ESAIA 41:14 - Jinghpaw Common Language Bible 2009

¹⁴ Dai Madu gaw, “Israela e, nang gaw kaji ai hte n-gun kya nga ndai, hkum hkrit et, ngai nang hpe karum na nngai. Israela a chyoi pra ai Karai Kasang Ngai gaw nang hpe hkye la ai wa rai nga nngai.

Jinghpaw Hanson Version Bible

¹⁴ Shingtai ngu ai Yaku e, Israela masha ni e, hkum hkrit myit; ngai nang hpe karum na nngai; Israela Chyoi pra ai Wa gaw na a Hkye hkrang la ai wa rai nga ai,” nga nna Yehowa tsun nga ai.

ESAIA 41:14 ပူးပေါင်းရင်းမြစ်များ

YOBA 19:25

Rai ti mung, sumsing lamu na marai langai ngai gaw hpang jahtum e ngai hpe makawp maga la na matu du sa wa na ra ai hpe ngai chye nngai.

YOBA 25:6

Dai rai yang, masha gaw hpa wa rai ta? Byet, shingtai ni rai nga a ni? Karai Kasang a man e masha gaw hpa manu dan nga a ni?

SHAKAWN KUNGDAWN 19:14

Nye a shingbyi shara hte nye a hkye hkrang la ai Madu e, nye a n-gup ga ni hte nye a sumru ai lam ni gaw na a man e sharawng awng nga u ga law.

SHAKAWN KUNGDAWN 22:6

Rai ti mung, ngai gaw masha langai mi n rai mat ni ai; latung shingtai langai mi rai nga nngai, masha shagu e n kaw n law re ai hte matsat kau ai hkrum nga nngai!

SHAKAWN KUNGDAWN 46:5

Karai Kasang gaw dai mare hta shanu nga nna, dai mare gaw galoi mung jahten kau ai hkrum na n rai; jahpawt manap jau jau e, dai mare hpe shi karum la na matu pru sa na ra ai.

SHAKAWN KUNGDAWN 78:35

Karai Kasang gaw shanhte hpe makawp maga nga ai wa rai nga ai hte; shanhte hpe karum la na matu, Chyahtum Chyalai n-gun rawng ai Madu du sa nga ai lam hpe, shanhte dum nga masai.

ESAIA 35:10

Shanhte gaw kabu gara ai hte Yerusalem de du wa na mara ai, mahkawn mangoi ai hte kabu gara jahtau na mara ai. Shanhte gaw htani htana kabu gara na mara ai, yawn hkyen ai hte sharung shayawt ai kaw na htani htana lawt wa na mara ai.

ESAIA 37:4

Asuri hkawseng gaw asak hkrung nga ai Karai Kasang hpe n kaw n law di na matu shi a hpyen du wa hpe dat dat nu ai. Dai Madu na a Karai Kasang gaw dai zawn re ai n kaw n law re ai lam hpe na nna shanhte hpe shing ngu tsun sai wa hpe ari jaw u ga law. Dai rai nna naw ngam nga ai anhte a amyu masha ni a matu Karai Kasang kaw akyu hpyi ya mi.”

ESAIA 41:10

Hkum hkrit et-Ngai nang hte rau rai nga nngai! Ngai gaw na a Karai Kasang rai nga nngai-nang hpe hpa mung n jahkrit shama u ga! Ngai gaw nang hpe n-gun shaja ya ai hte karum la na nngai; Ngai gaw nang hpe makawp maga ai hte hkye la na nngai.

ESAIA 43:14

Nang hpe hkye la ai dai Madu Israela a chyoi pra ai Karai Kasang gaw, “Nang hpe hkye la na matu, Babelon mung hpe ninghkap lu ai hpyen luksuk langai ngai shangun dat na nngai; Ngai gaw mare chyinghka ni hpe run kau na we ai, dai mung na masha ni a jahtau garu ai nsen hpe hkrap agru ai nsen shatai kau na we ai.

ESAIA 43:3

Ngai gaw dai Madu na a Karai Kasang, Israela a chyoi pra ai Karai Kasang, nang hpe hkye la ai wa rai nga nngai. Dai majaw nang hpe shalawt dat na matu, Egutu mung hpe mung, Ehtiopi mung hpe mung, Seba mung hpe mung ngai jaw na nngai.

ESAIA 44:22

Ngai gaw sumwi zawn na yubak ni hpe ye kau ya ni ai. Ngai hpang de nhtang wa rit; ngai gaw nang hpe hkye la ai wa rai nga nngai,” ngu tsun ai.

ESAIA 44:24

“Ngai gaw nang hpe hkye hkrang la ai dai Madu rai nga nngai; Ngai gaw nang hpe hpan da ai wa rai nngai. Ngai gaw arai yawng mayawng hpe Hpan Da Ai Wa, dai Madu rai nga nngai. Ngai chyu sha sumsing lamu ni hpe kahpyan da nngai; Ginding aga hpe ngai hpan ai shaloi, kadai mung ngai hpe n karum nga ai.

ESAIA 44:6

Israela hpe up nna makawp maga nga ai dai Madu Chyahtum Chyalai N-gun rawng ai dai Madu gaw ning ngu tsun nga ai: “Ngai gaw shawng ningshawng wa hte ahpang jahtum ngu ai Karai Kasang rai nga nngai; ngai hta lai karai shaje n nga nga ai.

ESAIA 47:4

Israela a chyoi pra ai Karai Kasang gaw anhte hpe shalawt mi ai, shi a amying gaw Chyahtum Chyalai N-gun rawng ai dai Madu rai nga ai.

ESAIA 48:17

Nang hpe hkye la ai dai Madu Israela a chyoi pra ai Karai Kasang gaw ning nga tsun ai: “Ngai gaw na a mai kaja lam a matu nang hpe sharin achyin ya mayu ai wa hte nang hkawm sa mai ang ai lam hta nang hpe lakawn la ai wa dai Madu na a Karai Kasang rai nga nngai.

ESAIA 49:26

Ngai gaw nang hpe dip gamyet sha ai ni hpe shada da sat hkat shangun na nngai; shanhte gaw lu nang nna masha sat ai hte n-yun bu na mara ai. Dai hpang amyu masha ni yawng gaw ngai nan dai Madu rai nga nngai hpe mung, nang hpe hkye la ai hte nang hpe shalawt dat ai wa rai nga nngai hpe chye wa na mara ai. Shanhte gaw ngai nan Israela a daru magam n-gun hte hpring ai Karai Kasang rai nga nngai hpe chye wa na mara ai.”

ESAIA 49:7

Israela a chyoi pra ai Karai Kasang hte hkye hkrang la ai wa gaw htum hkra n kaw n law di hkrum ai wa, masha amyu baw ni e n dawng hkrum ai wa hte mung du ni a shangun ma tai nga ai wa hpang de ning ngu tsun nga ai: “Hkawhkam ni gaw nang hpe dat kau dat ai mu na mara ai shanhte a hkungga lara ai hpe madun na matu rawt wa na mara ai; hkawhkam kasha ni mung dai hpe mu na mara ai, shanhte gaw nang hpe shagrau sha-a na matu gum dagup wa na mara ai.” Dai Madu gaw shi a shangun ma hpe lata la nu ai majaw ndai lam byin wa na ra ai; Israela a chyoi pra ai Karai Kasang gaw shi a ga sadi ni hpe shatup na ra ai.

ESAIA 54:5

Na a Hpan madu gaw na a matu madu wa zawn tai na ra ai- Chyahtum Chyalai N-gun rawng ai dai Madu gaw shi a mying rai nga ai. Israela a chyoi pra ai Karai Kasang gaw nang hpe hkye la na ra ai- shi gaw mungkan ga ting a up hkang du wa rai nga ai.

ESAIA 54:8

Ngai gaw hkring mi sha masin pawt let myi man kayin kau da nngai, rai ti mung ngai nang hpe nye a tsaw ra myit htani htana madun nga na nngai.” Shing rai nang hpe hkye la ai dai Madu gaw shing nga tsun ai.

ESAIA 59:20

Dai Madu gaw shi a amyu masha ni hpe, “Ngai gaw nanhte hpe makawp maga na matu mung, yubak kaw na kayin wa ai nanhte yawng hpe hkye la na matu mung Yerusalem de sa wa na nngai.

ESAIA 60:16

Masha amyu baw ni hte hkawhkam ni gaw Nang hpe kanu gaw shi a kasha hpe bau maka ai zawn lanu lahku na mara ai. Dai Madu ngai nan nang hpe hkye la ni ai lam hpe mung, Israela a chyahtum chyalai n-gun rawng ai Karai Kasang nang hpe shalawt dat ai lam hpe mung, nang chye wa na ndai.

ESAIA 63:16

Nang gaw anhte a kawa rai nga ndai. Anhte a kaji kawa ni rai nga ai Abraham hte Yaku yan gaw anhte hpe n chye mi ai, rai ti mung Madu nang gaw anhte a kawa rai nga ndai, anhte hpe tut nawng hkye mawai la ai wa mung rai nga ndai.

YEREMIA 46:27

“Nye a amyu masha ni e, hkum hkrit nga myit, Israela amyu masha ni e, hkum hkrit kajawng nga myit. Ngai gaw nanhte hpe sumtsan mung kaw nna mung, nanhte bawng dung nga ai mungdan kaw nna mung, hkye hkrang la na nngai. Nanhte gaw dum nta buga de bai nhtang wa nhtawm, ngwi pyaw sim sa ai hte nga lu na marin dai; nanhte gaw shim lum nga lu ai hte kadai mung nanhte hpe jahkrit lu na n rai.

YEREMIA 50:34

Rai ti mung, shanhte hpe hkye mawai la ai wa gaw n-gun rawng nga ai wa rai nna, shi a amying gaw Chyahtum Chyalai N-gun Rawng ai dai Madu rai nga ai. Shi hkum nan shanhte a amu hpe lit la nna, mungkan ga de ngwi pyaw sim sa lam jaw ya na ra ai, rai ti mung, Babelon masha ni hpang de gaw ru yak tsin-yam tsindam rai na ra ai,” ngu nna tsun ai.

SHARUNG SHAYAWT 3:57

Nang gaw ngai hpe hpa hkrit tsang shara n nga ra ai nga nna htan ni ai hte tsun nit dai.

Daniela 10:12

Dai hpang shi gaw, “Daniela e, hkum hkrit et. Karai Kasang gaw chye na hkawn hkrang ai lam hkam la na hte nang hkum nan shagrit shanem na matu nang daw dan ai shawng shani kaw nna pyi na a akyu hpyi ga hpe na ya nit dai; Na a akyu hpyi ga hpe htan ya na, ngai du sa nngai.

HOSEA 11:9

Nye a masin kahtet ai majaw ngai nanhte hpe ari jaw na n rai; Ngai gaw Israela hpe bai jahten kau na n rai. Hpa majaw nga yang, ngai gaw masha n rai; Karai Kasang rai nga nngai. Ngai gaw nanhte hte rau nga ai dai Chyoi Pra ai Wa rai nga nngai. Ngai gaw nanhte hpang de masin pawt ai hte du sa na n rai.

MAHTE 7:14

Rai ti mung, asak hkrung ai de hkrang ai chyinghka chyawm gaw, gyip nga ai hte de a lam yak la nga ai rai nna, dai hpe mu tam ai ni n law la ma ai.

LUKA 12:32

Sagu hpung kaji e, hkum hkrit et; hpa majaw nga yang, dai mungdan nanhte hpe jaw na, nanhte a Kawa myit ra sharawng nga ai.

ROMA 9:27

Israela amyu a lam Esaia jahtau tsun ai gaw, “Israela kashu kasha ni gaw nammukdara makau na zaibru zawn law ma timung, shanhte hta na kau chyen chyu sha hkye hkrang la ai hkrum na mara ai.

GALATI 3:13

“Hpun hta e jen da hkrum ai wa kadai rai ti mung Karai Kasang a dagam dala hkrum ai wa rai nga ai,” nga nna Chyum laika hta tsun da nga ai hte maren, Hkristu gaw anhte a matu mara dagam dala hkrum ai wa tai wa ai a jaw e jep ai Tara a dagam dala hkrum ai kaw na anhte hpe hkrang shaw la mi ai.

TARA JAHPRANG 7:7

“Nanhte gaw kaga masha amyu ni hta grau law nga myit dai majaw dai Madu nanhte hpe tsaw ra nna lata la myit dai n rai; nanhte gaw ginding aga ntsa e kaji htum ai amyu baw ni she rai nga myit dai.

TITU 2:14

Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

YAWSHU 17:18

Dai bum ga gaw nanhte a matu rai na myit dai, dai majaw nam maling mi rai nga ti mung, dai nam maling ni hpe hkyen jasan nna, maga mi kaw nna maga mi de htum hkra kaba ai lamu ga hpe madu la na rai myit dai. Hkanani masha ni hpri leng lu nna n-gun ja ai masha ni rai nga ti mung, shanhte hpe gawt shapraw kau na rai myit dai,” ngu nna tsun wu ai.

SHINGRAN 5:9

Shanhte gaw, “Nang gaw dai laika shabawn hpe la na hte, dazik ni hpe gaw kau na ging dan nga ndai. Hpa majaw nga yang, nang sat kau hkrum nit dai rai nna, na a nawng jau si hkam ai hte, amyu bawsang shagu hta na mung, ga amyu shagu hta na mung, Karai Kasang a matu masha ni hpe nang mari la nit dai rai nga ai, nga nna mahkawn ningnan mahkawn ma ai.