Daniela 4:32 - Jinghpaw Common Language Bible 2009

³² Nang gaw shinggyim masha uhpung kaw na shaden kau hkrum ai hte matse labye dusat ni hte rau nga let sanit ning tup dumsu zawn tsingdu tsingman sha na rai ndai. Shaloi Tsaw Htum ai Karai Kasang gaw masha mungdan ni a ntsa e up ai daru magam n-gun lu nna shi lata san da ai kadai hpe mung shi jaw lu nga ai hpe nang yin la na rai ndai,” ngu nna sumsing lamu kaw na nsen ngoi pru nga ai.

Jinghpaw Hanson Version Bible

³² mungdan gaw na a lata na sit mat sai; nang gaw masha kaw na shapraw kau ai hkrum nna, pa ga na ashu ashan ni hte rau shanu nga na ndai: Tsaw Htum ai Wa gaw masha mungdan hpe up nna, jaw mayu ai wa hpe dai jaw kau nga ai, nang chye matsing ai aten du hkra, nang gaw usu zawn tsingdu sha nna, aten sanit na ntsa e lai wa na ra ai,” nga ai.

Daniela 4:32 ပူးပေါင်းရင်းမြစ်များ

2 HKAWHKAM LABAU 33:13

Karai Kasang mung Manashe a hpyi nem ai ga hkap la ai rai nna Yerusalem mare de bai nhtang wa shangun nga ai hte bai up hkang shangun ai hku mahtai jaw ya wu ai. Dai Madu gaw Karai Kasang rai nga ai lam Manashe hpe chye na shangun nga ai.

YOBA 42:2

Madu e, nang gaw daru magam n-gun yawng hte hpring ai wa rai nna; nang ra ai lam magup hpe nang galaw lu nga ndai gaw ngai chye nngai.

YOBA 9:12

Shi ra ai arai hpe shi la nga ai, kadai mung shi hpe jahkring lu ai n rai; Kadai mung shi hpe, “Nang hpa galaw nga n ta?,” ngu nna san gwi nga ai n rai.

SHAKAWN KUNGDAWN 115:3

Anhte a Karai Kasang gaw sumsing lamu hta nga nga ai; shi ra ai hku hpa lam hpe mung shi galaw nga ai.

SHAKAWN KUNGDAWN 135:6

Sumsing lamu hte ginding aga hta e mung, panglai ni hte sung la ai shara shagu hkan e mung, shi myit ai hte maren, galaw nga ai.

PRU MAT 8:10

Hkawhkam wa gaw, “Nye a matu hpawt de mahtang hpyi nem ya e,” ngu nna htan wu ai. Mawshe gaw, “Nang san ai hte maren ngai galaw na rai nna anhte a Madu Karai Kasang zawn re ai karai kaga n nga ai hpe nang chye lu na rai ndai.

PRU MAT 9:14

Ndai lang chyawm gaw na a du salang ni hte na a amyu masha ni hpe chyu sha ngai ari jaw na n rai; rai ti mung, nang hpe du hkra pyi ngai ari jaw na we ai. Mungkan ga ting hta ngai zawn re ai langai mi mung n nga ai hpe nang chye lu na rai ndai.

PRU MAT 9:29

Mawshe gaw shi hpe, “Mare kaw nna ngai pru mat wa ai shaloi jang, nye a lata hpe sharawt nhtawm dai Madu hpe hpyi nem ya na nngai; shaloi jang mu ngoi ai gaw hkring mat nna sin marang ni mung dai hkan e htu sana n rai. Dai Madu gaw ginding aga hpe madu nga ai hpe nang chye lu na rai ndai.

ESAIA 37:20

Ya chyawm gaw, Madu anhte a Karai Kasang e, Asuri masha ni a lata kaw na anhte hpe hkye mawai la mi, shaloi mungkan ga na masha amyu baw ni yawng gaw nang chyu sha Karai Kasang rai nga ai hpe chye lu na mara ai.”

ESAIA 40:15

Masha amyu baw ni gaw dai Madu a matu kaman lila rai nga ai, dai ni gaw hka kahte mi hta pyi grau ma ai n rai; sumtsan ga na zunlawng ni gaw ga nhpu zawn tsang nga ai.

ESAIA 40:17

Masha amyu baw ni gaw shi a matu kaman be be rai ma ai.

ESAIA 45:3

Ngai nang hpe sin ai hte shim ai shara e makoi da ai sut gan arung arai ni jaw na de ai; dai hpang ngai gaw dai Madu rai nga nngai hte Israela a Karai Kasang gaw nang hpe amying hku shaga nu ai hpe nang chye na rin dai.

YEREMIA 27:5

“Nye a galu kaba ai daru magam n-gun, lahpum marai hte ngai gaw mungkan ga hpe mung, shinggyim masha hpe mung, ginding aga ntsa e shanu nga ai yam nga mahkra hpe mung, hpan tawn da ni ai; ngai lata la sai masha kadai hpe mung dai ni hpe ngai jaw ya nngai.

Daniela 2:21

Shi gaw aten ahkying hte ladaw ni hpe hkang nga ai; shi gaw hkawhkam ni hpe hkaw dung shangun nna bai shayu kau nga ai; shi gaw hpaji byeng-ya hte chye na hkawn hkrang ai nyan jaw ya nga ai.

Daniela 4:31

Ya shi a n-gup kaw na ga tsun garai n htum yang, “Hkawhkam Nebuhkadneza e, ngai tsun ai ga madat u! Na a hkawhkam daru magam n-gun gaw nang kaw na dawm kau ya nga sai.

Daniela 5:21

Shi a myit masin gaw dusat langai zawn tai mat nna, shinggyim uhpung hta na shapraw kau ai hkrum nga ai. Shi gaw nam na lawze shazai ni hte rau nga nna, dumsu usu zawn tsingdu sha let numri hkrat ai gangbang shara hkan yup nga ai. Hpang jahtum e, shi gaw Tsaw Htum ai Karai Kasang shi lata la sai kadai hpe rai ti mung masha mungdan ni yawng hpe up hkang na ahkang jaw lu nga ai hpe shi yin la nga ai.

YAWSHU 4:24

Ndai amu a majaw ginding aga ntsa na masha shagu gaw dai Madu a daru magam n-gun kade wa galu kaba nga ai hpe chye la lu nhtawm, dai Madu nanhte a Karai Kasang hpe htani htana shagrau sha-a lu na rai myit dai,” ngu nna tsun wu ai.