2 KORINHTU 12:20 - Jinghpaw Common Language Bible 2009

²⁰ Nanhte hpang de ngai du yang, ngai ra ai, mu mayu ai hku nanhte n rai nga la na hpe mung, nanhte mung nanhte ra ai, mu mayu ai hku ngai hta n rai nga na hpe mung ngai tsang nga nngai. Bai ngai gaw nanhte hta ga li ga law ai lam, manawn masham ai lam, pawt sindawng ai lam, tinang akyu tam ai lam, shada da jahpoi asawng ai lam, kadum kahte ai ga, grang ai ga hte kabring kabrawng n ru n ra re ai lam ni sa mu na hpe tsang nngai.

Jinghpaw Hanson Version Bible

²⁰ Kaning rai nme law, nanhte hpang de ngai du yang, ngai ra ai hte maren nanhte n rai nga nna, nanhte ra ai hte maren ngai mung n rai nga na nhten, ngu nna ngai tsang nga nngai: gasat gala, manawn masham, n dawng n yawt ai, bra wa na lam, baw law ai ga, kadum kahte ai ga, grang ai ga hte kabrawng kabrang rai nga na hpe mung, ngai tsang nga nngai:

2 KORINHTU 12:20 ပူးပေါင်းရင်းမြစ်များ

SHAKAWN KUNGDAWN 41:7

Ngai hpe n ju n dawng ai masha yawng hte gaw nye a lam hpe shanhte shada da gahte tsun ma ai; shanhte gaw nye a lam hpe grau sawng ai hku myit shapraw ma ai.

GA SHAGAWP 16:28

Kadum kahte ga hpe tara n lang ai masha ni tsun shabra nga ma ai; dai gaw ru yak tsin-yam hpe shalut shalau ya nhtawm, hku hkau ai lam hpe jahten kau ya nga ai.

ROMA 1:29

Shanhte hta n hkru n kaja ai lam amyu myu, awu asin re ai lam, nam mak lawhpa ai lam, arawn alai hten ai lam, n dawng n yawt ai lam, masha sat ai, ga li ga law ai lam, hkalem hkalau ai, mara matsing da ai lam ni hpring chyat rai nga malu ai.

ROMA 1:30

Shanhte gaw ga shaga baw law ai ni, kaga wa a sari jahpoi ai ga, kadum kahte ai ni, Karai Kasang hpe n dawng ai ni, manang wa hpe n kaw n law rai aroi ara re ai ni, gumrawng gumtawng ai ni, shakawng shakat rai grang dakat ai ni, n hkru n kaja ai amu amyu myu hpe myit shapraw nna galaw ai ni, kanu kawa ni a ga n madat ai ni,

ROMA 2:8

Rai ti mung masha nkau mi gaw dai n ding n man ai maga de hkan sa na matu tinang a akyu tam nna teng man ai tara hpe kabai kau ma ai, shing re ai ni a ntsa e Karai Kasang gaw shi a pawt bu nna sindawng kahtet ai ru bun na ru ai.

1 KORINHTU 1:11

Hpa majaw nga yang, ngai hpu ngai nau ni e, nanhte shada da ga li ga law rai nga myit dai lam hpe Hkloe a nta na masha nkau mi ngai hpe asan sha sa tsun shana dan mi ai.

1 KORINHTU 14:33

Hpa majaw nga yang, Karai Kasang gaw kashuk kashak lam a Karai Kasang n re ai sha, ngwi pyaw sim sa lam a Karai Kasang she rai nga ai.

1 KORINHTU 5:2

Dai zawn arawn alai hten nga myit ti mung, nanhte gumrawng gumtawng naw rai nga myit ni? Nanhte hta yawn ai myit rawng let, dai zawn nse nsa galaw ai masha hpe nanhte hte kanawn mazum nga ai kaw na shaden jahka kau ang myit dai.

2 KORINHTU 1:23

Korinhtu mare de ngai bai n sa sana ngu nna ngai myit daw dan ai lam gaw nanhte hpe hkyamsa shangun mayu ai majaw re ai lam, nye a myit masin hpe chye ya ai Karai Kasang gaw nye a sakse rai nga sai.

2 KORINHTU 10:2

Hkristu a sumnung ai hte myit gyip ai hpe tau yu nna nanhte kaw du sa ai shaloi sheng mareng nga nna ga shaga ai kaw n du ra na matu hpyi nem dat nngai; hpa majaw nga yang, anhte hpe mungkan a ra marit ai hku maw mawn ai myit hte asak hkrung ai ni re ngu nna tsun ai ni hpe sheng mareng ngu nna ngai hkrak sha tsun shaga lu nngai.

2 KORINHTU 10:6

Nanhte gaw anhte a ga hpe tup hkrak madat mara nna sadi dung ai lam hpe chye lu jang, anhte gaw sadi n dung ai hpa lam hpe mung ari jaw na matu jin jin rai nga saga ai.

2 KORINHTU 12:21

Nanhte hpang de ngai bai du ai shaloi Karai Kasang gaw ngai hpe nanhte a man e shagrit kau ai hkrum shangun na hpe ngai tsang nngai. Ya du hkra pyi myit malai n lu ai sha arawn alai hten nna ngang kayut ai hte nse nsa lam hkan nga ai ni law law a majaw, ngai hkrap myi prwi pru na hpe tsang nga nngai.

2 KORINHTU 13:2

Shawng de yubak galaw lai wa sai ni hte kaga ni yawng hpe ngai tsun mayu nngai. Dai hpe shawng de lahkawng lang ngu na nanhte hpang de sa du ai shaloi mung ngai tsun ni ai hte maren, ya nanhte hte tsan gang nga ai ten hta mung ngai kalang mi bai tsun na nngai. Dai gaw hpang na lang ngai bai sa du ai shaloi nanhte langai mi mung jeyang ari jaw ai hta na lawt lu na n rai.

2 KORINHTU 2:1

Dai rai nna nanhte hpe myit yawn ai lam n byin shangun u ga, nanhte hpang de bai n sa sana ngu nna ngai myit daw dan se ai.

GALATI 5:15

Rai ti mung zai ai dusat matse ni zawn nanhte shada da kawa sha hkat nga myit yang gaw, nanhte shada da shamyit kau hkat ai lam tai na re ai majaw, sadi nga mu.

GALATI 5:26

Anhte gaw kaman lila grang gumrawng nna shada da jahte tam ai hte shada manawn masham hkum rai nga ga.

YAKU 4:11

Hpu nau ni e, nanhte shada da mara tam dinglun ai lam hkum galaw myit; tinang a Hkristan hpu nau wa langai mi hpe mara tam dinglun ai, shing n rai jeyang ai wa kadai mung dai Tara hpe mara tam dinglun ai hta n ga, dai hpe jeyang ai wa mung rai nga ai. Nanhte gaw Tara hpe jeyang myit yang gaw, dai Tara hpe madat mara hkan sa ai ni n rai, dai hpe jeyang ai ni sha rai manit dai.

1 PETRU 2:1

Dai re ai majaw nanhte gaw n hkru n kaja ai lam amyu myu hte masu hkalem ai lam sawt ai lam, manawn masham ai lam hte roi asawng ai ga ni hpe yeng seng kabai kau mu.

2 PETRU 2:18

Shanhte gaw shut hpyit lam dam mat ai masha hpawng kata na ningnan sha lawt pru magang wa ai ni hpe kaman lila grang ai ga tsun let hkum shan a myit kayut ai lam ni hte hkalum la nna lam woi shadam ma ai.

YUDA 1:16

Ndai masha ni gaw galoi mung aput angun nga nna masha kaga ni hpe mara sha shagun nga ma ai; shanhte gaw shanhte a n hkru n kaja ai, ra marin ai hta hkan nang ma ai. Shanhte gaw tinang a lam hpe shakawng gumrawng chye ma ai; shanhte gaw tinang a akyu pru hkra masha wa hpe kawng sharawt ya masu ai hku hkalem ai ga chye tsun ma ai.