ESAIA 30:26 - Jinghpaw Common Language Bible 2009

²⁶ Shata gaw ajan zawn htoi tu wa na ra ai, jan a nhtoi gaw mi na hta htam sanit grau htoi wa nna sanit ya na nhtoi gaw kalang mi htoi ai n-gun zawn tai na ra ai. Dai Madu gaw shi a amyu masha ni hpe shakap da ya sai nma ni hpe ahkyen kayawp nna shamai shatsai ya ai shaloi ndai lam byin wa na ra ai.

Jinghpaw Hanson Version Bible

²⁶ Dai hta n-ga, Yehowa gaw, shi amyu a nma hpe kayawp nna, shanhte a hkala nba hpe shamai shatsai ai shani e, shata a nhtoi gaw jan a nhtoi zawn, jan a nhtoi gaw, myi na hta, htam sanit htoi na ra ai.

ESAIA 30:26 ပူးပေါင်းရင်းမြစ်များ

YOBA 5:18

Karai Kasang gaw nang hpe machyi hkra shangun tim ningma ni hpe ahkyen kayawp ya nga ai; shi a lata hte nang hpe machyi hkra ti mung, shi a lata hte shamai shatsai ya nga ai.

ESAIA 11:9

Karai Kasang a chyoi pra ai kawng ngu ai Ziun ntsa e machyi tsin-yam hte n hkru ai amu hpa mung nga na ra ai n rai. Panglai ni gaw hka hte hpring nga ai zawn dai Madu a machye machyang hpaji gaw mungkan ting hta pri rai na ra ai.

ESAIA 19:22

Dai Madu gaw Egutu masha ni hpe ari jaw na ra ai, rai ti mung shi gaw shanhte hpe shamai shatsai ya na ra ai. Shanhte gaw shi kaw kayin wa na mara ai, shi gaw shanhte a akyu hpyi ga ni hpe na ya ai hte shanhte hpe shamai shatsai ya na ra ai.

ESAIA 24:23

Shata gaw sin mat wa na ra ai, ajan mung htoi na ra ai n rai, hpa majaw nga yang, Chyahtum Chyalai N-gun rawng ai dai Madu gaw hkawhkam tai na ra ai. Shi gaw Ziun Bum ntsa na Yerusalem hta up nga na ra ai, amyu masha ni a ningbaw ni gaw shi a hpung shingkang hpe mu lu na mara ai.

ESAIA 30:13

Nanhte gaw mara kap nga myit dai. Nanhte gaw ga kaprang yu wa ai tsaw ai mare bunghku hte bung nga myit dai; nanhte gaw akajawng sha agrawp daw mat na marin dai.

ESAIA 30:14

Nanhte gaw ga di bu langai zawn ga gamang mat na marin dai, shing rai laja lana ga mat ai majaw, wan n-ga hta na matu mung, ntsin ja na matu mung lang ram na di hkyep pyi ngam nga na ra ai n rai.”

ESAIA 33:24

Anhte a mungdan hta shanu nga ai kadai mung machyi nna aput angun ai lam galoi mung nga na ra ai n rai; yubak mara yawng gaw raw dat kau hkrum na ra ai.

ESAIA 57:18

“Shanhte gara hku shamu shamawt ai amu hpe ngai mu se ai, rai ti mung ngai shanhte hpe shamai shatsai na nngai. Ngai shanhte hpe woi awn na nngai, shanhte hpe karum na nngai, Sharung shayawt hkrum nga ai ni hpe ngai shalan shabran na nngai.

ESAIA 58:8

“Dai hpang nye a myi man gaw jahpawt manap na ajan zawn na a ntsa e htoi wa na ra ai, na a ningma ni alawan shamai shatsai ai hkrum na ra ai. Ngai gaw nang hpe hkye la na matu nang hte tut nawng nga nga na nngai; nye a hpung shingkang gaw nang hpe man maga shagu makawp maga la na nngai.

ESAIA 61:1

Tsaw Htum ai dai Madu gaw ngai hpe shi a Wenyi hte jahpring ya ni ai. Matsan mayan ni hpang de kabu gara shiga gun sa na matu mung, Myit daw mat sai ni hpe shamai shatsai ya na matu mung, Bawng dung ai ni hpe raw dat na matu mung, Htawng hta shareng da hkrum ai ni hpe shalawt dat na matu mung, Shi ngai hpe lata la nna shangun dat nu ai.

YEREMIA 30:17

Ngai gaw nanhte hpe kalang mi bai hkam kaja shangun na nngai; Nanhte a gumlau hpyen ni, ‘Ziun gaw kau da ai hkrum nga ai; kadai mung shi hpe lanu lahku ai n rai,’ nga nna tsun ma ti mung, ngai gaw nanhte a ningma ni hpe shamai shatsai ya na we ai. Dai Madu ngai nan tsun ni ai,” nga ai.

SHARUNG SHAYAWT 2:13

O Yerusalem, tsaw ra htum ai Yerusalem e, ngai kaning ngu tsun lu na rai nga a ni? Nang hpe ngai gara hku shalan shabran lu na rai nga a ta? Ndai zawn re ai nni nkri hpe kadai mung n hkam sha yu ma ai. Na a ru yak tsin-yam tsindam gaw nammukdara zawn shadawn masat n lu hkra dam lada nga ai; mai byin na zawn re ai myit mada shara hpa mung n nga nga ai.

HOSEA 6:1

Amyu masha ni gaw, “Anhte dai Madu hpang de nhtang wa saga! Shi gaw anhte hpe machyi shangun nu ai, rai ti mung shi gaw anhte hpe teng teng shamai shatsai ya na ra ai; shi gaw anhte hpe nma shakap ya nu ai, rai ti mung shi gaw anhte a nma ni hpe kayawp ya na ra ai, shi galaw na n rai ni?

HOSEA 6:2

Lahkawng masum ya rai jang, shi anhte hpe shaprawn la na ra ai, anhte gaw shi a man e nga lu na ga ai.

AMO LAIKA (AMOS) 9:11

Dai Madu gaw, “Ngai gaw daw hten mat ai nta langai zawn rai nga ai Dawi a mungdan hpe bai gaw gap da ai shaloi dai nhtoi du wa na ra ai. Ngai gaw de a bunghku ni hpe bai lajang ai hte dai hpe bai gaw gap da na nngai. Ngai gaw dai hpe bai gaw gap ai hte moi na zawn bai de da na nngai.

ZEHKARIA 12:8

Dai aten hta dai Madu gaw Yerusalem hta shanu nga ai ni hpe makawp maga ya na ra ai rai nna, shanhte hta na n-gun kya htum ai wa pyi Dawi zawn n-gun ja ai wa tai wa na ra ai. Dawi a amyu matu ni gaw dai Madu a lamu kasa zawn, rai sa Karai Kasang shi hkum nan zawn shanhte hpe lam woi na mara ai.

ZEHKARIA 14:7

nsin sin na ra ai n rai. Dai yang e shani nhtoi tut nawng htoi nna shana e pyi htoi na ra ai. Dai amu galoi aten e byin wa na ra ai gaw dai Madu chyu sha chye nga ai.

MALAHKI 4:2

Rai ti mung nye a ga madat ai nanhte a matu hkye hkrang la lu ai nye a daru magam n-gun gaw nanhte a ntsa e ajan zawn rawt wa nna, jan a shingkang ni zawn shamai shatsai ai lam du pru wa na ra ai. Nanhte gaw shalawt dat ai hkrum nna, ulawng kaw na pru wa ai dumsu kasha ni zawn kabu gara na rai myit dai.

TARA JAHPRANG 32:39

“‘Ngai hte ngai chyu sha Karai Kasang rai nga nngai; karai shaje kadai mung karai jet n rai nga ai. Ngai sat nna ngai jahkrung nngai, ngai jahpye nna ngai shamai nngai; ngai galaw ai lam hpe kadai e mung ninghkap lu ai n rai.

SHINGRAN 21:23

Dai mare hpe jahtoi ya na matu jan, shata mung n ra nga ai. Hpa majaw nga yang, Karai Kasang a hpung shingkang gaw dai mare hpe jahtoi ya nna, Sagu Kasha gaw de a pyengdin rai nga ai.

SHINGRAN 22:5

Dai mare hta shana mung n nga na ra ai; pyengdin a nhtoi mung, jan a nhtoi mung, shanhte n ra ma ai: hpa majaw nga yang, dai Madu Karai Kasang gaw shanhte hpe nhtoi jaw na mu ai; dai hta n ga, shanhte gaw, hkawhkam tai nna htani htana prat dingsa up nga lu na mara ai.