2 KORINHTU 6:5 - Jinghpaw Common Language Bible 2009

⁵ Anhte gaw anu kayat ai, htawng bang ai, shawa masha ni kabring kabrawng re ai hkrum ai, bungli galaw ai hta hkring sa ten n lu nna yup n lu sha ai, lusha n lu sha ai lam ni hkrum ga ai.

Jinghpaw Hanson Version Bible

⁵ anu kayat hkrum ai hta, htawng bang ai hta, kabrawng kabrang hkrum ai hta, bungli gun hpai ai hta, a maja nga ai hta, kawsi hpang gara ai hta,

2 KORINHTU 6:5 ပူးပေါင်းရင်းမြစ်များ

1 HKAWHKAM 22:27

Ngai shim lum ai hte bai nhtang wa ai aten du hkra, shi hpe htawng sharen da nna, muk hte hka jaw lu jaw sha na lam shanhte hpe tsun u,” ngu nna hkang dat wu ai.

2 HKAWHKAM LABAU 16:10

Dai ga gaw Asa hpe masin grai pawt shangun nga ai rai nna myihtoi wa hpe htawng hta sharen da ma ai. Dai aten hta nan Asa gaw amyu masha nkau mi hpe mazut ai hku zingri hpang wa nu ai.

ESAIA 53:5

Rai ti mung, anhte a yubak mara ni a majaw shi gaw hkala nba hkrum nga sai, anhte galaw ai n hkru ai amu a majaw kayat hkrum nga nu ai. Anhte gaw shi hkrum sha ai nni nkri ari a majaw mung, shi hkum ting htwi hkrum ai a majaw mung, shamai shatsai hkrum nga ga ai.

YEREMIA 33:1

Ngai gaw htawng wang kata e bawng naw dung nga yang, dai Madu a mungga ngai kaw kalang mi bai du ai.

YEREMIA 38:6

Dai rai nna, shanhte gaw ngai hpe woi la nhtawm sumri hte gyit nna hkawhkam wang kata hkawhkam kasha Malhkiya a hka htung kata de ngai hpe shayu dat ma ai. Dai hka htung hta hka n rawng nga ai, hkumpup hkrai rai nga nna, ngai gaw dai hta lup nga nngai.

EZEKELA 3:17

Shi gaw, “Si chye ai masha wa e, ngai nang hpe Israela amyu masha ni a matu sin langa shatai nngai. Dai re ai majaw, ngai nang hpe tsun dan ai shadum jahprang ga ni hpe shanhte hpang de htawn shalai ya lu na rai ndai.

MAHTE 14:10

Shaloi shi shangun nna htawng hta e rawng nga ai Yawhan a du hpe htau dut wu ai.

MAHTE 14:3

Herod gaw shawng kaw nna kanau Hpilip a madu jan Herodia a majaw, Yawhan hpe rim gyit la nhtawm htawng e bang da nu ai.

MAHTE 9:15

Yesu gaw shanhte hpe, “La nnan wa a hkungran gawk hte seng ai manaw manang ni gaw, la nnan wa hte rau naw nga nga yang, shanhte yawn hkyen hkrum na ma hka? N rai law! Rai ti mung, la nnan wa hpe shanhte kaw na jahka la kau ya ai nhtoi du na ra ai; dai shaloi shanhte lusha gam na mara ai.

KASA 13:3

Dai hte maren shanhte gaw lusha gam let, akyu hpyi nna shan a ntsa e lata mara jaw ngut jang, shan hpe dat dat mu ai.

KASA 14:19

Dai hpang Pesidi mung na Antioki hte Ikoni mare hkan na Yuda masha nkau mi sa du nna shawa hpawng hpe shanhte maga lawm hkra woi awn nhtawm, Pawlu hpe n lung hte kabai nna shi hpe si mat sai zawn nawn ai majaw, mare shinggan de garawt shapraw kau mu ai.

KASA 14:23

Hpung shagu hta, hpung salang ni hpe lata san da nna lusha gam let akyu hpyi ngut jang shanhte kam sham nga ai Madu a lata hta ap ya da mu ai.

KASA 17:5

Rai ti mung Yuda masha ni myit manawn ai majaw, mare lam hkan na akyu n rawng pagawn para re ai n hkru n kaja ai masha ni hpe saw la nhtawm shawa hpawng langai mi byin hkra shinggyin la nna mare ting hpe woi kabrawng shangun mu ai. Shanhte gaw Yasun a nta de shang nna Pawlu yan Sila hpe shawa hpawng a man de shapraw na hku tam ma ai.

KASA 20:31

Dai re majaw, ngai nanhte mahkra hpe masum ning tup shani shana myi prwi law law hkrat nna sharin achyin shadum shahprang da ai hpe dum nna amaja nga mu.

KASA 23:10

Shing rai dangrang hkat ai lam grai laja lana rai wa jang shanhte Pawlu hpe ashep ashin di kau na, hpyen du kaba wa myit tsang da wu ai; dai majaw, shanhte kaw yu wa nna Pawlu hpe dai ni a ka-ang na gare la nhtawm hpyen wang de shawn la na hpyen ma ni hpe hkang da mu ai.

KASA 23:35

munggyi wa gaw, “Nang hpe mara shagun ai ni du jang she, na a amu ngai sagawn yu na nngai,” nga nna tsun nhtawm Pawlu hpe Herod galaw da ai htingnu hta rawng shangun nna zawng da na hkang dat wu ai.

KASA 24:27

Shing rai ni ning lai ai hpang, Porku Hpestu gaw Hpilik a aya hte munggyi tai wa nna Hpilik gaw Yuda masha ni kaw na myi man ra ai majaw Pawlu hpe naw sharen tawn da wu ai.

KASA 26:10

Kaja wa Yerusalem mare e dai hku nan ngai galaw yu se ai. Hkinjawng agyi ni kaw na ahkang lu la nna, Karai Kasang a masha ni law law hpe htawng hta bang da nna, shanhte hpe sat kau na daw dan ai shaloi ngai myit hkrum lawm ni ai.

KASA 26:29

Bai Pawlu gaw, “Aten kadun sha mi rai tim, aten galu wa rai tim Hkawhkam wa hte hpawn nang e nga ai ni nlang hte gaw, nye a htawng masha tai ai aya hta lai nna, ngai zawn re ai hkrai byin wa na matu Karai Kasang kaw ngai akyu hpyi nngai!,” ngu wu ai.

KASA 28:30

Dai kaw nna Pawlu gaw ni ning tup shi shap rawng ai nta hta nga nga let, shi kaw sa masa ni hpe hkap la nna,

KASA 5:18

Shing rai shanhte gaw kasa ni hpe rim la nhtawm mare na htawng hta bang da mu ai.

1 KORINHTU 15:10

Rai ti mung, Karai Kasang a chyeju majaw, ngai gaw ngai wa rai nga nngai; ngai hpe Karai Kasang jaw ai chyeju mung kaman lila n rai nga ai sha, kaga kasa ni yawng hta, ngai grau nna bungli galaw gun hpai shaja nngai. Shing rai galaw lu ai gaw, nye a atsam majaw n rai, ngai hte rau amu galaw nga ai Karai Kasang a chyeju a majaw rai nga ai.

1 KORINHTU 4:11

Ya ten du hkra anhte kawsi hpang gara, singgu krin, adup ajin zingri hkrum nna nga shara garen let shara mi kaw nna shara mi de hkawm nga ga ai.

1 KORINHTU 7:5

Nanhte gaw akyu hpyi na matu, shawng kaw nna jahkring mi aten la na myit hkrum da ai lam sha n nga yang gaw, madu jan madu wa hkum shan kanawn ai lam hpe hkum koi gam nga myit; akyu hpyi ai ten htum ai hpang bai kanawn nga mu. Dai hku rai yang she nanhte n sharang lu ai majaw, Satan e gunglau ai n hkrum na myit dai.

2 KORINHTU 11:27

Bungli hte kyin dut ai, law law lang yup n lu sha ai, kaw si hpang gara hkrum ai, law law lang, lusha dumhprut ai, shingbyi shara n lu ai hte singgu krin re ai tsin yam ahkrum nga nngai.

EHPESU 3:1

Ndai lam a majaw, Hkristu a bawng dung ai wa ngai Pawlu gaw, nanhte maigan masha ni a matu Karai Kasang kaw akyu hpyi ya nngai.

TARA JAHPRANG 25:3

Shi hpe mali shi lang hta n jan ai sha dam hkawn jaw mai nga ai; dai hta jan kayat ai rai yang, shi hpe yawng a man e manu n shadan ai hku tai nga ai.

HPILIPI 1:13

Dai Hkawhkam htingnu hpe sin ai hpyen dap ting hte nang e nga ai kaga ni yawng hkra gaw, ngai bawng dung ai gaw Hkristu a shangun ma tai ai majaw re ai lam hpe chye wa masai.

1 HTESALONI 2:9

Hpu nau ni e anhte gade daram amu bungli galaw shakut shaja lai wa saga ai hpe kaja wa nanhte dum nga myit dai. Nanhte hpe hpa lit n shali n shayak sha u ga, anhte gaw anhte a kan bau bungli hpe shani shana galaw shakut let Karai Kasang a Kabu Gara Shiga hpe hkaw tsun ga ai.

1 TIMOHTI 4:10

Shinggyim masha yawng hte, grau nna kam sham ai ni a hkye hkrang la ai Madu rai nga ai ahkrung nga ai Karai Kasang gaw anhte a myit mada shara rai nga ai majaw, anhte amu bungli galaw ai lam aja awa shakut nga ga ai.

2 TIMOHTI 1:8

Dai rai nna anhte a Madu a matu sakse hkam ai hta hkum kaya nga u; bai nna Hkristu a jaw e bawng dung ai wa nye a majaw mung hkum kaya nga u; shing rai na malai, Karai Kasang gaw nang hpe n-gun lagaw jaw da nit dai hte maren, dai Kabu Gara Shiga a jaw e nni nkri hpe hkam sharang u.

2 TIMOHTI 2:9

Hpa majaw nga yang ngai gaw Kabu Gara Shiga hkaw tsun ai majaw ru tsang hkrum nngai; ru hka hkrum ai bawng langai mi zawn gyit hkang sharen da ai pyi gaw hkrum ni ai. Rai ti mung dai Karai Kasang a mungga chyawm gaw sharen da hkrum ai n rai.

2 TIMOHTI 4:5

Nang chyawm gaw hpa baw mabyin masa lam ni hkrum katut wa ti mung na a hkum hpe hkang tawn nna nni nkri hpe hkam sharang u. Dai Kabu Gara Shiga hkaw tsun ai sara amu hpe gun hpai nna, Karai Kasang a shangun ma langai mi hku na a lit nga manga hpe kup tsup hkra gun hpai nga u.

HEBRE 11:36

Nkau mi gaw asawng asang anu kayat di nna gyit hkang sharen ai hte htawng hta bang da ai hkrum ma ai.

HEBRE 13:17

Nanhte a lam woi ningshawng ni a ga hpe madat mara nna shanhte a hkang da ai ga ni hpe hkan sa galaw mu. Shanhte gaw shanhte galaw daw ai amu a jahpan hpe Karai Kasang kaw dan lu na rai nna, shanhte gaw nanhte a myit masin ni hpe n hkring n sa sin ya nga ma ai. Shanhte a ga hpe nanhte madat mara myit yang gaw shanhte galaw ai bungli hpe kabu gara ai hte galaw na mara ai: dai n rai yang shanhte myit yawn let galaw na mara ai rai nna na a matu hpa akyu mi rawng na n rai.

HEBRE 13:23

Anhte a hpu nau wa Timohti gaw htawng kaw na lawt pru wa ra ai lam nanhte hpe chye shangun mayu nngai. Shi ngai hpang de aten dep du sa wa ai rai yang, nanhte hte hkrum na matu ngai sa du ai shaloi shi hpe ngai hte rau woi sa wa na nngai.

SHINGRAN 2:10

Nang hkrum magang ra ai nni nkri hpe hkum hkrit et; Yu u: Nanhte hpe chyam yu na matu nat gaw, nanhte hta na nkau mi hpe htawng hta sharen da na ra ai rai nna, nanhte a ru yak nni nkri hkrum ai lam nhtoi shi ya tup na na ra ai. Si hkra ngai hta maju jung nga u, shaloi ngai nang hpe asak janmau jaw na de ai: dai gaw na a awng padang lu ai shabrai rai nga ai.