1 SAMUELA 17:51 - Jinghpaw Common Language Bible 2009

⁵¹ Dawi gaw shi kaw kagat sa nhtawm shi a makau e tsap let, n-ga na Goliat a nhtu shaw la nhtawm shi a baw hpe kahtam di nna shi hpe sat kau da wu ai. Hpilisti masha ni mung shanhte a share ninghkrin wa si mat sai hpe mu ma ai shaloi, hprawng htaw mat wa ma ai.

Jinghpaw Hanson Version Bible

⁵¹ Shaloi Dawi gat sa wa nna, Hpilisti wa makau e tsap let, shi a n-ga na nhtu shaw la nhtawm, shi hpe du htau daw nna sat shakre wu ai: Hpilisti masha ni mung, shanhte a share langang wa si ai mu jang, htaw mat wa ma ai.

1 SAMUELA 17:51 ပူးပေါင်းရင်းမြစ်များ

2 SAMUELA 23:21

Hkum shingyan kaba ai Egutu masha langai mi hpe mung shi sat kau wu ai; Egutu masha wa nri lang ti mung, Benaia gaw hkawn hte sha htim nna shi a nri hpe kashun la nhtawm dai hte shi hpe sat kau wu ai.

2 SAMUELA 4:7

Dai hpang nhku kata de kalang mi bai sit shang wa nhtawm Ishboshet yup nga ai gawk kata de shang nna shi hpe sat kau ma ai. Shan mung shi a baw hpe daw la nhtawm dai hpe lang let shana tup dai Yawdan Kadit hku lai sa wa ma ai.

ESHTA 7:10

Dai re ai majaw Mordehkai a matu Haman galaw da ai masha sat shara hta noi sat kau hkrum nga wu ai. Shaloi hkawhkam wa a masin kahtet ai gaw kawp mat wu ai.

HEBRE 11:34

Ja la ai wan nsa ni hpe sat kau lu ma ai. Masha ni a nhtu nshan kaw na mung hprawng lawt lu ma ai. Shanhte n-gun kya ai rai ti mung, n-gun shaja ya ai lu la ma ai majaw majan pa e magrau grang lu ma ai hte masha tsasam ni a hpyen hpung ni hpe dang kau lu ma ai.

HEBRE 2:14

Kasha ni ngu nna shi shanhte hpe shamying wu ai hte maren, asai ashan dagraw ai masha ni rai nga ma ai. Yesu shi hkum nan mung shanhte zawn asai ashan dagraw ai shinggyim masha hkum hkrang rau rum hkam la wu ai. Shing rai hkam la ai lam gaw si hkrung si htan hpe up ai nat wa a atsam hpe jahten shabyak kau na matu rai nga ai.

1 SAMUELA 17:50

Dawi gaw nhtu n lawm ai sha lakli hte nlung langai e sha Goliat hpe gasat dang kau nhtawm sat kau wu ai.

1 SAMUELA 21:10

Shawlu kaw na shi hprawng wa ai hte maren, Dawi pru mat wa nhtawm Gat Hkawhkam Ahkisha hpang de sa mat wa wu ai.

1 SAMUELA 21:9

Ahimelek chyawm gaw, “Ela Kadit e nang sat kau ai Hpilisti masha Goliat a nhtu lu nngai; dai hpe sumpan hte kayawp nhtawm hpa hkai lawng a shingdu e nga nga ai. Ndai yang e laknak ngu na dai chyu sha nga ai majaw nang ra yang gaw dai hpe la lang u,” ngu nna htan wu ai. Shaloi Dawi gaw, “Kanang e mung dai daram kaja ai nhtu n nga sai, ngai hpe dai nhtu jaw e!,” ngu nna tsun wu ai.

1 SAMUELA 31:9

Shanhte gaw Shawlu a baw daw la nhtawm, shi a hpyen palawng ni raw la nna shanhte a hpara sumla ni hpe mung, shanhte a mung masha ni hpe mung dai awng padang shiga a lam tsun dan na matu dai arai ni hte hpawn Hpilisti mung ting de kasa ni hpe shangun dat ma ai.