ESAIA 27:13 - Jinghpaw Common Language Bible 2009

¹³ Dai nhtoi du ai shaloi, Asuri hte Egutu mung hkan bawng dung hkrum nga ai Israela masha ni yawng hpe shaga nhtang la na matu pahtau dum dat na ra ai. Shanhte gaw dai Madu a chyoi pra ai kawng ntsa na Yerusalem hta shi hpe sa nawku na mara ai.

Jinghpaw Hanson Version Bible

¹³ Dai shani e, pahtau kaba dum dat nna, Asuri mung e si mat magang ai ni hte, Egutu mung hta kau da hkrum ai ni gaw, sa du nna, shanhte gaw Yerusalem mare na chyoi pra ai bum ntsa e, Yehowa hpe nawku na mara ai.

ESAIA 27:13 ပူးပေါင်းရင်းမြစ်များ

2 HKAWHKAM 17:6

Hoshea hkaw dung ai jahku ning hta, Asuri hkawseng wa gaw Samari mare hpe gasat la nna Israela masha ni hpe bawng masha hku Asuri mungdan de woi mat wa nga ai. Shanhte hta na nkau mi gaw Hala mare e nga nna, nkau mi mahtang Gozan ginwang na Habora hka makau hku mung, Medi mare ni hkan mung nga nga ma ai.

SHAKAWN KUNGDAWN 47:5

Karai Kasang gaw shi a tingnyang de lung nga ai. Dai Madu lung wa yang, kabu gara jahtau garu ai nsen hte pahtau dum ai nsen ni hpe na lu nga ai.

SHAKAWN KUNGDAWN 81:3

Shata praw hte shagawng shani e, poi galaw na matu, pahtau dum mu.

SHAKAWN KUNGDAWN 89:15

Mahkawn hkawn ai hte nang hpe nawku daw jau ai ni hte; na a matsan dum lama ai myit a nhtoi hta hkawm sa nga ai amyu masha ni gaw kade wa a lu nga ma hka!

ESAIA 11:11

Dai nhtoi du ai shaloi, dai Madu gaw shi a daru magam n-gun hpe kalang mi bai lang nna, Asuri, Egutu, Pahtro, Ehtiopi, Elam, Babelon hte Hamat mung, panglai hkin-gau mayan hte panglai zunlawng ni hkan naw ngam nga ai shi a amyu masha ni hpe buga de woi wa na ra ai.

ESAIA 11:12

Dai Madu gaw bra ayai hkawm nga sai Israela hte Yuda amyu masha ni hpe lamu ga jut mali kaw nna bai woi la ai hte shinggyin da nga ai lam masha amyu baw hpe madun dan na nga, kumla dawnghkawn langai sharawt da na ra ai.

ESAIA 11:16

Israela amyu masha ni Egutu mung na pru wa yang shanhte a kaji kawa ni a matu masat dingsat tai ya ai zawn, Asuri mung hta naw ngam nga ai Israela amyu masha ni a masat dingsat a matu nmaw lam kaba dai shara hta nga nga na ra ai.

ESAIA 18:3

Ginding aga ntsa ting hta nga ai masha shagu hte e, madat mu! Bum pungding ntsa e sharawt da na kumla dawnghkawn hpe yu yu mu! Pahtau dum ai nsen hpe madat mu!

ESAIA 19:21

Dai Madu gaw shi nan Egutu mung masha ni hpe shadan dan na ra ai, shanhte gaw shi hpe yin la nna nawku daw jau wa na mara ai. Shanhte gaw shi hpe shagu hkungga hte mahku hkungga ni nawng jau wa na mara ai. Shanhte gaw shi hta dagam ga sadi tawn da na mara ai, dai ga sadi hte maren shanhte galaw na mara ai.

ESAIA 19:22

Dai Madu gaw Egutu masha ni hpe ari jaw na ra ai, rai ti mung shi gaw shanhte hpe shamai shatsai ya na ra ai. Shanhte gaw shi kaw kayin wa na mara ai, shi gaw shanhte a akyu hpyi ga ni hpe na ya ai hte shanhte hpe shamai shatsai ya na ra ai.

ESAIA 2:11

Masha a gumrawng gumtawng ai gaw htum mat wa nna masha a myit tsaw myit dap ai gaw jahten kau ai hkrum na ra ai nhtoi gaw du wa nga sai. Dai hpang dai Madu chyu sha shagrau shatsaw ai hkrum na ra ai.

ESAIA 2:2

Du wa na nhtoi ni hta Nawku Htingnu dung ai bum gaw yawng hta grau tsaw htum ai bum tai na ra ai, kawng ni yawng hta grau tsaw na ra ai. Amyu baw ni law law dai shara de yan bang wa na mara ai,

ESAIA 2:3

shanhte a masha ni gaw, “Anhte dai Madu a bum a de, Israela a Karai Kasang a Nawku Htingnu nga ai shara de lung wa saga. Shi gaw anhte hpe shi galaw shangun mayu ai lam sharin ya na ra ai; anhte gaw shi lata da nu ai lam ni hta hkawm sa na ga ai. Dai Madu a sharin ai ga Yerusalem kaw nna pru nhtawm; shi gaw Ziun kaw nna shi a amyu masha ni hpe shaga nga ai.”

ESAIA 25:6

Chyahtum Chyalai N-gun rawng ai dai Madu gaw ndai Ziun Bum ntsa e mungkan ga na amyu baw ni yawng a matu lusha poi langai hkyen ya na ra ai, dai gaw dwi sau mu mai htum ai lusha hte hkyeng tsawm ai sabyi machyan lusha poi rai nga ai.

ESAIA 43:6

Shanhte hpe wa shangun na matu dingdung maga de ngai tsun na nngai; shanhte hpe n shingdang lu na matu dingda maga de tsun na nngai. Nye a amyu masha ni tsan ai mung ni kaw na nhtang wa mu ga, mungkan jut shara shagu kaw na nhtang wa mu ga.

ESAIA 49:7

Israela a chyoi pra ai Karai Kasang hte hkye hkrang la ai wa gaw htum hkra n kaw n law di hkrum ai wa, masha amyu baw ni e n dawng hkrum ai wa hte mung du ni a shangun ma tai nga ai wa hpang de ning ngu tsun nga ai: “Hkawhkam ni gaw nang hpe dat kau dat ai mu na mara ai shanhte a hkungga lara ai hpe madun na matu rawt wa na mara ai; hkawhkam kasha ni mung dai hpe mu na mara ai, shanhte gaw nang hpe shagrau sha-a na matu gum dagup wa na mara ai.” Dai Madu gaw shi a shangun ma hpe lata la nu ai majaw ndai lam byin wa na ra ai; Israela a chyoi pra ai Karai Kasang gaw shi a ga sadi ni hpe shatup na ra ai.

ESAIA 56:8

Bawng dung hkrum ai kaw na Israela dum nta de woi wa ai Tsaw Htum ai dai Madu gaw shi a amyu masha ni hte matut mahkai wa na matu kaga masha ni hpe naw woi wa na ra ai, ngu ga sadi tawn da nga sai.

ESAIA 66:18

Ngai gaw shanhte a myit mang ai lam ni hte shanhte a arawn alai sat lawat ni hpe chye nga nngai. Amyu baw ni mahkra a masha ni hpe zup hpawng shangun na matu ngai du sa wa nga nngai. Shanhte rau sa hpawng ai shaloi, nye a daru magam n-gun kaning re ai amu galaw lu ai hpe shanhte mu wa na mara ai,

ESAIA 66:23

Shata Praw shagu hte Bansa Nhtoi shagu hta galaw ai poi hta amyu baw shagu na masha ni gaw ngai hpe nawku na matu ndai Yerusalem de sa wa na mara ai,” nga nna dai Madu tsun ai.

YEREMIA 31:6

Rai sa, Ehprim bum ntsa hkan e sin nga ai masha ni gaw, ‘Ziun bum e nga ai dai Madu anhte a Karai Kasang hpang de anhte rawt lung wa saga, nga nna marawn tsun ai aten du wa na ra ai,’” nga ai.

YEREMIA 43:7

Shanhte gaw dai Madu a hkang da ai ga hpe n madat ai sha Egutu mung Tahpan mare du hkra sa nga nga ma ai.

YEREMIA 44:28

Rai ti mung, nanhte hta na nkau mi gaw si hkrung si htan kaw na hprawng lawt wa nhtawm Egutu mung kaw nna Yuda mung de nhtang wa na marin dai. Shaloi asak naw hkrung nga lu ai ni gaw nye a ga mahtang, shing n rai, shanhte a ga mahtang teng ai n teng ai hpe chye wa na mara ai.

EZEKELA 20:34

Ngai gaw nanhte hpe bra ayai hkawm nga ai mungdan yawng kaw na bai shinggyin jahpawng nna woi wa ai shaloi, nye a daru magam n-gun hte masin kahtet ai lam, ngai nanhte hpe madun dan na nngai.

EZEKELA 20:41

Ngai gaw nanhte hpe shabra kau dat ai mungdan ni kaw nna woi wa nhtawm nanhte hpe shinggyin la ai hte jahpawng da ai hpang, nanhte nat nawng ai shagu hkungga ni hpe hkap la na nngai. Ngai nan chyoi pra nga nngai hpe amyu masha ni mu lu na mara ai.

EZEKELA 39:25

Tsaw Htum ai dai Madu gaw, “Rai ti mung, Yaku a aru arat ni rai nga ai Israela amyu masha ni hpe ya ngai matsan dum la nna, shanhte hpe kalang mi bai ngamu ngamai shangun na nngai. Nye a chyoi pra ai mying ningsang hpe mung ngai maga na nngai.

Daniela 11:45

Shi gaw panglai hte Nawku Htingnu shadun da ai bum yan a lapran hta hkawhkam sum kaba ni hpe pyi sharawt tawn da na ra ai. Rai ti mung dai yang e shi hpe karum la na kadai mung n nga ai sha shi si mat na ra ai.”

HOSEA 11:11

Shanhte gaw Egutu mung na chyang ai ntsa malen u ni zawn mung, Asuri mung na hkrudu ni zawn mung du sa wa na mara ai. Ngai gaw shanhte hpe shanhte a dum nta ni de bai woi la na nngai. Ngai Madu nan tsun ni ai.”

HOSEA 8:13

Shanhte gaw nye a matu shagu hkungga ni nawng ya ai hte hkungga shan ni sha ma ai. Rai ti mung dai Madu ngai nan dai ni hpe awng sharawng ai n rai; ya chyawm gaw shanhte a yubak ni hpe ngai dum nga nna, de a matu shanhte hpe ari jaw na nngai; ngai gaw shanhte hpe Egutu mung de nhtang kau dat na we ai!

HOSEA 9:3

Israela amyu masha ni gaw dai Madu a mungdan hta naw shanu nga lu na mara ai n rai; rai ti mung Egutu mung de nhtang wa nna Asuri mung e hkum pat da ai lusha ni sha na mara ai.

JAW JAU 25:9

Dai hpang shata sanit a nhtoi shi ya shani e ang ai htingrai htingrat ai shani hta masha langai mi hpe mungdan ting de pahtau dum garu shangun na rai myit dai.

MIHKA 7:14

Madu e, nang lata san da sai na a amyu masha ni a matu sagu rem wa tai nga u. Shanhte gaw nam mali kata hkan dumbri dumbra rai nga nga ma ti mung, dai shara hta ga sau kaja ai lamu ga gaw shanhte hpe gawan da nga ai. Bashan hte Gilead mung na udat shara hta lai sai aten shanhte nga ningngai lu ma ai zawn shanhte sa nna sha lu mu ga.

ZEHKARIA 14:16

Dai hpang, Yerusalem hpe gasat sa wa ai masha amyu baw ni hta na naw hkrung nga ai ni langai hte langai gaw Chyahtum Chyalai N-gun rawng ai dai Madu ngu ai Hkawhkam wa hpe nawku na matu mung, Sum Poi galaw na matu mung, shaning shagu dai mare de lung wa na mara ai.

ZEHKARIA 8:7

Nye a amyu masha ni hpe shanhte woi la hkrum ai mungdan ni kaw na hkye mawai la na nngai;

MALAHKI 1:11

Mungkan a jahtum shara mi kaw nna kaga shara mi de du hkra nga ai masha ni ngai hpe shagrau sha-a ma ai. Shanhte gaw ngai hpe manam pyaw ai baw hpe shara shagu hkan nat ai hte hkam la mai ai shagu hkungga ni nawng ya ma ai. Shanhte yawng gaw ngai hpe shagrau sha-a nga ma hka!

MAHTE 24:31

Dai hpang Masha Kasha gaw, pahtau kaba hpe dum shangun nhtawm, shi a lamu kasa ni hpe lamu ga man mali de shangun dat nna, mungkan maga mi kaw nna maga mi du hkra shi a lata la tawn sai ni hpe jahpawng la na maru ai.

LUKA 4:18

“Madu a Wenyi nye a ntsa e nga nga ai: matsan mayan ni hpe Kabu Gara Shiga hkaw tsun dan na matu, Shi ngai hpe namman jaw ya ni ai. bawng dung ai ni hpe shalawt lu na lam, myi kyaw ai ni hpe myi bai mu na lam, hkaw tsun na matu mung, zingri zingrat hkrum ai ni hpe dat dat shangun na hte,

ROMA 10:18

Rai ti mung, masha ni gaw dai mungga hpe nna lu ai gaw teng a ni? ngu n na ngai san mayu nngai. “Kaja wa shanhte na lu ma ai, hpa majaw nga yang dai Chyum Laika hta mungga hkaw tsun ai ni a nsen gaw mungkan ga ting chyam bra wa nna, shanhte a ga ni lamu ga jut shagu de du mat wa sai,” nga nna tsun ai hte maren rai nga ai.

1 HTESALONI 4:16

Dai Madu a jahtau garu ai hte hkang da ai ga, lamu kasa agyi a nsen, Karai Kasang a pahtau nsen hte Madu shi nan sumsing lamu kaw nna yu hkrat wa na ra ai. Hkristu hpe kam sham nna si mat wa ai ni gaw shawng numshawn e hkrung rawt wa na mara ai.

HEBRE 12:22

Nanhte chyawm gaw Sina Bum a malai Ziun Bum hte lamu kasa mun sen nga ai ahkrung nga ai Karai Kasang a mare ngu ai sumsing lamu na Yerusalem mare de du nga manit dai.

SHINGRAN 10:7

Rai ti mung, sanit ngu na lamu kasa a pahtau dum dat ai shaloi, Karai Kasang gaw shi a shangun ma ni ngu ai myihtoi ni hpe tsun shana da sai hte maren, shi a sung htum ai shatawng shada ai lam hpe shadik shatup na ra ai,” nga nna tsun ai.

SHINGRAN 8:2

Shaloi Karai Kasang a man e tsap nga ai lamu kasa sanit hpe ngai mu nngai; shanhte hpe pahtau sanit ya mu ai.

SHINGRAN 8:6

Shaloi pahtau sanit lang da ai lamu kasa sanit gaw, pahtau dum na hkyen nga ma ai.

SHINGRAN 9:14

Dai nsen gaw kru ngu na lamu kasa hpe, “Uhprat hka nu kaba makau e sharen da ai lamu kasa mali hpe raw dat u!,” nga nna tsun ai.