ESAIA 2:4 - Jinghpaw Common Language Bible 2009

⁴ Shi gaw galu kaba ai masha amyu baw ni a lapran na ndang kalang lam ni hpe jeyang ya na ra ai. Shanhte gaw shanhte a nhtu ni hpe najawn ni, shanhte a nri ni hpe gadoi nhkyi ni dup kau na mara ai. Amyu baw ni majan galoi mung bai baw na n rai, majan a matu galoi mung bai hkyen na mara ai n rai.

Jinghpaw Hanson Version Bible

⁴ Shi gaw amyu ni a lapran e tara dara nna, amyu baw ga daga hpe jeyang na ra ai: shanhte gaw tinang a nhtu ni hpe najawn, tinang a ri ni hpe nhkyau dup kau na mara ai: amyu mi gaw amyu mi hpe nhtu n shaw ai hte, htawm hpang e hpyen majan sharin sana n rai.

ESAIA 2:4 ပူးပေါင်းရင်းမြစ်များ

SHAKAWN KUNGDAWN 110:6

Shi gaw masha ni hpe tara dara na ra ai hte, majan pa ni hta masha mang ni hte jahpring da na ra ai; mungkan ting na hkawhkam ni hpe shi agrawp kau na ra ai.

SHAKAWN KUNGDAWN 46:10

Shi gaw, “Gasat gala ai lam hpe jahkring kau mu, ngai gaw masha amyu baw ni a ka-ang e mung, mungkan ting a Karai Kasang rai nga nngai hpe mung chye mu,” ngu nna tsun wu ai.

SHAKAWN KUNGDAWN 46:9

Shi gaw mungkan ga na majan ni yawng hpe shazim kau nna; ndan ni hpe shi shadaw kau let, ri ni hpe jahten kau nhtawm, hpyen ninggang ni hpe wan hta nat kau nga ai.

SHAKAWN KUNGDAWN 82:8

Karai Kasang e, sa rit, mungkan ga hpe up hkang nga u; amyu baw ni yawng hte gaw na a hkrai rai ma ai.

SHAKAWN KUNGDAWN 96:13

Dai Madu gaw mungkan ga hpe up hkang na matu du sa wa ai shaloi, shi gaw mungkan ga na amyu masha ni hpe teng man rap ra ai tara ni hte up hkang na ra ai.

ESAIA 32:17

Masha hkum shagu gaw jaw ai amu galaw wa na mara ai majaw dai mung e ngwi pyaw sim sa lam hte shim lum lam htani htana nga nga na ra ai.

ESAIA 32:18

Karai Kasang a amyu masha ni gaw tsin-yam tsindam kaw na shalawt hkrum na mara ai, shanhte a dum nta ni ngwi pyaw sim sa ai hte shim nga na mara ai.

ESAIA 33:22

Sanghpaw li hta lang ai hkinghku ni yawng kaman lila rai nga ai; sanghpaw li sumpan ni hpe n lu kahpyan nga ai! Anhte gaw gumlau hpyen luksuk ni a sut gan yawng hpe rim la na ra ai, dai yang e sut gan grai law nga ai majaw lagaw hten ai masha pyi gam bum langai lu la nga ai. Dai Madu shi nan anhte a hkawhkam tai na ra ai; shi gaw anhte hpe up nna anhte hpe makawp maga na ra ai.

ESAIA 42:1

Dai Madu gaw, “Ndai gaw ngai n-gun shaja ya ai nye a shangun ma- ngai lata la ai wa, ngai sharawng awng ai wa rai nga ai. Ngai gaw shi hpe nye a Wenyi hte jahpring ya ni ai, shi gaw masha amyu baw shagu hpang de teng man rap ra ai tara la sa ya na ra ai.

ESAIA 42:3

Shi gaw magaw ai mai-aw hpe shadaw na n rai, kachyi mi sha tu ai wan kawk hpe gawut sat na n rai. Shi gaw agrin nga ai teng man rap ra ai tara hpe yawng mayawng a man e shapraw dan na ra ai.

ESAIA 9:5

Shang gasat ai luksuk a hpyen hkyepdin ni hte shanhte a sai galu ai hpun nba ni yawng, wan hte jahten kau hkrum na mara ai.

ESAIA 9:7

Shi a hkawseng daru magam n-gun gaw matut nna galu kaba wa na ra ai; shi a mungdan tut nawng ngwi pyaw sim sa na ra ai. Shi gaw Hkawhkam Dawi a hkringhtawng dagraw ai wa zawn up hkang nna, shi a daru magam n-gun gaw ding man ai hte teng man rap ra ai hta rudi nga ai rai nna, ya kaw nna jahtum ai aten du hkra agrin nga na ra ai. Chyahtum Chyalai N-gun rawng ai dai Madu gaw ndai amu yawng galaw na matu daw dan da nga sai.

HOSEA 2:18

Dai aten hta, ngai gaw nam na matse labye dusat ni, ntsa malen u ni hte ga shaka tawn da na nngai; dai ni gaw nye a amyu masha ni hpe zingri na mara ai n rai. Dai mungdan na majan laknak yawng hpe mung, nhtu, ndan yawng hpe mung yeng seng kau na nngai; nye a amyu masha ni hpe ngwi pyaw sim sa ai hte shim lum ai hku nga shangun na nngai.

HOSEA 2:20

Ngai gaw nye a ga sadi hpe shatup na nngai, nang hpe nye a matu shatai da na nngai, nang gaw ngai hpe dai Madu hku yin la na rai ndai.

YOELA 3:10

Nanhte a majawn ni hpe nhtu, hpun lakying krum ai nhkyi ni hpe nri hku dup mu. N-gun kya ai wa pyi majan gasat lu na rai nga ai.

YOELA 3:12

“Masha amyu baw ni gaw Tara Jeyang ai Kadit de sa na jin jin rai nga lu na rai ma ai. Dai yang e, dai Madu ngai nan grup yin masha amyu baw ni yawng hpe tara jeyang na matu dung nga na nngai.

MIHKA 4:3

Shi gaw masha amyu baw ni a lapran e mung, ni ai tsan ai shara na daru magam n-gun kaba lu ai ni a lapran e mung ndang kalang lam ni hpe daw dan ya na ra ai. Shanhte gaw shanhte a nhtu ni hpe najawn, shanhte a nri ni hpe nhkyi kasha ni dup kau na mara ai. Masha amyu baw ni majan de galoi mung pru sa na ma ai n rai, majan a matu galoi mung bai hkyen na mara ai n rai.

ZEHKARIA 9:10

Dai Madu gaw, “Hpyen leng ni hpe Israela kaw na la kau nhtawm Yerusalem na gumra ni hpe seng kau na nngai; majan hta lang ai ndan ni hpe jahten kau na nngai. Nanhte a hkawhkam wa gaw masha amyu baw ni a lapran e ngwi pyaw sim sa shangun nna, shi gaw panglai kaw nna panglai du hkra, Uhprat hka nu kaw nna ginding aga a jahtum du hkra up na ra ai,” ngu nna tsun ai.

KASA 17:31

Hpa majaw nga yang Madu lata san da sai wa a lata hte mungkan ga hpe tara malang ai hku daw dan na ninghtoi gaw shi tawn da nu ai rai nga ai. Dai wa hpe si ai kaw na shi hkrung sharawt la ai hte dai lata san da ai lam masha yawng hpe kam ram ai sakse madun dan nu ai,” ngu nna tsun wu ai.

SHINGRAN 19:11

Dai hpang, sumsing lamu hpaw malang nga ai hpe ngai mu nngai. Dai yang e gumra hpraw langai mi nga nga ai rai nna, dai hta jawn ai wa gaw, kangka hte teng man ngu ai wa rai nga ai. Shi gaw ding hpring ai hku tara dara ai hte majan gasat nga ai.

1 SAMUELA 2:10

Dai Madu a gumlau hpyen ni gaw jahten kau ai hkrum na mara ai; shi gaw shanhte hpe ninghkap na matu sumsing lamu kaw na mu shangoi dat ya na ra ai. Dai Madu gaw mungkan ga ting hpe tara jeyang na ra ai; shi gaw shi a hkawhkam wa hpe daru magam n-gun jaw na ra ai, shi gaw shi lata la sai hkawhkam wa hpe awng padang lu shangun na ra ai.”