2 KORINHTU 4:2 - Jinghpaw Common Language Bible 2009

² Anhte gaw makoi magap ip da ai kaya kahpa amu nlang hte hpe rap di kau sagaw ai; anhte gaw hkalem hkalau ai hku n galaw ga ai, Karai Kasang a mungga hpe mung masu magaw gale galau n tsun ga ai. Anhte gaw Karai Kasang a man e dai teng man ai lam a nhtoi hta asak hkrung shamu shamawt nna masha hkum shagu a htauli htaula myit hte htap htuk ai hku nga ga ai.

Jinghpaw Hanson Version Bible

² makoi magap re ai kaya kahpa hpe anhte rap di kau sagaw ai hte, hkalem hkalau ai mung n hkan nna, Karai Kasang a mungga hpe gale galau n di ai sha, dai tengman ai lam shapraw shadan let, Karai Kasang a man e, masha yawng mayawng a myit masin kaw, anhte hkum a atsam marai anhte dan nga ga ai.

2 KORINHTU 4:2 ပူးပေါင်းရင်းမြစ်များ

1 HKAWHKAM 18:34

Shi gaw, “Kalang bai jaw mu,” ngu dat wu yang, shanhte mung jaw ma ai. Shi gaw, “Kalang sha mi naw jaw mu,” ngu wu yang, shanhte mung jaw ma ai.

ROMA 1:16

Hpa majaw nga yang, dai Kabu Gara Shiga hta awm dawm kam sham myit hkut nga nngai, Dai gaw shawng nnan e Yuda ni dai hpang e maigan masha ni hta kam sham ai ni kadai hpe mung hkye hkrang la hkrum shangun lu ai Karai Kasang a atsam rai nga ai.

ROMA 6:21

Dai aten hta nanhte hkan sa galaw ai amu ni gaw hpa akyu mi n shabyin ai hta n ga ya e nanhte dai ni a majaw kaya kahpa hkrum manit dai. Dai ni a jahtum ai gaw si mat ai rai nga ai.

1 KORINHTU 4:5

Dai re ai majaw, aten hkrak garai n du yang, kadai hpe mung hkum jeyang myit. Hpang jahtum na jeyang daw dan ai lam hpe, dai Madu bai du sa ai nhtoi shani du hkra la nga lu na rai nga ai; Shi gaw nsin hta makoi magap da ai nga manga hte hpe mung, masha a myit kraw lawang kata hta makoi magap da ai myit mang yaw shada ai lam ni hpe mung, shapraw shadan dan na ra ai. Dai shaloi e langai hte langai gaw tinang hte ging dan ai hte maren Karai Kasang kaw na shakawn shagrau ai hpe hkam la na ra ai.

2 KORINHTU 1:12

Anhte myit kata hta asan sha gumrawng na lam langai mi nga ai; dai gaw, ndai mungkan hta anhte a asak hkrung lam, grau nna nanhte hte kanawn mazum matut mahkai ai lam ni hta masha a machye machyang hta n shamyet shanat ai sha Karai Kasang a chyeju atsam hte anhte gaw Karai Kasang jaw ai teng man san seng ai myit masin e up hkang ai hku nna amu galaw ai lam rai nga ai.

2 KORINHTU 11:3

Ewa gaw lapu a hpaji rawng ai zai byeng-ya hte masu hkalem hkrum ai zawn, nanhte mung nanhte a myit mang ai lam jahten kau hkrum nna, nanhte a hpring tsup nna san seng ai myit hte Hkristu hta maju jung kam sham daw jau ai lam hpe kau da na myit tsang nga nngai.

2 KORINHTU 11:6

Lama wa ngai gaw hkaw tsun shaga ai lam hta n kung ai wa rai hkra rai ti mung, kaja wa chye chyang ai lam hta gaw dai zawn n rai, anhte gaw aten shagu mabyin masa lam yawng hta ndai lam nanhte hpe asan sha mu chye shangun saga ai.

2 KORINHTU 2:17

Anhte gaw kaga masha law law ni zawn, Karai Kasang a mungga hpe manu hpa ai gun rai hpe zawn dut mari ai lam n galaw ga ai. Rai ti mung anhte gaw Karai Kasang e shangun dat ai ni rai nna, Hkristu a shangun ma ni hku nna Karai Kasang a man e dai mungga hpe teng man san seng ai myit hte hkaw tsun ga ai.

2 KORINHTU 5:11

Anhte gaw dai Madu hpe hkrit kang ai ngu ai hpa rai nga ai hpe chye ga ai majaw kaga masha ni hpe lau la lu na matu shakut shaja ga ai. Karai Kasang anhte a lam akri akrai chye nga ai, nanhte mung nanhte a myit masin ni hta nye a lam atsawm sha chye nga myit dai ngu nna ngai myit mada nga nngai.

2 KORINHTU 6:8

Anhte gaw shagrau sha-a ai mung, jahpoi asawng ai mung, shakawn kungdawn ai mung hkrum ga ai. Anhte hpe masu hkalem sha ai masha ni rai ma ai ngu nna shadu ma ai, rai ti mung, anhte gaw teng man ai ga tsun ga ai.

2 KORINHTU 7:14

Ngai gaw Titu hpe nanhte a lam gumrawng dan ni ai. Shing rai gumrawng dan ai hte maren teng man nga ai lam nanhte madun dan manit dai majaw ngai hpe myit daw shangun myit dai n rai. Anhte gaw nanhte hpe galoi mung teng man ai lam hpe sha tsun ga ai hte maren, Titu hpe nanhte a lam gumrawng dan ai lam mung teng nga ai hpe chye lu sai.

EHPESU 4:14

Dai shaloi anhte gaw masha hpe lam dam hkra masu hkalem chye ai masha ni hpaji daw sharin shaga ai nbung leng kata hta nbung lam galai mat shagu kadau kadap nhting nhtang rai poi lawm mat wa ai ma kaji ni zawn rai sana n rai.

EHPESU 5:12

(Hpa majaw nga yang, shanhte mayun mayoi e galaw ai amu ni gaw kaja wa tsun na pyi gaw nachying kaya kahpa rai nga ai.)