Korito daidi 6:9 - Deoso-ka Yama Hani

⁹ Mai ihi amosara dai‑ya keyehe‑ya mai hirikariyahi. Mai fanawi one‑ya mai aha, mai one‑ka yibote mai‑ya mai aha, maki hini hinama mai ibi aha, mai fanawi hini hinama ibi nokotonihi na, deoso bare‑ya mai kahiyara, Deoso tabaro‑ya mai winateraboneni.

Korito daidi 6:9 ပူးပေါင်းရင်းမြစ်များ

Mateo 19:29

Owati dai mitahi. Owati‑ya mai tokadaba ihi mai‑ka yama nafi‑ya mai tonawadakosa, mai ihi manakone wadaboneni. Mai‑ka yobe, mai‑ka fadara, mai‑ka ayo, mai‑ka asima, mai‑ka abi, mai‑ka ami, mai‑ka madehe, mai na, mai tonokosa, mai manakone amosa‑ya mai kayafaboneni. Mai manakone fiyakanaboneni. Makobote mai abateraboneni.

Mateo 25:34

Hidi webote‑ka kanika‑ya mai naha mai‑ya hiyarebona, ‘Okobi dai‑ya nofi nafine, dai nafi‑ka hidi kitabote ohawaha, owa‑ya dai sawiwahaboneni. Hibati‑ya yama nafi‑ya wamani awisareya, dai‑ya okayawamaroni.

Roka 21:8

“Dai noko wadahi. Dai‑ya mai keyeheriyahi. ‘Deoso‑ka Ka‑kadika ama·oni. Yama yana kanibote naboneni.’ Mai dama mai ati naboneni. Mai ati dai tokadabariyahi.

Yeso‑ka yo‑yose mai tamine 20:32

Deoso dai‑ya nawada, dai‑ya kasoma nebona owatibodi ati nineni. Deoso‑ka yama hani dai kadikiya, dai habo kitawahaboneni. Deoso tabaro‑ya, dai kobona, dai nafi‑ya Deoso hika yama‑ya daanebonane.

Yeso‑ka yo‑yose mai tamine 24:25

“Yeso ati ai nofiya, ai ene amosa, Yeso ati‑nima ai naboneni. Makobote ai ene‑ya Deoso kadikebonane.” Baoro ati ne. Ati ene Feri habo siitone, “Tikamahi. Tiwati omitamatasaba awineni.” Feri ati nane.

Homa 1:18

Ai one mai tamine okanahanaboneni. Mai ihi amosarihi, Deoso ati miti‑ya mai nofarihi, mai ati ihi mai one Deoso ati‑ya mitarihi, Deoso ene‑ya mai awa, Deoso‑ya mai watorihi, mai na, mai ihi amosara. Neme‑ya mai ihi‑ya Deoso awe, Deoso yawe‑ya mai awawahaboneni.

Korito daidi 15:33

Dai noko wadahi. Mai ihi amosara mai‑ya dai daba, dai ene amosaraboneni.

Korito daidi 15:50

Soho, dai okanawatabone, owati dai mitahi. Bofe‑ke abano ai weyeniya, neme‑ya ai tokaraboneni. Bofe‑ke abano fawaneya, neme‑ke abano ai weyeniya, neme‑ya ai tokaboneni. Neme‑ke Hidi Deoso tohe, yama ababone neme‑ya koboteraboneni. Ai abano neme‑ke abaterebonane.

Korito daidi 3:16

Deoso‑ka yobe dai toha, Deoso‑ka Doni dai‑ya sawi dai watokarini?

Korito daidi 5:1

Dai‑ka owa Yeso ati‑ya nofe‑mona ati ne, badi fadi‑ya famawahemonane. Yeso ati‑ya ai nofa haa‑nima ai ene terani. Bara Yeso tamine‑ya mai watora, haa‑nima mai ihi terani.

Korito daidi 5:10

Deoso ati‑ya mai nofara mai tamine‑ya owati toharani. Deoso ati‑ya mai ati nofa mai tamine‑ya owati tohabisani. Deoso ati‑ya mai nofara mai ihi amosara. Mai one‑ya mai nokotonihi, mai one‑ka yama‑ya mai kayafa, yama‑ya mai boti mai na, deoso bare‑ya mai kahiyara teni. Fara yama nafi‑nima mai nawaare, mai tabori yakari‑ya ai sawi nofara‑mani, bofe‑ya ai winara neni.

Korito daidi 5:11

Yeso ati‑ya mai nofa‑mone mai ati na, mai ihi amosara, dai yorotokana, Deoso dai hiyarabone, dai‑ya mai dabarihi. Mai fanawi one‑ya mai a‑aha, mai makidi one‑ka mai a‑aha, kawi ihi mai towe toha, mai one‑ka yama‑ya mai kayafa, mai one tamine‑mone‑ya keyehe‑ya mai hiri, deoso bare‑ya mai ka‑kahiyara, yama‑ya mai boti mai na, dai‑ya mai dabarihi, mai tabori‑ya dai tafarihi nahi.

Korito daidi 6:10

Yama‑ya mai bo‑boti mai toha, hini mai‑ka yama‑mone‑ya mai ibi to‑tokatowe mai toha, kawi‑ya mai no‑nokotoni mai toha, mai one tamine‑mone‑ya keyehe‑ya mai hi‑hiri mai toha, mai na, Deoso tabaro‑ya mai winateraboneni.

Korito daidi 6:18

Fana one‑ya tiwati aha, kanatibisahi, tiaharabonehe. Ai ene amosara ai‑ya nakoma, fana one ai aha, ai kobobona mai tohawaha, mai ihi towe ai kayafateni.

Korito daidi 6:19

Ai abano Deoso‑ka Doni tabaro toha, ai‑ya Deoso hika Doni‑ya nawine, tika hidi tihara, Deoso tika hidi tohabisane.

Korito daidi 9:24

Mai ibi kanakanabone mai nafi kanani toka, ohari koboni dai tohe, mai ati‑nima ne kanane, hini kanani manakone‑ya kayafebonane. Dai‑ta Deoso tabaro‑ya dai tokabone, Deoso ati dai tokadabiya, dai manakone amosa‑ya dai kayafaboneni.

Korito yoto‑ke 12:21

Dai tabaro‑ya kobo·oniya, dai ene amosara, dai tamine‑ya Deoso‑ya dai kaminara, dai ene oyawa, ohi·ona, Deoso owa‑ya weeneba awane. Dai owa‑ka yobote‑ya dai owa aha, mai fanawi one‑ka yibote‑ya mai one dakora namone, dai ene owatibodi komene kitaboneni.

Karatiya 6:7

Dai‑ya keyehe‑ya dai hirikariyahi. Yamata ai kama, yana hini hini‑nima namatasateni. Fara‑nima hini ai ene‑nima ai manakone naboneni. Deoso‑ya keyehe‑ya ai hirina, ai ati‑ya Deoso nofaterebonane. Ai ene amosa, ai manakone amosabisaboneni. Ai ene amosara, ai manakone amosaraboneni.

Koroso 3:5

Dai atibodi bote dai‑ya keyehe, ati dai nanahabahi. Mai fanawi one‑ya dai aharihi, mai makidi one‑ya mai fanawi dakorarihi. Mai tamine‑ya dai atibodi kadikarihi. Mai one‑ka yama‑ya dai nokotonirihi. Mai‑ka yama‑ya dai nokotoniya, deoso bare‑ya dai kahiyara‑nima dai nineni.

Ebereo 12:14

Mai ibi weena, mai dai kasomahi, mai ibi weerabonehe. Yama amosa dai ene‑bone dai nokotonihi. Ai ene amosara, Deoso‑ya ai awateraboneni.

Ebereo 12:16

Dai ene amosahi. Dai‑ka yibote ohare‑ya dai famabisahi. Fana one‑ya dai famamakiriyahi. I‑di Esa‑nima dai riyahi. Deoso‑ka ka‑kasoma‑ya i‑di Esa nokotonire, sohori tefe bidi‑ya kanikebona, Deoso‑ka ka‑kasoma‑ya daanematane.

Ebereo 13:4

Dai‑ka yibote‑ya dai fami ohare, mai one‑ya dai dakorariyahi. Mai one‑ya dai dakoriya, dai ene‑ya Deoso aweya, dai manakone wadaboneni. Dai manakone amosara, dai nofaraboneni.

Tiyako 1:16

Soho, dai onofa, dai atibodi bote keyehe‑ya dai‑ya hirikana, ati dai tokadabariyahi.

Yowaho daidi 3:7

Oka dai toha, owati dai mitahi. Oka dao dai toha, dai‑ya keyehe‑ya mai hirikariyahi. Dai ene amosa, Yeso‑ka dai tohani. Yeso ene amose, Yeso ene‑nima mai ihi na, Yeso‑ka mai tohateni.

Yeso Kirisito ene‑bona 21:8

Mai habi siitona ihi oka hawi‑ya mai sawira mai toha, owati‑ya mai tokadabara mai toha, mai ihi towe mai toha, mai one‑ya mai nanahaba mai toha, mai si‑siwa mai toha, madi mai‑ya mai ha‑haa mai toha, deoso bara mai‑ya mai ka‑kahiyara mai toha, keyehe‑ya mai hi‑hiri mai toha, mai na, wara hirini yati hirini sawi‑kaya mai sawibisaboneni. Mai abi oharimatasa‑nima mai na, mai kome fawaraboneni.” Hidi Webote ati nene.

Yeso Kirisito ene‑bona 22:15

Mai ihi towe mai toha, madi towe mai‑ya mai ha‑haa mai toha, mai si‑siwa mai toha, ai one‑ya mai na‑nanahaba mai toha, deoso bara mai‑ya mai ka‑kahiyara mai toha, keyehe‑ya mai no‑nofa mai toha, keyehe‑ya mai hi‑hiri mai toha, mai na, sidadi‑ya mai tokiyomateraboneni.