1 TIMOHTI 5:17 - Jinghpaw Common Language Bible 2009

¹⁷ Ningbaw ningla amu hpe atsawm galaw ai hpung woi ni gaw shabrai htam lahkawng hkam la ging ai wa re ngu nna sawn la mai nga ai. Grau nna mungga htawn tsun ai lam sharin achyin ai lam hpe shakut shaja gun hpai ai ni gaw shing rai hkam la ging ai ni rai nga ma ai.

Jinghpaw Hanson Version Bible

¹⁷ Atsawm sha up nga ai Hpung salang ni hpe hkungga lara shagup na ging nga ai hta, dai mungga hte sharin shaga ai lam hta amu bungli gun hpai ai salang ni hpe, grau nna hkungga lara ging nga ai, dum nga mu.

1 TIMOHTI 5:17 ပူးပေါင်းရင်းမြစ်များ

2 HKAWHKAM 2:9

Dai yang e Elia gaw Elisha hpe, “Ngai woi la ai garai n hkrum yang, na a matu ngai hpa galaw ya ra ai lam ngai hpe tsun dan e,” ngu nna tsun wu ai. Shaloi Elisha gaw, “Ngai hpe na a hkringhtawng dagraw la shangun nhtawm nang hta rawng ai wenyi daru magam n-gun kamhtaw htam lahkawng ngai hpe lu la shangun e law,” ngu nna htan wu ai.

ESAIA 40:2

Yerusalem amyu masha ni hpe n-gun jaw mu. Shanhte aten galu mi hkrum sha lai wa sai nni nkri hte ya raw dat hkrum sai shanhte a yubak mara ni a lam shanhte hpe tsun dan mu. Ngai gaw shanhte hpe shanhte galaw ai yubak mara yawng a matu hpring tup hkra ari jaw ni ai,” ngu nna tsun ai.

YEREMIA 16:18

Shanhte gaw nye a mungdan hpe asak n rawng ai si mang zawn re ai hpara sumla ni hte awu asin di nhtawm shanhte a n teng n man ai hpara sumla ni hte jahpring da ma ai majaw, ngai gaw shanhte hpe shanhte a yubak hte n hkru ai a matu ari htam lahkawng jaw na we ai,” ngu nna tsun ai.

YEREMIA 17:18

Ngai hpe zingri zingrat ai ni hpe kaya kahpa jahkrum u, rai ti mung Madu e, ngai hpe ngam da e. Shanhte hpe hkrit hpa amu ni hte jahpring ya u; rai ti mung ngai hpe hkum jahkrit shama et. Shanhte a ntsa de tsin-yam tsindam du shangun nna shanhte hpe atsai awai agrawp kau u.

ZEHKARIA 9:12

Ya aten myit mada shara nga sai bawng dung masha ni e, nhtang wa marit; shim lum ai nanhte a shara de nhtang wa marit. Ya chyawm gaw, ngai nanhte hpe tsun made ga, nanhte hkrum sha manit dai nni nkri yawng a matu chyeju htam lahkawng bai htang jaw na made ai.

BU HKAWM 18:31

Dai gaw Sum kata e nanhte gun hpai ai amu a matu nanhte a shabrai rai nga ai majaw nanhte hte nanhte a dinghku masha ni dai ngam ai hpe shara shagu hkan rai tim, sha mai nga myit dai.

MAHTE 24:25

Madat mu! ndai lam garai n byin kaw nna ngai nanhte hpe tsun hkap da ni ai.

LUKA 10:7

Dai nta hta e nan, nanhte nga nga nna, shanhte jaw ai hte maren lu sha mu, hpa majaw nga yang, amu galaw ai wa gaw shabrai hkam la ging nga ai. Nta mi kaw nna nta mi de hkum htawt nga hkawm myit.

LUKA 12:42

Dai Madu gaw, “Dai rai yang gaw, kangka ai hte hpaji rawng ai shangun ma gaw kadai wa rai na rai ta? Nta Madu wa e, shangun ma ni hpe up hkang na hte, aten du jang lusha karan jaw na san da hkrum ai wa rai nga ai.

YAWHAN 4:38

Nanhte shawng e n galaw tawn ai kaw na dan la na ngai nanhte hpe shangun dat made ai. Kaga masha ni amu galaw gat hkai nna, nanhte gaw akyu hkam sha myit dai,” ngu nna shanhte hpe tsun mu ai.

KASA 11:30

Dai hte maren shanhte galaw nna Dai gumhpraw hpe Barnaba yan Shawlu a lata hte hpung salang ni hpang de shagun dat ma ai.

KASA 20:35

Lam shagu hta nanhte hpe madun dan sai nye a len ningli hte maren nanhte mung amu galaw shaja nna hkam sha ai hta jaw ya ai mahtang grau a lu nga ai, nga nna Madu Yesu tsun ai ga ni hpe dum nga let, ra kadawn gawng kya nga ai ni hpe anhte karum madi shadaw lu na rai nga ai,” ngu na tsun mu ai.

KASA 28:10

Shanhte gaw anhte hpe kumhpaw kumhpa law law jaw ma ai. Anhte pru wa na rai jang, hkrun lam a matu ra ai made li hta bang ya dat ma ai.

ROMA 12:8

shadum shahprang n-gun jaw chye ai chyeju kumhpa rai yang gaw shadum shahprang n-gun jaw ga. Masha hpe karan kachyan alu jaw chye ai atsam rai yang gaw n daw n hta jaw u ga, up hkang na ahkang aya chyeju kumhpa lu ai wa gaw shakut shaja let kasang kalang up hkang nga u ga, matsam dum chye ai wa gaw kabu gara ai myit hte galaw u ga.

ROMA 15:27

Shing rai shanhte daw dan ai lam gaw, masha e shadut ai majaw n rai, rai ti mung, teng sha tsun ga nga yang dai matsan mayan ni hpe karum madi shadaw na shanhte hta lit nga nga ai. Hpa majaw nga yang, Yuda amyu masha ni hkam la ai Wenyi shaman chyeju sali wunli ni hpe maigan masha ni hpe mung jawm hpawm hkam la shangun masai rai nna maigan masha ni mung shanhte hkam la ai shaman chyeju ni ngu ai mungkan arung arai ni hte Yuda masha ni hpe chyeju htang ai hku bai karum la ang ma ai.

ROMA 16:12

Dai Madu a bungli gun hpai ai Truhpena hte Truhpawsa yan hpe shakram ya mi. Dai Madu a matu amu grai galaw shakut shaja ai tsaw ra ai Persi hpe shakram ya mi.

1 KORINHTU 15:10

Rai ti mung, Karai Kasang a chyeju majaw, ngai gaw ngai wa rai nga nngai; ngai hpe Karai Kasang jaw ai chyeju mung kaman lila n rai nga ai sha, kaga kasa ni yawng hta, ngai grau nna bungli galaw gun hpai shaja nngai. Shing rai galaw lu ai gaw, nye a atsam majaw n rai, ngai hte rau amu galaw nga ai Karai Kasang a chyeju a majaw rai nga ai.

1 KORINHTU 16:16

Hpu nau ni e, shing re ai ni a woi awn ai lam hpe mung, shanhte hte rau shingdep shingtau nna amu bungli galaw daw jau nga ai ni a woi awn ai hpe mung, hkap la hkan sa na matu, nanhte hpe ngai hpyi nem dat made ai.

1 KORINHTU 3:9

Hpa majaw nga yang, anhte gaw Karai Kasang a matu amu bungli galaw nga ai shingdep shingtau ni rai nga ga ai. Nanhte gaw Karai Kasang a yi hkauna hte Karai Kasang a wahpang htingnu rai nga myit dai.

2 KORINHTU 6:1

Nanhte gaw Karai Kasang a chyeju hkam la ai ni rai nga myit dai hte maren dai chyeju hpe lahpawt lama n di kau myit ga, anhte Karai Kasang a shingdep shingtau ni hku nna nanhte hpe hpyi lajin dat ga ai.

GALATI 6:6

Dai Hkristu a mungga hpe sharin achyin hkam la ai wa gaw, sharin achyin ya ai sara wa hpe tinang lu mai ai kaja ai ja gumhpraw arung arai yawng hte karum madi shadaw nga u ga.

TARA JAHPRANG 18:8

Kaga hkinjawng ni zawn lusha gambum hpe mung maren hkam la mai nga ai; shi a dinghku masha ni shagun ya ai hpa hpe mung shi mazing mai na rai wu ai.

HPILIPI 2:16

Nanhte shing rai galaw myit dai rai yang gaw ngai n-gun dat gun hpai shakut ai lam shagu gaw kaman lila n rai nga ai majaw Madu Yesu du sa ai Nhtoi hta ngai hta kabu gumrawng shara tai na ra ai.

HPILIPI 2:29

Dai rai nna nanhte shi hpe Madu hta hpu nau langai mi hku nna hkap tau hkalum la mu. Shing re ai ni hpe hkungga lara di mu.

HPILIPI 4:3

Nye a nrum ntau share manang hku nna mung dai num yan hpe karum la na hpe ngai ra sharawng nga nngai; hpa majaw nga yang dai Kabu Gara Shiga hkaw tsun ai lam hta ngai hte rau nhki nsang amu galaw shakut shaja lawm ma ai. Shing rai galaw lai wa ai ni hta Klemen hte Karai Kasang a asak jahpan laika hta tinang a mying lawm ai nye a shingdep shingtau kaga ni mung lawm ma ai.

1 TIMOHTI 3:5

Masha langai mi gaw shi a nta dinghku hpe gara hku up hkang na lam n chye ai rai yang gaw, Karai Kasang a nawku hpung hpe gara hku lanu lahku lu na rai nga a ta?

1 TIMOHTI 4:10

Shinggyim masha yawng hte, grau nna kam sham ai ni a hkye hkrang la ai Madu rai nga ai ahkrung nga ai Karai Kasang gaw anhte a myit mada shara rai nga ai majaw, anhte amu bungli galaw ai lam aja awa shakut nga ga ai.

1 TIMOHTI 4:14

Myihtoi ni hkaw tsun ai hte hpung woi ni na a ntsa e lata mara sari dang da ya ai shaloi nang hpe jaw da nna nang hta rawng nga ai wenyi hte seng ai chyeju kumhpa hpe n gawn n sawn di nna hkum hprai kau nga u.

1 TIMOHTI 4:16

Na a hkum hpe mung na a sharin shaga ai lam hpe mung sadi let sin yu nga u. Nang gaw ndai lam ni hpe agalaw nga u; hpa majaw nga yang, shing rai galaw n yang gaw, na hkum hpe mung, hkaw tsun ai ga na la ai ni hpe mung hkye hkrang la lu na ra ai.

1 TIMOHTI 4:6

Ndai matsun ga ni hte maren Hkristan hpu nau ni hpe nang shadum shahprang nga n yang gaw nang gaw nang hkap la nga ai wenyi makam masham lam hpe mung, teng man ai sharin shaga ai ga hpe mung, hkan nga ai majaw Hkristu a shangun ma kaja rai nga nit dai.

1 TIMOHTI 5:19

Sakse hkam ai masha n law htum marai lahkawng masum n nga yang gaw hpung woi wa hpe mara shagun ai ga hpe n mai madat ya ai.

1 TIMOHTI 5:3

Masha shingtai rai taw nga ai gaida jan ni hpe hkungga lara nga u.

2 TIMOHTI 2:6

Sun hkauna galaw shaja ai wa gaw nmut ta hta shawng shu la lu ai hkam bum hpe lu la ra nga ai.

2 TIMOHTI 4:2

Dai mungga hkaw dan na matu, chye na shangun na matu, mara madun nna daru na matu, n-gun jaw na matu, myit galu ai hte sharin shaga na matu, (du hkra ladaw ang ai rai ti mung, n ang ai rai ti mung) a shaja nga u, ngu nna ngai nang hpe shadut jahkat dat de ai.

HEBRE 13:17

Nanhte a lam woi ningshawng ni a ga hpe madat mara nna shanhte a hkang da ai ga ni hpe hkan sa galaw mu. Shanhte gaw shanhte galaw daw ai amu a jahpan hpe Karai Kasang kaw dan lu na rai nna, shanhte gaw nanhte a myit masin ni hpe n hkring n sa sin ya nga ma ai. Shanhte a ga hpe nanhte madat mara myit yang gaw shanhte galaw ai bungli hpe kabu gara ai hte galaw na mara ai: dai n rai yang shanhte myit yawn let galaw na mara ai rai nna na a matu hpa akyu mi rawng na n rai.

HEBRE 13:24

Nanhte a lam woi ningshawng ni yawng hte hte, Karai Kasang a amyu masha ni yawng hpe shakram ya mi, Itali mung na hpu nau ni nanhte hpe shakram dat ma ai.

HEBRE 13:7

Nanhte hpe Karai Kasang a mungga tsun dan lai wa sai shawng de na nanhte a lam woi ningshawng ni hpe myit dum nga mu. Shanhte kaning rai asak hkrung nna gara hku si wa masai hpe amyit dum nga nna, shanhte a makam masham hpe len ningli la nga mu.