2 KORINHTU 7:1 - Jinghpaw Common Language Bible 2009

¹ Tsaw ra ai jinghku ni e, ndai ga sadi ni yawng gaw anhte hpe jaw da ai rai nga ai. Dai re ai majaw anhte gaw hkum hkrang hte wenyi hpe awu asin di kau ai matsat shabat nga manga hta na tinang hkum hpe jasan jaseng kau nhtawm Karai Kasang hpe hkrit hkungga let chyoi pra htum ai hku asak hkrung nga ga.

Jinghpaw Hanson Version Bible

¹ Tsawra ai ni e, ndai ga sadi yawng hte gaw lu la gaw ai majaw, hkumhkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga.

2 KORINHTU 7:1 ပူးပေါင်းရင်းမြစ်များ

2 HKAWHKAM LABAU 19:9

Shanhte hpe ning ngu nna tsun matsun wu ai: “Nanhte a lit ni hpe dai Madu hpe hkrit kamyin ai myit hte galaw nga mu; nanhte galaw ai amu magup hta kangka ai hte shi a ga madat mara nga mu.

SHAKAWN KUNGDAWN 119:9

Shabrang wa gaw shi a asak hkrun lam hpe san seng nga u ga, kaning rai shadik lu na rai nga a ta? Dai gaw na a hkang da ai tara ni hpe madat mara hkan sa ai hte sha shadik lu nga ai.

SHAKAWN KUNGDAWN 19:9

Madu hpe hkrit hkungga ai lam mai kaja nga ai rai nna, dai gaw htani htana agrin nga na ra ai. Madu a tara dara ai lam teng man nga ai rai nna, dai gaw tut nawng e tara rap ra nga ai.

SHAKAWN KUNGDAWN 51:10

O Karai Kasang e, san seng ai myit ngai hta hpan shapraw ya e; sadi dung ai wenyi hte myit masin nnan ngai hpe jaw ya rit.

GA SHAGAWP 16:6

Sadi dung nna kangka rai nga u, shing rai yang Karai Kasang gaw na a yubak hpe raw dat kau ya na ra ai. Dai Madu a ga madat u, shaloi n hkru ai lam hpa mung nang hta byin hkrum hkra wa na n rai.

GA SHAGAWP 20:9

Marai langai ngai, shi gaw shi a yubak mara hta na lawt lu sai nga nna myit masin hta asan sha hte, kadai wa teng teng tsun lu nga a ni?

GA SHAGAWP 30:12

Shanhte gaw dik hkra matsat shabat re nga ai shaloi, san seng nga ga ai nga nna, myit la ai masha ni mung nga nga ma ai.

GA SHAGAWP 8:13

Dai Madu hpe shagrau sha-a ai lam gaw n hkru ai lam hpe n dawng ai lam rai nga ai; ngai gaw gumrawng gumtawng ai hte myit tsaw myit dap ai n hkru ai lam hte n teng n man ai ga ni hpe n dawng nngai.

HPAJI NINGLI 11:10

Nang gaw hpa lam a majaw mung myit n ru, shing nrai n machyi hkra shangun u ga. Nang gaw aten grai na hkra ramma tai nga lu na ndai n rai.

ESAIA 1:16

Nanhte a hkum ni hpe asan aseng kashin kau mu. Ngai mu mada ai nanhte galaw nga ai n hkru ai amu ni yawng hpe jahkring kau mu. Rai sa, n hkru ai amu galaw ai hpe kau da ai hte

ESAIA 55:7

N hkru ai ni gaw shanhte a asak hkrun lam hpe kau da nna shanhte a myit mang ai lam galai shai kau nga mu ga. Shanhte gaw dai Madu anhte a Karai Kasang hpang de kayin wa mu ga; shi gaw matsan dum chye ai wa rai nna mara raw dat ya na matu lawan nga ai.

YEREMIA 13:27

Shi gaw nang galaw ai shi n dawng ai amu ni hpe mu nu ai. Htingbu wa a madu jan hpe hkan asoi yu nna ngang katu ai lasha wa zawn mung, gumra u yi hpang hkan ai lau gung zawn mung, kawng ni a ntsa hkan hte pa layang hkan e gap da ai tara maigan hpara ni hpang de nang hkan nga ai hpe shi mu nu ai. Yerusalem amyu masha ni e, nang gaw dingnye hkrum nga ndai! Galoi mi she nang san pra wa na rai nga n ta?

YEREMIA 4:14

Yerusalem e, na a myit masin kaw na n hkru ai hpe kashin kau u, shaloi hkye hkrang la hkrum na ndai. Nang gaw kade na hkra yubak hte seng ai myit mang lam ni hpe matut myit na ngu wu ni?

JAW JAU 13:58

Shi gaw dai arai hpe hkrut nna dai nshu lamu hkang mat mat ai rai yang, dai hpe shi bai hkrut nhtawm san seng mat na rai nga ai.

MAHTE 12:33

“Kaja ai asi lu na matu kaja ai hpun hkai ra ai. N kaja ai hpun gaw n kaja ai asi si na ra ai. Asi hpe yu nna hpun hpe chye ginhka lu nga ai.

MAHTE 5:48

Dai majaw sumsing lamu na nanhte a Kawa gaw kup tsup nga ai hte maren, nanhte mung kup tsup nga mu.

MAHTE 5:8

“Myit masin san seng ai ni gaw a lu ma ai; hpa majaw nga yang, shanhte gaw Karai Kasang hpe mu lu na maru ai!

KASA 9:31

Dai majaw dai aten hte yang Yuda mung Galile mung hte Samari mung shara magup hkan e nga ai hpung gaw zingri zingrat n hkrum ai angwi apyaw sha nga lu nga ma ai. Dai hpung gaw Karai Kasang hpe hkrit hkungga ai myit hte asak hkrung shamu shamawt nna Chyoi pra ai Wenyi a karum madi shadaw ai hte ngang kang grin nga ai rai nna hpung masha ni law htam wa ma ai.

ROMA 5:20

Dai Jep ai Tara tawn da ai majaw shut hpyit ai amu law jat wa nga ai; rai ti mung yubak mara law jat wa yang Karai Kasang a chyeju mung grau nna law jat wa nga ai.

1 KORINHTU 6:20

Madu gaw nanhte hpe jahpu manu daw nna mari da sai ni rai nga myit dai; dai re ai majaw, nanhte a hkum hkrang hpe Karai Kasang a hpung shingkang dan hkung na matu jai lang nga mu.

2 KORINHTU 1:20

Shi gaw Karai Kasang a ga ndat ni yawng a matu “Re ai” ngu ai mahtai rai nga ai. Dai rai nna anhte gaw Karai Kasang a hpung shingkang dan hkung shangun na matu Yesu Hkristu hta “Amen” ngu ga ai.

EHPESU 2:3

Kaja wa anhte yawng mung shawng de kalang mi shanhte zawn rai nna anhte a hkum shan a marin marit ai lam ni hta hkan sa let hkum shan a ra ai lam ni hte myit masin a ra ai lam shagu hpe hkan sa galaw nga ga ai. Anhte mung hkum shan lam hku nna kaga masha ni hte maren Karai Kasang a pawt sindawng ai hpe hkrum ging ai ni rai nga ga ai.

1 HTESALONI 3:13

Ndai lam hku nna shi nanhte hpe shadaw shangang na ra ai. Anhte a Madu Yesu gaw shi a chyoi pra ai ni yawng hte rau bai du sa ai shaloi e, nanhte gaw anhte a Kawa Karai Kasang a man e hkum tsup nna chyoi pra san seng ai ni tai wa na marin dai.

1 HTESALONI 4:7

Karai Kasang gaw anhte hpe n san n seng ai asak hkrung lam hta hkrung nga na matu shaga la mi ai n rai. Chyoi pra ai asak hkrung lam hta nga na matu she shaga la mani ai.

1 HTESALONI 5:23

Anhte hpe ngwi pyaw sim sa ai lam jaw ya ai Karai Kasang gaw, nanhte hpe lam shagu hta shachyoi shapra nna, anhte a Madu Yesu Hkristu bai du sa ai shaloi e, nanhte a Wenyi, myit masin hte hkum hkrang ting gaw, mara n kap hkra bau maka nga u ga.

HEBRE 12:23

Nanhte gaw Sumsing lamu na jahpan hta lawm ai kasha alat ni a kabu gara hpawng de nga ai hpawng de du nga manit dai. Masha amyu yawng hpe tara dara ai wa ngu ai Karai Kasang hpang de mung, jahkum shatsup hkrum sai ding hpring ai ni a wenyi ni hpang de mung, du nga manit dai.

HEBRE 12:28

Dai rai nna anhte lu la ai mungdan gaw n shamu n shamawt lu ai rai nna, anhte Karai Kasang hpe chyeju dum nga ga. Anhte gaw chyeju dum let hkrit hkungga ai myit hte Madu sharawng awng na hku Karai Kasang hpe nawku daw jau nga ga.

HEBRE 4:1

Ya Karai Kasang gaw anhte hpe ngwi pyaw ban sa ai lam hkam la shangun na nga nna tsun da ai ga ndat jaw da mani ai. Dai ga ndat jaw da sai ngwi pyaw ban sa ai lam hpe nanhte hta na langai mi mung n lu la ai n nga myit ga, anhte sadi nga ga.

HEBRE 6:9

Tsaw ra ai ni e, anhte ning nga nna tsun ga ti mung, nanhte hte seng nna anhte myit tsang ai lam nga ga ai. Nanhte gaw dai hkye hkrang la ai lam hte seng nna grau kaja ai shaman chyeju lu la manit dai hpe anhte chye ga ai.

YAKU 4:8

Karai Kasang hpang de sit sa wa mu; shaloi shi nanhte hpang de sit wa na ra ai. Yubak lu ai ni e, nanhte a lata ni hpe jasan jaseng da mu. Sawt ai ni e, nanhte a myit masin kraw lawang ni hpe jasan jaseng da mu.

1 PETRU 1:15

Nanhte hpe shaga la ai Karai Kasang gaw chyoi pra nga ai hte maren, nanhte mung nanhte galaw ai lam shagu hta chyoi pra nga mu.

1 PETRU 1:17

Dai hta kaga masha yawng hte hpe myi man n lata ai sha langai hte langai tinang galaw ai hte maren tara jeyang chye ai Karai Kasang kaw nanhte akyu hpyi myit yang, shi hpe, “Wa e,” ngu nna hpyi myit dai, Dai rai nna ndai mungkan hta nanhte asak hkrung nga ai laman hta shi hpe hkrit hkungga nga mu.

1 PETRU 1:22

Ya nanhte gaw dai teng man ai lam hpe madat mara nga let nanhte a hkum ni hpe jasan jaseng kau nhtawm, nanhte a kam sham ai manaw manang ni hpe kaja wa tsaw ra nga myit dai. Dai rai nna nanhte shada da myit masin mahkra hte tsaw ra nga mu.

1 PETRU 2:11

Ngai tsaw ra ai ni e, nanhte gaw ndai mungkan hta bu hkawm ai tsasam manam ni hte shingbyi nga ai ni zawn rai nga myit dai rai nna, myit masin hte gasat hkat nga ai hkum shan a kayut ai lam ni hpe galoi mung asum n jaw na matu ngai nanhte hpe hpyi nem dat made ai.

1 PETRU 5:10

Rai ti mung nanhte jahkring sha mi nni nkri hkam ngut ai hpang, chyeju yawng mayawng a Madu rai nga ai Karai Kasang gaw nanhte hpe Hkristu hta langai sha tai shangun nna htani htana hpung shingkang hta shang sha lu mu ga, nanhte hpe shaga la ai Madu shi nan nanhte hpe ra n rawng hkra jahkum shatsup ai lam shangang shakang ai lam, n-gun lagaw sharawng ai lam ni jaw nna ngang kang ai npawt hkridun hta tsap nga lu ai ahkang jaw na marin dai.

1 YAWHAN 1:7

Rai ti mung shi gaw nhtoi hta nga nga ai zawn, anhte mung Nhtoi hta asak hkrung hkawm sa nga ga yang gaw, anhte langai hte langai shada da kanawn mazum ai ni rai nga ga ai hte shi Kasha Yesu a asai gaw anhte hta na yubak nlang hte hpe jasan jaseng kau ya mi ai.

1 YAWHAN 1:9

Rai ti mung anhte a yubak mara ni hpe Karai Kasang kaw madun yin la nna hpyi nem ga yang gaw, shi gaw shi a ga sadi hta grin nga nna dai teng man ai amu galaw ai wa rai nga ai majaw, anhte a yubak mara hpe raw dat kau ya na hte, shut hpyit tawt lai ai lam yawng mayawng hta na jasan jaseng la na mi ai.

1 YAWHAN 3:3

Hkristu hta dai myit mada shara lu ai masha shagu gaw, Hkristu nan chyoi pra nga ai hte maren tinang hkum hpe mung shachyoi shapra da nga ai.