ESAIA 36:6 - Jinghpaw Common Language Bible 2009

⁶ Nanhte gaw nanhte hpe karum la na matu Egutu hpe myit mada nga myit dai, rai ti mung dai gaw mai-aw hpe dawhkrawng zawn lang ai hte bung na ra ai. Dai gaw daw mat nna na a lata hpe ju htinggrang ya na ra ai. Dai gaw Egutu hkawhkam wa kaw shamyet shanat ai ni kadai hta mung dai zawn hkrum hkra na ra ai,” ngu nna hkang dat wu ai.

Jinghpaw Hanson Version Bible

⁶ Ya, yu u, nang gaw daw mat ai mai-aw dawhkrawng ngu ai Egutu hkawhkam hpe hpa nga n hka; dai dawhkrawng gaw shamyet shanat ai wa a lata hpe ju htinggrang na ra ai; shing rai, Egutu hkawhkam Hpara-u hpe shamyet shanat ai ni yawng hkrum na mara ai.

ESAIA 36:6 ပူးပေါင်းရင်းမြစ်များ

2 HKAWHKAM 17:4

Rai ti mung laning mi hta, Hoshea gaw karum hpyi na nga, Egutu Hkawhkam So hpang de dat kasa ni hpe shangun dat wu ai. Asuri Hkawseng hpang de shaning shagu jaw ya nga ai ahkun hkanse hpe jahkring kau ya wu ai. Shing rai galaw ai lam hpe Shalmanesa chye jang, Hoshea hpe rim la nna htawng hta sharen da wu ai.

2 HKAWHKAM 18:21

Nang hpe karum la na matu Egutu hpe nang la dingda nga n hka gaw! Rai ti mung dai gaw mai-aw hpe lam hkawm dawhkrawng zawn lang ai hte bung nna dai gaw daw mat ai hte na a lata hpe ju htinggrang ya na ra ai. Shi hpe marai langai ngai kam hpa wa ai shaloi dai gaw Egutu hkawhkam wa zawn hkrum sha na lam rai nga ai,” ngu nna tsun dan wu ai.

SHAKAWN KUNGDAWN 146:3

Shinggyim masha ni a ningbaw ningla ni hpe hkum kam hpa nga et; shinggyim masha kadai mung nang hpe hkye hkrang la lu na n rai.

GA SHAGAWP 25:19

Kyin dut hkrum ai ten hta sadi n dung ai wa hpe shamyet shanat ai gaw, kanga taw nga ai wa hte maya ai hte hten taw nga ai lagaw hte lam hkawm ai zawn rai nga ai.

ESAIA 31:1

Karum la lam a matu Egutu mung de yu sa ai ni gaw dingnye hkrum nga ai! Shanhte gaw Egutu mung a law htam ai hpyen n-gun, gumra ni, hpyen leng ni hte hpyenla ni hpe shamyet shanat nga ma ai. Rai ti mung shanhte gaw dai Madu Israela a chyoi pra ai Karai Kasang hta shamyet shanat ma ai n rai, karum la na matu shi kaw hpyi lajin ma ai n rai.

ESAIA 31:3

Egutu masha ni gaw karai ni n rai ma ai-shanhte gaw shinggyim masha sha rai ma ai. Shanhte a gumra ni gaw shingra tara hta grau ai wenyi n rai ma ai. Dai Madu amu galaw ai shaloi, n-gun ja ai masha amyu baw gaw hpyai rai mat na ra ai, karum la hkrum ai n-gun kya ai masha amyu baw mung di hkrat mat na ra ai. Shan gaw jahten kau ai hkrum na mara ai.

EZEKELA 17:17

Babelon masha ni gaw masha law law hpe sat kau na matu hpyen ninghkap shara ga bum ni hte kaduk ni hpe htu tawn ai shaloi, Egutu hkawhkam a n-gun ja ai hpyen luksuk ni pyi hpyen gasat karum lu ai n rai.

EZEKELA 29:16

Israela gaw shi hpe karum la na matu shanhte hpe galoi mung bai shamyet shanat na mara ai n rai. Egutu hpe kam hpa ai gaw kade sha shut nga sai lam, shanhte hta byin ai maka hpe yu nna Israela hpe myit dum shangun na ra ai. Ngai nan Tsaw Htum ai Madu rai nga ai hpe Israela ni chye lu na mara ai,” ngu nna tsun wu ai.