ESAIA 26:11 - Jinghpaw Common Language Bible 2009

¹¹ Nang gaw na a gumlau hpyen ni hpe ari jaw na ra ai lam hpe shanhte n chye ma ai. Madu e, shanhte hpe kaya kahpa jahkrum nna nni nkri hkam sha shangun u; nang hkyen da ya sai ari ahpri shanhte hpe hkam sha shangun u. Na a amyu masha ni hpe nang kade daram tsaw ra nga ndai gaw, shanhte hpe madun dan u law.

Jinghpaw Hanson Version Bible

¹¹ Yehowa e, nang lata sharawt timung, shanhte n matsing ma ai; rai timung, na a amyu a matu nang rawng ai nja nhpra myit hpe, shanhte mada mu nna, kaya hkrum na mara ai: nang hpe hpyen ai ni hkru mat na mara ai.

ESAIA 26:11 ပူးပေါင်းရင်းမြစ်များ

YOBA 34:27

hpa majaw nga yang shanhte gaw shi a hpang n hkan ai hte shi a hkang da ai ga yawng hpe hpa zawn n nawn ya mu ai.

SHAKAWN KUNGDAWN 10:12

Madu e, tara n lang ai masha ni hpe ari jaw u! Nni nkri hkrum sha nga ai ni hpe dum nga u!

SHAKAWN KUNGDAWN 21:8

Dai hkawhkam wa gaw shi a gumlau hpyen yawng mayawng hte hpe rim la na ra ai; shi hpe n dawng ai masha shagu hte hpe mung shi rim kau na ra ai.

SHAKAWN KUNGDAWN 28:5

Dai Madu gaw kaning re ai amu galaw sai shing n rai, shi hpa galaw tawn sai lam ni hpe, shanhte hpa zawn n nawn ya nga ma ai; dai majaw, shi shanhte hpe ari jaw na ra ai, shanhte hpe htani htana shamyit kau na ra ai.

SHAKAWN KUNGDAWN 78:63

Shabrang ni majan hta sat kau ai hkrum nga ma ai; mahkawn ni mung shanhte hpe hkungran la na masha langai mi mung n nga nga ai.

SHAKAWN KUNGDAWN 86:17

Madu e, na a mai kaja ai sakse, ngai hpe madun dan e; nang ngai hpe jaw ya ai shangwi shapyaw lam hte karum la ai lam hpe mu ai shaloi, ngai hpe n ju n dawng nga ai ni kaya kahpa hkrum mat na mara ai.

PRU MAT 9:14

Ndai lang chyawm gaw na a du salang ni hte na a amyu masha ni hpe chyu sha ngai ari jaw na n rai; rai ti mung, nang hpe du hkra pyi ngai ari jaw na we ai. Mungkan ga ting hta ngai zawn re ai langai mi mung n nga ai hpe nang chye lu na rai ndai.

ESAIA 1:31

Wan n-yang hte yihku wan hkru ai zawn, wa ngan n-gun ja ai masha ni mung, shanhte a n hkru ai sat lawat arawn alai hta hten byak mat na mara ai. Dai hten run ai hpe kadai mung jahkring kau lu na ra ai n rai.

ESAIA 10:16

Chyahtum Chyalai N-gun rawng ai dai Madu gaw ya hpum sau nga ai ni hpe ari jaw na matu ana zinli dat dat na ra ai. Shanhte a hkum ni hta wan rawng nga nna, dai gaw hkru chyu hkru nga na ra ai.

ESAIA 10:17

Karai Kasang, Israela a nhtoi gaw wan tai na ra ai. Israela a chyoi pra ai Karai Kasang gaw wan shinglet tai na ra ai, dai gaw lani mi hta sha arai shagu hte hpe hkru kau na ra ai, ju hpun ni hte sumwum ni hpe pyi hkru kau na ra ai.

ESAIA 11:13

Israela mungdan gaw Yuda hpe galoi mung yu manawn sana n rai; Yuda gaw Israela a gumlau hpyen tai sana n rai.

ESAIA 18:3

Ginding aga ntsa ting hta nga ai masha shagu hte e, madat mu! Bum pungding ntsa e sharawt da na kumla dawnghkawn hpe yu yu mu! Pahtau dum ai nsen hpe madat mu!

ESAIA 37:32

Yerusalem hte Ziun Bum ntsa hta naw ngam nga ai amyu masha ni nga nga na mara ai, hpa majaw nga yang, Chyahtum Chyalai N-gun rawng ai dai Madu gaw ndai hku byin shangun na myit daw dan da nu ai.

ESAIA 42:13

Dai Madu gaw share ninghkrin wa zawn gasat na pru sa nga ai; shi gaw majan gasat na matu jin jin rai nna myit katu nga ai. Shi gaw majan hta jahtau nna garu nga ai; shi gaw shi a gumlau hpyen ni hpe ninghkap na matu shi a daru magam n-gun hpe madun nga ai.

ESAIA 44:18

Dai zawn re ai masha ni gaw shanhte hpa galaw nga ai amu hpe chye na na matu nau wa myit n su nga ma ai. Shanhte gaw shanhte a myi ni hpe mung, teng man ai lam hpe chye na shangun ai myit hpe mung pat da nga ma ai.

ESAIA 44:9

Hpara sumla tawk ai ni gaw kaman lila rai nga ma ai, shanhte manu shadan ai hte tawk da ai karai ni gaw asung n shang nga ai. Ndai karai ni hpe nawku ai ni gaw myi kyaw ai hte hpa mung n chye ma ai-shanhte gaw kaya kahpa hkrum na mara ai.

ESAIA 5:24

Dai majaw, Chyahtum Chyalai N-gun rawng ai dai Madu Israela a chyoi pra ai Karai Kasang gaw anhte hpe sharin da ya mi ai hpe nang ningdang kau nga ndai majaw yihku hte tsingdu jahkraw ni nyip mat nna wan hta hkru mat ai zawn na a ru ni tsam mat nna na a nampan pu ni hkraw nyui mat ai hte poi mat wa na ra ai.

ESAIA 59:17

Shi gaw teng man rap ra ai tara ngu ai hpri palawng hpun nna hkye hkrang la ai daru magam n-gun ngu ai hpri gup chyawp chyawp na ra ai. Shi gaw amu ni hpe jaw hkra galaw na hte shut ai hku nni nkri hkam sha nga ai ni a matu ari jaw na hte matai htang na matu grai sharawng awng ai myit hte tinang hkum hta hpun da na ra ai.

ESAIA 60:14

Nang hpe dip gamyet sha lai wa sai ni a aru arat ni gaw Shanhte a hkungga lara ai hpe madun na matu gum dagup na mara ai. Nang hpe lang mi n kaw n law di lai wa sai ni yawng na a lagaw nhpang e nawku na mara ai. Shanhte gaw nang hpe, ‘Dai Madu a Mare,’ ‘Ziun ngu ai, Israela a Chyoi Pra Ai Karai Kasang a Mare,’ ngu nna shaga na mara ai.

ESAIA 63:15

Madu e, na a chyoi pra ai hte hpung shingkang hta shanu nga ai sumsing lamu kaw na anhte hpe gum yu mi. Anhte a matu na a galu kaba ai tsang ai myit gaw kanang rai nga a ta? Na a daru magam n-gun kanang rai nga a ta? Na a tsaw ra myit hte matsan dum ai myit kanang rai nga a ta? Anhte hpe hpa n nawn hkum rai et.

ESAIA 66:15

Dai Madu gaw wan hte rau du sa wa na ra ai. Shi gaw shi pawt sindawng ai ni hpe ari jaw na matu nbung laru a singkaw ni a ntsa e jawn sa wa na ra ai.

ESAIA 66:24

“Shanhte pru sa wa yang, ngai hpe gumlau ai ni a moi mang ni hpe shanhte mu na mara ai. Dai ni hpe sha ai byet ni gaw galoi mung si htum mat na n rai, shanhte hpe hkru ai wan mung galoi mung kyip mat na ra ai n rai. Shanhte hpe mu ai lam gaw masha yawng mayawng a matu matsat shabat tai na ra ai.”

ESAIA 66:5

Shi hpe hkrit kamyin ai hte shi a ga madat mara nga ai nanhte gaw dai Madu ning nga tsun ai ga hpe madat mu: “Nang gaw ngai hta sadi dung nga ndai majaw, na a amyu masha majing na nkau mi ngai hpe n ju ai hte nang hte hpa amu mung galaw na mara ai n rai. Shanhte gaw nang hpe ashu ai hte, ‘Dai Madu gaw shi a galu kaba ai hpe madun nna nang hpe hkye la u ga, shaloi nang kabu gara ai hpe anhte mu lu n-ga,’ ngu nna tsun ma ai. Rai ti mung shanhte nan kaya kahpa hkrum na mara ai!

ESAIA 9:18

Amyu masha ni a tara n lang ai amu gaw ju sumwum hte ju hpun ni hpe hkru kau ai wan hte bung nga ai. Dai gaw wan hkut shadaw shalun dat ai maling htinggram wan zawn jahkru kau nga ai.

ESAIA 9:19

Chyahtum Chyalai N-gun rawng ai dai Madu gaw pawt sindawng nga ai majaw, shi jaw ai ari gaw mungdan ting hkru mat wa ai wan zawn hkru nga nna, amyu masha ni hpe jahten kau nga ai, masha ni gaw shanhte a kahpu kanau ni hpe ngam da na n rai.

ESAIA 9:7

Shi a hkawseng daru magam n-gun gaw matut nna galu kaba wa na ra ai; shi a mungdan tut nawng ngwi pyaw sim sa na ra ai. Shi gaw Hkawhkam Dawi a hkringhtawng dagraw ai wa zawn up hkang nna, shi a daru magam n-gun gaw ding man ai hte teng man rap ra ai hta rudi nga ai rai nna, ya kaw nna jahtum ai aten du hkra agrin nga na ra ai. Chyahtum Chyalai N-gun rawng ai dai Madu gaw ndai amu yawng galaw na matu daw dan da nga sai.

YEREMIA 44:28

Rai ti mung, nanhte hta na nkau mi gaw si hkrung si htan kaw na hprawng lawt wa nhtawm Egutu mung kaw nna Yuda mung de nhtang wa na marin dai. Shaloi asak naw hkrung nga lu ai ni gaw nye a ga mahtang, shing n rai, shanhte a ga mahtang teng ai n teng ai hpe chye wa na mara ai.

YEREMIA 5:3

Dai Madu gaw kaja wa kangka ai hpe tam nga ai. Shi nang hpe kayat ti mung, nang hpa zawn n nawn nga ndai; shi nang hpe agrawp mani kau ti mung, sharin la na matu nang ningdang kau nga ndai. Nang gaw du ja nna na a yubak ni kaw na n kayin wa nga ndai.

MIHKA 5:9

Israela gaw shi a gumlau hpyen ni hpe awng dang kau na ra ai, shanhte yawng hpe jahten shaza kau na ra ai.

MIHKA 7:10

Dai hpang, anhte a gumlau hpyen ni dai lam hpe mu wa nna kaya kahpa hkrum wa na mara ai. Dai gumlau hpyen ni gaw anhte hpe, “Na a Madu Karai Kasang kanang nga nga lit ta?,” nga nna san ashu ai ni gaw lam ka-ang na hkumpup zawn kabye hkrum ai hte sum kadawng mat ai hpe anhte mu lu na ga ai.

MIHKA 7:16

Masha amyu baw ni dai amu hpe mu wa nna shanhte a n-gun atsam yawng hpe dum na malai, dingbai dingna hkrum na mara ai. Shanhte gaw hkrit gari ai hte shanhte a n-gup magum nna shanhte a na ni pat mat na mara ai.

MALAHKI 4:1

Chyahtum Chyalai N-gun rawng ai dai Madu gaw, “Dai nhtoi gaw gumrawng gumtawng ai ni hte n hkru ai masha ni yawng yihku zawn hkru mat ai shaloi du na ra ai. Dai shani e, shanhte hkru mat nna dai yang e shanhte kadai mung ngam nga na mara ai n rai.

MAHTE 25:41

“Dai hpang, shi a pai maga de nga ai ni hpe, ‘Dagam dala hkrum ai ni e, ngai kaw na hka mat wa mu! Nat gumlau hte shi a salung sala ni a matu lajang da ai n htum n wai wan de shang wa mu!

LUKA 16:23

Shing rai katsan ga e nni nkri hkrum let sharawt mada dat yu yang, tsan tsan e Abraham hpe mung, shi a makau e dung nga ai Lazaru hpe mung, mu wu ai.

KASA 28:27

hpa majaw nga yang, ndai amyu gaw myit mak nga nna, shanhte a na lahpang nga ai hte shanhte a myi pat da nga ma lu ai. Lama wa shanhte a myi mu lu nna, shanhte a na na lu ai hte, shanhte a myit hta chye na ai rai yang gaw, shanhte ngai hpang de kayin wa na ma ai rai nna, ngai mung shanhte hpe shamai shatsai ya na ma we ai,’ nga nna Karai Kasang tsun ai,” ngu mu ai.

HEBRE 10:27

Anhte gaw du na ra ai tara daw dan ai lam hte Karai Kasang hte nhtan shai ai ni hpe nat jahten kau na nachying hkrithpa wan hpe hkrit kahpra let ala nga na lam sha nga sai.

1 PETRU 3:16

Rai ti mung dai hpe sumnung shingdi nna hkungga lara ai hte galaw nga mu, Nanhte hpe n kaw n law nga nna roi asawng ai ni gaw nanhte Hkristu a hpang hkan nang ai ni hku nna hkan sa nga ai mai kaja ai arawn alai hpe mu nna shanhte tsun kau ai lam hte seng nna kaya kahpa hkrum mat mu ga, nanhte a myit masin asan sha re ai hku asak hkrung nga mu.

SHINGRAN 19:20

Dai matse labye hte hpawn shi a man e lamik kumla ni hpe galaw dan ai myihtoi masu gaw bawng rim la ai hkrum wu ai. (Dai myihtoi masu gaw, matse labye a masat kumla ni madun dan ai hte masu hkalem ai wa rai nga ai.) Dai matse labye hte myihtoi masu lahkawng yan hkru nga ai wan nawng de chyahkrung jahkrat bang ai hkrum ma ai.

SHINGRAN 3:9

Yu u! Tinang dai Yuda masha rai ga ai nga ti mung Yuda n teng ai sha, Satan a hpung hta lawm ai dai masu ai ni hpe na a lagaw nhpang e ngai shanhte hpe sa naw dingnyawm shangun na mawe ai rai nna, ngai nang hpe tsaw ra nga ai gaw, shanhte chye lu na mara ai.

1 SAMUELA 6:9

Dai hpang, dai hkawm mat wa ai hpe azi yu mu; leng dai Bet Sheme mare maga de yawng sa mat wa ai rai yang gaw anhte a ntsa e Israela a Karai Kasang gaw ndai hkrit hpa ru yak tsin-yam tsindam shangun dat nu ai, dai gaw dai hku lachyum pru nga ai. Rai ti mung, dai hku n rai ai rai yang chyawm gaw, ana zinli hpe shi n shangun dat nga ai hpe anhte chye na ga ai; dai gaw majoi byin wa nna hkrum sha ai lam chyu rai nga ai,” ngu nna htan ma ai.