1 PETRU 1:4 - Jinghpaw Common Language Bible 2009

⁴ Dai rai nna anhte gaw shi a amyu masha ni a matu Karai Kasang kyem mazing da ai n taw n tsang re ai shaman chyeju ni hpe madu la lu na matu myit mada nga ga ai. Shi gaw n run n hten ai awu asin n re ai n wai n mat ai sali wunli ni hpe sumsing lamu e nanhte a matu kyem mazing da nu ai.

Jinghpaw Hanson Version Bible

⁴ n run n hten ai, awu asin n re ai, n wai n mat ai sali wunli hpe hkam la lu na matu, shi a galu kaba ai chyeju majaw, shi anhte hpe bai shangai mi ai:

1 PETRU 1:4 ပူးပေါင်းရင်းမြစ်များ

SHAKAWN KUNGDAWN 31:19

Nang hpe shagrau sha-a ai ni a matu nang kyem da ya ai kaja ai chyeju ni gaw kade wa mauhpa rai nga a hka! Nang kade wa mai kaja nga ai hpe mung nang hta kam hpa nga ai ni hpe kade sha shim ai hku nang makawp maga ya nga ndai hpe mung masha shagu chye nga ai.

SHAKAWN KUNGDAWN 47:4

Dai Madu gaw anhte shanu nga na lamu ga hpe anhte a matu lata san ya nga sai; dai gaw shi tsaw ra ai shi a amyu masha ni a gumrawng mai ai sut gan rai nga ai.

ESAIA 66:22

Ginding aga ningnan hte sumsing lamu ningnan ni gaw nye a daru magam n-gun hte grin nga na mara ai, dai zawn na a aru arat ni hte na a mying mung agrin nga na ra ai.

EZEKELA 47:12

Dai hka hkin-gau maga mi hte maga mi de sha mai ai hpun amyu myu tu na ra ai; de a alap ni gaw galoi mung n nyip ai sha asi mung n wai na ra ai. Nawku Htingnu na lwi pru ai hka a majaw, mu ai namsi shata shagu si na ra ai. Hpun ni mung sha na namsi si jaw nna de a alap ni gaw amyu masha ni hpe shamai shatsai ai lam hta lang lu na ra ai,” ngu nna tsun ai.

MAHTE 25:34

Shaloi dai Hkawhkam wa gaw, shi a hkra maga de nga ai ni hpe, ‘Nye a Wa kaw na shaman ya ai lu la ai ni e! Sa marit! Ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu.

MARKU 10:17

Yesu bai hkawm sa wa na matu pru sa wa magang nga yang, masha langai mi shi kaw gat sa du nna, shi a man e hput di let, “Mai kaja ai Sara e n htum n wai asak lu la hkra, ngai hpa mi galaw na rai ta?,” ngu nna shi hpe san wu ai,

KASA 20:32

“Ya ngai gaw nanhte hpe Karai Kasang a lata hta mung, chyeju hte seng ai dai Kabu Gara Shiga a lahku lamai ai lata hta mung, ap da masa de ai. Dai Kabu Gara Shiga gaw Madu a amyu masha ni yawng a matu mazing da ai shaman chyeju nlang hte hpe nanhte e hkam la shangun na ra ai.

KASA 26:18

Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

ROMA 8:17

Anhte gaw shi a kashu kasha ni rai nga ga yang gaw shi a amyu masha ni a matu san da ai sali wunli ni hpe anhte hkam la na ga ai. Hkristu a matu Karai Kasang san da ai hpung shingkang hpe mung anhte hkam la lu na ga ai, hpa majaw nga yang anhte gaw Hkristu hte rau nni nkri hkrum nga ga yang, shi hte rau hpung shingkang hpe mung anhte hkam la na rai nga ga ai.

1 KORINHTU 9:25

Shingjawng poi shang na matu shaman ai ginsup ninghkrin shagu gaw, ja ai hkan sa tara ni hpe hkan sa shatup ma ai. Dai masha ni shing rai galaw ai gaw hten mat chye ai nampan shanghkawng janmau lu la na matu rai nga ai. Anhte chyawm gaw htani htana n hten n mat chye ai janmau lu la na matu shakut sharang ga ai.

GALATI 3:18

Hpa majaw nga yang, Karai Kasang a chyeju sali wunli gaw dai jep ai Tara hta madung tai nga ai rai yang gaw, dai chyeju sali wunli gaw shi a ga ndat hte hpa n seng mat sai. Rai ti mung Karai Kasang gaw ga ndat a majaw Abraham hpe dai chyeju sali wunli jaw da nu ai.

EHPESU 1:11

Yawng mayawng hte chyawm gaw, Karai Kasang a yaw shada da ai lam hte myit daw dan da sai hku hte maren byin wa sai; bai nna shi a shawng npawt kaw nna daw dan sai lam hta npawt shatai nhtawm Hkristu hta langai sha rai nga ga ai a marang e shi a shatawng shada ai hku nna anhte hpe shi a amyu masha ni tai na matu lata san da mani ai.

EHPESU 1:14

Dai Wenyi jaw ya ai lam gaw, Karai Kasang shi a amyu masha ni hpe hkam la shangun na ga ndat tawn da sai sali wunli anhte hkam la lu na ra ai hpe pahkam hkam ya ai lam rai nga ai. Dai gaw Karai Kasang shi a amyu masha ni hpe yubak mara kaw nna tsep kawp shalawt dat na ra ai lam anhte hpe myit mu myit hkut shangun nga ai. Anhte gaw shi a hpung shingkang hpe shakawn kungdawn nga ga law.

EHPESU 1:18

Madu gaw nanhte hpe hpa baw myit mada ai lam hta shaga la sai hpe mung Madu a amyu masha ni hpe ndat da ai mauhpa chyeju sali wunli ni gaw, kade wa n taw n tsang rai nga ai hpe mung,

KOLOSE 1:12

Dai hta kaga, nhtoi a mungdan hta rawng nga ai shi a chyoi pra ai ni a matu mara Karai Kasang san tawn da ai sali wunli ni hpe nanhte hkan dagraw la ging ai ni tai wa shangun ai Karai Kasang a chyeju hpe kabu gara shakawn kungdawn nga mu ga law.

KOLOSE 1:5

Dai teng man ai mungga ngu ai Kabu Gara Shiga nanhte kaw shawng du dep sa wa ai shaloi, nanhte gaw dai Kabu Gara Shiga e jaw ya ai myit mada ai lam hpe na yu manit dai. (Dai rai nna nanhte a makam masham hte tsaw ra ai lam gaw sumsing lamu e nanhte a matu kyem da ya ai myit mada ai lam hta npawt jung nga ai.)

KOLOSE 3:24

Karai Kasang gaw shi a amyu masha ni hpe ga ndat tawn da ai shaman chyeju sali wunli hpe nanhte hkam la na rai nga myit dai hpe galoi mung adum nga mu. Hpa majaw nga yang, Hkristu chyawm gaw nanhte daw jau nga ai Madu majing rai nga ai.

2 TIMOHTI 4:8

Ya kaw nna ding hpring ai tara agyi ngu ai dai Madu gaw, tara jeyang ai Nhtoi hta ngai hpe jaw na rai nga ai dai ding hpring ai asak hkrung lam hte seng ai awng padang janmau hpe nye a matu mazing da nu ai. Ngai hpe sha n rai, shi bai du na nhtoi hpe ra sharawng let ala nga ai ni nlang hpe mung ap ya na ra ai.

HEBRE 10:34

Nanhte gaw bawng dung ai ni hkrum ai nni nkri hpe hkap shalan shabran lawm myit dai; nanhte a arung arai ni hpe kashun kashe di la kau hkrum ai shaloi mung kabu gara ai hte asum hkam myit dai, hpa majaw nga yang, grau nna kaja reng ai dinggrin anga nga ai arung arai lama mi nanhte naw lu nga myit dai hpe nanhte chye nga myit dai.

HEBRE 9:15

Ndai lam a majaw Karai Kasang e shaga la hkrum ai ni gaw Karai Kasang ga sadi jaw da sai htani htana shaman chyeju sali wunli hkam la lu mu ga nga, Hkristu gaw ga shaka ningnan hpe lajang ya sai. Shing rai hkam la na ahkaw ahkang lu la ai lam gaw, shawng na ga shaka kata e nga ai shaloi shut hpyit tawt lai kau ai yubak mara ni kaw na shalawt dat na matu si hkam ai lam langai mi byin pru wa sai majaw rai nga ai.

YAKU 1:11

Ajan gaw shi a kang kahtet ai hte rawt wa nna nampan hpun hkru hkraw mat ai. Nampan pu mung run hkrat mat ai hte de a tsawm htap ai gaw hten mat wa ai. Dai hte maren lu su ai wa gaw shi a magam bungli shachyen nga yang hten byak nna wai mat na ra ai.

1 PETRU 3:9

N hkru n kaja ai hpe n hkru n kaja ai hte, matsa mawa dagam dala ga hpe matsa mawa dagam dala ga hte, bai hkum tai htang nga myit; shing rai na malai; shaman ya ai ga htang jaw mu; hpa majaw nga yang, dai shaman ga gaw shi nanhte hpe shaga la ai shaloi nanhte hpe jaw na matu ga sadi jaw da sai rai nga ai.

1 PETRU 5:4

Dai Sagu Rem Agyi Kaba Wa dan pru ai shaloi nanhte gaw htoi kabrim ai nsam galoi mung n mat chye ai arawng sadang hte hpring ai janmau lu la na marin dai.

SHINGRAN 21:27

Rai ti mung, awu asin re ai hpa mung dai mare de shang lu na n rai. Matsat shabat awu asin amu galaw ai wa, masu magaw lam hkan ai wa mung dai mare hta galoi mung shang lu na n rai. Sagu Kasha a asak laika hta amying ka lawm ai ni chyu sha dai mare hta shang lu na mara ai.