2 PETRU 1:3 - Jinghpaw Common Language Bible 2009

³ Shi a hpung shingkang hte mai kaja ai lam hpe garan hkam la na matu anhte hpe shaga la ai Hkristu hpe chye chyang ai a marang e Karai Kasang a n-gun atsam gaw teng man ai nawku htung makam masham hta asak hkrung nga lu na matu anhte hta ra kadawn nga ai lam yawng mayawng jaw ya mani ai.

Jinghpaw Hanson Version Bible

³ Hpung shingkang hte arawng sadang e anhte hpe shaga la ai wa a chye chyang lu ai nyan a gawp e, shi a Karai Wa atsam gaw, asak hkrung nga ai hte tara hkungga ai lam hta seng maseng hte anhte hpe jaw da mi ai rai nna,

2 PETRU 1:3 ပူးပေါင်းရင်းမြစ်များ

SHAKAWN KUNGDAWN 110:3

Na gumlau hpyen ni hpe nang htim gasat ai shani e, na a amyu masha ni gaw madu myit hte shang karum wa na mara ai. Jahpawt manap jau jau e, hkrat ai mari zawn, na a brang ram ni nang shanu nga ai chyoi pra ai bum ni de du sa wa na mara ai.

SHAKAWN KUNGDAWN 84:11

Madu gaw anhte hpe makawp maga ai wa hte hpung shingkang hte hpring ai hkawhkam wa rai nna; matsan dum ai myit hte arawng sadang anhte hpe shaman ya nga ai. Shi gaw teng man ai amu galaw ai ni hpe mai kaja ai lam hpa hpe mung jaw ya na, ningdang ai n rai.

GA SHAGAWP 12:4

Kaja ai num gaw shi madu wa a gumrawng shara hte kabu hpa rai nga ai; madu wa a ntsa e, kaya jahkrum ai num gaw nrut nra hpe shatsam kau ya ai mawng ana zawn rai nga ai.

GA SHAGAWP 31:10

Atsam marai rawng ai dinghku num hpe mu lu na, gade wa yak nga a hka! Shi gaw lung seng ni hta grau hpu nga ai!

GA SHAGAWP 31:29

Shi gaw, “Num law law ni gaw kaja ai nta madu jan ni hkrai rai nga ma ti mung, dai ni yawng hta nang gaw kaja htum rai nga ndai,” nga nna tsun wu ai.

MAHTE 28:18

Yesu gaw sape ni hpang de sit sa wa nna, “Sumsing lamu hta e mung, ginding aga hta e mung, up hkang na ahkang nlang hte ngai hpe ap ya ni ai.

ROMA 8:32

Kaja wa Karai Kasang hta dai hku n rai, shi a Kasha hpe pyi n lahpawt dum ai sha anhte mahkra a matu mara shagu hkungga di nna nawng kau ai Karai Kasang gaw nga manga hpe mung shi anhte hpe n jaw ai nga na a ni?

ROMA 9:24

Hpa majaw nga yang anhte gaw Karai Kasang e shaga la sai masha ni rai nna Yuda ni hta na sha n rai, maigan amyu ni hta na mung rai nga ai.

1 KORINHTU 1:9

Anhte a Madu ngu ai, Kasha Yesu Hkristu hte kanawn mazum lu mu ga, nanhte hpe shaga la ai Karai Kasang chyawm gaw, kangka re ai wa rai nga ai.

2 KORINHTU 12:9

Rai ti mung Karai Kasang gaw, “Nye a chyeju gaw na a matu ram ging nga ai, hpa majaw nga yang, nang gawng kya ai shaloi nye a n-gun atsam gaw ja dik rai nga ai,” nga nna ngai hpe mahtai jaw ni ai. Dai re ai majaw Hkristu a n-gun atsam gaw ngai hpe makawp maga nna shingbyi shangun nga ai lam myit hta hkam sha lu n ga, nye a gawng kya ai lam a majaw ngai kabu gumrawng n ma rai nga nngai.

EHPESU 4:1

Dai re ai majaw dai Madu hpe daw jau ai a majaw bawng dung ai wa ngai Pawlu gaw nanhte hpe shi shaga la ai kaw nna Karai Kasang e madat da ya sai sak hkrung lam madung hte maren, sak hkrung hkawm sa na matu ngai nanhte hpe shadut jahkat dat made ai.

EHPESU 4:4

Nanhte hpe Karai Kasang shaga la ai lam hta myit mada shara langai sha de, shaga la manit dai hte maren, hkum hkrang langai sha hte Wenyi langai sha rai nga ai.

HPILIPI 3:8

Dai hta n-ga, nye a Madu Yesu Hkristu hpe chye chyang lu ai lam gaw, lam shagu hta grau nna chyahtum chyalai hpu reng nga ai amyat re ai majaw, dai hpe lu la na matu arai yawng mayawng hpe tsep kawp asum hku ngai sawn la nngai. Ngai gaw shi a matu arai yawng mayawng hpe kabai kau ni ai. Hkristu ngu ai amyat hpe lu la na matu hte Hkristu hte langai sha tai lu na matu nga manga hpe shanut shanaw zawn ngai nawn kau ni ai.

HPILIPI 4:8

Hpu nau ni e, hpungdim hku nna tsun ga nga yang, nanhte gaw hpa teng man ai lam rai ti mung, hpa ding hpring ai lam rai ti mung, hpa san seng ai lam rai ti mung, hpa sharawng awng hpa lam rai ti mung, hpa sha-a ram ai lam rai ti mung, a rawng re ai lam lama ma, shakawn kungdawn re ai lam lama ma rai nga yang gaw dai lam hte hpe myit sumru yu nga mu.

KOLOSE 1:16

Hpa majaw nga yang, sumsing lamu hte ginding aga hta n-gun atsam rawng ai Wenyi minla ni, madu ni up hkang ai ni, ahkang aya lu ai hte hpawn myi hte mu lu ai, n mu lu ai hte hpe rai ti mung, dai Kasha wa a marang e hpan tawn da nu ai. Karai Kasang gaw arai yawng mayawng hpe shi a jaw e mung, shi a matu mara a matu mung hpan tawn da nu ai.

1 HTESALONI 2:12

Anhte gaw nanhte hpe n-gun jaw ai lam hte shadaw shalan ai lam galaw saga ai. Shi a mungdan hta shang sha lu na hte hpung shingkang hkam la lu mu ga, nanhte hpe shaga la ai Karai Kasang hpe sharawng awng shangun ai asak hkrung lam hta e hkawm sa nga na matu anhte matut manoi shadut jahkat saga ai.

1 HTESALONI 4:7

Karai Kasang gaw anhte hpe n san n seng ai asak hkrung lam hta hkrung nga na matu shaga la mi ai n rai. Chyoi pra ai asak hkrung lam hta nga na matu she shaga la mani ai.

2 HTESALONI 2:14

Karai Kasang gaw nanhte hpe anhte hkaw tsun ai dai Kabu Gara Shiga hku nna shaga la manit dai. Shi gaw anhte a Madu Yesu a hpung shingkang hta na nanhte hkam la ang ai hkam bum hpe madu la lu myit ga ngu nna shaga la manit dai.

1 TIMOHTI 4:8

Hkum hkrang hte seng nna sha shaman shakyang ai lam gaw akyu loi sha mi nga ai; rai ti mung wenyi makam masham lam hta shaman shakyang ai gaw lam shagu hta akyu nga nga ai; hpa majaw nga yang dai gaw ndai prat hte htawm hpang prat a matu ga ndat rawng nga ai.

2 TIMOHTI 1:9

Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai.

HEBRE 1:3

Shi gaw Karai Kasang a hpung shingkang ningja shapraw nna, Karai Kasang shi nan a gawng shingyan hkrang sumla hpe dagraw ai hte mungkan jan shata shagan nga yawng danghta hpe shi a hpung shingkang rawng ai mungga atsam hte bau sin da nga ai. Shi gaw shinggyim masha ni a yubak mara ni hpe raw dat jasan jaseng ai lam galaw ngut ai hpang, sumsing lamu e daru magam n-gun atsam rawng ai Karai Kasang a hkra maga de dung nga ai.

1 PETRU 1:15

Nanhte hpe shaga la ai Karai Kasang gaw chyoi pra nga ai hte maren, nanhte mung nanhte galaw ai lam shagu hta chyoi pra nga mu.

1 PETRU 1:5

Dai gaw kam sham ai marang e hpang jahtum ai aten hta dan pru u ga nga nna lajang shajin da sai hkye hkrang la ai chyeju hpe hkam la lu mu ga; Karai Kasang a n-gun atsam hte makawp maga da hkrum nga ai nanhte a matu rai nga ai.

1 PETRU 2:21

Dai hte maren nanhte galaw hkan sa na matu she, Karai Kasang gaw nanhte hpe shaga la manit dai; hpa majaw nga yang Hkristu shi hkum nan mung nanhte a matu nni nkri hkrum wu ai hte nanhte shi a hkang hta hkan nang lu myit ga, nanhte a matu ningli tawn da nu ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

1 PETRU 3:9

N hkru n kaja ai hpe n hkru n kaja ai hte, matsa mawa dagam dala ga hpe matsa mawa dagam dala ga hte, bai hkum tai htang nga myit; shing rai na malai; shaman ya ai ga htang jaw mu; hpa majaw nga yang, dai shaman ga gaw shi nanhte hpe shaga la ai shaloi nanhte hpe jaw na matu ga sadi jaw da sai rai nga ai.

1 PETRU 5:10

Rai ti mung nanhte jahkring sha mi nni nkri hkam ngut ai hpang, chyeju yawng mayawng a Madu rai nga ai Karai Kasang gaw nanhte hpe Hkristu hta langai sha tai shangun nna htani htana hpung shingkang hta shang sha lu mu ga, nanhte hpe shaga la ai Madu shi nan nanhte hpe ra n rawng hkra jahkum shatsup ai lam shangang shakang ai lam, n-gun lagaw sharawng ai lam ni jaw nna ngang kang ai npawt hkridun hta tsap nga lu ai ahkang jaw na marin dai.

2 PETRU 1:10

Dai re ai majaw, nye a hpu nau ni e, nanhte hpe Karai Kasang e shaga la ai hte lata la sai ngu ai lam hpe tut tut hkam sha nga na matu grau nna shakut shaja nga mu. Shing rai galaw myit yang gaw, nanhte a makam masham hpe galoi mung kabai kau na myit dai n rai.

2 PETRU 1:2

Karai Kasang hte anhte a hkye hkrang la ai Yesu Hkristu hpe nanhte chye chyang ai a marang e nanhte gaw chyeju hte ngwi pyaw ai hpe hkum tsup hkra hkam la lu myit ga law.

2 PETRU 1:5

Ndai lam nan a majaw, nanhte a makam masham hta mai kaja ai lam, mai kaja ai hte chye chyang ai lam a shajat nga mu.

2 PETRU 1:6

Chye chyang ai lam hta tinang a hkum hpe hkang ai, tinang a hkum hpe hkang ai hta hkam sharang ai, hkam sharang ai hta tara hkungga ai lam,

2 PETRU 1:8

Ndai hte gaw nanhte hta nga ra ai atsam marai ni rai nga ai; ndai lam ni nanhte hta n taw n tsang rawng nga ai rai yang gaw, anhte a Madu Yesu Hkristu hpe nanhte chye chyang ai hte asak hkrung ai lam hta kasang galang rai nna akyu byin shangun na marin dai.

2 PETRU 2:20

Lama rai nna masha ni gaw nanhte a hkye hkrang la ai Madu Yesu Hkristu hpe chye chyang ai a marang e mungkan ga a matsat shabat n-gun atsam kata na lawt lu sai hpang kalang mi bai matsat shabat lam e dang kau hkrum ai rai yang, dai ni a hpang na byin da gaw shawng na hta grau sawng mat wa sai.

2 PETRU 3:18

Nanhte gaw anhte a hkye hkrang la ai Madu Yesu Hkristu a chyeju hte shi hpe chye chyang ai lam hta matut nna galu kaba kunghpan sa wa myit ga; ya e mung, htani htana prat ding sa e mung, Yesu Hkristu kaw hpung shingkang anga nga u ga law.

RUHTA 3:11

Ruhta e, ya nang hpa mung hkum tsang et. Nang sari sadang hte hpring nga ai num rai nga ai gaw, mare masha shagu chye nga ma ai zawn, nang hpyi mahpyi lam shagu hpe ngai galaw na nngai.