Daniela 11:36 - Jinghpaw Common Language Bible 2009

³⁶ “Suri hkawhkam gaw shi myit ra ai hte maren galaw na ra ai. Shi gaw kaga karai kadai hta mung grau kaba nga ai: Tsaw Htum ai Karai Kasang hta pyi grau kaba nga ai nga nna shi shakawng dan na ra ai. Karai Kasang shi hpe ari jaw ai aten du hkra, shi gaw ndai amu galaw na ra ai. Karai Kasang gaw shi shatawng shada nu ai hte maren tup hkrak galaw na ra ai.

Jinghpaw Hanson Version Bible

³⁶ “Dai hkawhkam wa gaw shi myit ra ai hte maren galaw nna, hpara ni mahkra ntsa e tinang hkum hpe shagrau shatsaw ai hte, hpara ni a Karai Kasang hpe shinggan kau nna, mauhpa ga tsun na ra ai; pawt sindawng hpring ai aten du hkra, shi awng wa na ra ai; kaning rai nme law ndat da ai lam gaw dik wa na ra ai.

Daniela 11:36 ပူးပေါင်းရင်းမြစ်များ

SHAKAWN KUNGDAWN 136:2

Hpara ni yawng hta kaba htum ai Karai Kasang hpe chyeju dum shakawn mu; shi a tsaw ra myit htani htana agrin nga ai.

SHAKAWN KUNGDAWN 33:10

Dai Madu gaw masha amyu baw ni a shatawng shada ai lam ni hpe shanut kau ya nga ai; shanhte a maw mawn ai lam ni n awng dang u ga, shi shanhte hpe hkum shingdang da nga ai.

GA SHAGAWP 19:21

Masha gaw lam magup hpe maw mawn mai nga ai; Madu a myit ra ai hte maren sha byin wa na ra ai.

ESAIA 10:23

Rai sa, Chyahtum Chyalai N-gun rawng ai Tsaw Htum ai dai Madu gaw dai mungdan ting hta jahten shabyak ai amu hpe shi tsun da sai hte maren shabyin dat na ra ai.

ESAIA 10:25

Kade n na yang, ngai nanhte hpe ari jaw nga ai hpe jahtum kau na nngai, dai hpang ngai shanhte hpe jahten kau na nngai.

ESAIA 10:5

Dai Madu gaw, “Asuri e, ngai masin pawt nga ai ni hpe ari jaw na matu hkawn langai zawn Asuri hpe ngai lang nngai.

ESAIA 14:13

Nang gaw sumsing lamu de lung nna tsaw htum ai shagan ni a ntsa e na a tingnyang tawn da na matu, myit daw dan da nit dai. Nang gaw karai ni zup hpawng ai dingdung maga na dai bum ntsa hta e hkawhkam langai zawn dung lu na hpe myit yu nit dai.

ESAIA 14:14

Nang gaw Chyahtum Chyalai N-gun rawng ai wa zawn sumwi ni a ntsa de lung na tsun nit dai.

ESAIA 26:20

Nye a amyu masha ni e, nanhte a dum nta kata de shang nna chyinghka la mu. Karai Kasang a pawt sindawng ai kawp mat ai aten du hkra, tinang hkum nan loi hkring mi makoi nga mu.

ESAIA 30:33

Moi chyaloi nhkoi kaw nna Asuri hkawseng hpe nat na matu wan htung kaba shara mi hkyen da nga ai. Dai gaw sung ai hte dam lada rai nna hpun ni hte sumpum shatsaw da nga ai. Dai Madu gaw dai shara hta wan shachyi na matu wan shinglet gawut bang dat na ra ai.

ESAIA 46:10

Ngai gaw shawng npawt kaw nna byin pru sai amu hpe tau tsun ni ai; moi chyaloi nhkoi kaw nna byin wa na lam hpe ngai tau tsun ni ai. Nye a yaw shada lam ni galoi mung hkrat sum na n rai nga ai hpe mung, ngai galaw na ngu shatawng shada ai lam magup hte hpe ngai galaw ai hpe mung tsun ni ai.

ESAIA 57:9

Nanhte gaw tinang hkum hta manam hawm ai baw hte sau ni chya nhtawm Molek karai hpe nawku na matu sa wa myit dai. Karai ni hpe tam nna nawku na matu nga, nanhte gaw tsan ai shara, katsan ga du hkra pyi kasa ni hpe shangun nga myit dai.

EZEKELA 28:2

Shi gaw, “Si chye ai masha wa e, Tsaw Htum ai dai Madu ngai nan Turu hkawhkam hpe tsun nga ai ga hpe htawn tsun u: Gumrawng ai hte shakawng shakat nga ndai, karai langai tai na ngu, nang tsun ndai. Nang gaw panglai hka ni shinggrup da ai tingnyang ntsa e karai langai zawn dung na nngai ngu, tsun ndai. Nang gaw karai langai tai lu na zawn nawn nga ndai, rai ti mung, n rai law, nang gaw karai n rai, si chye ai masha sha rai nga ndai.

EZEKELA 35:13

Ngai gaw zai ai hte shakawng shakat ai hku ngai hpe ninghkap tsun ai na a ga hpe na ni ai.”

Daniela 11:16

Dai gasat shang wa ai Suri masha wa gaw shi myit ra ai hte maren, hkap daw ai lam n hkrum ai sha htim bang wa na ra ai. Shi gaw Ga Sadi Mungdan hta tsap lu nna shi a daru magam n-gun hta dai hpe tsep kawp up lu na ra ai.

Daniela 11:3

“Dai hpang share shagan ai hkawhkam langai gaw pru wa na ra ai. Shi gaw kaba la ai hkawseng mungdan hpe up hkang nna shi ra ai hku galaw na ra ai.

Daniela 11:37

Dai hkawhkam wa gaw shi a kaji kawa ni daw jau ai karai hpe mung, numsha ni yu tsaw ra ai karai hpe mung, hpa zawn n nawn ya na ra ai. Shanhte hta na kadai hta mung shi grau galu kaba nga ai nga nna myit nawn la nga ai majaw dai karai shagu hpe teng teng hpa zawn n nawn na ra ai.

Daniela 12:7

Dai lamu kasa gaw lamu de lata lahkawng sharawt nhtawm Htani Htana a Karai Kasang a mying ningsang hta dagam shaka let ga sadi tawn da wu ai. Shi gaw, “Dai aten gaw masum ning a chyen mi rai na ra ai. Karai Kasang a amyu masha ni hpe zingri zingrat ai aten htum jang, ndai lam yawng mayawng byin wa na ra ai,” ngu nna tsun ai ga hpe ngai na nngai.

Daniela 2:47

Hkawhkam wa gaw, “Na a Karai Kasang gaw karai ni yawng hta galu kaba htum ai wa rai nna, hkawhkam ni a madu, makoi magap da ai amu ni hpe shadan dan ai wa rai nga ai. Ndai makoi magap ai amu hpe nang tsun shaleng dan lu nit dai majaw ndai lam ngai chye ni ai,” ngu nna tsun wu ai.

Daniela 4:35

Shi gaw mungkan masha ni hpe hpa mi n re ai zawn yu nga ai; sumsing lamu na lamu kasa ni hte mungkan ga na masha ni gaw shi up hkang ai n pu hta taw nga ai. Kadai mung shi a sharawng awng ai hpe ninghkap lu ai n rai; shi galaw ai amu hpe kadai mung ga san n shapraw lu nga ai.

Daniela 5:19

Shi gaw nachying galu kaba nga ai rai nna masha amyu baw ni yawng, amyu bawsang ni hte kaga ga amyu myu shaga ai ni yawng hte gaw shi hpe hkrit gari nga ma ai. Shi gaw marai langai ngai hpe sat kau mayu yang, shi galaw nga ai; marai langai ngai hpe jahkrung mayu yang, jahkrung da nga ai. Shagrau sha-a mayu yang, shi shagrau sha-a nna, shagrit kau mayu ai wa hpe shagrit kau nga ai.

Daniela 5:20

Rai ti mung shi mahtang gumrawng gumtawng ai hte du ja nna mazut gumshem nga ai majaw shi a hkawhkam tingnyang kaw na hkrat mat ai hkrum ai hte shi hpe shagrau sha-a ai mung n nga mat nga ai.

Daniela 7:8

Ngai gaw dai nrung ni hpe yu mau nga yang, kaga ni a ka-ang hta nrung kaji tu pru wa nga ai hpe ngai mu nngai. Dai gaw dai yang e nga nga sai nrung masum hpe baw kau nga ai. Ndai nrung hta gumrawng gumtawng ai hte shakawng shakat chye ai masha a myi ni hte n-gup langai rawng nga ai.

Daniela 8:19

“Karai Kasang a pawt sindawng ai akyu hpa rai na ra ai gaw ngai nang hpe madun dan nga nngai. Dai shingran gaw jahtum na aten hpe lakap nna tsun da nga ai.

Daniela 8:4

Dai sagu la gaw shi a nrung ni hte sinna de, dingdung de, hte dingda maga de daru nga ai hpe ngai mu nngai. Kaning re ai dusat mung shi hpe jahkring lu ai n rai; shi a n-gun atsam kaw nna hprawng lawt lu ai n rai. Shi sharawng awng ai hte maren galaw nga ai rai nna grau myit tsaw myit dap nga wu ai.

ZEHKARIA 11:16

Nye a sagu hpung hpe bau rem na langai mi hpe san da ni ai, rai ti mung shi gaw jahten shaza kau na ngu jahkrit shama hkrum nga ai sagu ni hpe karum ai n rai; mat mat ai ni hpe hkan tam la ai n rai; machyi ai ni hpe shamai shatsai ya ai n rai, hkam kaja ai ni hpe ushat jaw ai n rai, shing rai galaw na malai hpum sau htum ai sagu shan shi sha nna, shanhte a lahkru ni hpe malawk kau ya na ra ai.

YAWHAN 5:30

Ngai gaw nye a myit hte hpa mung n galaw lu nngai; ngai gaw Karai Kasang tsun ai hte maren sha jeyang nngai; nye a jeyang daw dan ai lam mung ding man li ai; hpa majaw nga yang, ngai gaw ngai ra ai lam hkan galaw na matu shakut nga nngai n rai, ngai e shangun dat ai wa a ra ai lam hkan galaw na matu chyu sha tam shakut nga nngai.

YAWHAN 6:38

Hpa majaw nga yang, sumsing lamu nna ngai yu sa ai gaw, nye a myit ra ai hku hkan galaw na matu yu sa nngai n rai; ngai hpe shangun dat ai wa a myit ra ai hku hkan galaw na she, yu sa ai rai nngai.

KASA 4:28

Shing rai shanhte hpawng de ai lam gaw Madu a n-gun atsam hte myit ra ai lam hku nna daw dan sai hte maren byin wa u ga matu rai nga ai.

TARA JAHPRANG 10:17

Dai Madu nanhte a Karai Kasang gaw Karai ni yawng hta daru magam n-gun tsaw htum ai wa rai nga ai. Shi gaw galu kaba nna chyalai n-gun hte hpring nga ai majaw hkrit kang mai nga ai. Shi gaw masha a myi man hpe tau ai n rai, mayun kumhpa hkap la ai n rai.

2 HTESALONI 2:3

Gara hku rai ti mung, nanhte hpe gade e mung n hkalem kau myit ga. Hpa majaw nga yang, hpang jahtum Karai Kasang hpe gumlau ai lam garai n byin yang, ngarai mung de jahkrat kau hkrum na rai nga ai n hkru Ai Wa garai n paw pru yang dai nhtoi du na ra ai n rai.

2 HTESALONI 2:4

Shi gaw masha ni nawku daw jau nga ai karai ngu ai baw nga manga hpe nhtan shai ninghkap nna, shi hkum nan hpe yawng mayawng a ntsa e hpung shingkang grau rawng ai wa re ngu nna shagrau shatsaw na ra ai. Shi gaw Karai Kasang a Nawku Htingnu kata de pyi sa shang dung nga nna shi hkum dai Karai Kasang re ai ngu nna tsun ndau na ra ai.

2 HTESALONI 2:8

Dai hpang dai N hkru Ai Wa dan pru na ra ai, rai ti mung Madu Yesu du sa ai shaloi N hkru Ai Wa hpe shi a n-gup kaw na pru ai nsa hte sat kau nna, shi a htoi kabrim ai hpung shingkang hte jahten shaza kau na ra ai.

YAWSHU 22:22

“Chyahtum Chyalai N-gun rawng ai wa gaw Karai Kasang rai nga ai! Shi gaw dai Madu rai nga ai! Chyahtum Chyalai N-gun rawng ai wa gaw Karai Kasang rai nga ai! Shi gaw dai Madu rai nga ai! Shi gaw anhte ndai amu hpe hpa majaw galaw nga ga ai lam chye ai zawn nanhte hpe mung anhte chye shangun nga ga ai! Anhte gumlau nna dai Madu hta kam sham ai myit n rawng saga ai rai yang, anhte hpe galoi mung hkum jahkrung da mi!

SHINGRAN 10:7

Rai ti mung, sanit ngu na lamu kasa a pahtau dum dat ai shaloi, Karai Kasang gaw shi a shangun ma ni ngu ai myihtoi ni hpe tsun shana da sai hte maren, shi a sung htum ai shatawng shada ai lam hpe shadik shatup na ra ai,” nga nna tsun ai.

SHINGRAN 12:14

Dai shaloi numsha gaw, baren numraw a hpyen kaw na lawt lu nna, nam mali na shi a shara de pyen wa lu na matu langda kaba a singkaw lahkawng shi hpe jaw dat wu ai. Shi gaw dai shara e masum ning e shata kru baren numraw a hpyen hpe n hkrit ra ai sha bau lanu lahku ai hkrum na rai nga ai.

SHINGRAN 13:1

Shaloi panglai kaw na matse labye langai pru lung wa ai hpe ngai mu nngai. Shi hta nrung shi hte baw sanit tu nga ai; dai nrung ni langai hkrai a ntsa e janmau gup nna, baw ni langai hkrai a ntsa e Karai Kasang a arawng sadang hpe jahpoi asawng ai amying kap nga ai.

SHINGRAN 17:17

Hpa majaw nga yang, shanhte gaw Karai Kasang a mungga dik wa ai nhtoi du hkra, shanhte up hkang na ahkang aya, dai matse labye hpe myit hkrum ai hte ap ya mu ga nga, Karai Kasang gaw shanhte a kraw lawang hta shi a yaw shada ai lam hkan galaw na myit bang ya mu ai.

SHINGRAN 17:3

Shaloi Wenyi gaw ngai hpe woi nawng mat wa nna, dai lamu kasa gaw, ngai hpe nam mali de woi sa mat wa ai. Dai shara e baw sanit hte nrung shi tu nna Karai Kasang hpe matsa shatan ai mying hkrai pri ka da ai, hkyeng mang ai matse labye a ntsa e dung nga ai numsha langai mi hpe ngai mu nngai.