1 SAMUELA 12:3 - Jinghpaw Common Language Bible 2009

³ Ngai gaw nang e nga nga nngai. Ngai gaw lama ma hpe sha pyi galaw shut kau yu ni ai rai yang, ya dai Madu a man e mung, shi lata san da nu ai hkawhkam wa a man e mung ngai hpe mara shagun mi. Kade a dumsu kanu, shing n rai lawze hpe ngai la kau yu a ta? Kadai hpe maw sha yu a ta? Kadai wa hpe dip gamyet sha yu a ta? Kadai kaw na mayun kumhpa hkap la yu a ta? Ndai zawn re ai amu ni hta na langai ngai hpe ngai galaw shut kau ai rai yang, ngai la kau ya ai made, ngai bai nhtang jaw made ga,” ngu nna tsun wu ai.

Jinghpaw Hanson Version Bible

³ Ya ngai nang rai nga nngai: gade a dumsu ngai kashun la yu a ta? gade a lawze kashun la yu a ta? kadai hpe maw sha yu a ta? kadai hpe zingri zingrat yu a ta? tinang a myi magap na matu, kadai kaw na manawn kumhpa hkap la yu a ta? Yehowa hte shi a namman chya ai wa a man e nye a lam sakse hkam yu mu; gade a rai kashun la ai rai yang bai wa made ga,” ngu nna tsun mu ai.

1 SAMUELA 12:3 ပူးပေါင်းရင်းမြစ်များ

2 SAMUELA 22:22

Dai Madu a tara hpe ngai madat mara ai rai nna, nye a Karai Kasang kaw na kayin mat wa nngai n rai.

NEHEMIA 5:11

Shanhte nanhte hpe jaw ra ai gumhpraw, nai mam, sabyi hte tsanlun sau re ai hka ni yawng hpe shaprai kau ya ga, shing rai shanhte hpe shanhte a yi sun ni, sabyi sun ni, tsanlun sau ni hte dum nta ni hpe kalang lata bai nhtang ya mu!,” ngu nna tsun we ai.

SHAKAWN KUNGDAWN 15:5

Shi gaw amyat n la ai sha, hkoi ya ai hte mara n kap ai wa hpe masu ai sakse tai ya na matu mayun kumhpa hpe jaw tim hkap la na wa n rai. Ndai lam ni hpe galaw shadik ai ni kadai mung tut nawng e shim nga na mara ai.

PRU MAT 20:17

“Kaga masha wa a nta hpe ra marit ai myit hkum rawng et. Shi a madu jan hpe mung, mayam num ni hpe mung, shi a dumsu hte lawze ni hpe mung, shi madu tawn ai arai hpa hpe mung hkum ra marit nga et.

PRU MAT 23:8

Mayun kumhpa hkap la mai na n rai, dai kumhpa a majaw, masha hpe ding man ai amu hta myi n mu shangun ai hte mara n kap ai ni a amu hpe sharun jahten kau ya nga ai.

GA SHAGAWP 15:27

Amyat hpe n ding n man ai hku, tam shakut ai rai yang, na a dinghku masha ni ru yak shoihpa hkrum hkra nga ai. Mayun kumhpa n la ai rai yang, nang asak galu na ra ai.

JAW JAU 6:4

shing re ai lam langai ngai hpe shi yubak galaw hkrup ai rai yang, dai zawn n ding n man ai hku lu la ai arai shi bai jaw lu na rai nga ai. Shi galaw shut kau ai mara dan dawng wa ai shani chyawm gaw arai madu hpe tsa lam shadang 20% bai kahtap jaw nna jahpring ya na rai wu ai.

BU HKAWM 16:15

Mawshe gaw masin pawt ai hte dai Madu hpe, “Ndai masha ni la sa ai hkungga hpa hpe mung hkum hkap la ya et; ngai shanhte hte hpa mara mung n galaw shut yu nngai; shanhte a lawze langai mi hpe pyi n la yu nngai,” ngu nna tsun wu ai.

MAHTE 22:21

Shanhte gaw, “Kehta a sumla hte masat laika kap nga ai,” ngu nna htan mu ai. Shaloi shi gaw, “Dai rai yang gaw, Kehta hte seng ai hpe gaw Kehta hpe ya mu; Karai Kasang hte seng ai hpe gaw, Karai Kasang hpe ya mu,” ngu nna shanhte hpe tsun mu ai.

LUKA 19:8

Zake rawt tsap nna, “Madu e, nye a sut rai ka-ang hkup matsan mayan ni hpe ngai garan jaw na we ai; bai langai ngai hpe ngai mawp sha kau ai rai yang gaw, htam mali ngai bai wa na we ai,” ngu nna Madu hpe tsun wu ai.

KASA 20:33

Ngai gaw gade a ja gumhpraw hpun nba mung n ra marin yu nngai.

2 KORINHTU 12:14

Ya ngai nanhte kaw masum lang ngu na sa du kawan na jin jin rai nga ni ai rai nna, ngai nanhte hpe kaga mi n htet shatsang na ni ai. Hpa majaw nga yang, ngai ra ai gaw ja gumhpraw hpe n rai, nanhte hpe sha ngai ra nga nngai. Kaja wa nga yang, kashu kasha ni gaw kanu kawa ni a matu sutgan mahkawng da na n ang ai, kanu kawa ni mahtang she shanhte a kashu kasha ni a matu mahkawng da na ang nga ai.

TARA JAHPRANG 16:19

Tara jeyang ai lam hta n teng n man ai hku myi man tau ya ai lam madun lu na myit dai n rai; mayun kumhpa ni la sha lu na ma ai n rai; dai gaw hpaji rawng ai ni hte ding man ai ni a myi hpe shamak kau ya nhtawm shanhte a tara daw dan ai lam hpe shut kau shangun nga ai.

1 HTESALONI 2:10

Kam sham nga ai ni nanhte a man e anhte a arawn asam san seng nna teng man ai hte mara n rawng nga ai gaw anhte a matu nanhte nan sakse ni rai nga myit dai, dai hte maren Karai Kasang mung sakse rai nga ai.

1 HTESALONI 2:5

Hpa majaw nga yang, nanhte atsawm sha chye nga myit dai hte maren, anhte gaw nanhte hpang de n teng n man ai hku asawng hkalem ai ga tsun shaga let, shing n rai nammak lawhpa ai lam hpe magap ai ga ni lang let sa ga ai n rai. Dai lam hta Karai Kasang nan sakse rai nga ai.

1 PETRU 5:2

Karai Kasang nanhte hpe ap ya da sai sagu hpung a sagu rem ai ni zawn, Karai Kasang galaw shangun mayu ai hku hte maren myit lawm ai hte kabu gara let bau rem gawn lajang nga mu. Ja gumhpraw shabrai lu na matu sha galaw ai hku n rai, kaja wa daw jau mayu ai shawang myit hte daw jau mu.

1 SAMUELA 10:1

Dai hpang Samuela gaw tsanlun sau rawng ai di bu langai la nna Shawlu a baw ntsa e ru jaw nna shi hpe pup let, “Shi a amyu masha Israela hpe up hkang ai du tai na matu, dai Madu gaw nang hpe namman jaw ya nga ai. Dai rai nna shi a amyu masha ni hpe nang up hkang nna shanhte a gumlau hpyen ni yawng a lata kaw nna mung shanhte hpe makawp maga ya na rai ndai. Ndai gaw dai Madu nang hpe lata la nna shi a amyu masha ni hpe up hkang na du tai na matu nang hpe madun ai sakse rai nga ai.

1 SAMUELA 12:4

Amyu masha ni gaw, “N rai law, nang chyawm gaw anhte hpe n maw sha, n dip gamyet sha ndai; kadai kaw na hpa arai mung nang n la yu nga ndai,” ngu nna htan ma ai.

1 SAMUELA 12:5

Samuela chyawm gaw, “Ngai hta tsep kawp mara n kap nga ai hpe nanhte mu manit dai rai nna dai Madu hte shi lata san da nu ai hkawhkam yan gaw dai ni na nhtoi hta sakse tai nga manu ga,” ngu nna htang tsun wu ai. Shanhte mung, “Rai sa, dai Madu gaw anhte a sakse rai nga ai,” ngu nna htan ma ai.

1 SAMUELA 2:35

Ngai hta sadi dung na ra ai hkinjawng langai hpe ngai lata la na nngai. Shi gaw ngai galaw shangun mayu ai lam magup hte hpe galaw na rai wu ai. Ngai lata san da sai hkawhkam wa a man e tut nawng daw jau na mara ai amyu matu mara ni ngai nang hpe jaw ya na nngai.

1 SAMUELA 24:11

Yu yu u, nye wa e, ya ngai lang da nga ai na a ntsa palawng adaw achyen hpe mada yu u! Ngai nang hpe sat kau lu sha gaw rai sai, rai ti mung shing rai galaw na malai ndai adaw hpe sha kadoi di la nngai. Ndai hpe yu nna ngai nang hpe gumlau na matu n myit hkawn nga ai hpe mung, nang hpe n machyi shangun mayu ai hpe mung, nang hpe chye na hkawn hkrang shangun mayu nngai. Ngai chyawm gaw nang hpe hpa mung n shut n hpyit kau yu tim, nang mahtang ngai hpe sat kau na matu tam gyam hkawm nga ndai.

1 SAMUELA 24:6

“Dai Madu lata san da sai hkawhkam nye a Madu hpe machyi shangun ai amu kaning re ai kaw na mung, dai Madu ngai hpe hkum kau ya n-ga law! Shi gaw dai Madu lata san da sai hkawhkam rai nga ai majaw ngai shi hpe kachyi mi pyi machyi shangun lu na nngai n rai!,” ngu nna tsun wu ai.

1 SAMUELA 24:7

Dai rai nna Dawi gaw Shawlu hpe shanhte n gasat ang ai lam shi a masha ni hpe chye na wa hkra tsun dan wu ai. Shaloi Shawlu gaw rawt nna lungpu hku kaw na pru wa nhtawm bai hkawm matut wu ai.

1 SAMUELA 26:11

Dai Madu nan hkawhkam shatai da sai wa hpe machyi shangun na matu ngai myit nga tim, dai Madu hkum kau ya nga ai. Sa, shi a nri hte ntsin namtau hpe chyawm gaw la mat wa ya ga,” ngu nna tsun wu ai.

1 SAMUELA 26:9

Rai ti mung, Dawi mahtang, “Shi hpe machyi shangun lu na n rai! Shi lata san da sai hkawhkam wa hpe machyi shangun ai wa hpe dai Madu teng teng ari jaw na rai wu ai.