ESAIA 31:1 - Jinghpaw Common Language Bible 2009

¹ Karum la lam a matu Egutu mung de yu sa ai ni gaw dingnye hkrum nga ai! Shanhte gaw Egutu mung a law htam ai hpyen n-gun, gumra ni, hpyen leng ni hte hpyenla ni hpe shamyet shanat nga ma ai. Rai ti mung shanhte gaw dai Madu Israela a chyoi pra ai Karai Kasang hta shamyet shanat ma ai n rai, karum la na matu shi kaw hpyi lajin ma ai n rai.

Jinghpaw Hanson Version Bible

¹ Israela a Chyoi pra ai wa hpe n mada ai hte, Yehowa hpe n tam ai sha, hpyen karum la na matu, Egutu mung de yu wa nna, law la ai gumra ni hte hpyen leng ni hpe mung, n-gun grai ja ai gumra jawn ai ni hpe mung, shamyet shanat nga ai ni gaw, dingnye lu ma ai.

ESAIA 31:1 ပူးပေါင်းရင်းမြစ်များ

NINGPAWT NINGHPANG 47:17

Dai rai nna shanhte mung Yosep hpang de shanhte a yam nga ni hpe la sa nhtawm, dai gumra, sagu, bainam, dumsu hte lawze ni a matu shi shanhte hpe lusha jaw wu ai. Dai shaning hta shanhte a yam nga yawng a matu lusha hte galai nna shi bau maka lu wu ai.

2 HKAWHKAM LABAU 16:7

Dai aten hta myihtoi Hanani gaw Hkawhkam Asa hpang de sa nhtawm, “Dai Madu na a Karai Kasang hpe kam hpa na malai Suri hkawhkam hpe kam hpa nga ndai majaw Israela hkawhkam a hpyen luksuk ni gaw na a lata kaw na lawt mat wa masai.

2 HKAWHKAM LABAU 16:9

Dai Madu hta sadi sahka myit rawng nga ai ni hpe n-gun atsam jaw ya na nga, shi gaw mungkan ga ting hpe mada azi yu wu ai. Nang chyawm gaw angawk ai hku galaw kau nit dai majaw ya kaw nna hpyen majan tut nawng ahkrum nga na nit dai,” ngu nna tsun wu ai.

YOBA 39:11

Shi a n-gun hpe nang kam nna na a li la ai amu galaw shangun na myit mada lu na n ni?

SHAKAWN KUNGDAWN 20:7

Nkau mi shanhte a majan leng ni hte bai nkau mi shanhte a jawn gumra ni hpe kam hpa nga ma ai; rai ti mung, nanhte gaw anhte a Madu Karai Kasang a daru magam n-gun hpe kam hpa nga ga ai.

ESAIA 10:17

Karai Kasang, Israela a nhtoi gaw wan tai na ra ai. Israela a chyoi pra ai Karai Kasang gaw wan shinglet tai na ra ai, dai gaw lani mi hta sha arai shagu hte hpe hkru kau na ra ai, ju hpun ni hte sumwum ni hpe pyi hkru kau na ra ai.

ESAIA 2:7

Shanhte a lamu ga gaw ja gumhpraw hte hpring nga nna, shanhte a sut gan ni htum ngu, n nga nga ai. Shanhte a lamu ga gaw gumra ni hte hpring nga ai, shanhte a gumra leng ni htum ngu, n nga nga ai.

ESAIA 20:5

Ehtiopi mung hpe kam hpa ai ni hte Egutu mung hte seng nna shakawng gumrawng ai ni gaw mak mat na mara ai, shanhte a myit mada ai lam ni mung gamang mat na mara ai.

ESAIA 22:11

Hka lawng dingsa na lwi hkrat wa ai hka hpe dim sha-ing da na matu nanhte gaw mare kata hta hka lawng ni hpe galaw manit dai. Rai ti mung nanhte gaw moi chyaloi nhkoi kaw nna dai lam yawng hpe yaw shada da ai hte byin wa na matu shabyin ya ai Karai Kasang a ga hpe n madat kau nga myit dai.

ESAIA 30:16

Shing rai na malai, Nanhte gaw gumlau hpyen ni a lata kaw na hprawng lawt lu na matu laram ai gumra ni jawn na she yaw myit dai. Hprawng lawt na matu nanhte lajang ai gaw jaw nga ai! Nanhte gaw nanhte a gumra ni laram nga ai ngu myit nawn la nga myit dai, rai ti mung nanhte hpe hkan shachyut ai ni gaw grau nna lawan na mara ai!

ESAIA 36:6

Nanhte gaw nanhte hpe karum la na matu Egutu hpe myit mada nga myit dai, rai ti mung dai gaw mai-aw hpe dawhkrawng zawn lang ai hte bung na ra ai. Dai gaw daw mat nna na a lata hpe ju htinggrang ya na ra ai. Dai gaw Egutu hkawhkam wa kaw shamyet shanat ai ni kadai hta mung dai zawn hkrum hkra na ra ai,” ngu nna hkang dat wu ai.

ESAIA 36:9

Nanhte gaw nem htum ai Asuri du salang hte pyi n lu shabung ai mi, Egutu masha ni nanhte hpang de hpyen leng ni hte jawn gumra ni shangun dat ya na myit mada nga myit ni?

ESAIA 43:15

Ngai gaw dai Madu na a chyoi pra ai Karai Kasang rai nga nngai. Israela e, Ngai gaw nang hpe hpan da nngai, ngai gaw na a hkawhkam rai nga nngai,” ngu nna tsun ai.

ESAIA 5:12

Na a lusha poi ni hta dawraw tingse, dumbu, sumpyi, larung sumhkran, hte sabyi ntsin ni lawm nga ai. Rai ti mung nang gaw dai Madu hpa galaw nga ai hpe n chye nga ndai,

ESAIA 57:9

Nanhte gaw tinang hkum hta manam hawm ai baw hte sau ni chya nhtawm Molek karai hpe nawku na matu sa wa myit dai. Karai ni hpe tam nna nawku na matu nga, nanhte gaw tsan ai shara, katsan ga du hkra pyi kasa ni hpe shangun nga myit dai.

ESAIA 64:7

Akyu hpyi let nang kaw kayin wa ai masha kadai n nga nga ai; karum la na matu nang kaw kadai n sa nga ai. Nang gaw na hkum hpe anhte kaw na makoi kau nhtawm anhte galaw ai yubak mara ni a majaw anhte hpe kau da nga nit dai.

ESAIA 9:12

Sinpraw maga nga ai Suri mung hte sinna maga nga ai Hpilisti mung ni gaw Israela hpe mayu kau na matu shanhte a n-gup ni hpe mahka tawn da manu ai. Dai rai tim pyi, dai Madu a masin kahtet ai gaw kawp mat ai n rai; shi a lata gaw ari jaw na matu naw ladawn da nga ai.

ESAIA 9:13

Chyahtum Chyalai N-gun rawng ai dai Madu gaw shanhte hpe ari jaw tim pyi, Israela amyu masha ni myit malai ma ai n rai, shanhte shi kaw nhtang wa ma ai n rai.

YEREMIA 17:5

Dai Madu gaw, “Ngai kaw na kayin mat wa ai masha ni hte shinggyim masha ni hte si chye ai masha a n-gun hta kam hpa nga ai ni hpe ngai daw dan na we ai.

YEREMIA 2:13

hpa majaw nga yang, nye a amyu masha ni gaw yubak lahkawng shut hpyit kau manu ai: shanhte gaw mu ai hka hpawk ngu ai ngai kaw na myi man kayin mat wa nhtawm, hka n rawng lu ai hka htung ni hpe htu manu ai.

YEREMIA 37:7

“Egutu hpyen luksuk ni gaw nang hpe karum la na matu pru sa wa ma ai, rai ti mung, dai ni gaw shanhte a dum nta de nhtang mat wa na mara ai.

EZEKELA 17:15

Rai ti mung, Yuda hkawhkam wa gaw gumlau ai hte gumra hte hpyen luksuk kaba karum hpyi na matu Egutu mung de kasa shangun dat sai. Shi awng dang na rai wu ni? Shi gaw dai zawn re ai amu galaw nga ai kaw nna hprawng lawt lu na rai wu ni? Shi gaw ga shaka hpe n run lu ai hte ari ahpri n hkrum na rai wu ni!

EZEKELA 29:16

Israela gaw shi hpe karum la na matu shanhte hpe galoi mung bai shamyet shanat na mara ai n rai. Egutu hpe kam hpa ai gaw kade sha shut nga sai lam, shanhte hta byin ai maka hpe yu nna Israela hpe myit dum shangun na ra ai. Ngai nan Tsaw Htum ai Madu rai nga ai hpe Israela ni chye lu na mara ai,” ngu nna tsun wu ai.

Daniela 9:13

Mawshe a Tara hta ka da ai ari ahpri yawng anhte hpe jaw nga ndai. Rai ti mung, ya chyawm gaw, O Madu anhte a Karai Kasang e, anhte a yubak ni kaw nna kayin mat wa nhtawm na a teng man ai lam hta hkan sa ai hku nang hpe awng sharawng shangun ga ai n rai.

HOSEA 11:5

“Shanhte gaw ngai hpang de nhtang wa na matu ningdang kau ma ai, dai rai nna shanhte gaw Egutu mung de nhtang wa lu na rai ma ai, Asuri gaw shanhte hpe up na mara ai.

HOSEA 11:9

Nye a masin kahtet ai majaw ngai nanhte hpe ari jaw na n rai; Ngai gaw Israela hpe bai jahten kau na n rai. Hpa majaw nga yang, ngai gaw masha n rai; Karai Kasang rai nga nngai. Ngai gaw nanhte hte rau nga ai dai Chyoi Pra ai Wa rai nga nngai. Ngai gaw nanhte hpang de masin pawt ai hte du sa na n rai.

HOSEA 14:3

Asuri gaw anhte hpe galoi mung hkye mawai la lu ai n rai; majan gumra ni mung anhte hpe makawp maga la lu ai n rai. Hpara sumla ni hpe anhte a Karai Kasang rai nga ai ngu nna, anhte galoi mung bai tsun sana ga ai n rai. O Madu e, kam hpa na masha langai mung n lu nga ai ni hpe matsan dum ai myit madun ya mi law.”

HOSEA 7:7

“Shanhte a pawt sindawng ai gaw kahtet kang nga ai rai nna, shanhte gaw shanhte a up hkang du ni hpe sat kau ma ai. Shanhte a hkawhkam ni langai hpang langai lagyim sat kau hkrum nga manu ai, rai ti mung kadai mung karum la na matu ngai kaw akyu n hpyi ma ai.”

HABAKU 1:12

Madu e, nang gaw moi chyaloi nhkoi prat kaw nna Karai Kasang rai nga ndai. Nang gaw nye a Karai Kasang rai nna, chyoi pra ai hte htani htana agrin nga ndai. Dai Madu nye a Karai Kasang hte ngai hpe makawp maga ai wa e, nang gaw Babelon masha ni hpe lata la nna shanhte hpe n-gun shaja ya nga ndai, shing rai shanhte gaw anhte hpe ari jaw lu nga ma ai.

HABAKU 3:3

Karai Kasang gaw Edom kaw nna bai sa wa nga ai; chyoi pra ai Karai Kasang gaw Paran kawng ni kaw na sa wa nga ai. Shi a hpung shingkang sumsing lamu ni hpe ka-up da nga ai; ginding aga gaw shi hpe shakawn kungdawn ai ga hte hpring nga ai.

ZEHKARIA 10:5

Yuda amyu masha ni gaw shanhte a gumlau hpyen ni hpe nmaw lam ntsa na hkumpup kata de kabye bang kau dat ai hte hpyenla ni zawn awng padang hkam la lu na mara ai. Dai Madu gaw shanhte hte rau rai nga ai majaw, shanhte gasat nna gumlau hpyen gumra jawn ai ni hpe pyi dang kau na mara ai.

TARA JAHPRANG 17:16

Dai hkawhkam wa gaw shi a hpyen luksuk a matu gumra law law lu la hkra madu da mai na n rai; Egutu mung de galoi mung bai nhtang sa lu na n rai, nga nna dai Madu shi a amyu masha ni hpe hkang da nu ai majaw dai mung de gumra sa mari na matu amyu masha ni hpe shi sa shangun lu na n rai.

TARA JAHPRANG 20:1

“Gumlau hpyen ni hpe nanhte htim gasat sa wa ai shaloi, gumra hte hpyen leng ni hpe mung, nanhte hta grau law ai hpyen luksuk ni hpe nanhte mu myit dai shaloi, shanhte hpe hkum yu hkrit myit. Nanhte hpe Egutu mung kaw na shaw woi wa ai dai Madu nanhte a Karai Kasang gaw nanhte hte rau rai nga na ra ai.