ESAIA 27:6 - Jinghpaw Common Language Bible 2009

⁶ Dai nhtoi ni du jang, Yaku a aru arat ni ngu ai Israela amyu masha ni gaw hpun zawn aru jung wa nna asi si na matu apu pu majawm wa na mara ai. Ginding aga gaw shanhte shapraw ai nsi naisi hte jahpring na mara ai.

Jinghpaw Hanson Version Bible

⁶ Yaku gaw htawm hpang prat e aru jung na ra ai; Israela gaw tsit lali nna pu majawm na ra ai: shan gaw mungkan ga hpe nsi naisi hte jahpring na mara ai.

ESAIA 27:6 ပူးပေါင်းရင်းမြစ်များ

YOBA 37:12

dai ni gaw Karai Kasang myit ra ai hku shamu hkawm ma ai. Shanhte gaw Karai Kasang hkang da ai hte maren mungkan shara shagu hkan e amu galaw ma ai.

ESAIA 35:1

Nam mali gaw kabu gara na ra ai, nampan ni gaw katsi katsang re ai ga hta pu tsawm nga na ra ai.

ESAIA 35:2

Nam mali gaw mahkawn mangoi ai hte kabu gara jahtau na ra ai; dai gaw Lebanon Bum ni zawn tsawm htap na ra ai. Hkarmela hte Sharon yi hkauna ni zawn ga sau rawng na ra ai. Masha shagu hte gaw dai Madu a hpung shingkang hpe mu lu na mara ai, shi a galu kaba ai hte daru magam n-gun hpe mu lu na mara ai.

ESAIA 37:31

Yuda mung hta naw ngam nga ai ni gaw ga kata de sung sung ru jung nna asi si kung dam wa ai hpun zawn gumring gumrat wa na ra ai.

ESAIA 4:2

Dai Madu gaw hpun lawn hte hpun shagu hte hpe lamu ga hta tu kaba wa shangun ai hte tsawm htap shangun na ra ai. Asak naw hkrung nga ai Israela amyu masha ni gaw dai lamu ga na shapraw ya ai nsi naisi a majaw kabu awng sharawng ai hte gumrawng wa na mara ai.

ESAIA 6:13

Dai mungdan hta marai shi kaw na langai mi naw ngam nga tim pyi, dai wa mung shaza kau ai hkrum na wu ai; shi gaw kran kadawng kau sai wamyi hpun a hpundu zawn tai na ra ai,” ngu nna htan wu ai. (Hpundu gaw Karai Kasang a amyu masha ni a matu nnan hpang la ai ngu ai hpe shaleng dan ai.)

ESAIA 60:22

Kaji htum ai hte grit htum ai na a dinghku pyi Galu kaba nna daru magam n-gun rawng ai amyu baw tai wa na mara ai. Dai aten du ai shaloi, Ngai gaw ndai lam hpe lawan shabyin dat na nngai. Ngai gaw dai Madu rai nga nngai!”

YEREMIA 30:19

Dai yang e nga ai amyu masha ni gaw mahkawn shakawn na mara ai; shanhte gaw kabu gara jahtau garu na mara ai. Nye a shaman chyeju ga a majaw, shanhte law htam mayat maya wa na mara ai; nye a shaman chyeju gaw shanhte hpe shagrau sha-a lam jaw ya na ra ai.

EZEKELA 36:10

Ngai gaw nanhte hpe shalaw jahtam ya na nngai. Nanhte gaw mare ni hta shanu nga lu nna, hten run taw nga sai arai shagu hpe bai gaw gap da lu na marin dai.

EZEKELA 36:8

Rai ti mung, nye a Israela amyu masha ni e, hpun ni gaw Israela bum ni hta e nanhte a matu kalang mi bai tu wa nna asi si wa na ra ai. Nanhte mung kade n na yang, buga dum nta de wa lu na marin dai.

HOSEA 2:23

Ngai gaw nye a amyu masha ni hpe ndai lamu ga hta shanu nga shangun nna shanhte hpe ngamu ngamai shangun na nngai. Ngai gaw “Tsaw ra n hkrum ga ai” ngu tsun hkrum nga ai ni hpe mung, “Nye a amyu masha ni n re” nga nna tsun hkrum ai ni hpe mung tsaw ra myit madun na we ai. Ngai gaw, “Nanhte gaw nye a amyu masha ni rai nga myit dai,” ngu nna tsun na we ai, shanhte gaw, “Nang gaw anhte a Karai Kasang rai nga ndai,” nga nna htan na mara ai.

ZEHKARIA 2:11

Dai aten e, masha amyu baw law law ni dai Madu hpang de sa wa nna, shi a amyu masha ni tai wa na mara ai. Shi gaw nanhte a ka-ang hta shanu nga nna, nanhte hpang de ngai hpe shi shangun dat ai hpe nanhte chye lu na marin dai.

GALATI 3:29

Ya nanhte gaw Hkristu hte seng ai ni rai nga myit yang gaw, nanhte Abraham a aru arat ni rai nga myit dai hte, dai ga ndat nga ai hte maren Karai Kasang kaw na sali wunli hkam la lu na ni rai myit dai.

HPILIPI 3:3

Matu gadoi hkam ai lam majing hpe hkam la ai ni gaw shanhte n rai, anhte she rai nga ga ai. Hpa majaw nga yang, anhte gaw Karai Kasang hpe shi a Wenyi hte nawku daw jau nna Hkristu Yesu hta langai sha tai lu ai asak hkrung lam hta kabu gumrawng ai ni rai ga ai. Anhte gaw shinggan maka kumla shadik poi ni hta n kam hpa ga ai.

SHINGRAN 11:15

Dai hpang sanit ngu na lamu kasa gaw shi a pahtau dum dat wu ai. Shaloi sumsing lamu hta e nsen kaba ngoi pru wa ai gaw, “Mungkan ga na mungdan hpe up na ahkang aya gaw, anhte a Madu Meshia a lata de rai nga sai rai nna, shi gaw htani htana prat dingsa e a up nga na sai law!,” nga nna tsun nga ai.