1 SAMUELA 2:6 - Jinghpaw Common Language Bible 2009

⁶ Dai Madu gaw sat kau ai hte asak bai jahkrung ya nga ai; shi gaw amyu masha ni hpe katsan ga de shayu kau nna, shanhte hpe bai woi la nga ai.

Jinghpaw Hanson Version Bible

⁶ Katsan ga de jahkrat kau ai hte sharawt la ai wa rai nga ai.

1 SAMUELA 2:6 ပူးပေါင်းရင်းမြစ်များ

1 HKAWHKAM 17:22

Dai Madu mung Elia a akyu hpyi ga hpe htan ya wu ai rai nna dai ma hta nsa bai shang wa nhtawm hkrung wa nga ai.

2 HKAWHKAM 5:7

Israela hkawhkam wa dai laika hpe hti jang, hkrit gari ai hte shi a palawng ni hpe gang je kau nhtawm, “Ndai masha wa a manggang ana hpe shamai ya na matu Suri hkawhkam ngai hpe gara hku myit mada lu nu ai kun? Ngai gaw Karai Kasang rai nna asak jahkrung ya ai hte si hkrung si htan shabyin lu ai daru magam n-gun lu ai wa re ngu myit nawn la nga a ni? Shi gaw ngai hte ga li ga law na matu jahte tam hpang wa nga ai gaw asan sha rai nga sai!,” ngu nna jahtau tsun wu ai.

YOBA 5:18

Karai Kasang gaw nang hpe machyi hkra shangun tim ningma ni hpe ahkyen kayawp ya nga ai; shi a lata hte nang hpe machyi hkra ti mung, shi a lata hte shamai shatsai ya nga ai.

SHAKAWN KUNGDAWN 116:3

Si du a sumgawn gaw ngai hpe htinggrum da nna; katsan ga na ru tsang ni, ngai hpe wang shinggrup da nga sai. Shing rai, ngai gaw hkrit ai hte nchyi nmu myit kahtet nga li ai.

SHAKAWN KUNGDAWN 30:4

Shi a kangka ai amyu masha ni yawng hte e, dai Madu hpe mahkawn shakawn nga mu! Chyoi Pra ai Wa galaw da sai amu hpe dum nna, shi hpe chyeju dum mu!

SHAKAWN KUNGDAWN 68:20

Anhte a Karai Kasang gaw hkye hkrang la ai Karai Kasang rai nga ai; shi gaw Madu rai nga nna, si hkrung si htan a lata kaw nna mawai la ai anhte a Madu rai nga ai.

SHAKAWN KUNGDAWN 71:20

Nang gaw ru tsang lam ni hte nni nkri lam ni hpe nye a ntsa e, hkrum sha shangun ai rai tim, nang gaw nye a n-gun hpe bai jahpring ya na rai nga ndai; lup sung hku de n du hkra mung, nang ngai hpe kyem mazing la na rin dai.

HPAJI NINGLI 3:3

sat kau ai aten hte shamai shatsai ai aten hpe mung, run kau ai aten hte gaw gap ai aten hpe mung, masat da ya nga ai.

ESAIA 26:19

Si mat sai anhte a amyu masha ni bai hkrung wa na mara ai! Shanhte a hkum hkrang ni hta asak bai rawng wa na ra ai. Shanhte a lup sung hku ni hta yup pyaw nga ai ni yawng hprang wa nna kabu gara mahkawn mangoi wa na mara ai. Htoi tu kabrim ai numri gaw ginding aga hpe n-gun awai ya ai zawn, dai Madu gaw moi chyaloi nhkoi kaw nna si mat sai ni hpe jahkrung la na ra ai.

EZEKELA 37:12

Dai rai nna, nye a amyu masha Israela ni hpe myihtoi htoi nna, Tsaw Htum ai dai Madu ngai nan shanhte a lup ni hpe hpaw nna shapraw la nhtawm, Israela mungdan de bai woi nhtang wa na lam, shanhte hpe htawn tsun u.

EZEKELA 37:3

Shi gaw ngai hpe, “Si chye ai masha wa e, ndai nrut nra ni gaw bai hkrung lu na rai nga a ni?,” ngu nna san we ai. Ngai gaw, “Tsaw Htum ai Madu e, dai lam hpe nang chyu sha htai ya lu nga ndai!,” ngu nna htan we ai.

MAHTE 12:40

Yona gaw shani masum ya hte shana masum na du hkra, dai nga kaba a kan kata e rawng nga ai hte maren, dai Masha Kasha mung, shani masum ya hte shana masum na du hkra ga a sung ai kata e rawng nga na ra ai.

YAWHAN 11:25

Yesu gaw, “Ngai gaw bai hkrung rawt ai lam hte asak hkrung ai lam rai nga nngai. Ngai hpe kam sham ai wa kadai mung, shi si mat ti mung, ahkrung nga na ra ai.

TARA JAHPRANG 32:39

“‘Ngai hte ngai chyu sha Karai Kasang rai nga nngai; karai shaje kadai mung karai jet n rai nga ai. Ngai sat nna ngai jahkrung nngai, ngai jahpye nna ngai shamai nngai; ngai galaw ai lam hpe kadai e mung ninghkap lu ai n rai.

SHINGRAN 1:18

Ngai gaw ahkrung nga ai wa mung ngai rai nga nngai; ngai si ni ai rai ti mung ya htani htana prat dingsa e ngai ahkrung nga nngai. Ngai gaw si hkrung si htan a ntsa e mung, si hkrung si htan a mungdan a ntsa e mung up hkang na ahkang aya lu nngai.

1 SAMUELA 20:3

Rai ti mung, Dawi mahtang, “Nang ngai hpe kade wa tsaw ra nga ndai gaw na nwa atsawm sha chye nga ai rai nna, nang hpe lai hkra n machyi shangun mayu ai majaw, shi kaning rai maw mawn na lam nang hpe n chye shangun mayu ai hku, shi daw dan da nga ai. Ngai gaw si hkrung si htan a lata kaw na lawt na lahkam mi dang sha rai nga sali ai ngu nna ahkrung nga ai dai Madu hta nang hpe dagam nngai,” ngu nna htan wu ai.