1 SAMUELA 11:2 - Jinghpaw Common Language Bible 2009

² Nahasha chyawm gaw, “Ngai gaw masa lam langai hta mahta nna nanhte hte ga shaka tawn da na nngai; masha shagu hte a hkra maga na myi ni hpe ngai malawk kau ya nhtawm, Israela amyu ting hpe jahpoi asawng kau lu na rai myit dai,” ngu nna htan wu ai.

Jinghpaw Hanson Version Bible

² Rai timung, Amon masha Nahasha gaw, “Nanhte mahkra a hkra maga na myi baw kau ya nna, Israela amyu ting hpe ngai jahpoi kau shangun lu yang she, nanhte hte htinglu hkraw na nngai,” ngu dat mu ai.

1 SAMUELA 11:2 ပူးပေါင်းရင်းမြစ်များ

NINGPAWT NINGHPANG 34:14

Shanhte gaw shi hpe, “Matu gadoi n hkam ai wa hpe anhte a kajan n ya sha lu na ga ai; dai sha n-ga, anhte a matu myi man sum shara tai na ru ai.

2 HKAWHKAM 18:31

Hezekia a ga hpe hkum madat myit. Mare kata kaw nna pru nhtawm lata sharawt asum hkam na matu Asuri hkawseng wa nang hpe tsun nga sai. Dai shaloi nanhte a mungdan hte bung ai nanhte a matu sabyi jaw ya ai sabyi sun ni, muk kabaw na matu nsi naisi, tsanlun sau a matu tsanlun hpun ni hte lagat ntsin pru ai mung de hkawseng wa bai woi wa ai aten du hkra, nanhte gaw nanhte a sabyi ru ni hta na sabyi si ni hpe mung, nanhte a hpun ni hta na maihpang si ni hpe sha lu nhtawm nanhte a hka htung ni hta na nan hka ja lu na ahkang lu na rai nga myit dai. Shi hkang da ai hte maren nanhte hkan galaw myit dai rai yang, nanhte si na n rai; hkrung nga lu na rai myit dai. Rai ti mung dai Madu gaw nanhte hpe hkye mawai la na ra ai nga nna nanhte a myit nawn ai lam Hezekia nanhte hpe mana hkum shachyoi kau shangun nga myit.

SHAKAWN KUNGDAWN 44:13

Anhte a htingbu ni gaw nang anhte hpe kaning di kau sai lam hpe mu nga ma ai rai nna, shanhte gaw anhte hpe ashu ai hte mani asawng nga ma ai.

PRU MAT 3:6

Ngai gaw na a nji nwa ni rai nga ai Abraham, Isak hte Yaku ni a Karai Kasang rai nga nngai,” ngu nna tsun wu ai. Dai rai nna Mawshe gaw Karai Kasang hpe yu na hkrit wu ai majaw shi a myi man hpe magap da wu ai.

GA SHAGAWP 12:10

Mai kaja ai masha wa gaw tinang a yam nga ni hpe, yu lanu lahku chye nga ai; tara n lang ai masha ni chyawm gaw dai yam nga ni hpe sheng mareng rai ma ai.

YEREMIA 39:7

Dai hpang, shi gaw Zedekia a myi hpe achyaw baw kau ya nna, Babelon mung de woi mat wa na matu hpri sumri hte gyit sumroi da ma ai.

BU HKAWM 16:14

Nang gaw anhte hpe ngamu ngamai ai mungdan de teng teng woi wa nga ndai n rai; anhte madu la na yi sun hkauna ni hte sabyi sun ni hpe mung jaw ndai n rai; dai rai nna ya mung nang anhte hpe masu hkalem na naw shakut nga ndai. An n sa lu na ga ai!,” ngu nna tsun wu ai.

TARA AGYI 16:21

Hpilisti masha ni shi hpe rim la nhtawm shi a myi achyaw baw kau ya ma ai. Shanhte gaw Gaza mare de shi hpe woi wa nna magri mang saidawng sumri hte shi hpe gyit tawn let htawng kata e htumrin rin shangun ma ai.

1 SAMUELA 11:10

Nahasha hpe, “Hpawt de nang hpe anhte asum jaw na saga ai, nang ra ai hku anhte hpe di mi,” ngu nna tsun ma ai.

1 SAMUELA 12:12

Rai ti mung nanhte hpe htim gasat hkyen nga ai Amon Hkawhkam Nahasha hpe nanhte mu myit dai shaloi, nanhte a hkawhkam rai nga ai dai Madu hpe ningdang kau nhtawm ngai hpe mahtang, ‘Anhte hpe up hkang na hkawhkam langai ra ga ai,’ nga nna tsun myit dai.

1 SAMUELA 17:26

Dawi gaw shi hte ani sha nga ai masha ni hpe, “Dai Hpilisti masha wa hpe sat kau nna, ndai kaya kahpa jahpoi asawng hkrum nga ai kaw nna Israela amyu masha ni lawt lu jang, hpa baw lu la na re da aw? Ahkrung nga ai Karai Kasang a luksuk hpe hkap daw na, ndai n kam n sham ai Hpilisti masha wa gaw kaning re ai wa rai nga a ta?,” ngu nna san yu wu ai.