na ra ai n rai; shi hte seng ai amyu masha ni hpe kabai kau da na ra ai n rai.

HPAJI NINGLI 1:15

Nang gaw magaw nga ai hpe malan lu ai n rai; dai yang e n nga ai arai ni hpe nang n hti lu nga ndai.

HPAJI NINGLI 7:13

Karai Kasang galaw nu ai amu hpe myit yu mu. Karai Kasang magaw da sai arai hpe kadai wa malan lu nga a ta?

ESAIA 26:7

Madu e, nang gaw mai kaja ai amyu masha ni a matu lam shatsawm ya nga ndai; shanhte hkawm sa ai lam gaw ra nga ai.

ESAIA 29:18

Dai nhtoi du ai shaloi, na lahpang ai ni gaw laika ja ja hti ai nsen na lu na ra ai, nsin kata nga nga ai myi n mu ai ni mung shanhte a myi ni hpaw wa nna mu lu na mara ai.

ESAIA 29:24

Angawk ai amyu masha ni chye la na matu sharin la na mara ai, tut nawng aput angun nga ai ni sharin achyin hkam la lu na matu kabu gara na mara ai.” ngu nna tsun wu ai.

ESAIA 30:18

Ti mung, dai Madu gaw nanhte hpe matsan dum la na matu ala nga ai. Shi gaw teng man ai amu tut nawng galaw ai majaw, nanhte hpe matsan dum la na matu jin jin rai nga ai. Dai Madu hpe kam hpa ai ni gaw a nga ai.

ESAIA 30:21

Nanhte gaw hkra de, pai de lam yit wa ai rai yang, nanhte a shingdu e, “Ndai gaw lam rai nga ai, de a hpang hkan mu,” ngu nna shaga ai shi a nsen hpe na lu na rai myit dai.

ESAIA 32:3

Shanhte a myi hte na ni gaw hpaw wa nna amyu masha ni a ra kadawn lam ni hpe mu wa na mara ai.

ESAIA 35:5

Myi n mu ai ni myi mu wa na mara ai, na lahpang ai ni na na wa na mara ai.

ESAIA 35:8

Dai shara e ningmaw lam kaba langai nga na ra ai, dai hpe, “Chyoi Pra ai Lam Nmaw,” ngu shamying na mara ai. Yubak kap ai ni kadai mung dai lam de galoi mung hkawm sa lu na n rai; dai lam hkan ai ni hta angawk ai ni pyi dai lam yit na ma ai n rai.

ESAIA 40:4

Kadit shagu hpe jahpring mu; bum shagu hpe shara mu. Kawng ni gaw pa layang tai mat nna rawk marak re ai mungdan gaw pri tsawm mat na ra ai.

ESAIA 41:17

“Nye a amyu masha ni hka ntsin tam la na ra ai aten hta mung, shanhte a yuhkraw ni hpang gara nna hkraw wa ai shaloi mung, dai Madu ngai nan shanhte a akyu hpyi ga hpe htan ya na nngai; Israela a Karai Kasang ngai gaw shanhte hpe galoi mung kau da na nngai n rai.

ESAIA 41:3

Shi gaw shanhte hpe hkan shachyut ai hte shim lum ai hku rawt hkawm sa lu nga ai, shi gaw ga ntsa e grai chyang ai hte kabye lai mat wa nga ai.

ESAIA 45:2

“Ngai nan na a lam hpe hkyen lajang ya na nngai, bum ni hte kawng ni hpe shara na nngai. Ngai gaw magri mang chyinghka ni hpe agrawp kau nna, de a hpri htinggrang ni hpe kahtum kadaw di kau na nngai.

ESAIA 45:7

Ngai gaw nhtoi hte nsin hpe hpan nngai; Ngai gaw shaman chyeju hte tsin-yam tsindam hpe shabyin nngai. Dai Madu ngai gaw ndai amu ni yawng mayawng hpe galaw nngai.

ESAIA 48:17

Nang hpe hkye la ai dai Madu Israela a chyoi pra ai Karai Kasang gaw ning nga tsun ai: “Ngai gaw na a mai kaja lam a matu nang hpe sharin achyin ya mayu ai wa hte nang hkawm sa mai ang ai lam hta nang hpe lakawn la ai wa dai Madu na a Karai Kasang rai nga nngai.

ESAIA 52:12

Ndai lang chyawm gaw nanhte tin shapun pru mat wa ra na myit dai n rai; nanhte hprawng shakut ra na myit dai n rai. Dai Madu na a Karai Kasang gaw nanhte hpe lam woi nna kade nde nanhte hpe makawp maga na ra ai.

ESAIA 54:13

“Ngai hkum nan na a amyu masha ni hpe sharin achyin ya na nngai, shanhte hpe ngamu ngamai lam hte ngwi pyaw sim sa lam jaw ya na nngai.

ESAIA 58:10

kawsi kyet ai ni hpe nang lusha jaw nhtawm, ra kadawn ai ni hpe nang myit shadik ya ndai rai yang, nang hpe shinggrup da ai nsin gaw shani chyingtung na nhtoi tai na ra ai.

ESAIA 62:12

Nang gaw, “Karai Kasang a Chyoi Pra Ai Amyu Masha, Dai Madu Hkye Hkrang La Sai Amyu Masha,” ngu nna shaga hkrum na ra ai. Yerusalem gaw, “Karai Kasang Tsaw Ra Ai Mare, Karai Kasang N Kau Da Ai Mare,” ngu nna shaga hkrum na ra ai.

EZEKELA 14:23

dai hpang, ngai galaw sai amu yawng mayawng hte gaw mai kaja lam a matu rai nga ai hpe nanhte chye lu na marin dai.” Tsaw Htum ai dai Madu tsun nu ai.

HOSEA 2:14

Dai re ai majaw, ngai shi hpe nam mali kata de bai woi shalen shang mat wa nna dai yang e, tsaw ra ai ga tsun let shi hpe bai pyaw shangun na nngai.

HOSEA 2:6

Dai re ai majaw, ngai gaw shi a lam pat kau lu hkra, ju hpun ni hte shakum kum nhtawm bunghku langai galaw na nngai.

AMO LAIKA (AMOS) 5:8

Dai Madu gaw Kru Majan hte Nhtoi Gintawng shagan ni hpe hpan da nga sai. Shi gaw nsin hpe shani nhtoi, shani hpe shana kayin kau nga ai. Shi gaw panglai hka ni hpe shaga dat nna dai ni hpe ginding aga ntsa e ru dat nga ai. Shi a amying shingteng gaw dai Madu rai nga ai.

LUKA 3:5

Hkaraw hkamwam shagu kaput lu na rai nga ai, Bum hte kawng shagu hpe daw shara kau lu na rai nga ai; Magaw ai lam ni hpe shading lu na rai nga ai, machyawk marawk re ai lam ni hpe shara lu na rai nga ai.

KASA 26:18

Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

EHPESU 5:8

Moi shawng de nanhte mung ningsin hta nga lai wa yu manit dai; rai ti mung ya e Madu a masha ni tai wa manit dai rai nna nhtoi de du shang manit dai. Dai re ai majaw, nanhte gaw nhtoi a kashu kasha ni zawn hkan galaw nga mu.

HEBRE 13:5

Nanhte a asak hkrung lam hpe gumhpraw marin ai hta n lawm mat shangun ai sha lu ai made hte myit dik nga mu, hpa majaw nga yang, Karai Kasang gaw, “Ngai nang hpe galoi mung n kau da na nngai, ngai nang hpe galoi mung n kabai kau na de ai,” nga nna tsun ai.

YAWSHU 3:4

Nanhte gaw shawng de galoi mung ndai lam hku garai n lai yu myit dai majaw gara lam hku hkawm sa na lam shanhte lam madun dan na mara ai. Rai ti mung Ga Shaka Sumpu de shani lu na myit dai n rai; Sumpu a hpang deng ka-ang hkup gang nna hkan nang na rai myit dai,” ngu nna tsun mu ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.