2 SAMUELA 7:24 - Jinghpaw Common Language Bible 2009

²⁴ Nang gaw Israela hpe htani htana na a amyu masha majing shatai la nga nit dai; dai rai nna Madu e, nang gaw shanhte a Karai Kasang tai nga nit dai.

Jinghpaw Hanson Version Bible

²⁴ Kaning rai nme law, nang gaw na a amyu Israela hpe, htani htana prat dingsa, na a amyu masha shatai na nga, shanhte hpe na a matu shangang shakang da nna, nang, Yehowa e, shanhte a Karai Kasang tai nit dai.

2 SAMUELA 7:24 ပူးပေါင်းရင်းမြစ်များ

NINGPAWT NINGHPANG 17:7

“Nang hte mung, du na ra ai ban na na a amyu matu ni hte mung htani htana ga shaka ngu ai nye a ga sadi hpe ngai shatup na nngai. Ngai gaw na a Karai Kasang mung, na a amyu matu ni a Karai Kasang mung tai nga na nngai.

NINGPAWT NINGHPANG 17:8

Ya nang tsasam tai nga ai ndai mung ting gaw nang hpe mung, na a amyu matu ni hpe mung ngai jaw na we ai. Ndai Hkanan mung ting hpe na a amyu matu ni htani htana madu lu na mara ai; ngai mung shanhte a Karai Kasang tai nga na nngai.”

2 SAMUELA 7:23

Na a amyu masha majing shatai na nga, shanhte hpe mayam shatai nga ai kaw na nang hkye mawai da nit dai, dai Israela amyu ni hte bung ai amyu baw kaga ndai ginding aga ntsa n nga nga ai. Shanhte a matu nang galaw dan sai dai galu kaba ai mauhpa amu ni gaw mungkan ting de na a mying ningsang dan hkung gumhkawng shangun nga sai. Na a amyu masha majing shatai la na nga, Egutu mung kaw na nang shalawt dat sai amyu masha ni rawt lung wa mu yang, kaga masha amyu baw ni hte shanhte a karai ni hpe nang gawt shapraw kau ya nga ndai.

2 SAMUELA 7:25

“Ya chyawm gaw, Madu Karai Kasang e, ngai hte nye a amyu matu ni hte seng ai nang shagrin da nit dai ga sadi hpe jahpring shatsup ya mi law; nang galaw na ngu nna tsun ai ga hte maren shadik ya e law.

1 HKAWHKAM LABAU 17:22

Israela hpe htani htana na a amyu masha majing shatai la nga nit dai rai nna, Madu e nang gaw shanhte a Karai Kasang rai nga nit dai.

SHAKAWN KUNGDAWN 48:14

nanhte gaw, “Dai Karai Kasang gaw htani htana prat dingsa na anhte a Karai Kasang rai nga ai; shi gaw anhte hpe prat ting lam woi wa na ra ai,” nga nna hpang ban prat masha ni hpe hkai dan lu na myit dai.

PRU MAT 15:2

Dai Madu gaw n-gun hte hpring ai nye a dahpran shara rai nga ai; shi gaw ngai hpe hkye hkrang la ai wa rai nga ai. Shi gaw nye a Karai Kasang rai nga ai, ngai shi hpe shakawn na nngai, nye wa a Karai Kasang rai nga ai majaw, shi a galu kaba ai lam hpe ngai mahkawn mangoi nga na nngai.

PRU MAT 6:7

Ngai gaw nanhte hpe nye a amyu masha majing hku shatai la nna, nanhte a Karai Kasang tai na nngai. Ngai gaw Egutu mung mayam prat kaw na nanhte hpe shalawt dat ai nanhte a Karai Kasang dai Madu rai nga ai hpe nanhte chye lu na marin dai.

ESAIA 12:2

Karai Kasang gaw ngai hpe hkye hkrang la ai wa rai nga ai; Ngai shi hpe kam hpa nga na nngai, hkrit kajawng na n rai. Dai Madu gaw ngai hpe daru magam n-gun hte n-gun lagaw jaw ya nga ai; shi gaw nye a hkye la Madu rai nga ai.

YEREMIA 31:1

Dai Madu gaw, “Ngai gaw Israela amyu bawsang ni yawng a Karai Kasang tai nna, shanhte gaw nye a amyu masha ni tai wa ai shaloi dai aten gaw du wa na ra ai.

YEREMIA 31:33

Israela amyu masha ni hte tawn da na ga shaka ningnan gaw ndai rai nga ai: Ngai gaw shanhte kata hta nan nye a tara hpe tawn da ai hte dai hpe shanhte a kraw lawang ni hta e ka da na nngai. Ngai gaw shanhte a Karai Kasang tai nna shanhte gaw nye a amyu masha ni tai na mara ai.

YEREMIA 32:38

Shing rai, shanhte gaw nye a amyu tai nna, ngai gaw shanhte a Karai Kasang tai nga na nngai.

HOSEA 1:10

Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, “Nanhte gaw nye a amyu masha ni n rai nga myit dai,” ngu nna tsun ai. Rai ti mung, dai nhtoi du du wa ai shaloi shi gaw shanhte hpe, “Nanhte gaw ahkrung nga ai Karai Kasang a kashu kasha ni rai nga myit dai!,” ngu nna tsun na ra ai.

ZEHKARIA 13:9

Ngai gaw dai naw hkrung nga ai htam mi hpe wan hte jasan jaseng la ai gumhpraw zawn shanhte hpe jasan jaseng nna chyam yu na nngai; ngai gaw aja hpe chyam yu ai zawn shanhte hpe chyam yu na nngai. Dai shaloi shanhte ngai kaw hpyi wa nna, ngai mung shanhte hpe htan ya na nngai. Shanhte gaw nye a amyu masha ni rai nga ma ai lam ngai shanhte hpe tsun dan na nngai, ngai gaw shanhte a Karai Kasang rai nga nngai hpe shanhte yin la na mara ai,” ngu nna tsun ai.

YAWHAN 1:12

Rai ti mung nkau mi shi hpe hkap la kam sham ma ai rai nna, shi gaw shanhte hpe Karai Kasang a kasha ni tai lu ai ahkang jaw mu ai.

TARA JAHPRANG 26:18

Shi gaw nanhte hpe ga sadi tawn da nu ai hte maren, chyoi pra ai amyu masha shatai la na matu mung, shi nanhte hpe hkang da nga ai tara ni yawng hpe hkan sa shatup na matu mung, dai Madu nanhte hpe dai ni hkap la nga manit dai.

TARA JAHPRANG 27:9

Dai hpang Mawshe gaw Lewi hkinjawng ni hte rau Israela amyu masha ni hpe, “Israela amyu masha ni e, atsin sha nga nna, nye a ga madat mu. Dai ni, nanhte gaw dai Madu nanhte a Karai Kasang a amyu masha ni tai nga manit dai;

TARA JAHPRANG 32:6

Angawk angak hte myit n su ai amyu masha ni e, nanhte gaw dai Madu hpe dai zawn galaw ai gaw lam jaw nga a ni? Shi gaw nanhte a kawa, nanhte hpe hpan da ai wa rai nga ai, shi gaw nanhte hpe amyu baw shatai nu ai.

1 PETRU 2:10

Nanhte gaw shawng de kalang mi Karai Kasang a amyu masha ni n rai myit dai; rai ti mung ya gaw, shi a masha ni rai wa manit dai. Shawng de kalang mi nanhte gaw Karai Kasang a matsam dum lama ai hpe n hkap la lu myit dai; ya chyawm gaw hkap la lu manit dai.