BU HKAWM 11:1 - Jinghpaw Common Language Bible 2009

¹ Dai amyu masha ni shanhte hkrum sha ai tsin-yam tsindam a majaw dai Madu hpe aput hpang wa ma ai. Dai Madu gaw dai lam ni na jang masin pawt nna amyu masha ni a ntsa e wan dat dat wu ai. Dai gaw shanhte a ka-ang e hkru wa ai hte dap a jahtum shara langai mi hpe jahten kau nga ai.

Jinghpaw Hanson Version Bible

¹ Ya dai amyu masha ni gaw aput apai nga nna, Yehowa a na hta n shawp ai ga tsun ma ai: Yehowa dai na jang masin pawt bu nna, Yehowa a wan shanhte hta grung wa ai hte dap shingnawm e hkru mat wa ai.

BU HKAWM 11:1 ပူးပေါင်းရင်းမြစ်များ

NINGPAWT NINGHPANG 38:10

Shi galaw ai lam hpe dai Madu n ra sharawng wu ai majaw shi hpe mung sat kau wu ai.

2 SAMUELA 11:27

Batsheba sharung shayawt ai ladaw lai jang, Dawi gaw masha shangun dat nna hkawhkam hkaw de shi hpe shaga la wu ai. Shi mung Dawi a madu jan tai ai hte shi a matu shadang sha langai shangai ya wu ai. Rai ti mung dai Madu chyawm gaw Dawi galaw kau nu ai amu hpe n yu sharawng nga wu ai.

2 HKAWHKAM 1:12

Elia mahtang, “Ngai gaw Karai Kasang a masha langai mi rai nga nngai teng yang gaw, sumsing lamu de na wan hkrat yu wa nhtawm nang hte na a masha ni hpe sat kau mu ga!,” ngu nna htan wu ai. Shaloi Karai Kasang a wan gaw kalang lata hkrat yu wa nhtawm du wa hte shi a masha ni hpe sat kau nga ai.

YOBA 1:16

Dai wa ga shaga pyi garai n htum yang, kaga shangun ma langai mi hkan du wa nhtawm, “Myihprap wan gala nna sagu hte sagu rem ai ni yawng hpe sat kau ma ai. Nang hpe shiga wa tsun dan na matu hprawng lawt wa ai gaw ngai chyu sha rai nga nngai,” ngu nna tsun wu ai.

SHAKAWN KUNGDAWN 106:18

Shanhte a hpang hkan nang ai ni a ntsa e, wan nan hkrat wa nna; tara n lang ai masha ni hpe hkru jahkat kau mu ai.

SHAKAWN KUNGDAWN 78:21

Shing rai, shanhte tsun shaga ai ga hpe shi na wu ai shaloi, Madu gaw masin pawt nga wu ai; shi a amyu masha ni hpe wan hte shi gasat nna, shi a masin kahtet ai gaw shanhte a ntsa e grau grau nna law jat wa nu ai.

SHAKAWN KUNGDAWN 78:63

Shabrang ni majan hta sat kau ai hkrum nga ma ai; mahkawn ni mung shanhte hpe hkungran la na masha langai mi mung n nga nga ai.

PRU MAT 16:7

Jahpawt e mung nanhte gaw htoi kabrim ai dai Madu a hpung shingkang hpe mu lu na marin dai. Nanhte shi hpe aput ai ga, rai sa, dai aput ai ga hpe shi na nu ai; an chyawm gaw shi a ga matsun ni hpe chyu sha gun hpai ai yan rai nga ga ai,” ngu nna tsun ma ai.

PRU MAT 16:9

Mawshe gaw Arun hpe, “Dai Madu gaw nanhte a aput ai nsen ni hpe na ya nu ai majaw, shi hpang de sa nna shi a man e tsap nga na matu hpung shawa ting hpe htawn tsun u,” ngu nna tsun wu ai.

ESAIA 10:17

Karai Kasang, Israela a nhtoi gaw wan tai na ra ai. Israela a chyoi pra ai Karai Kasang gaw wan shinglet tai na ra ai, dai gaw lani mi hta sha arai shagu hte hpe hkru kau na ra ai, ju hpun ni hte sumwum ni hpe pyi hkru kau na ra ai.

ESAIA 30:33

Moi chyaloi nhkoi kaw nna Asuri hkawseng hpe nat na matu wan htung kaba shara mi hkyen da nga ai. Dai gaw sung ai hte dam lada rai nna hpun ni hte sumpum shatsaw da nga ai. Dai Madu gaw dai shara hta wan shachyi na matu wan shinglet gawut bang dat na ra ai.

ESAIA 33:14

Yubak kap ai Ziun a amyu masha ni gaw hkrit gari nga ma ai. Shanhte gaw, “Karai Kasang a tara jeyang ai gaw htani htana agrung nga ai wan zawn rai nga ai. Anhte hta na kadai wa dai zawn re ai wan hta asak hkrung lu nga a ta?,” ngu nna tsun ma ai.

SHARUNG SHAYAWT 3:39

Anhte a shut hpyit kau ai yubak a matu anhte ari hkrum nga ga yang, hpa majaw aput angun nga nna tsun ang nga ga ni?

EZEKELA 20:36

Nanhte a kaji kawa ni hpe Sina Nam mali e ngai daw dan ni ai zawn, ya mung nanhte hpe ngai daw dan na nngai,” ngu Tsaw Htum ai dai Madu tsun ai.

JAW JAU 10:2

Dai Madu gaw wan akajawng sha dat dat nna shan hpe hkru kau ai hte shan mung dai Madu a man e si taw nga ma ai.

NAHUM 1:5

Bum ni gaw dai Madu a man e ashun nga ai; kawng ni shi a man e byawng mat nga ai. Dai Madu dan pru ai shaloi ginding aga ashun nga ai; mungkan ga hte dai hta nga ai masha ni hkrit gari ma ai.

HABAKU 3:5

Shi gaw shi a shawng e ana ahkya dat dat nna shi a hpang e si hkrung si htan hkan nang na matu hkang da nga ai.

BU HKAWM 10:33

Amyu masha ni dai chyoi pra ai Sina Bum kaw nna pru wa nhtawm masum ya lam hkawm ma ai. Dai Madu a Ga Shaka Sumpu mung shanhte but na shara tam let, shanhte a shawng e galoi mung sa wa nga ai.

BU HKAWM 11:18

Ya chyawm gaw amyu masha ni hpe, ‘Hpawt ni na matu nanhte a hkum ni hpe jasan jaseng da mu; nanhte shan sha lu na rai myit dai. Nanhte gaw Egutu mung hta ngamu ngamai ai hte nanhte ra sharawng ai shan sha lu ga ai, nga nna aput angun ai hte tsun ai ga hpe dai Madu na ya nu ai rai nna dai Madu nanhte hpe shan jaw na rai wu ai; nanhte dai hpe sha na rai myit dai.

BU HKAWM 12:2

Shan gaw, “Dai Madu gaw Mawshe hku nna chyu sha ga shaga nga a ni? An hku nna mung tsun lu ai n rai ni?,” ngu nna tsun ma ai. Shan hpa tsun ai hpe dai Madu na wu ai.

BU HKAWM 14:2

Shanhte gaw Mawshe yan Arun hpe aput let, “Egutu mung shing n rai ndai Nam Mali hkan e si mat tim pyi grau kaja na saga ai law!

BU HKAWM 14:22

ndai amyu masha ni kadai mung dai mung de shang lu na ma ai n rai, ngu nna ngai ga sadi tawn da nngai. Shanhte mahtang Egutu mung hte nam mali hkan ngai galaw dan sai mauhpa lamik kumla ni hte htoi tu ai nye a hpung shingkang hpe mu lu ma ti mung, nye a galu kaba ai myit hpe shanhte lang hte lang chyam dinglik yu nna nye a ga hpe n madat ya ma ai.

BU HKAWM 14:27

“Ndai n hkru ai amyu masha ni galoi aten du hkra ngai hpe aput shatsang na rai nga ma ta? Dai zawn nga ai aput angun ga ni hpe ngai na jin ni ai!

BU HKAWM 14:28

Ya chyawm gaw shanhte hpe ning ngu mahtai jaw u: ‘Ngai gaw ahkrung nga ai hte maren nanhte san myit dai hku, ngai nanhte hpe galaw na nngai,’ ngu ngai nan dagam da se ai. Ngai Madu nan tsun ni ai.

BU HKAWM 16:11

Arun hpe nanhte gumlau nna aput angun di myit dai shaloi dai amu gaw nang hte nang hpang maga hkan nang ai ni, dai Madu hpe teng teng gumlau nga myit dai,” ngu nna tsun wu ai.

BU HKAWM 16:35

Dai hpang dai Madu gaw wan shachyi dat nna manam pyaw ai baw hpe nawng jau ai masha 250 hte hpe hkru kau nga ai.

BU HKAWM 17:5

Dai hpang ngai lata la ai wa a dawhkrawng gaw maku ku na ra ai. Dai lam hku nna nang hpe ninghkap ai ndai Israela masha ni a n htum n mat hkraw ai aput angun ga hpe ngai shangap kau lu na rai nngai,” ngu nna tsun wu ai.

BU HKAWM 21:5

Shanhte gaw, “Lusha mung, hka mung n nga ai ndai nam mali hkan e si mat na matu nang anhte hpe hpa majaw Egutu mung kaw na woi wa nga n ni? Ndai asit awat nga ai lusha hpe anhte kachyi mi pyi n kam sha mat saga ai!,” ngu nna aput ma ai.

1 KORINHTU 10:10

Shanhte nkau mi aput angun nna, Si du a kasa wa a lata hte jahten shabyak kau ai hkrum ma ai zawn, anhte aput angun nga lu na n rai.

TARA JAHPRANG 25:18

Shanhte gaw Karai Kasang hpe mung n chye hkrit ma ai. Nanhte n-gun kya nhtawm ba kalawp nga myit yang, hpang kaw na htim gasat ma ai rai nna hpang hkrat ai ni yawng hpe hkap sat kau ma ai.

TARA JAHPRANG 32:22

Nye a masin kahtet ai gaw wan zawn grung wa nna, ginding aga ntsa na arai shagu hpe hkru kau na ra ai. Dai gaw mungkan ga a lawu tsang de du hkra dep nna, bum ni a npawt nhpang ni hpe hkru kau na ra ai.

TARA JAHPRANG 9:22

“Dai hta kaga, Tabera, Masa hte Kibrot Hatawa shara hkan e nanhte but nga myit dai shaloi dai Madu nanhte a Karai Kasang hpe masin pawt shangun manit dai.

HEBRE 12:29

Hpa majaw nga yang, anhte a Karai Kasang gaw hkru jahten kau chye ai wan nan rai nga ai.

YAKU 5:4

Nanhte gaw nanhte a yi sun hkauna ni hta amu bungli galaw ai masha ni hpe hpa shabrai mung n jaw myit dai. Shanhte aput angun ai nsen ni hpe madat yu mu! Nanhte a nsi naisi ni hpe dan shinggyin ya ai ni a marawn jahtau ai nsen gaw daru magam rawng ai Madu Karai Kasang a na hta hkrang shang wa sai.

YUDA 1:16

Ndai masha ni gaw galoi mung aput angun nga nna masha kaga ni hpe mara sha shagun nga ma ai; shanhte gaw shanhte a n hkru n kaja ai, ra marin ai hta hkan nang ma ai. Shanhte gaw tinang a lam hpe shakawng gumrawng chye ma ai; shanhte gaw tinang a akyu pru hkra masha wa hpe kawng sharawt ya masu ai hku hkalem ai ga chye tsun ma ai.