2 KORINHTU 6:16 - Jinghpaw Common Language Bible 2009

¹⁶ Karai Kasang a nawku htingnu gaw gawng-ngu sumla ni hte kaning di nna myit hkrum lu na rai ta? Hpa majaw nga yang, anhte gaw ahkrung nga ai Karai Kasang a nawku htingnu ni rai nga ga ai! Karai Kasang shi nan, “Ngai gaw nye a amyu masha ni hta nye a nta shatai nna, shanhte hta shanu nga na nngai; Ngai shanhte a Karai Kasang tai nga na nngai rai nna, shanhte gaw nye a amyu masha ni tai na mara ai,” nga nna tsun ai.

Jinghpaw Hanson Version Bible

¹⁶ Karai Kasang a nawku ai htingnu gaw, gawngngu sumla ni hte rau kaning rai kahtep lu na a ta? Kaning rai nme law, Ngai shanhte a kata de shanu nga nna ginrun nga na hte, Shanhte a Karai Kasang ngai tai na nngai rai nna, Shanhte gaw nye a amyu tai na mara ai, nga nna Karai Kasang tsun dan nga ai hte maren, ahkrung nga ai Karai Kasang a nawku ai htingnu gaw, anhte rai nga ga ai.

2 KORINHTU 6:16 ပူးပေါင်းရင်းမြစ်များ

1 HKAWHKAM 18:21

Elia mung amyu masha ni nga ai de lung wa nhtawm, “Nanhte gaw gade na hkra hpa mung n daw dan ai nga nga na ngu nga myit ni? Dai Madu gaw Karai Kasang rai nga ai rai yang, shi hpe nawku mu; rai ti mung Bala mahtang karai kasang rai yang gaw shi hpe nawku mu!,” ngu nna tsun wu ai. Rai ti mung amyu masha ni chyawm gaw ga hkaw mi pyi n htan ai sha nga nga ma ai.

SHAKAWN KUNGDAWN 90:1

Madu e, nang gaw anhte a tut nawng na shingbyi shara dum nta rai nga ndai;

PRU MAT 20:3

“Ngai hta kaga karai kasang shaje hpe nawku lu na n rai.

PRU MAT 23:13

“Ngai Madu nan nanhte hpe tsun ai lam magup hpe madat mu; kaga hpara ni kaw akyu hpyi lu na myit dai n rai; shanhte a mying hpe pyi hkum tsun myit.

PRU MAT 25:8

Amyu masha ni mung nye a matu chyoi pra ai Sum langai galaw lu na rai ma ai, shaloi ngai shanhte hta shanu nga lu na nngai.

PRU MAT 29:45

Ngai gaw Israela amyu masha ni hta shanu nga nhtawm shanhte a Karai Kasang tai nga na nngai.

PRU MAT 34:14

Ngai Madu nan shingjawng kashun ai hpe n hkam sharang lu nga nngai majaw kaga hpara shaje hkum nawku myit.

YEREMIA 24:7

Ngai gaw dai Madu rai nga nngai hpe chye na matu, chye mayu ai myit shanhte hpe ngai jaw na nngai. Shaloi, shanhte gaw myit masin mahkra hte ngai hpang de kayin wa na mara ai majaw, shanhte gaw nye a amyu masha ni tai nna, ngai mung shanhte a Karai Kasang tai na nngai.

YEREMIA 31:1

Dai Madu gaw, “Ngai gaw Israela amyu bawsang ni yawng a Karai Kasang tai nna, shanhte gaw nye a amyu masha ni tai wa ai shaloi dai aten gaw du wa na ra ai.

YEREMIA 31:33

Israela amyu masha ni hte tawn da na ga shaka ningnan gaw ndai rai nga ai: Ngai gaw shanhte kata hta nan nye a tara hpe tawn da ai hte dai hpe shanhte a kraw lawang ni hta e ka da na nngai. Ngai gaw shanhte a Karai Kasang tai nna shanhte gaw nye a amyu masha ni tai na mara ai.

YEREMIA 32:38

Shing rai, shanhte gaw nye a amyu tai nna, ngai gaw shanhte a Karai Kasang tai nga na nngai.

EZEKELA 11:20

Dai hpang, shanhte gaw nye a tara ni hpe shadik shatup lu na mara ai; nye a hkang da ai ga yawng hpe kangka ai hte madat mara hkan sa na mara ai. Shaloi, shanhte gaw nye a amyu masha ni tai wa ai hte ngai mung shanhte a Karai Kasang tai nga na nngai.

EZEKELA 36:25

Ngai gaw nanhte a ntsa e, san seng ai ntsin lapri bun nna, nanhte a hpara sumla ni yawng hta na mung, nanhte hpe awu asin di kau shangun ai arai shagu hta na mung, nanhte hpe jasan jaseng la na nngai.

EZEKELA 36:28

Dai hpang, nanhte gaw nanhte a kaji kawa ni hpe ngai jaw da sai mungdan hta shanu nga lu na marin dai. Nanhte gaw nye a amyu masha ni tai nna, ngai gaw nanhte a Karai Kasang tai nga na nngai.

EZEKELA 43:7

“Si chye ai masha wa e, ndai gaw nye a tingnyang rai li ai. Ndai yang e, Israela amyu masha ni hte rau ngai shanu nga nna shanhte hpe htani htana up hkang nga na nngai. Israela amyu masha ni hte shanhte a hkawhkam ni gaw karai shaje ni hpe nawku ai hku nna mung, shanhte a hkawhkam ni a si mang ni a makau hkan e mung, nye a chyoi pra ai mying ningsang hpe awu asin bai di lu na mara ai n rai.

EZEKELA 43:9

Ya chyawm gaw, karai shaje ni hpe nawku ai lam hpe shanhte jahkring kau nhtawm shanhte a hkawhkam ni a si mang ni hpe htawm kau lu na rai ma ai. Shanhte dai hku hkan galaw ai rai yang, ngai gaw shanhte a ka-ang e htani htana anga nga na nngai,” ngu nna tsun nngai.

HOSEA 14:8

Israela amyu masha ni gaw hpara sumla ni hte hpa mung seng na mara ai n rai; shanhte a akyu hpyi ga ni hpe ngai htan ya let shanhte hpe lanu lahku na we ai. Tsit lali ai hpun zawn ngai shanhte a makawp shingbyi shara tai ya na nngai; Ngai gaw shanhte yawng a shaman chyeju npawt rai nga nngai,” ngu nna tsun ai.

HOSEA 2:23

Ngai gaw nye a amyu masha ni hpe ndai lamu ga hta shanu nga shangun nna shanhte hpe ngamu ngamai shangun na nngai. Ngai gaw “Tsaw ra n hkrum ga ai” ngu tsun hkrum nga ai ni hpe mung, “Nye a amyu masha ni n re” nga nna tsun hkrum ai ni hpe mung tsaw ra myit madun na we ai. Ngai gaw, “Nanhte gaw nye a amyu masha ni rai nga myit dai,” ngu nna tsun na we ai, shanhte gaw, “Nang gaw anhte a Karai Kasang rai nga ndai,” nga nna htan na mara ai.

JAW JAU 26:12

Ngai gaw nanhte hte rau anga nga nna nanhte a Karai Kasang tai nga na nngai, nanhte mung nye a amyu masha ni tai nga na rai myit dai.

ZEHPANI 1:5

Kadai mung tinang nta ntsa de lung wa nna ajan, shata hte shagan ni hpe nawku nga ai ni hpe ngai jahten kau na we ai. Ngai hpe nawku daw jau ai hte ngai hta ga sadi dung nga na nga nna dagam da ai ni ngai kaw nna htak mat wa nhtawm Molek hpara a mying nsang hta ga shaka la ai ni hpe ngai shamyit kau na we ai.

ZEHKARIA 13:9

Ngai gaw dai naw hkrung nga ai htam mi hpe wan hte jasan jaseng la ai gumhpraw zawn shanhte hpe jasan jaseng nna chyam yu na nngai; ngai gaw aja hpe chyam yu ai zawn shanhte hpe chyam yu na nngai. Dai shaloi shanhte ngai kaw hpyi wa nna, ngai mung shanhte hpe htan ya na nngai. Shanhte gaw nye a amyu masha ni rai nga ma ai lam ngai shanhte hpe tsun dan na nngai, ngai gaw shanhte a Karai Kasang rai nga nngai hpe shanhte yin la na mara ai,” ngu nna tsun ai.

ZEHKARIA 8:8

shanhte hpe Yerusalem hta nga shangun na matu, sinpraw sinna maga hkan nga nga ai shanhte hpe bai woi la na nngai. Shanhte gaw nye a amyu masha ni tai nna, ngai gaw shanhte a Karai Kasang tai nga let shanhte hpe sadi sahka hte teng man ai hku up hkang nga na nngai.

MAHTE 16:16

Simun Petru gaw htan nna, “Nang gaw Meshia ngu ai ahkrung nga ai Karai Kasang a Kasha rai nga ndai,” ngu wu ai.

MAHTE 6:24

“Kadai rai ti mung, madu lahkawng a nchyang n tai lu ai; shi gaw langai mi hpe n dawng nna langai wa hpe tsaw ra na wu ai; langai mi hta sadi dung nna, kaga hpe n kaw n law di na wu ai. Nanhte Karai Kasang hpe mung, mungkan ga a sutgan hpe mung rau chyang lu na myit dai n rai.

LUKA 5:36

Yesu gaw ga shadawn hte mung shanhte hpe tsun mu ai gaw, “Palawng nnan hta na achyen gang je la nna, palawng dingsa hta kadai n kapa ga ai; shing di yang palawng nnan hpe gang je kau nna, palawng dingsa mung nnan hta na achyen hte n pre na ra ai.

YAWHAN 14:23

Yesu gaw, “Ngai e tsaw ra ai wa rai yang gaw, nye a sharin shaga ai ga hpe madat mara hkan sa shatup na ra ai. Nye Wa mung dai wa hpe tsaw ra na wu ai rai nna an lahkawng gaw dai wa kaw sa nna, shi hte rau shanu nga na ga ai.

YAWHAN 6:56

Nye a ashan sha nna, nye a asai lu ai wa kadai mung ngai hta rawng nga ai rai nna, ngai mung dai wa hta rawng nga nngai.

ROMA 8:11

Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung jahkrung ya na marin dai.

ROMA 8:9

Rai ti mung, nanhte a hkum shan myit e hkang ai hku n re ai sha nanhte hta Wenyi nan shanu nga yang gaw Wenyi e hkang ai hku galaw hkawm sa myit mang lu na rai myit dai. Kadai rai ti mung Hkristu a Wenyi n rawng ai wa gaw Hkristu hte n seng nga ai.

ROMA 9:26

Bai ‘Nanhte nye a amyu masha ni n rai nga myit dai,’ nga nna shanhte tsun kau hkrum ai shara dai yang e pyi, hkrung nga ai Karai Kasang a kasha ni ngu na marin dai,” nga ai.

1 KORINHTU 10:21

Nanhte gaw dai Madu a gawm kaw na lu nhtawm, nat ni a gawm kaw na mung bai lu lu na myit dai n rai, dai Madu a sha ku hta na sha nhtawm, nat ni a sha ku hta na mung bai sha lu na myit dai n rai.

1 KORINHTU 6:19

Nanhte a hkum hkrang gaw, nanhte hta rawng nga ai Karai Kasang jaw ya ai dai Chyoi pra ai Wenyi a htingnu rai nga ai hpe, nanhte n chye myit ni? Nanhte gaw nanhte a hkum hpe up madu lu myit dai n rai, Karai Kasang chyu sha madu rai nga ai.

EHPESU 2:20

Nanhte gaw kasa ni hte myihtoi ni gaw da ai npawt nhpang hta de kahtap myit dai; Hkristu chyawm gaw shi nan njut jahtum na nlung rai nga ai.

EHPESU 2:22

Nanhte mung Hkristu hte langai sha tai nna kaga masha ni yawng hte jawm de ai hpe hkam la nhtawm, shi a Wenyi a marang e Karai Kasang shanu nga ai shara tai wa manit dai.

EHPESU 3:17

makam masham a marang e Hkristu gaw nanhte a myit masin ni hta shi a shanu shara shatai u ga, hte tsaw ra myit hta ru jung npawt gaw da let,

TARA JAHPRANG 5:7

“ ‘Ngai hta lai karai shaje hpe hkum nawku myit.

1 TIMOHTI 3:15

Rai ti mung lama wa ngai alawan n lu du sa wa ai rai yang hkrung nga ai Karai Kasang a hpung ngu ai dai teng man ai lam a npawt hkridun rai nga ai Karai Kasang a nta dinghku hta anhte kaning re ai arawn asam sat lawat hkan sa mai ai lam chye lu u ga, ndai laika hpe ka dat nngai.

2 TIMOHTI 1:14

Nang hpe kam nna ap ya da sai mai kaja ai arai ni hpe anhte hta shanu nga ai dai Chyoi Pra ai Wenyi a atsam hte a mahkyu nga u.

HEBRE 3:6

Hkristu chyawm gaw Karai Kasang a nta hpe up ai Kasha re ai hku nna kangka rai sadi dung nga ai. Anhte nden marai rawng nna tinang ni a kabu gara myit mada ai lam hpe jahtum du hkra myit mu myit hkut ai hte ngang ngang kang kang manoi nga ga yang gaw, Karai Kasang a nta masha ni rai nga ga ai.

HEBRE 8:10

Ya ndai ga shaka gaw du na ra ai nhtoi ni a hpang e Israela amyu masha ni hte ngai tawn da na ga shaka rai nga ai. Shanhte a myit masin kata hta nye a tara hpe ngai bang da ya na mawe ai, shanhte a kraw lawang hta ka da na we ai: Shanhte a Karai Kasang ngai tai na nngai rai nna, shanhte gaw nye a amyu masha ni tai na mara ai.

YAKU 4:5

“Anhte hta Karai Kasang bang da ya ai wenyi gaw hkrithpa laja lana re ai ra marin ai myit hte hpring chyat nga ai,” nga nna dai Chyum Laika tsun ai ga hta teng man ai lam n rawng ai ngu nna nanhte myit nga myit ni?

1 PETRU 2:5

Nanhte gaw asak hkrung nga ai nlung ni zawn Karai Kasang kaw sa nna dai wenyi hte seng ai htingnu gaw gap ai hta nanhte ni nan shang lawm jai lang hkam nga mu. Dai shara hta Madu Yesu a marang e wenyi hte seng nna sharawng awng hkap la ging ai shagu hkungga ni hpe Karai Kasang kaw nawng ya na matu chyoi pra ai hkinjawng ni zawn nanhte daw jau na rai myit dai.

1 YAWHAN 4:12

Karai Kasang hpe kadai mung galoi mung n mu yu ai rai ti mung anhte shada da tsaw ra nga ga yang gaw, Karai Kasang gaw anhte hte langai sha tai nna nga nga ai rai nna, shi a tsaw ra ai myit gaw anhte hta kup tsup wa lu na ra ai.

1 YAWHAN 4:15

Yesu gaw Karai Kasang a Kasha rai nga ai nga nna marai langai ngai yin la ai rai yang, shi gaw Karai Kasang hte langai sha tai nna nga nga ai, Karai Kasang mung shi hte langai sha tai nna nga nga ai.

SHINGRAN 2:1

“Ehpesu mare hpung a lamu kasa hpang de ning ngu ka dat u: “Da ndai gaw, Hkra lata hta shagan sanit lang da nna, ja pyengdin sanit a ka-ang e lam hkawm ai wa kaw na mungga rai nga ai.

SHINGRAN 21:3

Bai ngai gaw, dai tingnyang kaw na shaga pru ai nsen kaba langai mi na nngai. Dai nsen gaw, “Ya Karai Kasang a sum nta gaw shinggyim masha ni hte rau rai nga ai. Shi shanhte hte rau hpawng de nga na rai nna, shanhte gaw shi a amyu masha ni tai na mara ai. Karai Kasang gaw, shi hkum nan shanhte hte rau nga nga na ra ai rai nna, shi gaw shanhte a Karai Kasang tai na ra ai.

SHINGRAN 21:7

Awng padang lu ai wa gaw, ndai ga sadi hte maren hkam la lu na ra ai rai nna, ngai gaw shi a Karai Kasang tai na hte, shi gaw nye a kasha tai na ra ai.