2 KORINHTU 10:18 - Jinghpaw Common Language Bible 2009

¹⁸ Hpa majaw nga yang, tengman ai arawng hkam la ai wa gaw tinang hkum dai tinang shagrau shatsaw ai wa n rai, Karai Kasang e shagrau shatsaw hkrum ai wa she rai nga ai.

Jinghpaw Hanson Version Bible

¹⁸ Kaning rai nme law, tinang hkum hpe shagrau ai wa n rai, dai Madu shagrau ai wa chyu sha, ging dan ngu ai hkam la nga ai.

2 KORINHTU 10:18 ပူးပေါင်းရင်းမြစ်များ

GA SHAGAWP 12:8

Nang zai byeng-ya hpaji hpe chye nga ai wa rai yang, shakawn shagrau ai nang hkrum na ndai; nang angawk ai wa rai yang chyawm gaw masha ni na a ntsa e yu kaji kau na mara ai.

GA SHAGAWP 21:2

Nang galaw ai amu lam magup, teng man nga ai nga nna nang myit la mai nga ai; dai Madu gaw na a maw mawn ai myit hpe jep yu nga ai lam, myit dum u.

GA SHAGAWP 27:2

Na a n-gup hte nang nan hpe hkum shakawn, masha ni shakawn mu ga, na a nten hte nang nan hpe hkum shagrau tsasam ni shagrau mu ga.

LUKA 16:15

Yesu gaw, “Nanhte gaw masha ni a man e, tinang a hkum hpe teng man ai masha ni re ngu ai hku mu shangun nga myit dai; rai ti mung, Karai Kasang gaw myit masin ni hpe chye ya nga ai. Hpa majaw nga yang, masha e jahpu shareng nna shagrau ai arai ni gaw Karai Kasang a man e manu n rawng nga ai.

YAWHAN 12:43

Hpa majaw nga yang, shanhte gaw Karai Kasang e masat masa galaw ai arawng sadang lu na hta masha e masat masa galaw ai arawng sadang lu na hpe grau ra ma ai.

KASA 2:22

Israela masha ni e, ga ndai ni hpe madat la mu! Karai Kasang gaw mauhpa magam amu ni hte lamik kumla ni hpe Nazaret wa ngu ai Yesu a lata hte nanhte a man e madun dan sai. Dai rai nna shi gaw Karai Kasang kaw na daru magam ahkang aya lu ai wa re ai lam dan leng wa sai. Dai lam ni gaw nanhte a man e byin lai wa sai majaw nanhte ni nan chye nga myit dai.

ROMA 14:18

Dai hku hkan nna Hkristu a bungli gun hpai ai wa gaw, Karai Kasang a man e sharawng awng nna, masha a man e mung awlaw ai hkrum nga ai.

ROMA 16:10

Hkristu hta sadi dung ai lam hta ra n rawng ai Apele hte Aristobulu a nta na ni hpe shakram ya mi.

ROMA 2:29

Yuda masha majing chyawm gaw, kraw kata e matu gadoi hking hkam la ai wa mahtang rai nga ai. Dai wa hpe Yuda masha byin shangun ai lam gaw ka da ai jep ai Tara a majaw n rai, Karai Kasang a Wenyi e masha a kraw lawang kata hta amu galaw ai hte shabyin ai lam rai nga ai. Dai zawn re ai masha wa gaw masha kaw na shakawn kungdawn ai hpe hkam la ai n rai, Karai Kasang kaw na she hkam la ai wa rai nga ai.

1 KORINHTU 11:19

(Nanhte hta hka bra wa ai lam byin na sha rai nga ai. Shaloi she kadai ni gaw jaw ai maga rai nga ai ngu ai teng man ai lam asan sha dan pru wa na ra ai.)

1 KORINHTU 4:5

Dai re ai majaw, aten hkrak garai n du yang, kadai hpe mung hkum jeyang myit. Hpang jahtum na jeyang daw dan ai lam hpe, dai Madu bai du sa ai nhtoi shani du hkra la nga lu na rai nga ai; Shi gaw nsin hta makoi magap da ai nga manga hte hpe mung, masha a myit kraw lawang kata hta makoi magap da ai myit mang yaw shada ai lam ni hpe mung, shapraw shadan dan na ra ai. Dai shaloi e langai hte langai gaw tinang hte ging dan ai hte maren Karai Kasang kaw na shakawn shagrau ai hpe hkam la na ra ai.

2 KORINHTU 10:12

Kaja wa nga yang, tinang a hkum hpe shagrau shatsaw la ai masha hpan hta hti lawm nna anhte a hkum ni hpe shanhte hte madang n shabung gwi ga ai. Shanhte gaw tinang a madang hpe chye shadawn na matu tinang dai madang masat la ma ai. Dai masat da ai madang hte tinang dai shadawn la nga ma ai. Shing re ai ni gaw gade wa angawk angak rai nga ma hka!

2 KORINHTU 13:7

Nanhte gaw shut ai lam hpe n galaw myit ga, ngu nna anhte Karai Kasang kaw akyu hpyi ga ai. Dai gaw, anhte chyam dinglik ai hpe awng dang ai lam madun dan na matu n rai, anhte ni gaw hkrat sum mat ai ni zawn san ti mung, nanhte teng man ai hpe galaw lu myit ga she hpyi ya nga ga ai.

2 KORINHTU 3:1

Ning nga nna tsun ai gaw anhte a lam anhte gumrawng tsun ai zawn nga nga a ni? Masha nkau mi zawn anhte a lam madi shadaw ai laika ni nanhte hpe jaw na ra a ni? Shing n rai, nanhte kaw na madi shadaw laika hpyi gun na ra a ni?

2 KORINHTU 5:12

Ning ngu nna tsun ai hta anhte gaw tinang a kaja ai lam hpe nanhte a man e shagrau sha-a dan nga ga ai n rai; anhte a ntsa e nanhte kabu gumrawng shara lu la shangun na matu she rai nga ai. Shaloi she masha a arawn alai hpe n yu ai sha shinggan nsam hpe sha yu nna gumrawng chye ai ni hpe mahtai jaw lu na rai myit dai.

2 KORINHTU 6:4

Ru yak jam jau lam ni, tsin-yam tsindam ni, yak hkak lam ni hpe myit galu kaba hte hkam sharang nna anhte galaw ai lam shagu hta anhte gaw Karai Kasang a nchyang mayam ni rai nga ga ai lam she madun dan ga ai.

2 TIMOHTI 2:15

Nang chyawm gaw shi a amu hta kaya shara hpa n rawng ai magam gun hpai wa zawn mung, Karai Kasang a teng man ai mungga hpe jaw ang ai hku hkaw tsun sharin achyin ya ai wa hku nna mung, Karai Kasang a man e myi man pa lu hkra na a atsam htum hkra shakut shaja nga u.

1 PETRU 1:7

Dai chyam dinglik hkrum ai lam gaw Karai Kasang hpe nanhte kam sham ai myit gaw jet nga ai kun? jen yu na matu rai nga ai. Jahten kau lu ai ja hpe pyi gaw wan hta ju shabyawng nna jen kau ra ai rai nna ja hta grau hpu reng ai nanhte a makam masham hpe mung ngang grin nga na matu jen kau hkrum lu na rai nga ai. Shing rai yang Yesu Hkristu bai dan pru ai nhtoi hta shakawn kungdawn ai, hpung shingkang hte arawng sadang hpe nanhte hkam la na marin dai.