BU HKAWM 20:12 - Jinghpaw Common Language Bible 2009

¹² Rai ti mung dai Madu gaw Mawshe yan Arun hpe daru kau wu ai. Dai rai nna shi gaw, “Nan gaw Israela amyu masha ni a man e nye a chyoi pra ai daru magam n-gun hpe hkam la na makam masham n law nga myit dai majaw shanhte hpe jaw na ngu nna ngai ga sadi tawn da ai mungdan de nan gaw shanhte hpe woi shawn lu na n rai myit dai,” ngu nna tsun wu ai.

Jinghpaw Hanson Version Bible

¹² Yehowa, Mawshe yan Arun hpe tsun wu ai chyawm gaw, “Israela kashu kasha ni a man e ngai e shagrau sha a na hku, nan htai e n kam n sham myit dai majaw, ndai shawa hpawng hpe ngai jaw ai mung de, nan woi shawn lu na myit dai n rai,” ngu wu ai.

BU HKAWM 20:12 ပူးပေါင်းရင်းမြစ်များ

2 HKAWHKAM LABAU 20:20

Hpang jahpawt manap jau jau aten e, amyu masha ni dai Tekoa mare makau na nam mali de pru sa mat wa ma ai. Shanhte shamu hpang wa ma yang Yehoshahpat gaw ning ngu nna shanhte hpe tsun matsun wu ai: “Yuda mung hte Yerusalem mare na amyu masha ni e, dai Madu nanhte a Karai Kasang hpe kam hpa nga mu; shaloi nanhte ngang grin wa lu na marin dai. Nanhte hpe tsun ai myihtoi ni a ga hpe kam mu, shaloi nanhte awng dang na marin dai.”

SHAKAWN KUNGDAWN 106:32

Amyu masha ni gaw Meriba hka hpawk hta e, dai Madu hpe pawt sindawng shangun mu ai; shanhte galaw shapraw ai arawn alai a majaw, Mawshe mung ru yak tsin-yam hkrum nu ai.

SHAKAWN KUNGDAWN 99:8

O Madu anhte a Karai Kasang e, na a myu masha ni shaga ai nsen hpe nang htan ya nit dai; shanhte galaw shut kau sai yubak ni a majaw, nang shanhte hpe ari jaw ti mung, nang gaw yubak mara ni hpe raw dat kau ya ai Karai Kasang rai nga ndai hpe madun dan nga nit dai.

ESAIA 7:9

Israela gaw Samari mung hte de a mare daju hta grau nna n-gun n rawng nga ai, Samari mung gaw Hkawhkam Peka hta grau nna n-gun n rawng nga ai. “Na a kam sham myit n ngang ai rai yang, nang grin nga lu na n rai.”

ESAIA 8:13

Chyahtum Chyalai N-gun rawng ai Ngai Madu gaw chyoi pra nga nngai hpe dum nga u; Ngai gaw nang hkrit kamyin ai wa rai nga nngai.

EZEKELA 20:41

Ngai gaw nanhte hpe shabra kau dat ai mungdan ni kaw nna woi wa nhtawm nanhte hpe shinggyin la ai hte jahpawng da ai hpang, nanhte nat nawng ai shagu hkungga ni hpe hkap la na nngai. Ngai nan chyoi pra nga nngai hpe amyu masha ni mu lu na mara ai.

EZEKELA 36:23

Maigan amyu ni a ka-ang e, nanhte jahpoi kau ya ai nye a galu kaba ai dai chyoi pra ai mying ningsang hpe masha amyu baw ni a man e n-gun madun dan ai shaloi, ngai nan dai Madu rai nga nngai hpe shanhte chye lu na mara ai. Tsaw Htum ai dai Madu ngai nan tsun ni ai. Ngai nan chyoi pra nga nngai lam masha amyu baw ni hpe madun dan lu na matu, ngai nang hpe jai lang na nngai.

EZEKELA 38:10

Ndai gaw Tsaw Htum ai dai Madu Goga hpe tsun ai mungga rai nga ai: “Dai aten du ai shaloi, nang gaw n hkru ai maw mawn lam hpe myit shapraw na rin dai.

JAW JAU 10:3

Dai hpang Mawshe gaw Arun hpe, “Da ndai gaw, ‘Ngai hpe daw jau ai ni yawng nye a chyoi pra ai ban hpe hkungga lu na rai nna, nye a amyu masha ni hpe nye a hpung shingkang madun dan na we ai,’ nga nna dai Madu tsun ai gaw ndai zawn re ai lam hpe shi tsun ai re,’” ngu nna tsun wu ai. Rai ti mung Arun mahtang atsin sha nga nga wu ai.

BU HKAWM 11:15

Ngai hpe ndai zawn di na rai yang, matsan dum la ai hku nna ngai hpe sat kau et; na a gumshem ai hpe ngai matut nna loi mi mung n hkam jan lu na we ai,” ngu nna tsun wu ai.

BU HKAWM 20:24

“Israela ni hpe jaw na ngu nna ngai ga sadi tawn da ai mungdan de Arun shang lu na n rai; nan lahkawng mahtang Meriba shara e nye a hkang da ai ga hte nhtan shai nna gumlau manit dai majaw si na rai ndai.

BU HKAWM 27:14

Shawa hpung ting dai Meriba shara e ngai hpe aput angun nga nna nhtan shai hkat nga yang, shanhte a man e nye a chyoi pra ai daru magam n-gun hkam la na ningdang kau myit dai,” ngu nna tsun wu ai. (Meriba gaw Zin Nam Mali na Kadesha shara hta pru ai hka hpawk rai nga ai.)

MAHTE 17:17

Yesu htan nna, “Nanhte gaw makam masham n rawng ai hte nhtan shai ai amyu she rai nga myit hka! Nanhte hte rau ngai galoi du hkra nga lu na rai ta? Galoi du hkra, ngai nanhte hpe sharang nga lu na rai ta? Dai la kasha ma hpe ngai hpang de woi sa wa marit,” ngu wu ai.

MAHTE 17:20

Yesu gaw, “Nanhte ai n kam myit dai majaw, n di lu myit dai; nanhte hpe ngai teng teng tsun made ai gaw, kam sham ai myit chyinghkrang tum daram nanhte hta rawng nga ai rai yang gaw, ndai bum hpe, ‘Nang kaw nna wora de htawt sit mat u!,’ ngu nna nanhte tsun mu yang, dai htawt sit mat na ra ai: nanhte n di lu na amu hpa mung n nga na re,” ngu nna shanhte hpe tsun mu ai.

LUKA 1:20

Yu u, dai ahkying du yang dik wa na ra ai nye a ga sadi hpe nang n kam ndai majaw, dai amu byin ai du hkra, ga n tsun lu ai ma-a na rin dai,” ngu nna shi hpe tsun wu ai.

LUKA 1:45

Kam sham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai,” nga ai.

YAWHAN 1:17

Karai Kasang gaw Mawshe hku nna dai Jep ai Tara jaw ya mi ai; rai ti mung chyeju hte tengman ai lam gaw Yesu Hkristu a gawp e jaw ya mi ai.

ROMA 4:20

Shi gaw galoi mung Karai Kasang a ga sadi hpe kam shut ai hte n di n da n re ai sha, Karai Kasang hpe kam hpa ai lam n kabai kau wu ai hta n ga shi a makam masham gaw shi hpe n-gun atsam jahpring ya nga ai rai nna shi Karai Kasang hpe shakawn kungdawn wu ai.

TARA JAHPRANG 1:37

Dai Madu gaw nanhte a majaw ngai hpe mung pawt ai hte, ‘Mawshe e, nang pyi dai mungdan de shang lu na n rai.

TARA JAHPRANG 34:4

Shaloi dai Madu gaw Mawshe hpe, “Abraham, Isak hte Yaku hte hpe ga sadi tawn nna shanhte a amyu matu ni hpe jaw na ngu ndat da ai mungdan gaw dai rai nga ai; dai hpe nang mu mada la ti mung, dai mung de ngai nang hpe rap sa shangun na ni ai n rai,” ngu nna tsun wu ai.

TARA JAHPRANG 4:21

Nanhte a majaw dai Madu nanhte a Karai Kasang mung ngai hpe masin pawt nna Yawdan hka n rap sa lu na hte nanhte hpe shi jaw ya ai dai ga sau hte hpring nna ningru ningja ai mungdan de n shang lu na lam dagam kau nu ai.

YAWSHU 1:2

Shi gaw, “Nye a shangun kasa Mawshe si mat sai. Dai rai nna nang hte Israela amyu masha ni yawng ngai shanhte hpe jaw na ngu ai mungdan de, Yawdan hka rap sa wa na matu, ya jang jin jin rai nga mu.

1 PETRU 3:15

Nanhte a myit masin ni hta Hkristu hpe hkungga lara ai hte Madu ra ai hku shagrau sha-a nga mu; nanhte hta hkam la da sai myit mada ai lam hpe masha langai ngai san dam ma yang, ga lachyum htai dan lu na matu jin jin rai nga mu.