ESAIA 14:1 - Jinghpaw Common Language Bible 2009

¹ Dai Madu gaw shi a amyu masha Israela hpe kalang mi bai matsan dum la nna shanhte hpe shi a amyu zawn lata la na ra ai. Shi gaw shanhte hpe shanhte a mung ga de bai nga shangun na ra ai. Maigan masha ni mung du sa nna shanhte hte rau dai mung e nga na mara ai.

Jinghpaw Hanson Version Bible

¹ Kaning rai nme law, Yehowa gaw Yaku hpe matsan dum nna, Israela amyu hpe naw lata la nhtawm, shanhte hpe tinang a buga hta nga shangun na ra ai: malet nhprang manam ni mung, shanhte hte rau kanawn nga nna, Yaku a dap hta manoi nga na mara ai.

ESAIA 14:1 ပူးပေါင်းရင်းမြစ်များ

ESHTA 8:17

Hkawhkam wa a ndau shabra laika hti shana dan ai mungdaw shagu hte mare shagu hta bansa ai shani lusha poi galaw let kabu gara awng sharawng nga ma ai. Kaga mung masha law law hte mung shanhte hpe hkrit nga ma ai majaw Yuda masha tai wa nga masai.

SHAKAWN KUNGDAWN 102:13

Nang rawt wa nna, Ziun mare hpe matsan dum na rin dai; dai mare hpe matsan dum na aten du wa nga sai, dai aten gaw ya e nan rai nga ai.

SHAKAWN KUNGDAWN 102:14

Ziun mare gaw jahten sharun kau hkrum nga tim pyi, na a shangun ma ni shi hpe tsaw ra nga ma ai; dai mare hten byak mat ti pyi, shanhte dai hpe matsan dum ai myit nga nga ma ai.

SHAKAWN KUNGDAWN 143:12

Ngai hpe nang tsaw ra nga ndai majaw nye a gumlau hpyen ni hpe shamyit kau u, ngai gaw na a shangun ma wa rai nga nngai majaw, ngai hpe dip gamyet sha nga ai ni yawng hte hpe shamyit kau u law.

SHAKAWN KUNGDAWN 98:3

Shi gaw Israela amyu masha ni hpe shanhte a matu, sadi dung ai hte dinggrin tsaw ra myit hte shi a ga sadi hpe shagrin da nu ai; shing rai, shara shagu hkan na amyu masha ni yawng hte gaw anhte a Karai Kasang a awng padang hpe mu lu nga masai.

ESAIA 19:18

Dai aten du ai shaloi, Egutu mung na mare manga hta Hebre ga shaga wa na mara ai. Dai masha ni gaw Chyahtum Chyalai N-gun rawng nga ai dai Madu a mying nsang hta shanhte a ga shaka dagam da na mara ai. Mare langai mi gaw “Jan a Mare,” ngu shamying hkrum na ra ai.

ESAIA 21:1

Ndai gaw Babelon mung hte seng ai mungga rai nga ai. Zaibru jang hpe lai di nna bung wa ai bung hpoi zawn, tsin-yam tsindam gaw hkrit na zawn re ai mung kaw nna sa wa na ra ai.

ESAIA 27:6

Dai nhtoi ni du jang, Yaku a aru arat ni ngu ai Israela amyu masha ni gaw hpun zawn aru jung wa nna asi si na matu apu pu majawm wa na mara ai. Ginding aga gaw shanhte shapraw ai nsi naisi hte jahpring na mara ai.

ESAIA 41:8

Rai ti mung, nang nye a shangun ma Israela e, nanhte gaw ngai lata la sai amyu masha ni rai nga myit dai; nanhte gaw nye a jinghku Abraham a aru arat ni rai nga myit dai.

ESAIA 41:9

Ngai gaw nang hpe ginding aga a jahtum kaw na woi la nngai; Ngai gaw nang hpe tsan htum ai jut shara ni kaw na shaga la nna nang hpe, ‘Nang gaw nye a shangun ma rai ndai,’ ngu nna tsun sai. Ngai nang hpe ningdang kau ai n rai, nang hpe lata la ni ai.

ESAIA 44:1

Dai Madu gaw, “Nye a shangun ma, Israela, ngai lata la sai nye a amyu masha, Yaku a aru arat ni e, ya chyawm gaw, nye a ga madat mu.

ESAIA 45:14

Dai Madu gaw Israela hpe, “Egutu hte Ehtiopi mung na sut gan ni gaw na a rai na ra ai, hkum shingyan galu ai Seba masha ni gaw na a mayam ni tai na mara ai; shanhte gaw nang kaw hpri sumroi gyit ai hte hkan nang na mara ai. Shanhte gaw na a man e gum dagup nna mara hpyi nem let, ‘Karai Kasang gaw nang hte rau rai nga ai, shi chyu sha Karai Kasang rai nga ai.

ESAIA 47:1

Dai Madu gaw, “Babelon e, na a tingnyang kaw na yu wa nna, ga ntsa na nhpu hta dung nga u. Nang gaw hkawn sek langai zawn, kalang mi mung ka-up la n hkrum yu ai mare langai rai nga ndai, rai ti mung nang gaw galoi mung nu nu nai nai rai nga ai n rai! Ya chyawm gaw nang mayam rai nga nit hka!

ESAIA 49:10

shanhte gaw galoi mung kawsi hpang gara hkrum na mara ai n rai. Ajan hte zaibru jang a kahtet kang ai gaw shanhte hpe hkra na ra ai n rai, hpa majaw nga yang, shanhte hpe tsaw ra ai wa gaw shanhte hpe lam woi na ra ai. Shi gaw shanhte hpe hka hpawk ni nga ai de woi sa na ra ai.

ESAIA 49:13

Sumsing lamu ni e, mahkawn mangoi mu! Ginding aga e, kabu gara jahtau u! Bum ni mahkawn garu nga mu ga! Dai Madu gaw shi a amyu masha ni hpe shalan shabran na ra ai; shi gaw nni nkri hkam sha nga ai shi a amyu masha ni hpe matsan dum na ra ai.

ESAIA 49:15

Dai rai nna dai Madu gaw, “Numsha gaw tinang a chyu chyu ai ma hpe malap kau nna shi shangai ai ma hpe n tsaw ra mai nga a ni? Kanu gaw tinang a kasha hpe malap kau tim pyi, ngai gaw nang hpe galoi mung malap kau na nngai n rai.

ESAIA 49:25

Dai Madu gaw, “Dai gaw ning rai byin wa na lam rai nga ai. Hpyenla wa a bawng masha ni gaw lawt wa lu na mara ai, gumshem ai wa a lanep gaw rim la hkrum na ra ai. Ngai hpe gasat ai wa kadai hpe mung ngai gasat na nngai, ngai gaw na a ma kaji ni hpe hkye mawai la na nngai.

ESAIA 49:7

Israela a chyoi pra ai Karai Kasang hte hkye hkrang la ai wa gaw htum hkra n kaw n law di hkrum ai wa, masha amyu baw ni e n dawng hkrum ai wa hte mung du ni a shangun ma tai nga ai wa hpang de ning ngu tsun nga ai: “Hkawhkam ni gaw nang hpe dat kau dat ai mu na mara ai shanhte a hkungga lara ai hpe madun na matu rawt wa na mara ai; hkawhkam kasha ni mung dai hpe mu na mara ai, shanhte gaw nang hpe shagrau sha-a na matu gum dagup wa na mara ai.” Dai Madu gaw shi a shangun ma hpe lata la nu ai majaw ndai lam byin wa na ra ai; Israela a chyoi pra ai Karai Kasang gaw shi a ga sadi ni hpe shatup na ra ai.

ESAIA 54:3

Nang gaw na a lamu ga jarit ni hpe man maga shagu de maden jat lu na rai ndai; na a amyu masha ni gaw kaga masha amyu baw ni ya madu nga ai mungdan de nhtang wa na mara ai. Ya chyawm gaw katsi katsang re ai mare ni hta amyu masha ni hpring wa na mara ai.

ESAIA 55:7

N hkru ai ni gaw shanhte a asak hkrun lam hpe kau da nna shanhte a myit mang ai lam galai shai kau nga mu ga. Shanhte gaw dai Madu anhte a Karai Kasang hpang de kayin wa mu ga; shi gaw matsan dum chye ai wa rai nna mara raw dat ya na matu lawan nga ai.

ESAIA 56:3

Dai Madu a amyu masha ni kaw hkan nga sai maigan masha wa gaw, “Dai Madu gaw ngai hpe shi a amyu masha ni hte rau n nawku shangun na re,” nga nna n tsun hkrup u ga. Unuk gaw shi hta kashu kasha n lu sai, shi gaw galoi mung Karai Kasang a amyu masha daw chyen mi pyi n tai lu na sai, ngu nna galoi mung n myit la mai ang nga ai.

ESAIA 60:10

Dai Madu gaw Yerusalem hpe, “Maigan masha ni gaw na a bunghku ni hpe bai gaw gap wa na mara ai, Shanhte a hkawhkam ni nang hpe daw jau na mara ai. Nye a masin kahtet ai majaw, ngai nang hpe ari jaw ni ai. Rai ti mung, ya chyawm gaw ngai nang hpe myi man shapa ya ai hte matsan dum ai myit madun dan na nngai.

ESAIA 60:14

Nang hpe dip gamyet sha lai wa sai ni a aru arat ni gaw Shanhte a hkungga lara ai hpe madun na matu gum dagup na mara ai. Nang hpe lang mi n kaw n law di lai wa sai ni yawng na a lagaw nhpang e nawku na mara ai. Shanhte gaw nang hpe, ‘Dai Madu a Mare,’ ‘Ziun ngu ai, Israela a Chyoi Pra Ai Karai Kasang a Mare,’ ngu nna shaga na mara ai.

ESAIA 66:20

Shanhte gaw na a amyu masha ni yawng hpe ngai hpang de la sa ai kumhpa hku masha amyu baw ni a lata kaw na woi wa na mara ai. Israela masha ni gaw htung hte maren san seng ai hkungga ban ni hta lusha hkungga ni bang nna Nawku Htingnu de la sa ma ai zawn shanhte gaw dai ni hpe gumra ni, lawze ni, gawla-uk ni, hpyen leng ni hte daw htaw ai leng ni hta htaw nna nye a chyoi pra ai kawng nga ai Yerusalem de la sa na mara ai.

YEREMIA 16:15

Shing nga dagam na malai, Israela amyu masha ni hpe dingdung mung hte ngai shanhte hpe shaden shabra kau dat ai kaga mungdan ni yawng kaw na woi shapraw wa ai Karai Kasang gaw ahkrung nga ai ngu shanhte ngai hpe dagam na mara ai. Ngai gaw shanhte a kaji kawa ni hpe jaw da ai mungdan, shanhte a mungdan de bai woi wa na nngai. Dai Madu ngai nan tsun ni ai,” nga nna tsun ai.

YEREMIA 29:14

Rai sa, nanhte ngai hpe mu tam na marin dai; ngai gaw nanhte hpe nanhte a mungdan hta bai wa shanu shangun na nngai. Ngai gaw nanhte hpe mungdan shara shagu hkan na hte nanhte hpe ngai shaden shabra kau dat ai shara shagu hkan na shinggyin la ai hte nanhte hpe shaden shabra kau ai mungdan kaw na ngai bai woi wa na nngai, nga nna tsun ai. Dai Madu ngai nan tsun ni ai,’ nga ai.

YEREMIA 30:8

Chyahtum Chyalai N-gun Rawng ai dai Madu gaw, “Dai shani du jang, shanhte a du hta mara da ai kandang hpe ngai agrawp daw kau nna shanhte a sumri ni hpe raw kau ya na nngai. Shanhte gaw maigan masha ni a mayam galoi mung tai na masai n rai.

YEREMIA 31:4

Ngai gaw nanhte hpe kalang mi bai de da na mawe ai. Nanhte gaw kalang mi bai chying bau ni dum let kabu gara ai hte ka manawt lu na rai myit dai.

YEREMIA 50:33

Chyahtum Chyalai N-gun rawng ai dai Madu gaw, “Israela hte Yuda amyu masha ni gaw dip gamyet sha hkrum nga ma ai hte zingri zingrat hkrum nga masai. Shanhte hpe rim tawn da ai ni yawng gaw shanhte hpe ni htum ai hku sin tawn nga ma ai hte shanhte hpe wa shangun ma ai n rai.

YEREMIA 51:51

Nanhte gaw, ‘Nawku Htingnu kata na chyoi pra ai shara ni hpe maigan masha ni e madu sha kau mu ai majaw, anhte gaw myi man sum ai hte kaya kahpa di hkrum nga saga ai; anhte gaw dik hkra garen gari rai hkam sha saga ai,’ ngu nna tsun myit dai.

EZEKELA 16:60

Rai ti mung, nang naw kaji nga yang, ngai nang hte tawn da ai ga shaka hpe ngai shagrau nga na nngai; ngai gaw nang hte htani htana agrin nga na ra ai ga shaka hpe tawn da na nngai.

EZEKELA 47:22

dai gaw nanhte a htani htana hte seng ai lamu ga sali rai nga ai. Nanhte a lapran e hkan matep nga ai hte dai lamu ga hta shangai wa sai kashu kasha ni lu ai maigan masha ni mung, nanhte dai lamu garan ai shaloi, lamu ga sali hkam la na rai ma ai. Shanhte hpe Israela mungchying masha ni hte maren masat la nna Israela amyu bawsang ni hte rau lamu ga sali hpe hpaida da la lu na ma ai.

ZEHKARIA 1:17

Lamu kasa gaw ning ngu hkaw tsun na matu ngai hpe tsun da nga ai: Chyahtum Chyalai N-gun rawng ai dai Madu gaw shi a mare ni bai ngamu ngamai wa ai hte lang mi bai Yerusalem hpe karum la let, shi madu da ai mare zawn shatai na nga tsun ai.”

MALAHKI 1:11

Mungkan a jahtum shara mi kaw nna kaga shara mi de du hkra nga ai masha ni ngai hpe shagrau sha-a ma ai. Shanhte gaw ngai hpe manam pyaw ai baw hpe shara shagu hkan nat ai hte hkam la mai ai shagu hkungga ni nawng ya ma ai. Shanhte yawng gaw ngai hpe shagrau sha-a nga ma hka!

LUKA 1:54

Anhte a ji wa ni hpe jaw da sai ga sadi hte maren, shi a shangun ma Israela hpe lanu lahku nu ai.

LUKA 2:32

Maigan amyu ni a man e na a myit ra ai lam shadan dan na nhtoi hte, na a amyu Israela a matu hpung shingkang jaw ya na lam rai nga ai,” nga nna tsun ai.