EHPESU 2:4 - Jinghpaw Common Language Bible 2009

⁴ Rai ti mung Karai Kasang gaw matsan dum ai myit grai law htam nna shi anhte hpe tsaw ra ai myit kaba la nga ai rai nna,

Jinghpaw Hanson Version Bible

⁴ Shing rai, tawt lai ai bungli a jaw e, anhte chyasi rai nga ga timung, nachying matsan dum chye ai Karai Kasang gaw, shi a tsawra ai myit kaba a marang e anhte hpe tsawra nna,

EHPESU 2:4 ပူးပေါင်းရင်းမြစ်များ

NEHEMIA 9:17

Shanhte gaw ga n madat ma ai; shanhte gaw nang galaw ai amu yawng mayawng hpe malap kau ma ai; shanhte gaw nang galaw dan sai mauhpa amu ni hpe malap kau manu ai. Shanhte gaw gumrawng ai myit hte mayam tai nga ai Egutu mung de shanhte hpe woi nhtang sa wa na matu ningbaw langai san da ma ai. Rai ti mung nang gaw mara dat ya ai Karai Kasang rai nga ndai; nang gaw chyeju myit rawng nna tsaw ra ai hte hkam sharang lu ai wa rai nga ndai. Na a matsan dum ai myit gaw galu kaba nga nna; nang gaw shanhte hpe kau da nga ai n rai.

SHAKAWN KUNGDAWN 145:8

Madu gaw tsaw ra ai hte matsan dum ai wa rai nga nna; shi gaw pawt sindawng ai hpe hkam sharang ai hte dinggrin tsaw ra myit hte hpring nga ai.

SHAKAWN KUNGDAWN 51:1

Karai Kasang e, na a dinggrin tsaw ra myit a majaw, ngai hpe matsan dum la e. Na a galu kaba ai matsan dum myit a majaw, nye a yubak ni hpe arut kau ya e.

SHAKAWN KUNGDAWN 86:15

Rai ti mung, Madu e, nang gaw tsaw ra matsan dum ai Karai Kasang rai nga ndai; nang gaw tut nawng e hkam sharang ai, matsan dum ai hte sadi sahka nga ai wa rai nga ndai.

SHAKAWN KUNGDAWN 86:5

Nang gaw anhte a ntsa e, mai kaja nga nna mara dat kau ya nga ndai; nang kaw akyu hpyi nga ai ni yawng a matu, na a dinggrin tsaw ra myit hpe hpring hpring tsup tsup hkam sha shangun nga ndai.

PRU MAT 33:19

Dai Madu gaw, “Nang hte na a man e nye a hkik hkam ai hpung shingkang nhtoi yawng hpe ngai shalai dat nna, nye a chyoi pra ai amying hpe ngai shapraw na we ai. Ngai gaw dai Madu rai nga nngai rai nna ngai lata la ai ni hpe matsan dum ai wa hpe matsan dum ai myit ngai madun dan na nngai.

ESAIA 63:7

Ngai gaw dai Madu a n-gaw nwai ai tsaw ra myit a lam atsun nga na nngai; anhte a matu shi galaw dan sai amu yawng a majaw ngai shi hpe shakawn kungdawn na nngai. Shi a matsan dum ai myit hte dinggrin tsaw ra myit a majaw, shi gaw Israela amyu masha ni hpe nhpaw n-ya shaman ya nu ai.

YEREMIA 31:3

ngai gaw tsan tsan kaw nna shanhte hpang de dan pru ni ai. Israela amyu masha ni e, ngai gaw nanhte hpe tut nawng e tsaw ra nga nngai majaw nanhte hpe nye a dinggrin tsaw ra myit matut madun na nngai.

Daniela 9:9

Anhte nang hpe gumlau kau saga tim, nang gaw matsan chye dum ai hte mara raw dat ya ai wa rai nga ndai.

YONA 4:2

Dai rai nna shi gaw, “Madu e, ngai nta kaw na garai n pru sa wa yang, nang ndai hku galaw na nit dai ngu nna ngai tsun ni ai n rai ni? Dai re ai majaw nye a matu kaja htum ai lam rai u ga ngu nna Spain mung de hprawng mat wa nngai! Nang gaw tsaw ra ai, matsan dum ai, myit galu kaba ai, n gaw n wai ai hte galoi mung ari jaw na hkyen ai myit hpe galai kau na jin nga chyalu re ai Karai Kasang rai nga ndai.

LUKA 1:78

Anhte a Karai Kasang gaw tsaw ra matsan dum ai myit hte hpring tsup nga ai: shi a hkye hkrang la ai chyeju nhtoi gaw lamu ntsa na jan shingkang zawn anhte a ntsa e du nna;

ROMA 10:12

Hpa majaw nga yang, dai hta yawng lawm nga ai rai nna, Yuda ni hte tara maigan masha ni a lapran e lachyen lahka n nga ai sha dai Madu gaw yawng mayawng a ntsa na Madu rai nga ai hte shi hpe shaga ai ni yawng mayawng hte hpe shaman chyeju nhpaw n-ya jaw ya mu ai.

ROMA 2:4

Shing n rai nang gaw shi a n taw n tsang ai matsan dum ai chyeju hpe mung, myit sharang ai hte myit galu kaba ai hpe mung, nang n kaw n law di da wu ni? Karai Kasang gaw nang hpe myit malai lu shangun na matu lam madun woi awn nga ai rai nna shi gaw matsan dum lama ai Madu rai nga ai lam kaja wa nang chye nga ndai.

ROMA 5:8

Rai ti mung, anhte yubak kap ai ni naw rai nga yang Hkristu gaw anhte a matu mara si hkam sai. Ndai hku nna Karai Kasang gaw anhte hpe gade wa tsaw ra mi ai lam madun dan mani ai.

ROMA 9:23

Dai hta n ga Madu gaw shi a matsan dum lama ai lam hkam la na masha ni ngu ai anhte hpe shi a n hpaw n ya re ai hpung shingkang hpe mu lu shangun na matu ra sharawng nga ai. Dai ni gaw Karai Kasang a hpung shingkang hkam la lu na matu hkyen lajang shajin da sai masha ni rai nga ma ai.

EHPESU 1:7

Hpa majaw nga yang, Hkristu a si hkam ai lam a majaw, anhte shalawt dat ai hkrum ga ai; dai gaw nanhte a yubak mara ni hpe raw dat kau ya ai lam rai nga ai.

EHPESU 2:7

Shi ning rai galaw ai lam gaw Hkristu Yesu hta anhte hpe tsaw ra myit madun ai hta Madu a chyeju gaw laklai nna galu kaba nga ai lam htawm hpang prat dingsa e masha ni mu chye lu na matu rai nga ai.

EHPESU 3:8

Ngai gaw Karai Kasang a masha ni hta kaji dik ai wa hta pyi grit nem ai wa rai nga nngai; rai ti mung, Karai Kasang gaw Hkristu a chyahtum chyalai re ai ngamu ngamai lam hte seng ai dai Kabu Gara Shiga hpe maigan masha ni hpang de la sa na matu mung,

2 HTESALONI 2:13

Madu a tsaw ra ai hpu nau ni e, nanhte a majaw anhte gaw Karai Kasang a chyeju hpe tut nawng e shakawn kungdawn lu na ra ga ai. Hpa majaw nga yang, Karai Kasang gaw, nanhte hpe chyoi pra ai masha shatai ai Wenyi a n-gun atsam hte mung, teng man ai hpe kam sham ai nanhte a makam masham hte mung, shawng na hkye hkrang la hkrum ai ni hku nna nanhte hpe lata la sai.

1 TIMOHTI 1:14

Anhte a Madu gaw shi a n taw n tsang re ai chyeju nye a ntsa e ru jaw bun ya nna Hkristu hte langai sha tai nna asak hkrung nga ai majaw anhte lu la ang ai makam masham hte tsaw ra ai myit ngai hpe jaw ni ai.

2 TIMOHTI 1:9

Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai.

1 PETRU 1:3

Anhte gaw Madu Yesu Hkristu a Kawa Karai Kasang hpe shagrau sha-a nga ga; hpa majaw nga yang, shi a matsan dum ai myit kaba hte Yesu Hkristu hpe si mat ai kaw nna bai hkrung sharawt la ai a marang e shi anhte hpe asak sumdam ningnan bai jaw da mani ai rai nna anhte hta ahkrung nga ai myit mada shara jahpring shatsup ya mani ai.