1 SAMUELA 29:3 - Jinghpaw Common Language Bible 2009

³ Shaloi Hpilisti up hkang du ni gaw shanhte hpe mu nna, “Ndai Hebre masha ni nang e hpa sa galaw nga ma ta?,” ngu nna san ma ai. Ahkisha mahtang, “Dai wa gaw Israela Hkawhkam Shawlu a du Dawi rai nga ai. Shi ngai kaw sa nga nga ai gaw ram ram na sanu ai. Shi ngai kaw sa nga nga ai shani kaw nna shi galaw shut kau ai amu hpa hpe mung mara shagun shara ngai n mu lu nngai,” ngu nna tsun wu ai.

Jinghpaw Hanson Version Bible

³ Shaloi Hpilisti du ni gaw, “Ndai Hebre masha ni gaw nang de hpa sa galaw nga ma ta?” ngu nna san mu ai. Ahkisha gaw, “Dai wa gaw Israela hkawhkam Shawlu a shangun ma Dawi rai nga ai, n rai ni? Ngai kaw sa nga ai laning ni ning nga wa sai; shi gumlau nna ngai kaw sa shingbyi ai shani kaw nna, ya du hkra shi hta mara shagun shara ngai n mu we ai,” ngu nna Hpilisti du ni hpe htan wu ai.

1 SAMUELA 29:3 ပူးပေါင်းရင်းမြစ်များ

NINGPAWT NINGHPANG 14:13

Rai ti mung, hprawng lawt wa ai masha langai mi gaw Amori masha Mamre madu da ai dai chyoi pra ai hpun ni tu ai shara makau e naw nga ai Hebre masha Abram hpang de dai lam yawng sa tsun dan wu ai. Mamre hte shi a kahpu kanau yan rai nga ai Eshkola hte Anera ni chyawm gaw Abram hte ga shaka tawn da ai jinghku ni rai ma ai.

1 HKAWHKAM LABAU 12:19

Dawi gaw Hpilisti masha ni hte rau Hkawhkam Shawlu hpe htim gasat na matu rawt sa wa yang, Manashe a amyu bawsang kaw nna hpyenla nkau mi gaw Dawi hpang maga de shang mat wa ma ai. Teng teng nga yang, shi gaw Hpilisti masha ni hpe sa karum la na matu n rai; hpa majaw nga yang, shanhte hpe shi a shawng na madu Shawlu hpang de woi kayin gumlau kau na hpe shanhte a hkawhkam ni hkrit nga ma ai majaw shanhte gaw Dawi hpe Ziklag mare de nhtang wa kau shangun nga ma ai.

1 HKAWHKAM LABAU 12:20

Ndai ni gaw shi nhtang wa yang, Dawi a maga de tsap ai Manashe kaw na hpyenla ni rai nga ma ai; dai ni gaw Adna, Yozabad, Yediela, Mihkaela, Yozabad, Elihu hte Zilihtai ni rai ma ai. Shanhte gaw Manashe masha hkying hkying hpe up hkang ai ni rai ma ai.

Daniela 6:5

Shanhte gaw, “Shi hpe nawku htung hte lama mi hku ginchya ai sha n rai yang, Daniela hpe mara shagun shara anhte hpa mung mu tam na ga ai n rai,” ngu nna shada da tsun hkat ma ai.

YAWHAN 19:6

Hkinjawng agyi ni hte Nawku Htingnu sin ai hpyen ma ni Yesu hpe mu jang, “Wudang hta jen da u! Jen da u!,” nga nna jahtau ma ai. Shaloi Pilat gaw, “Nanhte nan shi hpe la nna jen da mu, ngai gaw shi hta hpa mara mung n mu nngai,” ngu nna shanhte hpe tsun mu ai.

ROMA 12:17

Nanhte hpe masha langai ngai n hkru n kaja ai hku tai yang, shi hpe n hkru n kaja ai hku hkum tai mu, masha shagu a myit hta htap htuk mai kaja ai ngu myit sawn la mai ai amu galaw na shakut shaja nga mu.

1 PETRU 3:16

Rai ti mung dai hpe sumnung shingdi nna hkungga lara ai hte galaw nga mu, Nanhte hpe n kaw n law nga nna roi asawng ai ni gaw nanhte Hkristu a hpang hkan nang ai ni hku nna hkan sa nga ai mai kaja ai arawn alai hpe mu nna shanhte tsun kau ai lam hte seng nna kaya kahpa hkrum mat mu ga, nanhte a myit masin asan sha re ai hku asak hkrung nga mu.

1 SAMUELA 14:11

Dai rai nna shan gaw shan a hkum hpe Hpilisti masha ni a man e shadan shadawng dan mu ai rai nna Hpilisti masha ni gaw, “Yu mu! Hebre masha nkau mi shanhte makoi nga ai nhkun kaw na pru wa mara ai law!,” ngu nna tsun ma ai.

1 SAMUELA 25:28

Madu e, chyeju hte ngai galaw shut kau sai mara ni hpe raw dat ya e law. Nang chyawm gaw nang hkrung nga ai hte yang, n hkru ai amu hpa mung n galaw nga ndai hte shi a majan ni hpe nang gasat ya nga ndai majaw dai Madu gaw nang hpe mung, na a matu mara ni hpe mung hkawhkam shatai na ra ai.

1 SAMUELA 27:1

Dawi gaw, “Lani mi na nhtoi langai ngai hta Shawlu ngai hpe sat kau na ra ai. Dai re ai majaw Hpilisti mung de hprawng shang mat wa ai gaw nye a matu kaja htum ai lam rai na sai. Shaloi Shawlu gaw Israela mung e ngai hpe tam shakut hkawm ai hpe jahkring kau ai hte ngai mung shim nga lu na rai nngai,” ngu nna shi kraw e sumru wu ai.

1 SAMUELA 27:7

Dawi gaw Hpilisti mung e shata shi kru nga kau wu ai.

1 SAMUELA 29:6

Ahkisha gaw Dawi hpe shaga la nhtawm shi hpe, “Nang ngai hta sadi dung nga ndai mung, ndai majan hta ngai hte rau nang pru sa nna sa gasat lawm ai amu hta ngai nang hpe myit du sade ai mung, nang ngai kaw du ai shani kaw nna ya du hkra nang hta hpa mara n mu mada ai mung, ahkrung nga ai Israela a Karai Kasang hta ngai dagam nga nngai. Rai ti mung, kaga hkawhkam ni mahtang nang hpe n ra sharawng nga ma ai.

1 SAMUELA 4:6

Hpilisti masha ni dai jahtau garu ai nsen na jang, “Hebre dap e jahtau garu ai nsen yawng hpe madat yu mu! Dai gaw hpa baw lachyum rai nga a ta?,” ngu nna tsun ma ai. Hebre dap e dai Madu a Ga Shaka Sumpu du nga sai hpe shanhte mu chye ma ai shaloi,