BU HKAWM 13:20 - Jinghpaw Common Language Bible 2009

²⁰ Namhpun kaja ai, nam maling law ai mung yu wa mi. Dai mung hta tu ai namsi namsaw nkau mi hpe la wa na hkum malap kau myit,” ngu nna htet dat wu ai. (Dai aten gaw sabyi si myin hpang wa ai aten rai nga ai.)

Jinghpaw Hanson Version Bible

²⁰ dai mung na lamu ga gaw hpun rawng malu ai kun, n rawng malu ai kun; nam maling law ai kun, n law ai kun, yu wa marit. Nden ja ai myit hte sa wa mu; dai mung na namsi loi mi mung la wa yu mi, ngu nna hkang dat mu ai. Dai ten gaw tsabyi si nnan myin wa ai aten rai nga ai.

BU HKAWM 13:20 ပူးပေါင်းရင်းမြစ်များ

1 HKAWHKAM LABAU 22:11

Dawi gaw, “Ya chyawm gaw sha e, dai Madu na a Karai Kasang gaw nang hte rau rai nga u ga, shi a matu nang hpe awng dang hkra galaw shangun ai Nawku Htingnu hte seng ai shi a ga sadi hpe shi shadik shatup ya nu ga law.

NEHEMIA 9:25

Na a amyu masha ni gaw bunghku kum ai mare ni, ga sau rawng ai lamu ga, sut gan hpring hkra rawng ai dum nta ni, htu da chyalu hka htung ni, tsanlun hpun ni, namsi hpun ni, hte sabyi sun ni hpe zing la nga ma ai. Shanhte gaw sha mayu ai mahkra sha ai hte hpum wa ma ai; shanhte gaw nang jaw ya ai mai kaja ai arung arai yawng a majaw kabu gara nga ma ai.

NEHEMIA 9:35

Na a shaman chyeju a jaw e, hkawhkam ni na a amyu masha ni hpe up ma ai; shanhte sumtsan ga e nga nga ma ai shaloi, nang shanhte hpe ga sau rawng ai lamu ga jaw ndai; rai ti mung shanhte gaw yubak mara kaw na kayin wa na matu hte nang hpe daw jau na matu hprai ma ai.

EZEKELA 34:14

Ngai gaw shanhte hpe Israela mungdan na tsit lali ai udat shara ni yawng hta mung, bum ni hte pa layang kadit hkan tu ai tsingdu pa layang ni hta mung, shim lum ai hte sha shangun na nngai.

Daniela 11:24

Sut ngai ai mungdaw langai hpe sadi jaw ai lam n nga ai sha, shi shang gasat la nhtawm shi a kaji kawa ni kadai mung n galaw yu ai lam galaw na ra ai. Dai hpang shi gaw shi a hpang hkan nang ai ni hpe majan e rim la lu ai sut rai ni hte sut gan ni hpe karan ya na ra ai. Shi gaw hpyen dap ni hpe htim gasat na maw mawn na ra ai, rai ti mung shi a aten kade n na yang htum mat na ra ai.

MIHKA 7:1

Myit mada shara n nga nga a hka! Ngai gaw myin ai namsi di la kau ngut sai hpun ni hte sabyi ru hta sabyi si ni n si mat sai hpe mu nna kawsi kyet ai masha wa zawn rai nga nngai. Sabyi si sumbaw ni yawng hte mu mai ai lakum si ni yawng hta la kau sai.

BU HKAWM 13:19

Dai mungdan gaw kaja ai, n kaja ai mung, dai mung na masha ni nga ai mare ni bunghku kum, n kum ai lam hpe mung yu wa mi.

TARA JAHPRANG 1:24

Shanhte mung bum ga de lung wa nhtawm Eshkola Kadit de du hkra dai mung na lam hpe hkan maram yu kau da lu ma ai.

TARA JAHPRANG 1:25

Shanhte gaw dai mung e mu ai namsi namsaw nkau mi hpe di hpai let anhte hpang de la wa nna dai Madu anhte a Karai Kasang anhte hpe jaw ai mungdan gaw teng teng ga sau hte hpring nna grai ningru ningja ai she rai nga ai,’ nga nna tsun dan mi ai.

TARA JAHPRANG 31:23

Dai hpang Nun a kasha Yawshu hpe, “Kam hpa ai hte myit jahkut daw dan u. Nang gaw ngai ga sadi jaw da ai mungdan de dai Israela amyu masha ni hpe woi shawn na rai ndai; ngai mung nang hte rau anga nga na nngai,” ngu nna dai Madu shi hpe hkang da wu ai.

HEBRE 13:6

Dai re ai majaw, “Dai Madu gaw ngai hpe karum ai wa rai nga ai, ngai hpa hpe mung hkrit kang na n rai. Kadai wa ngai hpe hpa di lu na rai ta?,” nga nna nden ja ai myit hte anhte tsun nga ga.

YAWSHU 1:6

Myit jahkut daw dan nna kam hpa nga u; ngai gaw shanhte a kaji kawa ni hpe ga sadi tawn da sai ndai mungdan hpe shanhte madu la ma ai shaloi, nang gaw dai amyu masha ni a ningbaw tai na rai ndai.

YAWSHU 1:9

Ngai nang hpe hkang da sade ai hte maren, myit jahkut daw dan nna kam hpa nga na hpe adum nga u! Hkum hkrit et; myit hkum daw hkum hten et. Dai Madu na a Karai Kasang ngai gaw nang hkawm sa ai shara shagu hta nang hte rau rai nga nngai,” ngu nna tsun wu ai.

YAWSHU 2:1

Dai hpang Yawshu gaw Akasia dap kaw na kin-yu lahkawng hpe Hkanan mung na Yerihko mare hpe sa lagyim maram yu na hkang dat wu ai. Shan dai mare de du ai shaloi Rahab mying ai shawa num a nta e sa nga shalai kau ma ai.

YAWSHU 2:3

shi gaw Rahab hpang de ning ngu shana dat wu ai: “Mungdan ting hpe kin-yu yu na masha ni na a nta e du nga masai! Shanhte hpe shapraw ya mi!”