Nya-mangaji Mirningiya Jujiba 41:54 - Yanyuwa

⁵⁴ Jinangu barra lhabayi wardi ka-wunumbarrirri, nya-mangaji wardi lhabayi ngaliwa wirndajku awara. Jinangu barra maya awara Yijiba lukuluku, kurdardi barra mu-ngarranku, wiji ku-wayarri. Baji barra ki-mayangka lukuluku Yijiba, wardi lhabayi barra ka-arri marda, barra kurdardi ku-yirdardinma ma-ngarra kangka wardi lhabayi, winarrku barra kalu-arri wirndajku. Ngala arrkula awara barra, baji barra Yijiba barra, ku-arri ma-ngarra aluwa, wudurru ka-arri baji arndaarnda rdarlbu.

Nya-mangaji Mirningiya Jujiba 41:54 ပူးပေါင်းရင်းမြစ်များ

Nya-mangaji Mirningiya Jujiba 41:27

Kulu rra-ja rra-kawurna rra-ngulakaringu ka-mawuranganhu rra-wardi rra-ngurlingurli kulu ma-ja mili ma-ngulakaringu ma-ngarra ma-wardi ma-rukarra, kurdardi kalngi ku-yirdardinma nu-manka, ma-ja ma-kanymarda kulu ma-kanymarda kulu ma-kanymarda arrkula, jinangu barra ngulakari kurdardi ki-lhabayiyu, marnarnaji barra ngulakari kalngiya narnu-wirndajku.

Nya-mangaji Mirningiya Jujiba 41:30

Ngala bajarnaji ngulakari kinyu-mawuranganhu kanymarda kulu kanymarda kulu kanymarda arrkul wardi lhabayi kiwa-nmala, kurdardi ka-yirdardirru wudurru ki-lhabayila nyungku-ja ngulakari, kalngi wirndajku barra kiwa-nmala awara, rukarra awara kiwa-nmala, kurdardi ki-wabudawu. Kulu li-wulu, kalu-murdirrila barra awara mu-ja barra mu-ngarranku ambuliyalu wumba ma-jakarda.

Nya-mangaji Mirningiya Jujiba 41:53

Nya-mangaji barra lhabayi yabi, kanymarda kulu kanymarda kulu kanymarda arrkula, ka-wayarri barra, barranamba ka-wukanyi Jujiba ambuliyalu yiku ki-king.

Nya-mangaji Mirningiya Jujiba 42:2

Nganhirra-nykarriya! Karna-nykarri awara jinangu Yijiba, bajawu barra ma-jakarda ma-ngarra. Aya kirru-wingkala bajinju, kirru-lhakanbala rdumanthalu ngambalanga. Marnaji marnaji kambalamba-mirranma wirndajku. Kirru-wingkala rdumanthalu ngambalanga wudurru, ngambala anmanthawu li-lhungku.”

Nya-mangaji Mirningiya Jujiba 43:1

Baku barra kalu-arri bajingulaji ki-awarala Kinin. Kulu mili yurrulu kurdardi kiwa-nbanma wabuda, kulu mili yurrulu ka-rukurri awara, kalngiya narnu-wirndajku...i narnu-walkurra narnu-wirndajku barra.

Nya-mangaji Mirningiya Jujiba 45:11

“Kulu yiwa baji barra Kujin, ngarna barra wudurrumanthawu wunumbarra likili-nganji. Baku barra yurrulu mili kanymarda kulu kanymarda kulu arrkula kiwa-nmala awara kurdardi lhabayiyu. Kalirna-wudurrumanthanama kulu kurdardi yiwa kulu likili-nganji anmanthawu wirndajku, marda nyiku yumbulyumbumantha buluki, jibi, kurdardi anmanthawu wirndajku,” nganinya ka-arri.

Nya-mangaji Mirningiya Jujiba 47:13

Bajingu barra ku-wayarri mili yurrulu barra ma-ngarra lukuluku nyungku-mangaji ki-awarala, wiji bawuji kalu-arri wirndajku, waraba wudurruwu. Kulu li-wulu, li-jibiya baji Yijiba kulu li-mangaji li-jibiya Kinin, wiji bawuji kalu-arrkama nalu-manka wirndajku.