1 KORINHTU 6:9 - Jinghpaw Common Language Bible 2009

⁹ N hkru n kaja ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit; hpye ai amu galaw ai ni, gawkngu sumla nawku ai ni, num shaw ai ni, la shada tam ai ni,

Jinghpaw Hanson Version Bible

⁹ N ding n man ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit: hpye ai amu galaw ai ni mung, gawngngu sumla nawku ai ni mung, num shaw ai ni mung, ngang ai ni mung, la shada tam ai ni mung,

1 KORINHTU 6:9 ပူးပေါင်းရင်းမြစ်များ

NINGPAWT NINGHPANG 19:5

Lawt hpe shanhte shaga shapraw la nhtawm, “Dai na nang hte rau nga na matu du sa ai yan gaw kanang rai nga ma ta? Shan hpe anhte hpang de shapraw ya mi!,” ngu nna san mu ai. Sodom mare na lasha nlang ni mahtang shan hte kanawn mayu nga ma ai.

PRU MAT 23:1

“N teng n man ai shiga hkum htawn shamawng et; mara kap ai wa hpe n teng n man ai sakse hkam nna hkum karum la et.

GA SHAGAWP 11:1

Dai Madu gaw n teng n man ai joi jang lang ai ni hpe n ju n dawng nga ai. Shi gaw teng man ai joi si ni hta kabu gara nga ai.

GA SHAGAWP 22:8

N teng n man ai atum hpe nang hkai da ai rai yang, tsin-yam tsin dam tu pru wa nna kaga masha ni hpe dip gamyet sha ai lam hkoi mat na ra ai.

GA SHAGAWP 7:27

Nang lama, dai num a nta de sa wa ai rai yang nang gaw katsan ga de hkawm sa nga ai wa rai nga ndai; dai gaw Si du hpang de hkrang ai dingtawk lam rai nga ai.

ESAIA 55:7

N hkru ai ni gaw shanhte a asak hkrun lam hpe kau da nna shanhte a myit mang ai lam galai shai kau nga mu ga. Shanhte gaw dai Madu anhte a Karai Kasang hpang de kayin wa mu ga; shi gaw matsan dum chye ai wa rai nna mara raw dat ya na matu lawan nga ai.

EZEKELA 18:11

Shi gaw hkum da ai hkungri ni hta nawng jau da ai shagu hkungga shan sha ai hte kaga masha jan ni hpe mung hkan shaw nga ai.

JAW JAU 18:20

Nang hpe awu asin di shangun mai ai dai kaga masha wa a madu jan hte hkum kanawn et.

JAW JAU 18:22

Lasha kadai mung shada da kanawn lu na n rai; dai hpe Karai Kasang n dawng nga ai.

JAW JAU 19:15

“Tara shang amu ni tsun daw dan myit dai shaloi, myit malang ai hte teng man ai hku hparan ya na rai myit dai; matsan ai wa hpe n maga, lu su ai wa hpe mung n mada ai sha daw dan na rai myit dai.

JAW JAU 20:13

Lasha shada da kanawn ai rai yang, shan gaw matsat shabat amu galaw kau nga ma ai majaw shan lahkawng sat kau ai hkrum na rai ma ai.

ZEHKARIA 5:3

Dai hpang, shi gaw ngai hpe, “Dai ntsa hta mungdan ting de bra nga ai dagam dala lam ka da nga ai. Dai laika katsu a man maga mi hta lagut shagu hte gaw dai mungdan kaw nna seng kau ai hkrum na rai nga ai ngu nna tsun da nga ai. Bai kaga maga de gaw dagam da sai rai tim masu magaw ga naw tsun ai ni langai hte langai la kau ai hkrum na rai nga ai nga nna tsun da nga ai.

MAHTE 19:29

Nye a majaw nta ni, kahpu kanau ni, kajan ni, kanu kawa, kashu kasha ni hte yi hkauna ni hpe kau da ai wa kadai rai ti mung, htam latsa n ga akyu lu la nna htani htana asak a sali wunli hkam la na ru ai.

MAHTE 25:34

Shaloi dai Hkawhkam wa gaw, shi a hkra maga de nga ai ni hpe, ‘Nye a Wa kaw na shaman ya ai lu la ai ni e! Sa marit! Ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu.

LUKA 21:8

Yesu gaw, “Nanhte hkalem masu kau ai n hkrum myit ga, sadi nga mu, hpa majaw nga yang, masha law law wa nye a mying hte paw pru nna, ‘Ngai gaw shi rai nngai; Jahtum nhtoi du ra ai; nga nna tsun na mara ai. Shanhte a hpang hkum hkan nang myit.

KASA 20:32

“Ya ngai gaw nanhte hpe Karai Kasang a lata hta mung, chyeju hte seng ai dai Kabu Gara Shiga a lahku lamai ai lata hta mung, ap da masa de ai. Dai Kabu Gara Shiga gaw Madu a amyu masha ni yawng a matu mazing da ai shaman chyeju nlang hte hpe nanhte e hkam la shangun na ra ai.

KASA 24:25

Rai ti mung Pawlu gaw ding hpring ai lam, tinang hkum hkang ai lam hte du magang ra ai tara daw dan ai nhtoi a lam hkaw tsun dan ai shaloi Hpilik hkrit kajawng nna, “Ya nang naw wa su, ngai rau jang she ngai nang hpe bai shaga na de ai,” ngu wu ai.

ROMA 1:18

Shinggyim masha a shut hpyit mara gaw dai teng man ai lam hpe masha ni n chye hkra pat shingdang nhtawm n hkru n kaja ai amu hpe galaw shangun nga ai karai kata ai masha ni yawng a ntsa de, Karai Kasang a masin pawt ai myit gaw sumsing lamu de nna dan pru ra ai.

1 KORINHTU 15:33

Nanhte lam hkum dam myit, “N kaja ai kanawn manang ni gaw kaja ai arawn alai hpe jahten ma ai.”

1 KORINHTU 15:50

Hpu nau ni e, ngai nanhte hpe tsun mayu ai lam gaw, asai yan ashan hte rai nga ai masha gaw, Karai Kasang a mungdan a sali wunli n dagraw la lu ai hte hten mat chye ai gaw n hten n mat chye ai sali wunli hpe madu lu na n rai.

1 KORINHTU 3:16

Nanhte gaw Karai Kasang a nawku htingnu rai nga nna, Karai Kasang a Wenyi gaw nanhte hta e rawng nga ai hpe nanhte kaja wa chye nga myit dai!

1 KORINHTU 5:1

Ya Hkristan n re ai maigan masha ni pyi n hkan galaw ai hkrithpa num la nse nsa lam nanhte hta nga nga ai lam masha ni hkrak tsun kajai nga ma ai hpe ngai na lu nngai. Masha langai mi gaw shi a hpang kanu hte rau nga sha nga ai lam ngai na lu nngai.

1 KORINHTU 5:10

Shing rai htet dat ai hta, ndai mungkan ga na hpye ai amu galaw ai ni, nammak lawhpa ai ni, lagu lagut ni, gawkngu sumla nawku ai ni hte n kanawn lu na rai myit dai ngu nna ngai n tsun mayu nngai. Shanhte hpe koi kau lu na nga yang gaw, nanhte ndai mungkan ga na tsep kawp pru mat wa ra na sha rai nga ai.

1 KORINHTU 5:11

Ya ngai ngu mayu ai gaw, tinang hkum hpe Hkristan hpu nau wa rai nga nngai nga nhtawm me, hpye ai lam hkan ai, nammak lawhpa ai, gawkngu sumla naw ai, shatan nhkan ai; chyaru ya tai ai hte lagu lagut re ai ni hte n kanawn lu na hta n ga, shing re ai wa hte rau dung nna pyi n jawm lu n jawm sha lu na, ngu ai lam rai nga ai.

1 KORINHTU 6:10

lagu lagut galaw ai ni, nammak lawhpa ai ni, chyaru ya shang ai ni, shatan nhkan ai ni, kashun kashe rai jahkrit shagyeng sha ai ni, Karai Kasang a mungdan a sali wunli hpe hkam la lu na ma ai n rai.

1 KORINHTU 6:18

Hpye ai amu hpe koi gam nga mu: masha e tawt lai ai yubak mara yawng mayawng gaw tinang hkum hkrang a mai kaja ai lam hpe n hkra ya lu nga ai; rai ti mung hpye ai amu hta mara kap ai wa gaw, shi a hkum hkrang hpe nan shut hpyit da wu ai.

1 KORINHTU 6:19

Nanhte a hkum hkrang gaw, nanhte hta rawng nga ai Karai Kasang jaw ya ai dai Chyoi pra ai Wenyi a htingnu rai nga ai hpe, nanhte n chye myit ni? Nanhte gaw nanhte a hkum hpe up madu lu myit dai n rai, Karai Kasang chyu sha madu rai nga ai.

1 KORINHTU 9:24

Gat shingjawng ai shara e yawng mayawng gat ma ti mung, marai langai wa chyu sha dang ai kumhpa lu la nga ai hpe nanhte kaja wa chye nga myit dai. Dai rai nna, nanhte dang ai kumhpa lu la hkra gat shingjawng nga mu.

2 KORINHTU 12:21

Nanhte hpang de ngai bai du ai shaloi Karai Kasang gaw ngai hpe nanhte a man e shagrit kau ai hkrum shangun na hpe ngai tsang nngai. Ya du hkra pyi myit malai n lu ai sha arawn alai hten nna ngang kayut ai hte nse nsa lam hkan nga ai ni law law a majaw, ngai hkrap myi prwi pru na hpe tsang nga nngai.

GALATI 6:7

Nanhte gaw tinang hkum hpe hkalem nna lam hkum dam myit; Karai Kasang hpe kadai mung n sawn n sang di lu na n rai. Masha gaw tinang gat hkai ai hte maren dan la na ra ai.

TARA JAHPRANG 22:22

Kaga dinghku num langai mi hte shut hkat ai la wa hpe rim hkrum ai rai yang, shan lahkawng sat kau ai hkrum na rai ma ai. Ndai hku nna dai n shawp n kap ai amu hpe nanhte yeng seng kau lu na rai myit dai.

TARA JAHPRANG 22:5

“Numsha gaw lasha a hpun palawng bu hpun lu na n rai; lasha mung numsha hpun palawng bu hpun lu na n rai. Shing rai galaw ai amyu masha ni hpe dai Madu nanhte a Karai Kasang n dawng nga ai.

TARA JAHPRANG 23:17

“Israela numsha lasha kadai mung htingnu shawa num shawa la tai lu na ma ai n rai.

KOLOSE 3:5

Dai re ai majaw anhte a kata e amu galaw nga ai mungkan ga a ra marin ai myit ni, hpye ai amu, n tsawm n htap awu asin re ai amu, ngang kayut ai, n hkru n hkra re ai marin marit ai hte lawhpa ai (lawhpa ai gaw gawkngu naw ai amyu mi rai nga ai.) lam re ai ni hpe nanhte sat kau lu na rai myit dai.

HEBRE 12:14

Masha shagu hte ngwi pyaw ai hku nga lu hkra mung, chyoi pra ai asak hkrung lam hpe lu la hkra mung, tam shakut nga mu. Hpa majaw nga yang, dai zawn re ai asak hkrung lam hte n rai yang kadai mung dai Madu hpe mu lu na n rai.

HEBRE 12:16

Lai kyang n kaja nna wenyi makam masham n rawng ai hte shat ma mi a matu sha shi a hpu lat aya dut sha kau ai Esaw zawn, nanhte kadai hta mung n byin u ga, sadi nga mu.

HEBRE 13:4

Hkungran ai lam hpe masha yawng mayawng hkungga shagrau lu na rai myit dai hte madu wa madu jan shada da a ntsa e sadi dung nga lu na rai myit dai; Karai Kasang gaw arawn alai hten ai ni hte num shaw la shaw ai ni hpe jeyang na ra ai.

YAKU 1:16

Tsaw ra ai hpu nau ni e, hkalem hkalau ai ni a majaw lam hkum dam myit!

1 YAWHAN 3:7

Shu sha ni e, kadai mung nanhte hpe lam n shadam myit ga; Hkristu gaw ding hpring nga ai hte maren, ding hpring ai amu galaw ai wa kadai rai ti mung ding hpring nga ai.

SHINGRAN 21:8

Rai ti mung, hkrit ai myit rawng ai ni, n kam n sham nna sadi n dung ai ni, n hkru n kaja matsat shabat re ai ni, masha sat ai ni, hpye ai amu galaw ai ni, mandan lakle galaw ai ni, sumla nawku ai ni hte, masu magaw ga tsun ai ni yawng hte gaw, wan hte kan grung ai nawng hta ari hkrum lu na mara ai: dai gaw lahkawng lang na si ai lam rai nga ai, nga nna ngai hpe tsun ai.

SHINGRAN 22:15

Rai ti mung, masha zawn pyi n rai hkra n hkru n kaja ai ni, mandan lakle galaw ai ni, hpye ai amu galaw ai ni, masha sat ai ni, sumla nawku ai ni hte masu magaw lam sharawng awng let hkan galaw ai ni yawng hte gaw, mare shinggan e nga lu na mara ai nga nna ngai hpe tsun nngai.

TARA AGYI 19:22

Shanhte gaw apyaw sha nga nga ma yang, dai mare na n hkru n hkra ngang gayut ai masha nkau mi gaw dai hpe sa wang nhtawm nta chyinghka ni hpe sa adup hpang ma ai. Shanhte gaw dai dingla wa hpe, “Nang hte rau nta de shang wa sai masha wa hpe shapraw ya mi! Anhte shi hte nga sha mayu ga ai!,” ngu nna tsun ma ai.