2 SAMUELA 1:11 - Jinghpaw Common Language Bible 2009

¹¹ Dawi gaw yawn hkyen ai hte shi a palawng ni hpe gang je kau nga ai rai nna shi a masha ni yawng mung dai hte maren galaw ma ai.

Jinghpaw Hanson Version Bible

¹¹ Shaloi Dawi shi a palawng gang je kau wu ai rai nna, shi a masha ni mahkra dai hte maren galaw ma ai:

2 SAMUELA 1:11 ပူးပေါင်းရင်းမြစ်များ

NINGPAWT NINGHPANG 37:29

Rubin dai hka htung de bai wa yu wu yang, dai shara hta Yosep n nga sai hpe mu wu ai; shi gaw yawn hkyen ai hte shi a palawng ni hpe gang je kau wu ai.

NINGPAWT NINGHPANG 37:34

Yaku gaw yawn hkyen ai hte shi a hpun palawng ni hpe gang je kau nhtawm lachyit nba lawai da wu ai. Shi gaw shing rai hkrum hkra sai kasha a matu nhtoi na na wa sharung shayawt nga wu ai.

NINGPAWT NINGHPANG 44:13

Bai kahpu kanau ni gaw yawn hkyen ai hte shanhte a hpun palawng ni hpe gang je kau nna shanhte a lawze ni hta daw mara nhtawm mare de bai nhtang wa ma ai.

2 SAMUELA 13:19

Tama gaw shi a baw hta dap hte bun let shi a palawng galu gang je kau nhtawm myi man hpe lata hte magum nna hkrap let wa mat wa wu ai.

2 SAMUELA 13:31

Hkawhkam wa tsap let, yawn hkyen ai hte shi a hpun palawng ni hpe gang je kau nhtawm ga ntsa e galeng taw nga ai. Shi hte rau nga nga ai shangun ma ni mung shanhte a hpun palawng ni hpe gang je kau ma ai.

2 SAMUELA 3:31

Dawi gaw Yoab hte shi a masha ni hpe shanhte a bu hpun palawng ni gang je kau nhtawm lachyit nba lawai let Abna a matu sharung shayawt na lam hkang dat wu ai. Dai moi mang makoi mayang ai shaloi, Hkawhkam Dawi mung shi hkum nan moi mang shingdu kaw nna hkan sa nang wu ai.

2 HKAWHKAM 5:7

Israela hkawhkam wa dai laika hpe hti jang, hkrit gari ai hte shi a palawng ni hpe gang je kau nhtawm, “Ndai masha wa a manggang ana hpe shamai ya na matu Suri hkawhkam ngai hpe gara hku myit mada lu nu ai kun? Ngai gaw Karai Kasang rai nna asak jahkrung ya ai hte si hkrung si htan shabyin lu ai daru magam n-gun lu ai wa re ngu myit nawn la nga a ni? Shi gaw ngai hte ga li ga law na matu jahte tam hpang wa nga ai gaw asan sha rai nga sai!,” ngu nna jahtau tsun wu ai.

2 HKAWHKAM LABAU 34:27

Yerusalem mare hte dai hta nga ai amyu masha ni hpe ari jaw na matu ngai kaning rai jahkrit shama ai lam hpe nang na ndai shaloi na a hpun palawng ni hpe gang je kau nna hkrap let nye a man e myit malai ai hte nang nan shagrit shanem nga ndai. Na a hpyi nem ai nsen hpe ngai na ni ai majaw,

EZRA 9:3

Dai lam hpe ngai na jang, myit htum ai hte nye a hpun palawng ni gang je kau nna, nye a kara hte nhka mun ni hpe baw kau nhtawm gawng run yawn hkyen let dung nga nngai.

ESHTA 4:1

Shing rai byin ai lam yawng hpe Mordehkai chye ai shaloi, dai nni nkri a majaw shi a hpun palawng ni hpe gang je kau wu ai. Dai hpang lachyit sumpan hpe bu hpun nhtawm shi a baw hpe dap hte bun nna mare hku lai wa nhtawm nsen kaba hte ahkup ahka ngu hkam sha let,

YEREMIA 36:24

Rai ti mung, ndai lam yawng hpe na ai hkawhkam wa mung, shi a du salang ni mung hkrit nga ma ai n rai; yawn hkyen ai kumla hpa mung n madun dan ma ai.

YOELA 2:13

Nanhte a yawn hkyen ai hpe madun dan lu hkra nanhte a myit masin agrawp shadaw kau mu; hpun palawng gang je kau ai hte sha ram ai n rai,” ngu nna tsun wu ai. Dai Madu nanhte a Karai Kasang hpang de nhtang wa marit. Shi gaw matsan chye dum ai hte n-gaw n wai ai myit hpring hkra rawng nga ai; shi gaw myit galu kaba ai hte shi a ga sadi ni hpe shatup nga ai; shi gaw ari jaw na matu n rai, mara dat ya na matu, tut nawng jin jin rai nga ai wa rai nga ai.

KASA 14:14

Ya dai masha ni hpa galaw maw nga ai hpe Barnaba yan Pawlu na jang tinang a hpun palawng gang je kau let, shawa hpawng ka-ang de gat shang nhtawm,

ROMA 12:15

Kabu gara re ai ni hte rau kabu gara nga mu, hkrap ngu hkrap ngoi re ai ni hte rau hkrap ngu hkrap ngoi nga mu.

YAWSHU 7:6

Yawshu hte Israela ningbaw ni gaw lahpawt dum ai myit hte yawn hkyen let shanhte a hpun palawng ni hpe gang je kau nhtawm dai Madu a Ga Shaka Sumpu man e galeng nga nna, shanhte a baw hta nhpu hte bun nhtawm shana de du hkra yawn hkyen ai kumla madun nga ma ai.