Hechos 16:18 - Jakalteko

¹⁸ Caw txꞌiꞌal tzꞌayic yal ix hacaꞌ tuꞌ, caw xin tibayo yu naj Pablo yaben tzet chal ix, yuxin meltzo naj, yoc tꞌan̈no naj yin̈ ix, yalni naj tet ischejab naj matzwalil ayco yin̈ ix hacaꞌ tiꞌ: —Yin̈ isbi Comam Jesucristo chiwalan tawet, elan̈ yin̈ ix tiꞌ, ẍi naj Pablo. Yet yaben ischejab naj matzwalil yalni naj Pablo huneꞌ tuꞌ, yelcano naj yin̈ ix.

Hechos 16:18 ပူးပေါင်းရင်းမြစ်များ

San Mateo 14:24

Wal ebnaj iscuywom Comam nahatxa chito ebnaj yiban̈ haꞌ lago tuꞌ, yaj xin ay huneꞌ niman jakꞌekꞌ chimakꞌnican̈ ha haꞌ sata teꞌ barco tuꞌ.

San Marcos 1:34

Caw txꞌiꞌal anma nananta yabil ayco yin̈ cawxicanocan̈ yu Comam, txꞌiꞌalpaxo xin anma el ischejab naj matzwalil yin̈. Machi xin ischah Comam tzotelo ebnaj ischejab naj matzwalil tuꞌ, yun̈e mach chalilo ebnaj mac anmahil Comam.

San Marcos 16:17

Haꞌ huntekꞌan cꞌaybalcꞌule tiꞌ chioc yechelo tet mac chianayto yul yanma, chiyilo ebnaj ischejab naj matzwalil yin̈ anma yin̈ inbihan, cat istzotel ebnaj yin̈ nan abxubal.

San Lucas 9:1

Yet hunel, yawte Comam Jesús ebnaj cablahon̈wan̈ iscuywom iscꞌatan̈. Yakꞌnicano Comam ishelanil yeb yip ebnaj yinilo sunil ischejab naj matzwalil yin̈ anma, yebpaxo xin yakꞌni cawxo ebnaj anma yin̈ tzettaj yabil ayco yin̈.

Hechos 3:6

Yalni naj Pedro: —Wal hanintiꞌan, mach inmelyuhan, yaj wal huneꞌ ikꞌbil wuhan chiwakꞌan tawet. Yu yip Comam Jesucristo ah con̈ob Nazaret, ahan̈wanoj cat xin habelwi, ẍi naj Pedro tuꞌ tet naj.

Hechos 9:34

Yalni naj Pedro tuꞌ tet naj: —Eneas, Comam Jesucristo chaẍakꞌni cawxoj, yuxin ahan̈wano tinan̈, ican̈ hawaybal tiꞌ, ẍi naj Pedro tuꞌ tet naj. Hac tuꞌ xin yu yahwano naj.

Colosenses 2:15

Hayet iscam Comam Jesucristo yin̈ culus tuꞌ xin, yakꞌni aycꞌayo Comam huntekꞌan yahawil yeco yu naj matzwalil. Isyenicanilo Comam yin̈ sat anma tato elcano ispixan huntekꞌan tuꞌ yin̈ huneln̈e. Hac tuꞌ yu isyenilo Comam tato kꞌoji Comam yin̈ naj matzwalil.