2 KORINHTU 8:6 - Jinghpaw Common Language Bible 2009

⁶ Dai re ai majaw shawng kaw nna lit la galaw nga sai Titu hpe ndai alu hte seng nna nanhte a laksan tsaw ra shawang myit hte daw jau ai amu ngut kre hkra nanhte hpe karum u ga, anhte shi hpe shadut gaw ai.

Jinghpaw Hanson Version Bible

⁶ Dai rai nna, Titu gaw shawng galaw hpang ai hte maren, dai chyeju mung nanhte hta shatup u ga, anhte shi hpe shadut jahkat gaw ai.

2 KORINHTU 8:6 ပူးပေါင်းရင်းမြစ်များ

KASA 24:17

“Shing rai Yerusalem mare kaw na pru mat wa ai tsawmra ning lai ai hpang, nye a amyu masha ni a matu alu gumhpraw la wa ya na matu dai mare de ngai wa nngai.

ROMA 15:25

Ya hkyak hkyak e chyawm gaw, Karai Kasang a amyu masha ni hpe karum madi shadaw ai amu gun hpai na matu Yerusalem mare de sa wa nga nngai.

2 KORINHTU 12:18

Ngai gaw Titu hpe nanhte hpang de sa na matu hpyi lajin nna shangun dat nngai. Kaga Hkristan hpu nau langai mi mung shi hte rau hkan nang sa ai. Titu gaw nanhte a ntsa e ahkaw ahkang la nna sen di sha ai ngu na kun? Shi hte ngai gaw maw mawn ai myit mang lam langai sha hta hpawm hkrum nna lam masa langai hta sha hkan sa galaw ai ni n rai ga ni?

2 KORINHTU 2:13

Rai ti mung anhte a hpu nau wa Titu hte ngai n hkrum lu ai majaw ngai nachying myit ru myit tsang rai nga nngai. Dai majaw dai kaw na masha ni hpe shakram kau da nna Makedoni mung de sa wa nngai.

2 KORINHTU 8:10

Ndai alu jaw ai lam hte seng nna ngai myit ai hku nga yang, lai wa sai shaning hta nanhte galaw hpang da sai amu hpe ya galaw shakre yang nanhte a matu mai kaja na re. Nanhte gaw shawang myit hte jaw mayu ai myit shawng rawng ai ni sha n rai, alu shawng jaw ya ai ni rai nga myit dai.

2 KORINHTU 8:19

Dai hta sha n ga, ndai tsaw ra myit hte daw jau ai alu gumhpraw lahkawn ai amu hta anhte hte rau hkawm sa na matu hpung ni e lata la nna san da hkrum ai wa mung shi rai nga ai. Dai lam gaw Madu a hpung shingkang shadan jahkung na hte anhte a karum mayu ai shawang myit hpe madun dan na matu rai nga ai.

2 KORINHTU 8:23

Titu hte seng nna tsun ga nga yang, shi gaw nye a shingdep shingtau rai nna nanhte hpe karum na matu ngai hte rau amu jawm galaw ai wa rai nga ai; shi hte rau hkan nang sa wa ai kaga hpu nau yan gaw hpung ni a kasa ni rai nna, Hkristu a hpung shingkang dan hkung shangun ai yan mung rai nga ma ai.

2 KORINHTU 8:4

Shanhte gaw Yuda mung na Karai Kasang a masha ni hpe karum madi shadaw ai lam hta shang lawm mayu ma ai rai nna, shang lawm lu na ahkang jaw ya na matu shanhte a myit hku nna shanhte akroi anoi hpyi nem ma ai.

2 KORINHTU 9:5

Dai re ai majaw, nanhte shawang kumhpa ga sadi jaw da sai hte maren, dai hpe hkyen lajang shajin da na matu ndai hpu nau ni hpe nanhte hpang de nye a shawng e tau hkrau shangun dat ra nga ai ngu nna ngai myit nngai. Ngai du sa ai shaloi alu shajin shangut da chyalu rai nna nanhte a jaw ya ai gaw jaw ra ai lit shaprai ai hku n re ai sha jaw mayu ai shawang myit hte jaw ya ai re ai lam madun dan lu na rai nga ai.

HPILIPI 4:18

Nanhte shagun jaw dat ai arung arai alu yawng lu la sai lam hte jahpan ya nang e madun dan nngai. Dai gaw ra ai hta pyi jan hkra rai sai. Dai alu arung arai ni hpe Epahprodi la sa ya ai majaw ngai ra ai hta pyi jan hkra lu ni ai. Dai arai ni gaw Karai Kasang kaw nawng ya ai manam pyaw ai bat zawn mung, Karai Kasang ra sharawng ai hte hkap la ging ai shagu hkungga zawn mung rai nga ai.

1 PETRU 4:10

Nanhte gaw Karai Kasang kaw na laksan chyeju kumhpa ni hpe hkam la lu ai hte maren, Karai Kasang a chyeju kumhpa amyu myu hpe kaja ai lit hkam hpareng wa zawn shada da a mai kaja ai akyu a matu jai lang nga mu.