1 SAMUELA 22:19 - Jinghpaw Common Language Bible 2009

¹⁹ Shawlu gaw Noba mare e shanu ai masha ni hpe mung, mare na hkinjawng ni hpe mung, numsha lasha, ma kaji ni hte chyu chyu ai ma ni, dumsu lawze hte sagu ni yawng hpe sat kau na matu hkang dat wu ai hte maren, dai ni yawng sat kau ai hkrum nga ma ai.

Jinghpaw Hanson Version Bible

¹⁹ Hkinjawng ni hte seng ai Noba mare hpe mung, shi nhtu hte hpya kau nna, numsha lasha, ma kaji chyu chyu ai chyangai du teng, sagu dumsu, lawze ni hte hpawn sat kau mu ai.

1 SAMUELA 22:19 ပူးပေါင်းရင်းမြစ်များ

NEHEMIA 11:32

Bai Anahtot, Noba, Anania,

ESAIA 10:32

Dai ni jang, gumlau hpyen ni gaw Noba mare hta nga nga ma ai, dai yang e shanhte gaw Ziun Bum ngu ai Yerusalem mare hpe sha-ang nna shanhte a lata latup nna kanga dan ma ai.

HOSEA 10:14

hpyen majan gaw nanhte a amyu masha ni kaw du nna nanhte a hpyen dap ni hten byak mat na mara ai. Dai gaw Betarbela mare hta hpyen majan byin ai shani Hkawhkam Shalman e jahten sharun kau ai mare zawn tai mat nna, kanu ni hte shanhte a kashu kasha ni mung adit sat kau hkrum nga masai.

MAHTE 21:16

Shing rai shanhte gaw Yesu hpe, “Ndai ni hpa tsun nga ai hpe nang na da wu ni?,” ngu nna san mu ai. Yesu gaw, “Ngai na nga nngai, Dai Madu gaw “Ma ni hte chyu chyu ai ma chyangai ni hpe mahkawn shakawn ga majing hte daw jau na matu sharin ya da nu ai, nga ai ga Chyum Laika hta nanhte galoi mung n hti yu myit ni?,” ngu nna shanhte hpe tsun mu ai.

YAKU 2:13

Hpa majaw nga yang matsan dum ai lama myit n rawng ai masha hpe daw dan ai shaloi Karai Kasang gaw matsan dum lama ai lam madun na ru ai n rai; rai ti mung matsan dum lama ai lam gaw tara daw dan ai hpe awng dang kau wu ai.

YAWSHU 6:17

Dai Madu hpe hkungga nawng jau ya ai hku nna dai mare hte dai hta rawng marawng ni hpe tsep kawp jahten kau lu na rai myit dai. Shawa num Rahab hte shi a nta na nga manga ni chyu sha lawt lu na rai ma ai; hpa majaw nga yang, Rahab chyawm gaw anhte a kin-yu ni hpe makoi da ya mi ai.

YAWSHU 6:21

Dai mare kata na numsha lasha kaji kaba, sagu dumsu hte lawze nga manga mahkra hpe shanhte a nhtu hte sat kau ma ai.

1 SAMUELA 15:3

Amalek masha ni hpe sa gasat nhtawm shanhte lu malu sut gan mahkra hte hpe tsep kawp jahten shaza kau ya mu. Arai hpa mung hkum tawn hkum ngam da myit. Numsha, lasha, ma kaji, ma chyangai, sagu, dumsu, gawla-uk hte lawze ni yawng mayawng hpe sat kau mu,” ngu nna tsun wu ai.

1 SAMUELA 15:8

shi gaw Amalek hkawhkam Agag hpe chyahkrung rim la lu wu ai; shi a masha ni yawng hpe chyawm gaw sat sharu kau ma ai.

1 SAMUELA 15:9

Rai ti mung, Shawlu hte shi a masha ni gaw Agag a asak hte hpawn kaja htum ai sagu, dumsu, grau kaja htum ai dumsu ni, sagu kasha ni hte kaja ai arai hpa hpe mung n shaza kau ai sha jahkrung da ma ai; asung n shang ai hte manu n dan ai arai ni hpe chyu sha jahten shaza kau ma ai.

1 SAMUELA 21:1

Dawi gaw hkinjawng Ahimelek nga ai Noba mare de sa wa wu ai. Ahimelek mung shi hpe hkap tau la na nga hkrit gari ai hte pru sa wa nhtawm, “Nang chyu sha ndai shara de hpa majaw sa wa n ta?,” ngu nna hkap san wu ai.

1 SAMUELA 22:11

Dai rai nna, Hkawhkam Shawlu gaw hkinjawng Ahimelek hpe mung, shi a jinghku ni yawng hpe mung, Noba mare na hkinjawng ni hpe mung shaga dat wu ai rai nna, shanhte mung shi kaw du sa ma ai.

1 SAMUELA 22:9

Dai yang e Shawlu a du salang ni hte rau tsap nga ai Doeg gaw shi hpe, “Dawi gaw Noba mare e nga ai Ahitub a kasha Ahimelek kaw sa ai hpe ngai mu nngai.