Daniela 9:18 - Jinghpaw Common Language Bible 2009

¹⁸ O karai Kasang e, anhte a ga madat ya mi; anhte hpe mada yu nna anhte hkrum sha ai tsin-yam tsindam hpe mung, na a mying gang ai mare a nni nkri hpe mung mu ya e. Anhte gaw jaw ai amu galaw ga ai majaw n rai, nang nan matsan dum ai wa rai nga ndai majaw sha nang kaw anhte akyu hpyi nga ga ai.

Jinghpaw Hanson Version Bible

¹⁸ Nye a Karai Kasang e, na a na kayin nna, madat mara ya e; na a myi hpaw nna, anhte katsi katsang rai nga ai hpe mung, na a mying gang ai mare hpe mung, mada yu u; anhte gaw tinang dinghpring ai hpe hpa nna tawngban ga ai, n rai; na a chyeju myit kaba hpa nna she, tawngban nga ga ai.

Daniela 9:18 ပူးပေါင်းရင်းမြစ်များ

1 HKAWHKAM 8:29

Nawku na matu nang lata san da nit dai ndai shara na ndai Nawku Htingnu hpe shani shana sin yu nga u law. Ndai Nawku Htingnu de ngai myi man yawng let akyu hpyi ai ga hpe na ya e law.

2 HKAWHKAM 19:16

Ya chyawm gaw Madu e, anhte hta hpa byin nga ai hpe mada yu u. Ahkrung nga ai Karai Kasang e, nang hpe hkawseng Senahkerib tsun ai n kaw n law asawng asang re ai ga mahkra hte hpe madat mara ya e.

SHAKAWN KUNGDAWN 116:1

Dai Madu gaw nye a nsen hpe na ya ai majaw, ngai shi hpe tsaw ra nga nngai; shi nye a akyu hpyi ai ga ni hpe madat ya nga ai.

SHAKAWN KUNGDAWN 25:6

O Madu e, chyaloi nhkoi kaw nna nang madun dan nga sai na a matsan dum ai myit hte dinggrin tsaw ra myit hpe adum nga u.

PRU MAT 3:7

Dai hpang dai Madu gaw, “Nye a amyu masha ni Egutu mung hta kade daram mazut ai hku sharu shatsang hkrum nga ma ai hpe ngai mu ni ai; shanhte a mayam hpareng ni a lata kaw na hkye la hkrum na matu hkrap sharung ai nsen ni hpe mung ngai na ni ai. Shanhte hkrum sha ai nni nkri yawng a lam hpe ngai chye nngai;

ESAIA 37:17

Ya chyawm gaw, Madu e, anhte a ga na ya nna anhte hta hpa byin nga ai lam hpe mada yu u. Ahkrung nga ai Karai Kasang nang hpe Senahkerib n kaw n law nga nna tsun nga ai ga yawng mayawng hpe madat u law.

ESAIA 43:7

Shanhte gaw nye a amyu masha ni nan rai nga ma ai, nye a hpung shingkang a matu ngai shanhte hpe hpan da ni ai,” ngu nna tsun ai.

ESAIA 64:12

Madu e, ndai lam ni yawng hpe nang gaw hpa n galaw ai sha nga na wu ni? Nang gaw dai lam ni hpe hpa mung n galaw ai sha anhte hkam sharang lu ai hta jan nna anhte hpe nni nkri jahkrum na ngu nu ni?

ESAIA 64:6

Anhte yawng gaw yubak mara kap ai ni rai nga saga ai; anhte a kaja htum ai magam bungli ni pyi npawt kaw nna ndung hkren matsat shabat amu hkrai rai nga ai. Anhte galaw shut ai yubak mara ni a majaw, anhte gaw nyui mat nna nbung e shapoi kau ai hpun lap ni zawn rai nga ga ai.

YEREMIA 14:7

Nye a amyu masha ni gaw ngai hpe, ‘Anhte a yubak mara ni anhte hpe mara shagun tim pyi, Madu e, na a ga sadi hte maren, anhte hpe karum la mi. Anhte gaw nang kaw na law law lang kayin mat wa saga ai; anhte gaw nang hpe shut hpyit kau saga ai.

YEREMIA 14:9

Nang gaw hpa majaw mau mak mat ai hte karum la na matu n-gun n rawng ai hpyenla wa zawn tai nga n ta? Kaja wa tsun ga nga yang, Madu e, nang gaw anhte hte rau nga nga ndai! Anhte gaw na a amyu masha ni rai nga ga ai; anhte hpe hkum kau da nga et,’” ngu nna jahtau tsun ma ai.

YEREMIA 15:16

Nang ngai hpe tsun shaga ai ga hkum shagu hte hpe ngai madat se ai. Chyahtum Chyalai N-gun Rawng ai Madu Karai Kasang e, nang ngai hpe madu da nga ndai majaw na a mungga ni nye a myit kraw lawang hta kabu gara ai hte awng sharawng ai hte jahpring ya nit dai.

YEREMIA 25:29

Nye a mare hta jahten sharun ai amu hpe ngai shawng hpang dat na nngai. Shanhte gaw ari jaw ai n hkrum na ga ai nga nna shanhte myit nawn nga ma ni? N rai law, ngai gaw ga ntsa ting hta nga ai masha amyu baw ni yawng a ntsa e hpyen majan shabyin dat na rai nga nngai majaw, shanhte mung ari hkrum sha na mara ai. Chyahtum Chyalai N-gun Rawng ai dai Madu ngai nan tsun ni ai.

YEREMIA 36:7

Dai Madu gaw ndai amyu masha ni hpe shi a hkrit hpa pawt sindawng ai hte myit kahtet let jahkrit shama nu ai majaw, shanhte gaw n hkru n shawp ai amu kaw na kayin wa nhtawm dai Madu hpe akyu hpyi dam wa ma nhten.”

YEREMIA 37:20

Ya chyawm gaw, nye a madu hkawhkam wa e, ngai tsun ai ga hpe madat mara nna ngai hpyi lajin ai hpe lajang ya e law. Chyeju hte ngai hpe Yonahtan a nta htawng de hkum nhtang wa shangun e. Nang lama nhtang wa shangun ai rai yang, ngai gaw dai shara hta teng teng si mat na ring ngai,” ngu nna tsun nngai.

EZEKELA 36:22

“Dai rai nna, Tsaw Htum ai dai Madu ngai nan Israela amyu masha ni a matu san da ai mungga shanhte hpe htawn tsun u. Israela amyu masha ni a majaw ndai amu hpe ngai tau nna galaw ai n rai, nanhte du hkawm nga sai mungdan shagu hta nye a chyoi pra ai mying ningsang hpe jahpoi kau ya ai majaw sha tau nna ngai galaw nga nngai.

EZEKELA 36:32

Israela e, ngai gaw ndai lam yawng mayawng hpe nanhte a matu galaw ya nga ai lam n re ai hpe nanhte hpe chye shangun mayu nngai. Nanhte galaw ai kaya myi man jasum ai amu nanhte hpe ngai chyim shangun mayu nngai. Tsaw Htum ai dai Madu ngai nan tsun ni ai.”

Daniela 9:7

Madu e, nang gaw jaw ai amu hpe tut nawng galaw nga ndai; rai ti mung, anhte chyawm gaw anhte a hkum ni hpe nan tut nawng myi man jasum kau nga saga ai. Shanhte gaw nang hta sadi n dung nga ma ai majaw, ni, tsan ai mungdan ni de shabra kau hkrum nga ai Yuda mung hte Yerusalem mare hkan shanu nga ai anhte yawng hte Israela masha ni yawng hta ndai lam teng sha byin nga ai.

BU HKAWM 6:27

Dai Madu gaw, “Shanhte nye a mying gang nna Israela amyu masha ni hpe shaman ga tsun ai rai yang, ngai mung shanhte hpe shaman ya na mawe ai,” ngu nna tsun wu ai.

1 KORINHTU 1:2

Korinhtu mare na Karai Kasang a Hpung hta lawm nga ai ni hte, shara shagu hkan na, anhte hte shanhte a Madu rai nga ai Madu Yesu Hkristu hpe nawku daw jau nga ai Hkristu Yesu hta e, Karai Kasang a chyoi pra ai amyu masha tai na matu shaga la hkrum ai ni yawng hpang de ga shana dat ga ai.